Na Tauia i Laua Ona o le Savavali ma le Lē Matauleagaina
E FAAMANUIA ma tauia e Ieova ana auauna faamaoni. Atonu e umi se taimi latou te faatalitali ai ina ia latou vāai i le auala e faataunuuina ai fuafuaga a le Atua, ae maeu se fiafia pe afai e tofo i ana faamanuiaga!
Sa faataʻitaʻia lelei mai lenei mea i le luaafe tausaga ua mavae i le tulaga o le faitaulaga Iutaia o Sakaria, ma lana avā o Elisapeta, o i laua uma o lo sā Aronā. Na folafola atu e le Atua na te faamanuiaina tagata Isaraelu ma faatoateleina a latou fanau pe afai latou te auauna ia te ia ma le faamaoni. Sa ia fetalai mai, o fanau o se taui. (Levitiko 26:9; Salamo 127:3) Ae peitai, sa leai se fanau a Sakaria ma Elisapeta, seia oo lava ina matuā matutua i laua.—Luka 1:1-7.
Ua faapea mai le Tusi Paia, o Sakaria ma Elisapeta, “sa amiotonu i laua i luma o le Atua, o savavali i poloaiga ma tulafono uma a le Alii e le mataʻuleagaina.” (Luka 1:6) Sa alolofa tele i laua i le Atua, o lea sa lē o se avega mamafa ia i laua le savavali i se ala amiotonu ma tausi i ana poloaiga.—1 Ioane 5:3.
Faamanuiaga e Leʻi Faatalitalia
Seʻi o tatou toe foi atu i le faaiuiuga o le tau e totogo ai mea po o le amataga o le tau mafanafana i le tausaga e 3 T.L.M. O le taimi lena o loo pule ai Herota le Sili o se tupu i Iutaia. I se tasi aso, na ulu atu ai le faitaulaga o Sakaria i le Mea Paia o le malumalu i Ierusalema. A o faapotopoto tagata i fafo o le malumalu e tatalo, ae o loo ia faamuina mea manogi i le fata faitaulaga auro. Ai ona sa manatu i lenei auaunaga e faapea o le vaega aupito sili lenei ona mamalu o auaunaga i aso faisoo, ua faia ai lenei auaunaga pe a uma ona ofoina atu o le taulaga. Atonu pe na o le faatasi lava ona maua e se faitaulaga lenei faaeaga i lona olaga atoa.
Ua matuā maofa lava Sakaria i le mea ua ia vaaia. Ioe, o le agelu a Ieova o loo tu mai i le itu taumatau o le fata faitaulaga e mu ai mea manogi! Sa atuatuvale ma mataʻu lenei faitaulaga ua matua. Ae ua faapea mai le agelu: “Sakaria e, aua e te mataʻu; auā ua faafofogaina lau tatalo; e fanau lau avā o Elisapeta sou atalii, e te faaigoa ia te ia o Ioane.” Ioe, sa faafofogaina e Ieova tatalo faatauanau a Elisapeta ma Sakaria.—Luka 1:8-13.
Ua faaopoopo mai le agelu: “E ia te oe le fiafia ma le olioli; e toatele foi e fiafia i lona fanau mai. Auā e sili o ia i luma o le Alii; e le inu o ia i le uaina po o le ʻava; e faatumuina foi o ia i le Agaga Paia e afua ina fanau mai o ia.” O le a avea Ioane ma Naseri i lona olaga atoa e faatumuina i le agaga paia o le Atua. a faaauau mai le agelu: “E faaliliu e ia le fanauga a Isaraelu e toatele i le Alii lo latou Atua. E muamua atu o ia i ona luma ma le loto o Elia ma lona faamalosi, e faaliliu e ia loto o mātua i le fanau, e faaliliu foi e ua faalogogata i le poto o e amiotonu; e sauni le nuu e faatatauina mo le Alii.”—Luka 1:14-17.
Ua fesili atu Sakaria: “Pe faapefea ona ou iloa le mea nei? auā ua ou toeaina, o laʻu avā foi ua loomatua ia.” Ua tali mai le agelu: “O aʻu o Kaperielu, o lē tu i luma o le Atua; ua auina mai aʻu e fai atu, ma taʻu atu ia te oe lenei tala lelei. Faauta foi, e gūgū oe, e te le magagana seia oo i le aso e fai ai nei mea, auā ua e le talitonu mai i aʻu upu, o mea ia e taunuu lava pe a oo i ona po.” Ina ua sau i fafo Sakaria mai le malumalu, ua lē mafai ona tautala o ia, ma ua manatu tagata e faapea, ai na vaaia e ia se mea uiga ese. Na pau lava le mea na ia faia, o le faia o tāga e faailoa atu ai ona manatu. Ina ua uma lana auaunaga, ona toe foi atu lea o ia i lona aiga.—Luka 1:18-23.
