Fesili Mai le Au Faitau

I nei taimi faigata tau tamaoaiga, e anoanoai tagata ma kamupani ua iu ina faailoa atu ua gau ua lē mafai ona totogi a latou aitalafu. Po o se mea tatau faale-Tusi Paia mo se Kerisiano ona faapea atu ua gau ua lē mafai ona totogi ana aitalafu?

O le tali i lenei fesili ua saunia ai se faataitaiga lelei i le auala ua ofo mai ai i a i tatou e le Afioga a le Atua se taiala aogā i mataupu ia e aliali mai o ni mea patino faaonaponei. E tele atunuu e iai a latou tulafono faatatau i le tulaga pe a gau se tasi ua lē mafai ona totogi aitalafu. E eseese lava atunuu ma a latou tulafono, ma e lē mo le faapotopotoga Kerisiano e tuuina atu ni fautuaga faaletulafono i lenei mataupu. Ae seʻi o tatou sailia se manatu atoa o le sauniuniga faaletulafono pe afai ua gau ua lē mafai ona totogi ia aitalafu.

O le tasi o mafuaaga ua faatagaina ai e pulega faalemalo tagata ma pisinisi e tautino atu e faapea ua gau, ina ia tuuina atu ai se puipuiga i ē o faaune atu tupe faaaitalafu, mai tagata po o pisinisi o aitalafuina tupe po o nofo aitalafu ae ua lē totogia mea na latou aitalafuina. Mo i latou e ōna tupe faaune, e foliga mai e na o le pau lava le auala, o le talosaga atu lea i faamasinoga ina ia tautino mai e lē o nofo aitalafu e faapea, ua gau, ua lē mafai ona totogi lana aitalafu, ona mafai loa lea e i latou na faaune atu tupe, ona faasoa ana mea totino e avea o se vaega e totogi ai le aitalafu.

O le isi auala e aogā ai le tautino atu faapea ua gau, ua lē mafai ona totogi aitalafu, ina ia puipuia ē o nofo aitalafu, o ē o le mea moni ua lē o mafai ona latou faamalieina ē o latou nofo aitalafu ai. Atonu ua faatagaina lē o nofo aitalafu e tautino atu e faapea o ia ua gau, ua lē mafai ona totogia lana aitalafu, i lena tulaga, e mafai ai e ē o faaune atu tupe ona aveesea nisi o ana mea totino. Ae faatagaina pea o ia e le tulafono e taofia lona fale, po o nisi o ana mea totino, ma i lea, ua mafai ai ona ia ola saoloto mai le faamataʻuina i le aveesea o ana mea po o le maua uma foi e lē o ia nofo aitalafu ai.

E manino lava la, o nei tulafono ua faia ma le manatu ina ia tuuina atu ai sina puipuiga i itu uma e lua e tusa ai ma tulaga tau tupe ma faiga faapisinisi. O lea la, seʻi o tatou matauina po o le ā le fautuaga aogā ua ofoina mai e le Tusi Paia.

O le a faigata mo se tasi ona faitau le Tusi Paia mai le amataga e oo i le faaiuga e aunoa ma le iai o se lagona e faapea, e lē o faalaeiauina e le Tusi Paia le faia o ni aitalafu. Ua tatou maua lapataiga faapena i le Faataoto 22:7: “E pule le mauoa i e matitiva; e auauna foi lē no mea i le ua au mai ai ana mea.”

Ia manatua foi le faataoto a Iesu i le Mataio 18:23-34 o loo aafia ai se auauna o lē sa matuā telē lava sana aitalafu. “Ona fai atu lea o lona alii ia faatauina o ia, ma lana avā, ma ana fanau, atoa ma ana mea uma,” ae na musu le matai, o ia foi o se tupu, o lea, na ia faapalepale ai ma faaalia le alofa mutimutivale. Ae ina ua faamaonia mulimuli ane le leai o se alofa mutimutivale o lena auauna, na poloaiina ai o ia e le tupu ina ia ‘tuuina atu o ia i ē faataumaoi o i le falepuipui, seia tauia mai e ia o mea uma na ia aitalafu ai.’ E manino lava la, o le auala sili ona lelei, o le ala ua fautuaina e tatau ona uia ia alofia le faia o ni aitalafu.

Sa faia foi e auauna a le Atua i Isaraelu anamua feutagaiga faapisinisi, ma i nisi taimi, sa faia ai le aitalafu mai ma le faaune atu o ni tupe. O le ā na faatonuina i latou e Ieova e faia? Afai sa manao se tasi e aitalafu tupe ina ia faia ai pe ina ia faalauteleina se pisinisi, o se faiga faaletulafono ma o se mea masani mo se tagata Eperu le tuuina atu o se faasiliga po o se pasene. Ae peitai, sa uunaia e le Atua ona tagata ina ia aua neʻi manatu faapito pe a faaune atu ni mea i se tagata Isaraelu ua mativa; e lē tatau ona latou maua mai ni tupe faasili mai i se tagata o loo i tulaga faigata i le totogia o se pasene. (Esoto 22:25) Ua faapea mai le Teuteronome 15:7, 8: “Afai e ia te oe se tagata mativa o sou uso . . . ia e matuā faamafola atu lou lima ia te ia, ma e matuā avatu lava i ai o mea ia tusa ma lona mativa, ua mativa ai o ia.”

