Vaavaai atu ma le Talisapaia i le “Fale o le Atua”

“E TASI le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o loʻu ola, ina ia ou iloa atu ai le matagofie o Ieova, ma ou vaavaai atu ai ma le talisapaia i lona malumalu.”—Salamo 27:4, NW.

Sa vaavaai atu ma le fiafia, po o le matuā olioli le tupu o Tavita o lē na matuā talisapaia le malumalu o Ieova. Pe faapena lou lagona i nofoaga o le tapuaiga moni i aso nei? O aiga Peteli o loo i lālā e sili atu i le 95 o le Sosaiete o le Olo Matamata, o nisi ia o nofoaga e fesootai ma le tapuaiga ia Ieova i o tatou aso.

Ua faamatala mai e Helga, o lē na amata ona galue i le aiga Peteli i Siamani i le tausaga e 1948, e faapea: “Pe a toe tepa i tua i le tele o oʻu tausaga i le auaunaga i Peteli, ua faatumuina ai pea aʻu i le matuā loto faafetai ma le matuā talisapaia, lea e tuputupu pea i lea tausaga ma lea tausaga.” O Helga, o se tasi o le 13,828 o le aufaigaluega olioli i Peteli i le lalolagi aoao o lē ‘na ia vaaia le matagofie o Ieova’ i le tausaga faaleauaunaga o le 1993. O le ā tonu lava le uiga o le igoa Peteli? Ua mafai faapefea e tagata uma o Molimau a Ieova, ona vaavaai atu ma le talisapaia i lenei fuafuaga, e tusa lava po o auauna ai i le Atua i totonu o Peteli pe lē o galulue ai?

O se Igoa e Manaomia ona Tuutoina i Ai

O “Peteli” o se igoa e sili ona talafeagai, ona o le upu Eperu Behth-ʼElʹ o lona uiga o le “Fale o le Atua.” (Kenese 28:19, faamatalaga i lalo) Ioe, o Peteli, ua faaatagia ai se fale e matuā maopoopo lelei, po o ‘se aiga e atiina aʻe i le poto,’ e avea ai le Atua ma lona finagalo ma faatumutumuga. (Faataoto 24:3) Ua faapea mai Herta ma lona matuā talisapaia: “E pei lava o loo nofo i totonu o se aiga. E iai sa matou faasologa maopoopo lelei i aso taitasi.” Sa auauna o ia i le aiga Peteli lava lea e tasi e pei o Helga mo le sili atu i le 45 tausaga. E tofu lava sui taitasi o lenei aiga telē ma ana galuega ma lona lava nofoaga, e mafai ona maua ai e ia le fiafia ma le malupuipuia. I le ogatasi ma le igoa Peteli, o faatulagaga lelei ma le maopoopo, e faatinoina ai matagaluega taitasi. O lenei tulaga e maua ai le filemu, ma mafai ai ona talaʻia ma le uigā le tala lelei, ma avatu ai i faapotopotoga se pogai e sili ona aogā e tausia ai i se tulaga e sili ona maualuga le “Fale o le Atua.”—1 Korinito 14:33, 40.

Aisea e tatau ai nei nofoaga? Mo se faaaoaoga, o lenei mekasini, na saunia i se fale lomitusi i Peteli. O le talaʻiina o le feau o le Malo ma le tufatufaina atu o meaai faaleagaga, ia na valoia uma e Iesu Keriso, e manaomia ai faatulagaga faalefaapotopotoga e pei o Peteli—e lagolagoina e le aufaigaluega loto naunau, ma e matuā maualuga i manatu o tagata tapuai uma o Ieova.—Mataio 24:14, 45.

Pe e te fia iloa atili e uiga i galuega masani o le aso i inei? I le fale o loo nonofo ai Helga ma Herta, e tatagi mai se leo mālie i le fale atoa e nonofo ai, i le 6:30 i le taeao, e ui lava o le toatele o le aufaigaluega e sili atu i le 800, e vave ona feala na i lo o lena taimi e sauniuni mo le aso. I le 7:00 i le taeao, o Aso Gafua e oo i Aso Toonai, e faapotopoto ai le aiga i potu o taumafataga mo le talanoaina o le mau o aso taitasi, po o le tapuaiga i le taeao. Ona sosoo ai lea ma se taumafataga faamalositino o le taeao. O aso faigaluega taitasi, e amata i le 8:00 i le taeao, ma o lona umi e valu itula, e na o le pau lava le taimi e mālōlō ai, o le taumafataga i le aoauli. (E masani ona galulue le aiga i le ʻafa aso i Aso Toonai.) E tusa lava pe i le umukuka, fale lomitusi, fale ta lavalava, ofisa, fale gaosimea, matagaluega e tuufaatasia ai tusi, po o so o se isi lava matagaluega, ae tele lava mea e fai.