Pogai o le Olioli
E pei lava ona folafolaina mai, e leʻi pine ae maua e Elisapeta se mea e pogai ai ona olioli. Ua oo ina to o ia, ua aveesea ai le luma o le lē fanau. O lona tauaiga o Maria, ua olioli foi o ia, auā ua taʻu atu e le agelu lava lea o Kaperielu ia te ia e faapea: “Faauta foi, o le a to oe, ma e fanauina se tama tane, e te faaigoa ia te ia o Iesu. E sili o ia, e taʻua foi o le Alo o le Silisili ese; e foai atu e le Alii o le Atua ia te ia le nofoaiga a Tavita lona tamā.” Ua loto malie Maria e avea o ia ma “auauna teine a Ieova.”—Luka 1:24-38, NW.
Ua faanatinati atu Maria i le aiga o Sakaria ma Elisapeta i se aai i le atunuu maugā o Iutaia. Ina ua faalogo mai Elisapeta i le ofo alofa atu o Maria, ona osooso ai lea o le tama i lona manava. I lalo o le taaʻiga a le agaga paia o le Atua, na alaga ai ma le leo tele Elisapeta: “Amuia oe i fafine, amuia foi lē a fanau mai ia te oe. Pe faapefea foi lenei mea, ina ua sau le tinā o loʻu Alii ia te aʻu nei? Faauta foi, ua oo mai le leo o lou alofa i oʻu taliga, ona osooso ai lea o le tama i loʻu manava ma le olioli. E manuia foi le fafine e talitonu, auā e taunuu upu na fetalai mai ai le Alii ia te ia.” Ua tali atu i ai ma le matuā olioli Maria. E tolu masina na nofo ai o ia ma Elisapeta.—Luka 1:39-56.
Ua Fanau Ioane
I le taimi tonu lava na atofaina, na fanaua ai e Elisapeta ma Sakaria ua matutua se tama tama. I le aso lona valu, na peritomeina ai le pepe. Na mananao tauaiga e faaigoa le tama ia Sakaria, ae ua faapea atu Elisapeta: “Aua; e igoa lava o ia ia Ioane.” Pe sa malie i ai le loto o lana tane o loo gūgū pea? Ua ia tusia i se papatusi e faapea: “O Ioane lona igoa.” Ona matala loa lea o le laulaufaiva o Sakaria, ma amata ona tautala ma faamanū atu ia Ieova.—Luka 1:57-66.
I le faatumuina i le agaga paia, na perofeta ane ai le ositaulaga ua tumu i le olioli. Ua tautala o ia e peiseai ua uma ona faatuina le Faaola na folafolaina mai—‘le nifo o le olataga i le aiga o Tavita’—e tusa ai ma le feagaiga ma Aperaamo e uiga i se Fanau e manuia ai atunuu uma. (Kenese 22:15-18) I le avea o le teuteu ala o le Mesia, o le a alu atu ai le atalii o Sakaria na fanauina e ‘muamua atu ai i luma o Ieova e aʻoaʻoina tagata i le malamalama o le faaolataga.’ A o mavae atu tausaga, sa tupu le tino o Ioane ma ua malosi lona loto.—Luka 1:67-80.
Tauia i le Tele o Faamanuiaga
O Sakaria ma Elisapeta, sa o ni faaaoaoga lelei o le faatuatua ma le onosai. Sa faaauau pea ona la auauna ma le faamaoni ia Ieova e ui lava sa tatau ona la faatalitali i le Atua, ma na faatoʻā oo mai o la faamanuiaga sili ina ua matuā matutua lava i laua.
Peitai, maeu ni faamanuiaga na olioli ai Elisapeta ma Sakaria! I le faagaeega a le agaga o le Atua, na perofeta ane ai i laua uma. Sa faaeaina i laua e avea ma mātua ma faiaʻoga o le teuteu ala o le Mesia, o Ioane le Papatiso. E lē gata i lea, sa silasila le Atua ia i laua o ni tagata amiotonu. E faapena foi i latou i aso nei o ē e tausia se auala faaleatua, e mafai ona maua se tulaga tauamiotonuina i luma o le Atua ma maua le tele o taui faamanuiaina ona o le savavali ma le lē matauleagaina i poloaiga a Ieova.