Le Tusi Paia—O le ā Lona Tāua Moni?
UA FAI mai se tasi tagata tausi aiga e faapea: “O le Tusi Paia o se mealilo, o se tusi sa lē fuafuaina e malamalama i ai.” Ae ua faapea mai foi se tasi: “Ua ou iloa o le Tusi Paia o se tusi e tāua, ae e lē tele soʻu iloa i ai. E faigata tele ona malamalama i ai.”
Na taʻua i le Toronto Star e faapea: “E toatele Kerisiano e itiiti . . . lo latou iloa e uiga i le Tusi Paia.” Na faapea mai se tamaitai Katoliko: “O le iai o se Tusi Paia, e lelei ai oʻu faalogona. E filemu ai loʻu loto.” Fai mai se tagata faifaiva: “O le Tusi Paia, e pei o se tapasā na te taitaiina atu se tasi mai le olaga faigata ma le fesouaina i se nofoaga saogalemu.” I upu a sē na avea muamua ma tagata o le Lotu Hinitu e faapea: “O le Tusi Paia, o le Afioga a le Atua, o se meaalofa i tagata ma o se vailaau aogā mo mafatiaga faaleagaga.”
E tele ma eseese manatu i le tāua moni o le Tusi Paia. Ae o le ā la lona tāua moni?
O le Tusi Paia, o se tusi e aupito sili ona tāua ua iai, ma ua sili atu foi lona faasalalauina. I ona itulau, o loo iai tali i faafitauli aupito sili ona lavelave ua faapea ona tofo i ai tagata, po o ia o le a latou fetaiai. O le aogā o ana fautuaga, e lē ma faatusaina. O tapulaa tauamio o loo aumaia ai, e lē tatau ona tuulafoaia. O lana feau, e malosi ma aogā. O lenei tusi e lē mafaatusaina lona tāua, e tatau ona aumaia mai a tatou fata tusi ma matuā suesueina ma le faaeteete ma le faamaoni.
E mafai ona tatou tatalaina le Tusi Paia ma le matuā mautinoa ua saʻo aʻiaʻi, maufaatuatuaina, ma moni. O mea na tutupu i le talafaasolopito o loo faamauina ai, ua faamautinoa mai e le talafaasolopito o le lalolagi. Ua faamaonia pea i suesuega mai mea na eliina aʻe i le eleele le moni ma le faamaoni o le Tusi Paia. O le faamaoni o tusitala e toʻa 40 pe ā o le Tusi Paia, ua faaesea ai i latou e faapea o ni tane faamaoni ma le faatuatua. O le autasi o tusi o loo iai i le Tusi Paia ua faailoa mai ai e leʻi māfua mai i se puna faaletagata. O mea tutupu o loo faamauina ai, o mea moni lava. O tagata o loo tautalagia ai, o tagata moni. O nofoaga ma vaipanoa o loo faasino atu i ai, e moni. E lē gata i lea, o loo i le Tusi Paia valoaga mataina, ua faailoa mai ai ma le lē mafaafitia e faapea, o Ieova le Atua, o le Tusitala o le Tusi Paia.—2 Peteru 1:21.
Ua faamautinoa e lo tatou Aʻoaʻo Sili e faapea, o le malamalama e uiga i lona finagalo ma fuafuaga, o le a mafai ona maua e i latou o ē fia iloa e faatatau i na mea. O le mea moni, ua taʻu mai e Ieova i a i tatou i se gagana malamalama e faapea, o lona finagalo, ia suesueina e ituaiga uma o tagata lana Afioga, “ma ia oo ina iloa lelei le upu moni.” (1 Timoteo 2:3, 4; Faataoto 1:5, 20-33) O le tasi lenei o mea aupito sili ona tāua e mafai ona tatou faia i lo tatou olaga. O se luitau ua faamalosia i tatou e tatau ona tatou faafesagaia. Sa malamalama uluai Kerisiano i lenei mea. Sa faagaeetia le tasi o i latou e faapea mai: “O laʻu tatalo foi lenei, ia faatuputeleina pea lava lo outou alofa, ma le iloa lelei, atoa ma le faautauta uma; ina ia masino ia te outou mea uiga eseese [“mea e sili ona tāua,” NW].”—Filipi 1:9, 10; Kolose 1:9, 10.
O le Tusi Paia, o le auala sili lea o fesootaiga a Lē na Foafoaina Mea e faailoa mai ai lona finagalo ma ana fuafuaga i le aiga faaletagata, ma o loo faamatala mai ai le auala e mafai ona ofi atu ai i tatou taitoatasi i lena fuafuaga. O loo faamauina ai foi mea na tutupu i aso ua mavae, ma o loo aumaia ai se ata manino o le lumanai. Ua faamatalaina mai i le Tusi Paia aʻoaʻoga saʻo ma faasaʻoina ai i tatou e tusa ma mea e ao ona tatou talitonu i ai pe leai. (Galuega 17:11; 2 Timoteo 3:16, 17) O loo saunia ai tulafono tau amio e ao ona ola ai le tagata, ma taitaiina ai tagata i ala e manuia ma fiafia ai. (Mataio, mataupu 5 e oo i le 7) O loo faamatilatila mai ai le Malo o le Atua, ua na o lea le faamoemoe mo le fanau uma a tagata ma faaalia ai le auala ua avea ai lana pulega ma mea faigaluega e faapaiaina ai lona suafa, ma faasilisiliina lana pule silisiliesee. Ua faamatala mai e le Tusi Paia le auala e manaomia ona tatou tausisia ina ia olioli ai i se faiā alofa ma vavalalata ma lo tatou Foai Ola, o Ieova.
E lē gata i lea, ua tutasi le Tusi Paia, ua na o lea le tusi e mafai ona taitaiina oe i le taui silisili o le a mafai ona maua e le fanau a tagata—le ola e faavavau i se lalolagi parataiso e avea o ni tagata lelei atoatoa. (Roma 6:23) Ua taʻu mai e le Alo e toatasi o Ieova i a i tatou e faapea: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) E mautinoa lava, o se tusi e faapena ona tāua, e ao ona faagaeetia ai i tatou e aʻoaʻo po o le ā e tatau ona tatou faia ina ia maua ai le taui o le ola e faavavau. O le Tusi Paia, o se tusi sa faia ma le manatu ia malamalama i ai, e pei ona o le a faaalia i le mataupu o sosoo mai.