I afiafipo ma faaiuga o vaiaso, e aufaatasi atu ai sui o le aiga i faapotopotoga o lea vaipanoa mo sauniga ma le galuega talaʻi. O le toatele o uso i Peteli, o toeaina, po o auauna o le faiva i nei faapotopotoga. E matuā talisapaia moni e Molimau i ia vaipanoa lenei lagolagosua, e galulue faatasi ma le maopoopo nei vaega uma e pei o se tino e tasi, faatasi ma le faaaloalo ma le femalamalamaaʻi o le tasi i le tasi. (Kolose 2:19) Ua iloa e tagata faigaluega taitoatasi i Peteli e faapea o lona tofiga i le “Fale o le Atua” e faamuamua i isi galuega uma. Ae peitai, o le maelega i le talaʻiga ma le faaaafia i le faapotopotoga, faatasi ma se uiga paleni, e mafai ona faamalosia ai faaleagaga le tagata faigaluega i Peteli, faateleina ai lona olioli, ma avea ai o ia o se sui taulau o le aiga. Maeu le tāua o nei uiga pe afai e galue i se “fale” e fesootai atu lona igoa ma le tuutoina atu o le tagata atoa!

Faataulauina o le Auaunaga i Peteli

O le ā ua fesoasoani i le lē mafaitaulia o Molimau a Ieova e taulau manuia ai i le auaunaga i Peteli? Ua faamatalaina e sui o le aiga Peteli i Falani o ē ua tele tausaga o le poto masani i le auaunaga e faapea: “O le alofa mo Ieova. O le iai o le faanaunauga ina ia finafinau po o fea lava na te tuuina i ai i tatou; ia loto maulalo, gauai, ma le usiusitai i taiala ua tuuina mai ia i tatou e le Sosaiete.” (Denise) “Sa ou matauina le tāua tele o le faaaloalo i le mataupu silisili na taʻua e Pauro i le Roma 12:10: ‘Ia tausolomua ona ava o le tasi i le tasi.’ Ua faaalia e lenei mau ia i tatou le tāua o le lē tausisi atu faapea ia talia o tatou lava manatu, ae, na i lo o lea, ia mafaufau i manatu o isi. I se isi faaupuga, aua le saili lou lava viiga.” (Jean-Jacques) “E ono mafai ona faaleagaina lo tatou faaaloalo mo le auaunaga i Peteli pe afai tatou te vaavaai faaletino pe manatu faaletagata i mea, ona e mafai e lenei mea ona galo ai ia i tatou le mea moni e faapea, o Ieova o loo ia taʻitaʻiina lana faalapotopotoga. E mafai ona leiloa lena faaaloalo pe afai tatou te tausuai i vaivaiga o isi.” (Barbara)

O tagata uma i Peteli e lē lelei atoatoa, o lea, e manaomia ai ona mafaufau ma le faaeteete i aumea. E sili ona lelei mo le au talavou po o i latou faatoʻā taunuu mai i Peteli ona aua le faatapulaaina a latou aumea i na o a latou tupulaga. O i latou o ē atonu e faaalia se naunau e faitio pe iai ni manatu lē atiaʻe, e lē o ia o se aumea lelei e atiina aʻe ai i Peteli po o le faapotopotoga. I le isi itu, o le faataitai i le “poto mai luga” lea e faamatalaina i le Iakopo 3:17, e aumaia ai faamanuiaga. O le poto lenei “e muamua ona mamā, i le ua filemu, e agamalu, e ganagofie, e tumu i le alofa ma fua lelei, e le alofa faapito, e le faatagā fai.” O na uiga, faatasi ma le onosai ma le agalelei, e iloa gofie i le “Fale o le Atua,” e mafai ai ona fiafia ma faagaeeina se tasi e nofo ai i inā. E oo lava i tagata asiasi atu e lē o ni Molimau, e masani ona faaleoina mai lo latou viiviia o amioga lelei, faaleuo, ma le agaga olioli o le au faigaluega.

