Lipoti a Ē Faalauiloa le Malo

“Ia Tetee atu i le Tiapolo, ona Sola Ese ai lea o Ia ia te Outou”

I LE uluai senituri, o se vaega o tagata fai “togafiti faataulaitu” i Efeso na latou tali atu i le feau faa-Kerisiano e ala i le susunuina i luma o le lautele o ā latou tusi faataulaitu. (Galuega 19:19) O le tau o nei tusi e tusa ma le 50,000 tupe ario. Afai o loo faatatau le tala a le Tusi Paia i le tupe ario a Roma o le tenari, e tusa lena ma le $37,000 Amerika pe a itiiti mai!

Ua toatele nisi i aso nei o ē na iai a latou tusi e faatatau i faiga faaagaga, ae na faaalia le maumauai e pei o na tagata Efeso anamua. Seʻi manatunatu i le tala i se mea na tupu mai Kanata.

Pe ā ma le lima tausaga ua tuanai, na feiloai ai se tasi o Molimau a Ieova sa auai i le galuega talaʻi mai lea fale i lea fale ma se fafine e suafa i a Nora, o lē na tosoina o ia i totonu o lona fale. I ana sailiiliga ua leva ona faia mo le tele o tausaga i mea faaleagaga, na oo ai ina iai i a Nora se faaputuga e faitau selau o tusi i mea faalelotu ma faiga faataulaitu, ae na ia fia iloa po o ā fā a le Tusi Paia e faatatau i le faamoemoe mo ē ua maliliu. Na ofoina i a te ia e le Molimau le sāvali O le ā le Faamoemoe mo Ē Pele ua Maliliu? Na taliina fesili a Nora, ma na faia sana tusiga o mekasini o Le Olomatamata ma le Awake!

Mulimuli ane, na siitia o ia i se isi nofoaga ma na lē toe feiloai ma Molimau a Ieova. Ae sa faaauau pea ona maua ana mekasini mai le meli i lona tuatusi fou. Sa ia ʻotaina foi nisi o lomiga e faavae i le Tusi Paia na taʻua i mekasini. Ina ua mavae sina taimi, ona oo atu lea o se tasi o Molimau a Ieova i lona fale. I lona fiafia ona o le taliina tuusaʻo mai le Tusi Paia e le Molimau o ana fesili, na valaaulia ai e Nora o ia e toe foi atu mo se isi talanoaga atili.

Ae sa faafaigata ona toe maua Nora e lea Molimau. Sa lē taulau ona maua o ia i toe asiga sa faia i taimi eseese o le aso ma taimi eseese foi o le vaiaso. Ae sa iu ina tauia le faamaoni o lea tuafafine, ma faapea ona ia maua ai ni iuga lelei. Na amataina se suesuega faifai pea faale-Tusi Paia, lea sa masani ona manao Nora e faia faatolu i le vaiaso. O mea sa ia aʻoaʻoina na uunaia ai o ia e taʻu atu i uo ma aiga, ma iu ai ina mananao le toatolu o i latou ia e faia ni suesuega faale-Tusi Paia ma Molimau a Ieova.

E ala i lana suesuega, na iloa ai e Nora le iai o le tele o lotu sese ma perofeta pepelo, ae na o le tasi lava le ala e tau i le ola. Sa ia sailia ni tali i ana fesili i totonu o lotu sese mo le tele o tausaga, ae ina ua ia aʻoaʻoina le mea ua fai mai ai le Tusi Paia e faatatau i temoni, sa ia gaoioi loa e pei ona faia e tagata Efeso anamua, lea o loo taʻua i le Galuega 19:19. Sa ia aveesea ia tusi mai lana fatatusi, ma i ni nai aso sa ia faatamaia le sili atu i le afe tusi e faatatau i faiga faaagaga ma aʻoaʻoga sese faalotu. Sa iai i na tusi na faatamaia se seti tusi, e fa tusi e iai, e sili atu lona tau ma le $800!

Ona o le lē fiafia o temoni i ia gaoioiga a Nora, na latou faataugā ai i a te ia pe ā ma le lua vaiaso. Peitai ane, sa leʻi mafai e nei agaga leaga ona taofia o ia mai le faaauauina o lana suesuega faale-Tusi Paia, ma lona aufaatasi atu ma le faalapotopotoga faaonaponei a Ieova.

O mea tutupu faapena ua faataitaia lelei ai le moni o upu a le Tusi Paia e faapea: “O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou.”—Iakopo 4:7.