Ia Galue Malosi mo le Faaolaina o lou Aiga

“Ia tausi atu i ai i aoaiga ma apoapoaiga a le Alii [“Ieova,” NW].”—EFESO 6:4.

1, 2. O ā luʻi ua fesagai ma mātua i aso nei?

UA FAAIGOA e se mekasini taʻutaʻua o se suiga tele. Sa faasino atu faamatalaga a le mataupu i suiga mataina ia ua tutupu i le aiga i tausaga e leʻi leva tele atu. Ua taʻua faapea, o nei mea o “le iuga o se faamaʻi o talagā faaipoipoga, ua toe faaipoipo, toe tatala, tamaiti e fananau mai i mātua e leʻi faaipoipo, ma mafatiaga fou i totonu o aiga o loo mafuta faatasi.” O omiga ma mafatiaga ua lē o ni mea e faateia ai, auā na valoia mai e le Tusi Paia e faapea o le a fesagai tagata ma “aso faigata” a o faagasolo nei “aso e gata ai.”—2 Timoteo 3:1-5.

² O lea la, ua fesagai mātua i aso nei ma faigata sa lē iloa e augātupulaga ua mavae atu. E ui o nisi mātua o loo tatou iai faatasi sa latou tausia aʻe a latou fanau i ala faaleatua ‘mai lava a o tamameamea,’ ae e tele aiga e leʻi leva tele talu ona faatoʻā amata ona ‘savavali i le upu moni.’ (2 Timoteo 3:15; 3 Ioane 4) Atonu ua matutua a latou fanau a o faatoʻā amata ona aʻoaʻoina i latou e o latou mātua i ala o le Atua. E lē gata i lea, ua iai se aofaiga faatuputupulaia o aiga e taitasi matua ma aiga o ni mātuafai o loo iai i lo tatou lotolotoi. Po o le ā lava la le tulaga o loo e iai, ae ua aogā lava i ai le timaiga a le aposetolo o Pauro e faapea: “Ia tausi atu i ai i aoaiga ma apoapoaiga a le Alii [“Ieova,” NW].”—Efeso 6:4.

O Mātua Kerisiano ma A Latou Matafaioi

3, 4. (a) O ā ni mafuaaga ua pogai ai ona faaitiitia le matafaioi a tamā? (e) Aisea e ao ai i tamā Kerisiano ona avea i latou ia sili atu i le na ona avea o ni ē saunia le tausiga faaletino o le aiga?

³ Seʻi mātau, na faasino patino atu upu a Pauro o loo i le Efeso 6:4 i “tamā.” Ua faamatala mai e se tasi tusitala e faapea, i augātupulaga ua mavae atu, “sa avea o le avega tauave a tamā le tausia o tulaga tau i amio ma le tulaga faaleagaga o a latou fanau; sa avea o le avega tauave a tamā le tulaga tau i aʻoaʻoga a a latou fanau. . . . Peitai o le Suiga i le Tamaoaiga ua tafea ese ai lenei vavalalata; ua tuua e tamā a latou faatoaga ma a latou faleoloa, ua tuua o latou aiga ina ia ō atu e faigaluega i falegaosimea ma sosoo atu ai ma le faigaluega i ofisa. Ua faia e tinā le tele o avega tauave ia sa masani ona faia e tamā. Ua faatuputupulaia le avea o le tulaga faatamā ua na o se taʻu ae lē o faatinoina.”

⁴ Tane Kerisiano: Aua le manatu faapea ua lava le tau ina avea o outou ma ē saunia le tausiga faaletino o le aiga, ae tuu uma le toleniina ma le tausia o a outou fanau i a outou avā. Na faalaeiauina e le Faataoto 24:27 tamā i aso anamua e faapea: “Ia sauniuni i fafo lau galuega, ma ē teuteu ai i le vao; mulimuli ane, ona e faia lea o lou fale [“atiina aʻe ai lou aiga,” NW].” Ua faapena foi i aso nei, afai o oe o se tane e galue, atonu e manaomia ona umi se taimi e te galue mamafa ai ina ia maua mea e tausia ai lou aiga. (1 Timoteo 5:8) Peitai, pe a uma lena, faamolemole, ia faaalu se taimi e “atiina aʻe ai lou aiga”—i le itu i faalogona ma le itu faaleagaga.