O Anny, ua sili atu i le 70 ona tausaga, ma na avea ma sui o le aiga Peteli i Siamani talu mai le 1956, ua ia faamatala mai le auala na tausia ai pea lona nofo sauni e auauna ai i inā: “Mo loʻu lava lelei faaleagaga, sa ou faia ai se taumafaiga sili e faitauina lomiga uma a le Sosaiete, auai e lē aunoa i sauniga, ma faia se sao e lē aunoa i le talaʻiga. Sa ou taumafai foi e tausia loʻu soifua maloloina i le tino, e ala i le faia o faamalositino i taeao taitasi, e ala i le alofia o le faaaogāina o le lifi (elevator) i le tele o taimi, ae e masani ona savali i le tele e mafai ai, ae maise lava i le auaunaga i le fanua”

E toatele tagata ua masani i le olaga i Peteli e ioe faatasi ma Anny. E lē taitai ona uma lo latou aʻoaʻoina, e lē uma foi le galulue. O le soifua maloloina o le tino, e manaomia ai ona lava le moe ma faia ni nai faamalositino ma ia faaalia le pulea i le ʻai ma le inu. O le mea e sili ona tāua i mea uma, o lo latou lē tuulafoaiina lea o tatalo totino ma le suesueina o le Tusi Paia.

Manatu Maualuga mo le Auaunaga Paia i Peteli

“O fea e te faigaluega ai?” o se fesili lea e masani ona fesiligia ai sui o le aiga Peteli. E eseese lava tofiga o galuega, ae e manaomia ona manatu maualuga i ai tagata taitoatasi uma. Aisea? Auā o tofiga taitasi—pe faigaluega i se masini e lomia ai meaai faaleagaga, tatāina o lavalava, kuka ma le faamamāina o le fale mo le aiga Peteli, po o le galue i se ofisa—e saosaolaumea uma lava i le auaunaga paia. E pei ona taʻua i luga, o Kerisiano, latou te lē faailogaina ni vaega. Ia manatua, o tiute tatau uma lava i le malumalu, sa faia uma e ositaulaga ma sa Levī, i ona lotoā ma potu o taumafataga, sa manatu i na mea uma o le auaunaga paia ia Ieova. Sa aofia ai i lena le fasia o manu ma sauniunia mo le taulaga, toe faatutumuina o suauu o lamepa, e oo lava i le faamamāina ma le faia o tiute tau tagata vaai. E faapena foi i tofiga taitasi i Peteli ona avea o se gaoioiga faamalie loto ma aogā mo “le galuega a le Alii,” i lea ua avea ai o se faaeaga tutasi.—1 Korinito 15:58.

Seʻi talanoaina puupuu se tasi o uiga e mafai ona taofia ai lo tatou vaavaai atu ma le talisapaia i le “Fale o le Atua.” O Kerisiano uma i Peteli ma i fafo, e manaomia ona leoleo i latou faasaga i le matauʻa ma le loto leaga, “o le mea e pala ai ivi.” (Faataoto 14:30) E lē tatau i se tasi ona iai se pogai e matauʻa ai i faaeaga o le auaunaga a tagata faigaluega i Peteli. E lē gata i lea, e leai se avanoa i totonu o se aiga Peteli mo le loto leaga, o se tasi lea uiga o galuega a le tino. Faatali ma le loto maulalo—o se fautuaga aogā lena mo se tasi o lē atonu e foliga mai ua faaleamanaiaina a ua tuuina atu i ai isi faaeaga e sili atu. E lē gata i lea, e nonofo vavalalata faatasi i Peteli tagata e matuā eseese o latou talaaga tau tupe. Pagā le faalotovaivaia pe afai e manatu se tasi e “faatusatusa lona tulaga ma le tulaga o se tasi tagata”! O le loto malie o se tasi i “mea e aai ai ma mea e oofu ai” ua fesoasoani i le toatele e faaauau ai ma le faamaoni mo le faitau sefulu o tausaga i le “Fale o le Atua.”—Kalatia 5:20, 26; 6:4, NW; 1 Timoteo 6:8.

Ua maua e Molimau a Ieova, ma le faitau miliona o isi, aogā sili mai auaunaga e aunoa ma se totogi ua faia i Peteli—o galuega, ua faia ma le lē manatu faapito ona o le alofa i le Atua ma tuaoi. O aiga Peteli ma fale lomitusi o le Sosaiete o le Olo Matamata, e pei lava o isi nofoaga faatiokarate, e faatupeina i meaalofa tauofo. (2 Korinito 9:7) I le pei o le tupu o Tavita ma aloalii ma alii sili o Isaraelu, e mafai ona tatou faailoa atu lo tatou manatu maualuga ma le talisapaia mo le “Fale o le Atua” e ala i le tuuina atu o le lagolagosua tau amio ma tau tupe i le Sosaiete. (1 Nofoaiga a Tupu 29:3-7) Seʻi o tatou vaai nei pe mafai faapefea ona “iloa . . . le matagofie o Ieova” i Peteli.