E faapena foi le agalelei ma le magafagafa na faaatagia i tulafono e faia ai se feagaiga ina ia lē mafai ai e lē o faaune atu mea ona taofia uma mea e ola ai lē o nofo aitalafu, e pei o se maaolo a se aiga po o se ofu e manaomia ina ia faamafanafana ai lea tagata i le po.—Teuteronome 24:6, 10-13; Esekielu 18:5-9.

O le mea moni, e leʻi talia ma faatatauina e tagata Iutaia uma le agaga o na tulafono alofa mai lo latou Faamasino sili ma Lē Faitulafono. (Isaia 33:22) Sa faileagaina e nisi tagata Iutaia matapeapea ō latou uso. I aso nei foi, o nisi tagata o ē faaune atu mea, atonu e agaleaga ma lē magafagafa i mea latou te manaomia mai ē o nofo aitalafu, e oo lava i se Kerisiano faamaoni o lē ua lē mafai ona faia se totogiina o le aitalafu i lena taimi ona atonu sa iai se mea e lē maalofia ua tupu i a te ia. (Failauga 9:11) Ona o lo latou lē fetuutuunai, ua latou tāpā ai ina ia vave ona totogi atu aitalafu, atonu o le a faapogaia ai e se tagata faaune tupe o le lalolagi le tagata o nofo aitalafu na te faia se laasaga e puipuia ai o ia lava. Faapefea? I nisi o tulaga, e na o le pau lava le mea e talia e ē o faaune atu tupe, o le faia o le laasaga faaletulafono, i le faailoa atu e faapea ua gau lē o aitalafu, ua lē mafai ona ia totogia le aitalafu. O lea, o se Kerisiano o lē atonu e lē o matapeʻapeʻa po o faatamala i le totogia o ana aitalafu, o le a iu ina faapea atu ua gau, ua lē mafai ona totogi ana aitalafu.

E ui i lea, e tatau foi ona tatou iloa e uiga i le isi itu o le faafitauli. Atonu ua nofo aitalafu se Kerisiano ona ua leai se pulea totino i mea, ia po o le ā foi le tele na te faaaluina, po ua le faautauta foi i le faia o ana faaiuga tau pisinisi. Pe tatau ona ia lē manatu mamafa i le aitalafu ma vave saili se mapusaga e ala i le faapea atu o ia ua gau, ua lē mafai ona totogi lana aitalafu, ma faamanualia ai i isi ona o lona lē fuafua tatau? E lē o faamaonia e le Tusi Paia sea tulaga lē manatu mamafa i mea tau tupe. Ua uunaia e le Tusi Paia auauna a le Atua ina ia avea la latou ioe, o le ioe. (Mataio 5:37) Ia manatua foi, ua fautuaina e Iesu le fuafua muamua o le tau po ua lava, a o leʻi amataina ona fau se olo. (Luka 14:28-30) Ina ia ogatasi ma lena mea, e ao i se Kerisiano ona manatunatu muamua i iuga lē moomia e ono tulai mai, ae na te leʻi faia se aitalafu. O le taimi e manatu ai e fia faia se aitalafu, e tatau foi ona ia lagona lana matafaioi ina ia toe totogi atu i tagata po o kamupani tupe o loo ia aitalafu ai. Afai ua manatu le toatele ua matauleagaina se Kerisiano po ua lē maufaatuatuaina, e ono mafai ai i lea ona ia faaleagaina le igoa lelei na ia taumafai e faia, ma ua lē toe taulelei ai e tagata e lē o i le faapotopotoga.—1 Timoteo 3:2, 7.

Ia manatua, ua taʻu mai e le Salamo 15:4 i a i tatou e uiga i le ituaiga o tagata e talia e Ieova. Ua tatou faitau ai e faapea: “E tauto ia [lē ua faamaonia e Ieova] i le mea e tiga ai o ia, ae le ʻalo ai.” Ioe, e faatalitalia e le Atua Kerisiano ina ia faia i ē o latou nonofo aitalafu ai, e pei ona latou mananao e fai atu i a te i latou.—Mataio 7:12.

I le aotelega la, e lē o faasaina e le Tusi Paia le ono mafai ona maua e se Kerisiano se puipuiga i tulafono ua ofoina mai e Kaisara faatatau i le lē mafai ona totogia o lana aitalafu, pe afai ua oo atu i se tulaga e sili ona faigata ua lē mafai ai ona ia totogia. Ae peitai, e faatalitalia Kerisiano ia sili ona faamaoni ma maufaatuatuaina. I lea, e ao ai ona avea i latou ma faaaʻoaʻo lelei i o latou faanaunauga faamaoni ia faafetaiaia ā latou avega tauave tautupe.