5. E mafai faapefea e avā Kerisiano ona galulue mo le faaolaina o o latou aiga?

⁵ Avā Kerisiano: E tatau foi ona outou galulue mamafa mo le faaolaina o o outou aiga. Ua faapea mai le Faataoto 14:1: “E taitasi uma fafine popoto ma atiina ae lona fale.” I le avea o oulua o ni paaga faaipoipo, e saosaolaumea ai oe ma lau tane i le avega tauave o le toleniina o la oulua fanau. (Faataoto 22:6; Malaki 2:14) Atonu e aofia ai i lenei mea le aoaiina o lau fanau, ia tapena i latou mo sauniga faa-Kerisiano ma le faiva i le fanua, po o le faia foi o le suesuega a le aiga pe afai e lē o mafai e lau tane ona faia. E mafai foi ona tele atu nisi mea e te faia ina ia aʻoaʻo ai i lau fanau tomai i mea latou te faia i totonu o le aiga, o amioga lelei, o le tumamā, ma isi lava mea e aogā. (Tito 2:5) Pe a galulue faatasi tane ma avā i lenei itu, ona faaleleia atili ai lea o lo latou faataunuuina o manaoga o a latou fanau. Ae o ā tonu lava nisi o na mea manaomia?

Le Tausiga o O Latou Manaoga Tau i Faalogona

6. O ā matafaioi e faia e tinā ma tamā e tusa ai ma le tuputupu aʻe o a latou fanau i itu tau i faalogona?

⁶ Pe a “pei o se failele na te tausi lelei i ana lava tama,” ona latou lagona ai lea o le malupuipuia, le saogalemu, le alofagia. (1 Tesalonia 2:7; Salamo 22:9) E toaitiiti lava ni tinā e mafai ona latou teena le manaoga ina ia matuā uai atu i a latou tamaiti laiti. Na fesili le perofeta o Isaia: “E galo ea i le fafine lana tama ua susu, na te le alofa i le tama a lona lava manava?” (Isaia 49:15) Ua faia la e tinā se matafaioi tāua i le atinaʻe tau i faalogona o le fanau. Peitai ane, ua faia foi e tamā se matafaioi tāua i lenei itu. Ua taʻua e le faiaoga o mataupu tau i aiga o Paul Lewis e faapea: “E leʻi iai lava saʻu tagata faigaluega i mataupu tau i tagata ma aiga, ua ia aumaia se lipoti o se tamaitiiti [ua lafoaia] e faapea mai e iai ni a latou faiā lelei ma o latou tamā. E leai ma se tamaitiiti e toatasi na ese mai i le faitau selau o tamaiti.”

7, 8. (a) O le ā le faamaoniga o loo iai se mafutaga lelei i le va o Ieova le Atua ma lona Alo? (e) E mafai faapefea e tamā ona faamalosia se fusi o le alofa ma a latou fanau?

⁷ O lea la ua manaomia ai i tamā Kerisiano ona matuā atiina aʻe se fusi o le alofa ma a latou fanau. Mo se faaaoaoga, seʻi manatu ia Ieova le Atua ma Iesu Keriso. I le papatisoga o Iesu, na faasilasila mai ai e Ieova e faapea: “O loʻu Atalii pele oe, ua ou fiafia lava ia te oe.” (Luka 3:22) E matuā tele ni mea ua faaalia mai i na upu! (1) Na faamaonia mai ai e Ieova lona Alo, (2) na faailoa faalauaitele mai ai lona alofa mo Iesu, ma (3) na faailoa mai ai le fiafia o lona finagalo ia Iesu. Ae ua lē na o le pau lenei o le taimi na faailoa mai ai e Ieova lona alofa mo lona Alo. Na mulimuli ane foi fetalai atu Iesu i lona Tamā: “Ua e alofa mai ia te au a o leʻi faavaeina le lalolagi.” (Ioane 17:24) Ae peitai, o le mea moni lava, pe ua lē manaomia ea e atalii uma ma afafine uma e usiusitai, le faamaoniga, le alofa, ma le talileleia mai i o latou tamā?

