E Faapefea ona E Foiaina Feeseeseaiga?

O se gaoioiga faaletonu—na paʻū ifo ai mai le fata le elefane mataʻetaʻe sa lona tolu i le laina o elefane e lima. E tatau ona toe faapipii le mea ua taʻe. Auā a lē faia, o lona uiga o le a lē atoa le faasolosologa lelei o le seti. Peitai, e faigata tele lea gaoioiga, ma e te lagona e leai sou agavaa e fai ai. E tatau ona e saili atu mo se fautuaga po o le oo lava ina e talosagaina se tagata e poto faapitoa i lea galuega ina ia ona faia.

O LE sologa lelei i le va o uso ma tuafāfine e sili atu ona tautele na i lo o na mea teufale mataʻetaʻe. Ua talafeagai ai la le pese a le faisalamo e faapea: “Faauta, o le mea e matuā lelei ma le matagofie lava, pe a nonofo faatasi lava o uso.” (Salamo 133:1) O le foiaina o se feeseeseaiga ma se isi uso Kerisiano e mafai ona avea o se mataupu faigata i nisi taimi. Ae maise ai, o nisi latou te lē faia i se auala saʻo lenei tulaga. E masani lava, o le “toe faafoisia” e oo mai ai tiga sa lē tatau ona iai, pe lē logolelei foi, ma iu ai i ni foliga lē lelei e lē matagofie i le silasila.

O nisi Kerisiano ua latou faaaafia fua toeaina tofia i ni mataupu e ono mafai lava e i latou ona taulimaina. Atonu o lena le tulaga, talu ai latou te lē o mautinoa sa latou gaoioiga e faia. Na faapea mai se tasi uso e tomai i le avatuina o fautuaga faale-Tusi Paia: “O le toatele o o tatou uso e lē iloa pe faapefea ona faaaogāina fautuaga faale-Tusi Paia mo le foiaina o o latou feeseeseaiga.” Ua ia toe faapea mai: “E masani lava, latou te lē mulimuli i le auala a Iesu i le faafoeina o mataupu.” O le ā tonu lava la na fetalai i ai Iesu e faatatau i le auala e foia ai e se Kerisiano ni feeseeseaiga ma se isi o ona uso? Aisea ua matuā tāua ai le faamasani lelei i lenei fautuaga ma ia iloa le auala e faaaogā ai?

Nai Feeseeseaiga Laiti

“Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.”—Mataio 5:23, 24.

Sa fetalaia e Iesu na upu, ae o le vaitaimi lena sa fai ma tu a Iutaia le ofoina o taulaga, po o le tuuina atu o meaalofa, i le fata faitaulaga o le malumalu i Ierusalema. Afai sa iai se sese o se tagata Iutaia i sona uso Isaraelu, ona tatau lea i lē ua faia le sese ona ofoina atu se taulaga mu atoa po o le taulaga o agasala. O le faaaoaoga lea na fetalai i ai Iesu, ua aumaia i se taimi e sili ona faigata. A o iai le tagata i tafatafa o le fata faitaulaga ma ua toe lava ina ofo atu o lana taulaga i le Atua, ae ua ia toe manatua loa e iai se mea o loo lē fiafia ai lona uso ia te ia. Ioe, sa manaomia ona malamalama le tagata Isaraelu, e tatau ona muai faia le toe faaleleiga ma lona uso, a o leʻi faatinoina lea tiute faalelotu.

E ui o na taulaga o se mea na manaomia i le Tulafono Faa-Mose, ae sa leʻi matuā tāua tele na mea i le silafaga a le Atua. Na faapea atu le perofeta o Samuelu i le tupu lē faamaoni o Sauro: “E tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le gaʻo o mamoe poa.”—1 Samuelu 15:22.

I lana Lauga i luga o le Mauga, na toe taʻua ai foi e Iesu lenei faasologa o mea e ao ona faamuamua, ma faaali atu i ona soʻo e faapea, e ao ona foia o latou feeseeseaiga a o leʻi faia a latou taulaga. I aso nei, o taulaga o loo manaomia mai Kerisiano, o ni taulaga faaleagaga—“le taulaga o le viiga . . . , o le fua lea o tatou laugutu, o loo faafetai atu i lona suafa.” (Eperu 13:15) Peitai, o loo tumau pea le aogā o le mataupu silisili. Ua faapena foi ona taʻua e le aposetolo o Ioane, o le a leai se aogā pe a fai mai se tasi e alofa i le Atua, ae ita i lona uso.—1 Ioane 4:20, 21.

E mālie, auā o le tagata lea ua ia manatuaina e iai se mea o loo ita ai lona uso ia te ia, o ia e tatau ona faia le laasaga muamua. O le loto maulalo lea ua ia faaalia atonu o le a iu i ni iuga lelei. E masani lava, o le tagata lea ua aafia o le a lotomalie e toe faalelei ma lē ua oo mai ma taʻutino mai ni ona lava sese. Na faamanino mai e le Tulafono Faa-Mose e faapea, so o se mea e sese ona fai, e ao ona toe faaatoatoa lelei ma e tatau ona faaopoopo atu i ai ma lona vaega e lima. (Levitiko 6:5) O le toe faafoisia o le filemu, o faiā sologa lelei o le a faapena foi ona faigofie pe afai e faaalia e lē ua agasala lona faanaunauga e faia nisi mea e sili atu na i lo na o mea ua manaomia, i se uiga e sili atu ona malosi o lea faaupuga, ia toe faaleleia so o se mea na leaga ona o ia.

