Lipoti a Ē Faalauiloa le Malo

E Lē Faailoga Tagata le Atua

E SILI atu i le 1,900 tausaga ua mavae, na molimau atu ai le aposetolo o Peteru i se taitaiau o Konelio, i le faapea atu: “E moni, ua ou iloa e le faailogaina tagata e le Atua; ae peitai o le mataʻu ia te ia i nuu uma lava, ma fai le amiotonu ua talia i latou e ia.” (Galuega 10:34, 35) Sa faaalia e Konelio se mataʻu i le Atua ma le alofa i le amiotonu. Sa ia talia le molimau na tuuina atu e Peteru, ma na avea ai ma Kerisiano.

Ua faapena foi ona moni o lea lava mataupu silisili i aso nei—e lē faailogaina tagata e le Atua. Ua tatou matauina lenei mai se mea na tupu i Siamani. Ua faapea mai le lipoti:

“I le oganuu a la matou faapotopotoga, e iai se nofoaga e matuā telē o le fitafita a Rusia. I le 1989, e leʻi umi lava talu ona masofa i lalo le pa o Perelini, sa fesili mai ai le au toeaina pe iai nisi o le au talaʻi e mafai ona tautatala ma malamalama i le gagana Rusia. O nisi o i matou sa iloa, ma na matou ō atu loa e galulue ai i lenei oganuu, lea na faamaonia le avea ma olioli moni. O se tasi la lenei o tala mai le tele o mea na tutupu.

“O aʻu sa ma paga ma se tagata talaʻi e leʻi papatisoina (o lē ua papatisoina nei talu mai lena taimi) ina ua ma talanoa atu i se taʻitaʻi o le vaegaau. Sa faalogologo le taitaiau po o le ā le mea lea ma te fai atu ai, ma i lea, na valaaulia i maʻua e talanoa atu i ana fitafita. Sa faapea mai o ia, e tatau ona latou faalogo e uiga i le Atua faapea foi ma le Tusi Paia, o lea na faia ai sa matou tuutuuga ma te toe foi atu.

“Na ma talosaga atu i se tuafafine e lelei tele lana tautala i le gagana Rusia matou te ō faatasi e fai o ia ma faamatala upu. I le potu e faia ai fono a le vaegaau, na ma faatū ai i inā se laulau e tuu ai lomiga, ma sa mafai ona matou talanoa atu i ni fitafita e toʻa 68 ma tali a latou fesili. Mulimuli ane, na latou talia ma le fiafia tusi e 35 ma mekasini e toeitiiti lava atoa le selau. A o matou tuua le potu fono, sa matou vaaia ai ni vaega toaitiiti o talanoa i lomiga.

“Sa faia sa matou tuutuuga matou te toe foi atu ia Iulai 4, 1992. I lo matou taunuu atu i le toe sefulu minute i le sefulutasi i le taeao, na taʻu mai e le fitafita e leoleo i le faitotoa e faapea, o loo faatalitali mai fitafita ia i matou. Sa ave i matou e se alii ofisa sili o le vaegaau i le potu fono, ma na matou iloa ai e faapea, o se tamaitai e vaaia le potu tusi, o lē na ia muai mauaina ni lomiga mai ia i matou mo le potu tusi, sa ia faailoa atu lo matou ō atu e ala i le tuuina atu o ni pepa e faasilasila atu ai i le nofoaga o le vaegaau. Na fofogaina atu e ni uso se toatolu ni tautalaga pupuu e uiga i la tatou galuega i le lalolagi aoao ma faaalia ai le mafuaaga tatou te faatuatuaina ai le Tusi Paia. Ona sosoo lea ma le tuufesili mai o le aofia, ae matou taliina mai le Tusi Paia. O le tasi o na fesili na faapea, O le ā le tulaga o Molimau a Ieova i le auaunaga faavaegaau, ma po o iai nisi o i latou o avea ma fitafita? O lenei fesili na tuuina atu ai i le tagata talaʻi e leʻi papatisoina lea na ma ō mai muamua le avanoa e faamatala atu ai le 25 tausaga na ia galue ai i le vaegaau a Siamani i Sasaʻe, ma tausaga mulimuli na avea ai o ia ma kapeteni i le vaegaau o le ea. Sa ia faamatala le auala na ia aʻoaʻo ai e uiga i le Atua ma le Tusi Paia, ma ua manao nei e avea o se tasi o Molimau a Ieova. Sa faafiafiaina fitafita i mea na latou faalogo i ai. I le na o le fitu minute, a ua tofu uma fitafita ma le lomiga o lomiga uma ia na matou avatua, ma e toatele na mananao i ni Tusi Paia. Sa mafai ona matou maua ni Tusi Paia se fitu i le gagana Rusia mai se fale tusi, ma na latou matuā sapaitalia le mauaina. Sa o se olioli moni le tufaina atu i nei tagata matelaina faaleagaga o faamatalaga mai le Tusi Paia, ma matou te faamoemoe o le a latou gaoioi e tusa ai.”

E moni lava, e lē faailoga tagata le Atua. E ala i lana Afioga, ua ia talosaga atu ai i tagata loto faamaoni e tusa lava po o ai ia, ma po o fea foi o iai. Ua ia valaaulia i latou ina ia aʻoaʻo e uiga ia te ia ma lona Alo, o Iesu Keriso, ma e toatele mai i so o se vala o le olaga o loo faia lena mea.—Ioane 17:3.