⁸ Pe afai o oe o se tamā, e foliga mai la e tele atu ni mea e te mafaia ina ia faamalosia ai se fusi o le alofa ma lau fanau, e ala i le faailoa atu i ai e lē aunoa o ni faailoaga o lou alofa i au gaoioiga ma au upu. E moni, e faigata i nisi tane ona faaali atu o latou lagona alofa, ae maise lava pe afai sa latou leʻi maua lava lena faaaliga o le alofa mai i o latou lava tamā. Ae oo lava i se taumafaiga faalēlava e faaali atu ai lou alofa i lau fanau, e iai sona āuga e sili ona malosi. Ae maise ai, “o le alofa e faamafanafana lea.” (1 Korinito 8:1) Afai e lagona e lau fanau le saogalemu ona o lou alofa faatamā, o le a sili atu ai la ona latou mananao ina ia avea o ni ‘atalii ma ni afafine e sili ona lelei’ ma o le a saoloto foi e tatala mai o latou loto ia te oe.—Faataoto 4:3.

Le Tausiga o O Latou Manaoga Faaleagaga

9. (a) Na faapefea i mātua Isaraelu sa matatau i le Atua, ona latou tausia manaoga faaleagaga o o latou aiga? (e) O ā avanoa ua maua e Kerisiano ina ia aʻoaʻoina ai a latou fanau i so o se avanoa lē fuafuaina?

⁹ E iai foi manaoga faaleagaga o fanau. (Mataio 5:3) Na augani atu Mose i mātua Isaraelu e faapea: “Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.” (Teuteronome 6:6, 7) Pe afai o oe o se matua Kerisiano, e mafai ona tele lau faatonu atu e faia i se ala lē fuafuaina, pe a “ē savali foi i le ala.” O taimi tou te faimalaga faatasi ai i le tou taavale, le ō atu e fai se faatauga, po o le savalivali faatasi ma lau fanau mai lea fale i lea fale i le faiva faa-Kerisiano, e saunia ai ni avanoa lelei e faaofi atu ai faatonuga i se tulaga ua fetaui lelei. O taimi o taumafataga o se taimi ua sili ona lelei lea mo talanoaga a le aiga. Ua faamatala mai e se tasi matua e faapea: “Matou te faaaogāina le taimi o la matou taumafataga e talatalanoa ai i ni mea sa tutupu a o faagasolo lea aso.”

10. Aisea ua avea ai le suesuega a le aiga o se luʻi i nisi taimi, ma o le ā le filifiliga maumaututu e tatau ona iai i mātua?

¹⁰ Peitai ane, e matuā tāua foi faatonuga e fuafuaina lelei e ala i se suesuega faale-Tusi Paia e lē aunoa ma lau fanau. O le mea moni lava, “ua fusifusia le valea i le loto” o le fanau. (Faataoto 22:15) Ua faapea mai nisi mātua e faigofie lava i a latou fanau ona faalavelaveina le suesuega a le aiga. E faapefea? E ala i le lē fifilemu ma lē fiafia, i le faia o ni mea lē manuia e fai ma faalavelave (e pei o le fufusu ma isi o latou tei), po o le faatagā faafoliga mai o loo lē amanaiaina upu moni faavae o le Tusi Paia. Afai o lenei tulaga ua avea o se taua po o ai le loto e malosi, e tatau la ona silisili atu ona malosi le loto o le matua. E lē tatau i mātua Kerisiano ona fiu ma tuulafoai ai i le fanau e pulea le aiga.—Faatusatusa i le Kalatia 6:9.

11. E mafai faapefea ona faia le suesuega a le aiga e avea o se mea e fiafia ai?

¹¹ Afai e lē o fiafia lau fanau i le suesuega a le aiga, atonu e mafai ona faia ni suiga. Mo se faaaoaoga, po o faaaogā ea le suesuega e fai ma auala e toe faamanatu ai ni masei o lau fanau? Atonu o se mea e sili ona lelei ona talanoaina na o oulua ma le lua tamaitiiti ua sese lena faafitauli. Po o faia i se tulaga e lē aunoa la outou suesuega? Afai e te tolopoina ona o se polokalama o le televise o loo e fiafia i ai, po o se taaloga, e foliga mai la o le a lē matuā uigā tele i lau fanau le suesuega. Po o e naunautai ea ma matuā maumaututu i le auala o loo e faia ai le suesuega? (Roma 12:8) Ioe, e tatau ona avea le suesuega o se mea e olioli ai. Ia taumafai e faaaafia uma ai le fanau. Ia uigā ma ia atiina aʻe ai, ia faamālō atu i lau fanau mo le latou vaega sa fai. Aua le tau ina faia le mataupu, ae ia taumafai ina ia pāʻia o latou loto.—Faataoto 23:15.