Peitai, e lē manuia pea i taimi uma taumafaiga ina ia toe faafoisia ni faiā filemu. Ua faamanatu mai e le tusi o Faataoto ia i tatou e faapea, e faigata tele ona foia ni feeseeseaiga ma se tasi o lē e faafaigata ona talilelei mai. Ua taʻua i le Faataoto 18:19: “O le tagata ua agaleagaina e lona uso, e sili o ia ona faigata i le ʻolo; o misa foi o uso e tusa ia ma faamaufaalava o le ʻolo.” Ua faitauina faapenei le isi faaliliuga: “O le uso ua aafia ona o se mea lē lelei e sili atu ona faigata ona toe faamalie na i lo o se aai malosi: Ma o a latou finauga ua pei o puipui maualuluga o se ʻolo.” (The Englishman’s Bible) Peitai, e foliga mai, o taumafaiga faamaoni ma le loto maulalo e ono iu manuia i tulaga o uso talitonu o ē faanaunau ina ia faafiafia le Atua. Ae i tulaga ua masalomia ai agasala matuia, e manaomia ai ona faaaogāina le fautuaga a Iesu ua tusia i le Mataio mataupu e 18.

Foiaina o Feeseeseaiga Matuia

“Afai e agaleaga mai lou uso ia te oe, ia e alu, ma aoai ia te ia tau lava o oulua ma ia. Afai e faalogo mai o ia ia te oe, ua e maua lou uso. A e afai e le faalogo mai o ia, lua te o ma se tasi, po o se toalua, ina ia faamaonia ai upu uma i le mau a le toalua, po o le toatolu. A le faalogo lava o ia ia te i laua, ia e taʻu atu i le ekalesia; pe afai e le faalogo lava o ia i le ekalesia, ia avea o ia ia te oe, ia pei o le faapaupau, po o le telona.”—Mataio 18:15-17.

Ae faapefea pe afai o se tagata Iutaia (po o se Kerisiano) na fesagai ma ni faafitauli matuia ma se isi o ona uso tapuai ia Ieova? O lē ua afaina ona o le agasala a se tasi, sa tatau ona ia faia le laasaga muamua. Sa tatau ona ia talanoaina mataupu e na o i laua lava ma lē ua agasala. O lona lē taumafai e aoaoina nisi mo lana itu i le mataupu, o le a foliga mai ai na te mauaina lona uso, ae maise lava pe afai sa na o ni lē femalamalamaai, na e mafai ona toe vave foia. O le a sili atu ona faigofie le foiaina o so o se mea, pe afai e na o le pau lava tagata e iloa le mataupu, ua na o ē o loo aafia ai.

Ae peitai, atonu e lē lava le laasaga muamua. Ina ia feagai ma lea tulaga, na fetalai ai Iesu: “Lua te o ma se tasi, po o se toalua.” O i laua nei o uluai molimau. Atonu o i laua ia na faalogo a o tautala taufaaleaga le isi tagata i le isi, po o i laua foi ia ua ave sa molimau i se maliega tusitusia lea ua toe feeseeseai ai nei tagata e toalua. I se isi itu, o i laua nei o loo ave, e ono avea ma molimau pe a oo ina tutupu aʻe so o se vala e pei o ni faamaoniga tusitusia pe tuugutu, e fai ma faamautinoaga pe afai o le a sailia le mafuaaga o le faafitauli. O i inei foi la, e ao ai i se vaega toaitiiti lava pe a mafai—“se tasi po o se toalua”—ona pau ia o ē e iloaina le faafitauli. O lenei faiga o le a puipuia mai ai i le oo ina leaga tele tulaga o mea, pe afai o le mataupu ua na o se lē femalamalamaai lava.

O ā lagona e tatau ona iai i le tagata ua aafia ona o se sese a se tasi? Po o le a ia taumafai ea e faalumaina lona uso Kerisiano ma manao i lea uso ina ia tootuli mai ia te ia? E tusa ai ma le fautuaga a Iesu, e lē tatau i Kerisiano ona vavevave e taʻuleagaina o latou uso. Afai ua taʻutino e lē ua agasala lona sese, ua faatoese atu, ma ua taumafai e toe faasaʻoina mataupu, o lona uiga la, o lē na aafia ona o le agasala ua ia toe ‘maua lona uso.’—Mataio 18:15.

