Ua Taatele le Mataʻu i Ē ua Maliliu
Ua fai lava si leva ona goto o le la. Ua fai foi sina tuai ona e foi atu i le aiga na i lo o le mea sa e manao ai. A o e savali atu e pāsia le fanuatanu o le nuu, ua amata ona tātāvale lou moa. Ona o le taaligoligoa o le po, ua lālāvale ai ou taliga i so o se paʻō. Ae faafuasei loa ona e faalogo mamao atu i se leo ʻiʻivale, ua segia ai lou mauli. Ona faanatinati loa lea o lau laa—ua oo foi ina saputu le tātā o lou fatu—a o e agaʻi atu mo se puipuiga i lou aiga.
PE NA oo i a te oe na lagona popole a o e iai i se fanuatanu pe latalata atu foi i ai? Afai o lea, e lē taumatea ua taaina oe i se aʻoaʻoga faalotu lea o loo taatele i le lalolagi aoao—e faapea, e mafai e agaga o ē ua maliliu ona fesoasoani pe faaleagaina tagata ola.
E tele faiga faataulaitu ua tutupu mai ona o le talitonuga e faapea, e manaomia e tagata oti le fesoasoani a tagata ola, pe faapea, e mafai ona latou faaleagaina tagata ola pe a lē malilie. Mo se faataitaiga, i nisi atunuu o Amerika Latina, e toatele ua fai ma masani ona faatuina se tamai fale faatasi ma se koluse i se mea na oti ai se tagata mai se faalavelave faafuasei. E tutu ai e tagata molīgaʻo ma tuu ai fugalaau i inā ona o le taumafai e faaalia le naunau pe fesoasoani atu foi i le solu po o le agaga o le tagata ua maliu. I nisi o tulaga, ua lipotia mai ai le salalau atu o tala i le talia “faavavega” o tatalo, o lea ua amata ai e tagata ona asiasi atu pea i le nofoaga o le animita, le nofoaga laitiiti mo le solu po o le agaga o lē ua oti. O i inā latou te faia ai ni folafolaga mandas e faapea, afai o le a fesoasoani le tagata oti i a i latou e faataunuu pe maua mai se mea—atonu po o se faamalologa faavavega—o le a latou faaalia lo latou loto faafetai i se auala faapitoa. I se isi itu, atonu o le a lipotia mai e faapea, ua faaali mai le agaga o le tagata oti i le pouliuli o le po ma faamataʻu mai i latou o loo ola. E masani lava ona faapea mai, o na agaga, o ni penando, o loo ō mai e faatiga i tagata ola ona o mea na faia i aso ua mavae.
I le tele o atunuu, ua faia e tagata taumafaiga sili e faamalie ai “agaga” o ē ua maliliu. E faia ni faigaai tetele, ofoina atu taulaga, ma fai atu upu mālū—e faia nei mea uma ona o le taumafai e taofia le agaga o le tagata oti mai le toe tauimasui mai. Ua manatu i ai e faapea, o le faamalieina o le agaga, o le a iu ai i faamanuiaga ma taui mo i latou o loo ola.
Ua faapea mai se tasi lipoti mai Aferika: “E toatele ua talitonu e faapea, e leai lava se mea e ‘tupu fua pe tupu ona o le tulaga masani.’ So o se mea lava e tupu,—po o maʻi, mala, le lē fanau, faigata tautamaoaiga, le tetele naua o timuga po o mūgalā, faalavelave faafuasei, le lē autasi o aiga, ma le oti—ua manatu i ai e faapea, o agaga lē vaaia, e sili atu ona mamana, ua faapogaia nei mea uma.” Ua faapea mai se tasi lipoti: “Ua talitonu tagata e faapea, o agaga o ō latou tuaā o loo nonofo i se nofoaga i le lagi, ma o loo leoleoina pea ē o ola o ō latou aiga i le lalolagi. Ua talitonuina e faapea, ua iai i tuaā le mana e mafai ona latou faaaogaina e faamanuia ma puipuia ai ō latou aiga i le lalolagi, pe faasalaina ai foi i latou, e faalagolago lava i le po o āva atu aiga i ē ua oti po o tuulafoaia i latou.”
Ae pe ogatasi ma le Afioga a le Atua na talitonuga? O le ā lou manatu?
[Ata i le itulau 4]
O se “Animita” i Sili