Le Aoaiga i le Amiotonu

12. Aisea e lē tatau ai ona faatinoina aoaiga i taimi uma lava i le sasa?

¹² E iai foi se manaoga malosi mo le aoaiina o le fanau. I le avea ma matua, e ao ona e faataatitia ni tapulaa mo i latou. Ua faapea mai le Faataoto 13:24: “O le ua tuuna lana sasa, ua ʻinoʻino o ia i lona atalii; a o le ua alofa ia te ia, ua saili le aoaiga mo ia.” Peitai, e lē o uiga upu a le Tusi Paia e faapea, o taimi uma lava e tatau ai ona faatino le aoaiga i le sasa. Ua taʻua i le Faataoto 8:33 e faapea: “Ia outou faalogologo i mea e aʻoaʻo atu,” ma ua taʻu mai ia i tatou, “e sili ona ogoogo o le aoaiga i le tagata mafaufau, i ta e selau i le vale.”—Faataoto 17:10.

13. E ao faapefea ona avatu le aoaiga i se tamaitiiti?

¹³ I nisi taimi, e talafeagai ai ona faatino le aoaiga i le sasa. Peitai afai e faia i le ita, e foliga mai la o le a soonafai ma e leai se aogā e maua ai. Ua lapatai mai le Tusi Paia e faapea: “O outou tamā, aua neʻi faaita i a outou fanau, ina neʻi faapalapala i latou.” (Kolose 3:21) O le mea moni, “o le saua e faavalea ai lava le tagata poto.” (Failauga 7:7) O se talavou e faaita soo, e oo lava ina fouvale i faatulagaga amiotonu. O lea e ao ai i mātua ona faaaogā le Tusi Paia e aoaia ai a latou fanau i le amiotonu i se auala e maumaututu ma paleni. (2 Timoteo 3:16) O aoaiga faaleatua, e avatu i le alofa ma le agamalu.—Faatusatusa i le 2 Timoteo 2:24, 25.a

14. O le ā e ao ona faia e mātua pe a la lagona ua tau oo atu i le ita?

¹⁴ O le mea moni, “o mea e tele e sese ai i tatou uma.” (Iakopo 3:2) E oo lava i se matua alofa e mafai lava ona aafia i se omiga e tupu faafuasei aʻe ma ia fai atu ai se faamatalaga lē alofa po o le faia o se gaoioiga e iloa ai lona matuā ita. (Kolose 3:8) Pe afai o le a tupu lena mea, ia aua neʻi goto le la o e tuua pea lau tamaitiiti i se loto mafatia po o lou iai lava foi o oe i se tulaga ita tele. (Efeso 4:26, 27) Ia lua foia faatasi ma lau tamaitiiti le mataupu, fai se faatoesega pe afai ua talafeagai. (Faatusatusa i le Mataio 5:23, 24.) O le faaalia o lena loto maulalo atonu e atili mafana ai le lua faiā ma lau tamaitiiti. Pe afai e te lagona e lē o mafai ona e puleaina lou ita, ma o le a iu ina e matuā toatamai, ia saili atu i toeaina tofia o le faapotopotoga mo sa latou fesoasoani.

O Aiga e na o le Toatasi le Matua, ma Aiga e Mātuafai

15. E faapefea ona avatu le fesoasoani i tamaiti o loo i aiga e toatasi se matua?

¹⁵ Peitai, e lē o tamaiti uma o loo latou maua le lagolagosua a mātua e toalua. I le Iunaite Setete, e toatasi le tamaitiiti mai tamaiti e toʻafā ua tausia aʻe e se matua e toatasi. Sa taatele i aso o le Tusi Paia ‘tamaiti mātuaoti,’ ma ua taʻua soo i le Tusi Paia le tāua o le alolofa ia i latou. (Esoto 22:22) Ua faapena foi ona fesagai aiga Kerisiano o ē e taitoatasi mātua, ma omiga ma faigata i aso nei, peitai ua faamafanafanaina i latou i lo latou iloa, o Ieova o “le Tamā ia o e ua mātuaoti, le na te faamasinoina mo fafine ua oti a latou tane.” (Salamo 68:5) Ua fautuaina Kerisiano ina ia “tauasiasi atu i e mātua oti ma fafine ua oti a latou tane i o latou tiga.” (Iakopo 1:27) E tele isi mea e mafai e uso talitonu ona faia ina ia fesoasoani ai i aiga o loo taitoatasi mātua.b

16. (a) O le ā e ao i mātua e taitoatasi i se aiga ona fai mo le lelei o o latou lava aiga? (e) Aisea e ono faigata ai aoaiga, ae aisea e ao ai ona avatu?

