Puapuaga o Tagata—Po o le a Faaiuina Ea?
O NI vaaiga matautia ina ua uma ona pa se pomu i se maketi tumutumu i Sarajevo; o faiga sauā na fasiotia ai tagata i Rwanda; o tamaiti matelaina i Somalia o loo tuualaga mo ni mea e ʻai; o aiga ua lē mautu o loo tau faavasega le tele o ā latou mea ua leiloloa ina ua mavae se mafuie i Los Angeles; ma tagata ua lē mafesoasoania i le tatafe o lologa i Bangladesh. O na vaaiga i puapuaga o tagata, o loo fesagai pea ma ō tatou mata i aso uma i TV po o mekasini ma nusipepa o loo tatou faitau ai.
O se iuga faanoanoa o puapuaga o tagata, ua avea ma pogai ua lē faatuatua ai nisi i le Atua. E tusa ai ma le faamatalaga a se tasi vaega faalelotu Iutaia i le Iunaite Setete e faapea: “O le iai o le leaga, ua aumaia ai pea se toatuga e taofia ai le faatuatua.” Ua faasino atu e tusitala i tagata na maliliu i falepuipui a Nazi e pei o le falepuipui i Auschwitz, faapea ma ē na maliliu i pomu e pei o lea na pa i Hiroshima. Fai mai ia tusitala: “O le fesili i le pe faapefea i se Atua fai mea tonu ma mamana ona faatagaina le faatamaia o le anoanoai o ola o tagata e lē sala, ua ōia ai loto fuatiaifo o tagata lotu, ma faigata ai i le mafaufau ona faavasega.”
E faanoanoa lava, ona o le aumaia pea o nei lipoti faaootia loto, ua iu ai ina tau leai ni faalogona ootia o tagata. Afai lava e lē o aafia ai ni uo ma aiga, ona faigata foi lea i le toatele ona iai ni ō latou lagona ootia i puapuaga o isi.
Ae peitai, o le mea moni, ona e iai ō tatou lagona alofa mutimutivale mo ē pele i a i tatou lava, ua taʻu mai ai se mea e uiga i Lē na Faia i tatou. Ua faapea mai le Tusi Paia, o le tagata na faia i le “faatusa o le Atua” ma “foliga ia [te ia].” (Kenese 1:26, 27, NW) E lē o le uiga o lenei mea e faapea, o tagata ua pei o le tino mai o le Atua. E leai, auā na faamatala mai e Iesu Keriso e faapea “o le Atua o le agaga,” ma o se “agaga e leai ni aano ma ni ivi.” (Ioane 4:24; Luka 24:39) O le faia i foliga o le Atua, ua faasino atu i lo tatou mafaia ona faaalia o uiga e pei o le Atua. O lea la, ona e lagona e tagata lautele le alofa mutimutivale mo i latou o ē o puapuagatia, e tatau ona tatou faia ai se faaiuga e faapea, o Lē na Foafoaina le tagata, o Ieova le Atua, e alofa mutimutivale ma e matuā faanoanoa o ia ona o ana foafoaga o loo puapuagatia.—Faatusatusa i le Luka 11:13.
O se tasi o auala ua faaalia ai e le Atua lona tiga alofa, e ala lea i le saunia mo tagata o se faamatalaga tusitusia e uiga i le pogai o puapuaga. Ua ia faia lenei mea i lana Afioga, le Tusi Paia. Ua faaalia manino e le Tusi Paia e faapea, na foafoaina e le Atua le tagata ina ia olioli i le ola, ae lē ina ia puapuagatia. (Kenese 2:7-9) Ua faaalia ai foi e faapea, o le uluai tagata na aumaia puapuaga i a i laua lava e ala i lo la teena o le pule amiotonu a le Atua.—Teuteronome 32:4, 5; Roma 5:12.
E ui lava i lenei mea ua tupu, ae o loo alofa mutimutivale pea le Atua mo tagata puapuagatia. Ua faaalia manino lenei mea i lana folafolaga, o le a faamutaina puapuaga o tagata. “Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4; tagaʻi foi i le Isaia 25:8; 65:17-25; Roma 8:19-21.
O nei folafolaga ofoofogia e faamaonia ai, o loo silafia lelei e le Atua puapuaga ua oo i tagata, ma ua uma ona ia filifili o le a faamutaina. Ae, o le ā moni lava na faapogaia puapuaga i le amataga, ma aisea ua faataga ai e le Atua e faaauau pea seia oo mai i ō tatou aso?
[Ē Ana le Ata i le itulau 2]
Cover and page 32: Alexandra Boulat/Sipa Press
[Ē Ana le Ata i le itulau 3]
Kevin Frayer/Sipa Press