Faamanuiaga i le “Fale o le Atua”

Pe a e auai i se tauaofiaga, pe logo i ou tino le matuā loto malie, ona o le siomia e tagata fiafia o ē tapuai ia Ieova? Seʻi tau lava ina manatu, o se tagata faigaluega i Peteli ua ia maua se faaeaga e auauna ai ia Ieova faatasi ma se vaega o uso i aso uma! (Salamo 26:12) Maeu ni avanoa e tuputupu aʻe ai faaleagaga ua ofoina mai e lena tulaga! Na faapea mai se uso, i le tausaga e tasi i Peteli, e tele mea na ia aʻoaʻoina e fesoasoani ai ia te ia e faatulaga ona uiga, na i lo o le tolu tausaga na ia faaalu i se isi mea. Aisea? Ona e leai se isi nofoaga na ia maua ai le avanoa e matauina ai ma faataʻitaʻi ai i le faatuatua o le toatele o tagata Kerisiano e taʻumatuaina o latou uiga.—Faataoto 13:20.

I Peteli, e siomia ai se tagata e ni faufautua agavaa. E faaopoopo atu i ai, e iai aogā e maua i le faalogologo atu i faaopoopoga lava saunia lelei i le taimi o le tapuaiga i le taeao, ma i le Suesuega o Le Olomatamata a le aiga Peteli, ma pe a faalogologo atu i lauga i po o Aso Gafua. E maua e tagata faatoʻā taunuu faatonuga mai le Aʻoga e Ulufale ai i Peteli, ma e tofia e faitau le Tusi Paia atoa i totonu o uluai masina e 12.

O lipoti ma tala i mea tutupu mai tagata asiasi mai i isi atunuu, e aumaia ai foi nisi faalaeiauga atili. E lē gata i lea, o tagata o le Vaega Pule po o latou sui e asiasi mai i ofisa o lālā. E pei ona manatua ai e Helga e faapea: “E ui lava e tele a latou mea e fai, ae maua pea e uso se taimi mo sina upu agalelei po o sina ʻataʻata.” Maeu le faalaeiau ai i le vaaia totino o amioga e faafouina ai ma onomea a na tane faamaoni!

E mafai e se tasi ona matauina lelei, ae maise lava i Peteli, le auala o loo faagaoioia ai le faalapotopotoga a le Atua, ma le auala o loo faagaeeina ai e lona agaga paia loto ma lima e naunau i galuega. Ua faamatala mai e se uso o lē na auauna i le aiga Peteli i Falani talu mai le 1949 e faapea: “I Peteli, e lagona ai e se tasi lona latalata atu ‘i le ogatotonu o gaoioiga.’” Ua ia faaauau mai e faapea: “Ua mafai nei ona ou faapea atu ma le faamaoni, ia te aʻu, o Peteli o se ituaiga o auaunaga faataimiatoa ua mafai ai ona ou tuutoina atu se taimi faatulagaina ma le malosi i le auaunaga a Ieova, ma auauna ai i se aofaiga e matuā toatele o uso.” Ma pe lē o la tatou fuafuaga moni ea lena i le olaga—ina ia faia le finagalo o le Atua? I Peteli, ua mafai ai e se tasi ona “vivii atu pea lava i le Atua.” Maeu se faamanuiaga!—Salamo 44:8.

E pei ona tatou iloa nei, o se tasi e galue i se aiga Peteli, e mafai ona ia iloa le matagofie o Ieova ma maua le anoanoai o faamanuiaga. (Eperu 6:10) Pe e mafai ona avea le auaunaga i le “Fale o le Atua” o se mea e aogā mo oe? O i latou o ni Molimau a Ieova o ē ua taʻi 19 tausaga le matutua, o ē o maua le soifua maloloina lelei faaleagaga ma le faaletino, ma o ē e pei o Timoteo, e “tauleleia o ia e le au uso” e mafai ona talosaga atu e auauna i Peteli. (Galuega 16:2) E toatele ua faia le auaunaga i Peteli o se galuega i o latou olaga, e pei o i latou na o loo taʻua i luga. Ua oo moni ia i latou moomooga loloto o le faisalamo—ina ia ‘nofo i le fale o Ieova i aso uma o lona ola.’

E matuā faaaloalo loloto Molimau a Ieova mo le agaga faataulagaina ua faaalia e o latou uso ma tuafāfine i Peteli, o ē o loo tauaveina ma le loto malie ma le olioli o latou tofiga. Tusa lava pe tatou te auauna ia Ieova i Peteli po o se isi mea, ua ia i tatou taitoatasi se mafuaaga lelei e lagona ai e pei ona faia e le tupu o Tavita—o le vaavaai atu ma le talisapaia, po o le olioli i le “Fale o le Atua.”

[Ata i le itulau 31]

O nei Kerisiano ua faitau sefulu tausaga o latou faia ma le fiafia le auaunaga paia i Peteli i Siamani