¹⁶ Pe afai o oe o se matua e toatasi, o le ā e mafai e oe lava ia ona fai ina ia manuia ai lou aiga? E manaomia ona e mataalia i le faia o se suesuega faale-Tusi Paia a lou aiga, le auai i sauniga, ma le faiva i le fanua. Peitai, atonu o le aoaiga o se luʻi e sili ona faigata. Atonu po o loo e faavauvau pea i le maliu o lau paaga e pele ia te oe. Pe atonu foi o loo e taumafai pea e faatoilalo lagona e pei ua agaleaga po o lagona o le ita i se teteaga ma lau paaga faaipoipo. Pe afai o loo iai uma ia te oulua ma lau paaga ua lua tetea le aiā mo le tausiaina o le fanau, atonu o loo e mataʻu foi ina neʻi manao lau tamaitiiti e fia nofo faatasi ma lau paaga lea ua lua tetea po o ua tatala le lua faaipoipoga. O tulaga faapena atonu e faafaigata ai i tulaga tau i faalogona ona avatuina se aoaiga paleni. Peitai ane, ua taʻu mai ia i tatou e le Tusi Paia e faapea, “o le tama ua tuulafoaiina, e tupu ai le mā o lona tinā.” (Faataoto 29:15) O lea, aua neʻi e lolo atu i le lagona o le pei ua agaleaga, le faanoanoa, po o o omiga tau i faalogona ootia e faapogaia e se paaga faaipoipo sa iai. Ia faatulaga ni tapulaa e talafeagai ma ia maumauai i ai. Aua neʻi faagutugutulua i mataupu silisili a le Tusi Paia.—Faataoto 13:24.

17. E mafai faapefea ona oo ina lē manino matafaioi a tagata o le aiga, i se aiga e na o le toatasi se matua, ma o le ā e mafai ona faia ina ia lē tupu lenei mea?

¹⁷ E ui i lea, e mafai ona mapuna aʻe faigata, pe afai e faia e se tinā e leai se paaga lana tama tama e pei o se paaga e pule—o le ulu o le aiga—po o lana tama teine foi e pei o se fafine, ua lafoai atu ia te ia faafitauli tugā. O le faia faapea e lē talafeagai ma e fenuminumiai ai le tamaitiiti. Pe a oo ina lē manino le eseesega i matafaioi a le matua ma le tamaitiiti, ona lē aogā ai foi lea o aoaiga. Ia faamautinoa atu o oe o le matua. Pe afai o oe o se tinā o loo manaomia se fautuaga faale-Tusi Paia, ia saili atu i toeaina pe saili atu foi i se tuafafine matua e taumatuaina.—Faatusatusa i le Tito 2:3-5.

18, 19. (a) O ā nisi o luʻi ua fesagai ma aiga e mātuafai? (e) E mafai faapefea e mātua ma fanau o loo iai i se aiga e mātuafai ona faaalia le poto ma le faautauta?

¹⁸ Ua faapena foi ona fesagai aiga e mātuafai ma ni luʻi. E masani lava, ona seāseā maua e mātuafai lena “alofa vave” mai tamaiti e lē o ni a la fanau moni. Mo se faaaoaoga, atonu e fai sina maaleale o tamaiti e lē o ni fanau moni, i so o se mea lava e foliga mai o loo faaʻauʻau atu ai i le fanau moni. (Faatusatusa i le Kenese 37:3, 4.) O le mea moni, atonu o loo tauivi se fanau ma so latou faavauvau ona o so latou matua moni ua toesea, ma fefefe ai ina neʻi lē alofa faamaoni le tagata lea o le a fai ma o latou matuafai, i lo latou tamā moni po o lo latou tinā moni o iai. O taumafaiga la ina ia avatu aoaiga manaomia atonu o le a fetaiai ma le tali e sili ona lē manuia, ‘E lē o oe o soʻu tinā po o soʻu tamā moni!’