Afai sa lē mafai ona foia le mataupu, sa tatau la ona avatu i le faapotopotoga. I le amataga lava, sa faauiga ai lenei mea i toeaina Iutaia, ae mulimuli ane, ua faauiga atu i toeaina o le faapotopotoga Kerisiano. Atonu sa tatau ona faateaeseina mai i le faapotopotoga lē sa faia se mea sese ae lē salamō. O le uiga lena o le faaupuga e faapea, ia manatu ia te ia “ia pei o le faapaupau, po o le telona,” o ni tagata sa taumamao ese mai ai tagata Iutaia. O lenei laasaga matuia e lē mafai ona faia toatasi e so o se Kerisiano. Ua na o toeaina tofia lava, o ē ua fai ma sui o le faapotopotoga, ua na o i latou lava ua iai le pule e faia ai lea gaoioiga.—Faatusatusa i le 1 Korinito 5:13.

O le ono faateaina o sē ua agasala ae lē salamō e faaalia ai, e lē o faasino atu le Mataio 18:15-17 i ni feeseeseaiga laiti. Sa faatatau e Iesu i agasala matuia, ae o ni agasala e ono foiaina i le va o ni tagata se toalua o aafia ai. Mo se faaaoaoga, atonu o le agasala, o se tala taufaaleaga, ua matuā aafia ai le igoa lelei o lē o loo aafia ai. Pe ono faasino foi i ni mataupu tau tupe, auā i fuaiupu o loo sosoo mai ua taʻua ai le tala faatusa a Iesu e uiga i se auauna lē alofa o lē na faamagaloina mai sana aitalafu telē. (Mataio 18:23-35) O se nonoga tupe ua lē totogia i le taimi atofaina atonu ua na o se faafitauli laitiiti e ono faigofie lava ona foia i le va o ni tagata se toalua. Ae mafai ona avea ma agasala matuia, e taʻua o le gaoi, pe afai e teena ma le loto i ai e lē na nonoina, lona toe totogia o le aitalafu.

O isi agasala e lē mafai ona foiaina i le na o le va o Kerisiano se toalua. I le Tulafono Faa-Mose, o agasala matuia sa tatau ona lipotia. (Levitiko 5:1; Faataoto 29:24) E faapena foi i agasala tugā e aafia ai le mamā o le faapotopotoga e ao ona lipoti atu i toeaina Kerisiano.

Ae peitai, o le tele o faagaulemalie i le va o Kerisiano e lē aofia ai i lenei taualumaga.

Pe Mafai ona Tau ina E Faamagalo?

I le taimi lava na maeʻa ai ona faamatala e Iesu le auala e foia ai ni feeseeseaiga matuia, na ia aʻoaʻo atu ai loa se isi lesona tāua. Tatou te faitau i ai e faapea: “Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea loʻu uso ia te au, ma ou faamagalo ia te ia? seia atu fitu ea? Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.” (Mataio 18:21, 22) I se isi taimi na taʻu atu ai e Iesu i ona soʻo ina ia faamagalo atu e “faafitu i le aso.” (Luka 17:3, 4) Ua manino mai la, ua fautuaina soʻo o Keriso ina ia foiaina o latou feeseeseaiga e ala i le nofosauni e fefaamagaloai.

O le itu lenei o loo manaomia ai ni taumafaiga talafeagai. Na faapea mai le tagata lea na taʻua lana faamatalaga i le amataga: “O isi uso e matuā lē iloa lava pe faapefea ona faamagalo atu.” Na ia toe faaopoopo mai: “E pei e teʻi o latou foliga pe a fai atu i ai se tasi, e mafai ona latou filifili pe faamagalo, mo le mafuaaga muamua ma o le sili foi lea, ina ia maua ai pea le filemu i le faapotopotoga Kerisiano.”

Na tusi le aposetolo o Pauro e faapea: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso [“Ieova,” NW] ia te outou, ia faapea foi outou.” (Kolose 3:13) O lea la, a o tatou leʻi ō atu i se uso o lē atonu na faia se mea ua faatiga ai ia i tatou, e lelei pe a toe manatunatu i fesili nei: Pe aogā ea ona talanoa atu ia te ia e tusa ai o lona sese? Pe ua matuā faafaigata ea ona ou faagalo ni feeseeseaiga ua tuanai, i se agaga moni o le Faa-Kerisiano? Pe ana faapea o aʻu lea o loo i lona tulaga, pe o le a ou lē manao ea mo se faamagaloga? Ma pe afai ou te filifili ina ia lē faamagalo atu, pe mafai ea la ona ou faatalitalia le tali mai o le Atua i aʻu tatalo ma faamagalo mai ia te aʻu? (Mataio 6:12, 14, 15) O na fesili atonu o le a fesoasoani ai ia i tatou e faamagalo atu.

Ona o ni Kerisiano, o se tasi o a tatou avega tauave tāua, o le faatupuina lea o le filemu i le faapotopotoga a tagata o Ieova. O lea la, seʻi o tatou faaaogāina le fautuaga a Iesu. O le a fesoasoani lenei ia i tatou e nofo sauni ai e faamagalo atu. O lena agaga faamagalo o le a maua ai le alofa faaleuso, lea ua avea ma faailoga e mataulia ai soʻo o Iesu.—Ioane 13:34, 35.

[Ata i le itulau 23]

E mafai e Kerisiano ona foia o latou feeseeseaiga e ala i le usitaia o le fautuaga a Iesu