¹⁹ Ua faapea mai le Faataoto 24:3: “Ua atiina ae le fale i le poto; a e faamausaliina i le faautauta.” Ioe, e manaomia e tagata uma le poto ma le faautauta, ina ia taulau manuia ai se aiga e matuafai. E iai ni taimi, e ao ai i fanau ona talia le mea moni e ui ina tiga, e faapea, ua suia tulaga o mea. E faapena foi la i mātuafai ona onosai ma ia mutimutivale lo latou alofa, ia aua le vave ona ita pe a fetaiai ma ni tulaga e foliga o se tetee mai. (Faataoto 19:11; Failauga 7:9) A o leʻi faailoaina atu lau matafaioi o oe e avatua aoaiga, ia taumafai e faamausaliina se lua faigauo ma le tamaitiitifai. A o leʻi mausali lelei lena faiā, e manatu nisi e sili ai ona lelei pe a tuu i le matua moni e faia le aoaiga. Pe a mapuna aʻe ni feeseeseaiga, e ao ona taumafai ina ia talanoa. Ua faapea mai le Faataoto 13:10c: “O e filifili [“talatalanoa,” NW], e popoto i latou.”

Ia Galue Pea mo le Faaolaina o Lou Aiga!

20. O le ā e ao i ulu o aiga Kerisiano ona faia pea?

²⁰ E lē maua faafuasei ni aiga Kerisiano e malolosi. E ao ia te outou ulu o aiga ona galulue malolosi pea mo le faaolaina o o outou aiga. Ia vilivilitai, ma ia mātau ni uiga lē lelei po o ni faanaunauga faalelalolagi e aliaʻe. Ia faataatia se faaaoaoga lelei i le tautala atu, i amio, i le alofa, i le faatuatua, ma i le amio mamā. (1 Timoteo 4:12) Ia faaalia fua o le agaga o le Atua. (Kalatia 5:22, 23) O le onosai, le faautauta, le faamagalo, ma le agamalu o le a faamalosia ai au taumafaiga ina ia aʻoaʻo lau fanau i ala o le Atua.—Kolose 3:12-14.

21. E mafai faapefea ona fafau aʻe se siomaga mafana ma le fiafia i le aiga o se tasi?

²¹ Faatasi ai ma le fesoasoani a le Atua, ia taumafai e tausisia se uiga fiafia ma le mafana i totonu o lou aiga. Ia faaalu taimi e faifai mea faatasi ai o se aiga, i le taumafai lea, e aai faatasi a itiiti mai i se ʻaiga e tasi i aso uma. O ni mea manaomia sauniga faa-Kerisiano, le auaunaga i le fanua, ma le suesuega a le aiga. Peitai ia iai foi “ona po e ʻataʻata ai, . . . ma ona po e sasaa ai.” (Failauga 3:1, 4) Ioe, ia faatulaga ni vaitaimi e fai ai ni tafaoga e talafeagai. O ni asiasiga i fale mataaga, i nofoaga o loo tausi ai manu, ma isi nofoaga faapena e fiafia ai le aiga atoa. Po o le tapē foi o le televise ae faaalu le taimi e pepese faatasi ai, faalogologo i ni musika, faia ni taaloga, ma talatalanoa. O le a fesoasoani lenei i le aiga ina ia atili vavalalata ai.

22. Aisea e ao ai ona galue malosi mo le faaolaina o lou aiga?

²² Tau ina ia faaauau pea e outou uma o mātua Kerisiano, ona taumafai ina ia matuā faafiafia Ieova a o “outou fua mai galuega lelei uma lava, ma ia tupu pea lo outou iloa lelei o le Atua.” (Kolose 1:10) Ia atiina aʻe lou aiga i se faavae malosi o le usiusitai lea i le Afioga a le Atua. (Mataio 7:24-27) Ma ia mautinoa, o le a fiafia mai lona finagalo i a outou taumafaiga i le tausia aʻe o a outou fanau “i aoaiga ma apoapoaiga a le Alii.”—Efeso 6:4.

[Faaopoopoga i lalo]

O le a Faapefea ona E Tali?

◻ E mafai faapefea e le tane ma le avā ona felagolagomai uma i le atiina aʻe o lo la aiga?

◻ O ā nisi o manaoga tau i faalogona o le fanau, ma e mafai faapefea ona faamalieina?

◻ E mafai faapefea e ulu o aiga ona aʻoaʻoina a latou fanau i se tulaga fuafua lelei ma le lē fuafuaina foi?

◻ E mafai faapefea e mātua ona aoai atu i le amiotonu?

◻ O le ā e mafai ona faia mo le manuia o ni aiga e taitoatasi mātua ma aiga e mātuafai?

[Ata i le itulau 16]

O le alofa ma le talileleia e se tamā e tāua lea i le tuputupu aʻe o le tamaitiiti i le itu tau i faalogona