Ia Tele le Alofa Mutimutivale

“Ia oofu outou i le alofa mutimuti vale, ma le agalelei.”—KOLOSE 3:12.

1. Aisea ua manaomia tele ai le alofa mutimutivale i aso nei?

E LEʻI iai lava se taimi muamua o le talafaasolopito ua toatele ai tagata ua manaomia le fesoasoani alofa mutimutivale. I le feagai ai ma maʻi, o le fia ‘aʻai, le leai o ni galuega, o solitulafono, o taua, le lē pulea, ma mala faanatura, e faitau miliona tagata ua manaomia le fesoasoani. Peitai e iai se faafitauli e sili atu ona matuia, o le tulaga matuā galala faaleagaga lea o tagata. Ua iloa e Satani ua puupuu lona taimi o totoe, ua ia “faasese [ai] i le lalolagi uma.” (Faaaliga 12:9, 12) O lea, ae maise lava i latou e lē o iai i le faapotopotoga Kerisiano moni, ua iai i se tulaga lamatia e maumau ai ō latou ola, ma ua lē o iai i le Tusi Paia se faamoemoe i le toetutu mo i latou o le a faasalaina i le taimi e oo mai ai le aso faamasino o le Atua.—Mataio 25:31-33, 41, 46; 2 Tesalonia 1:6-9.

2. Aisea ua faatuai ai Ieova i le faaoo mai o le faaumatiaga i ē amioleaga?

² E ui i lea, o loo faaauau pea ona faaalia e Ieova le Atua le onosai ma le alofa mutimutivale i ē lē lotofaafetai ma ē amioleaga i lenei taimi o le taufaasiusiuga o aso e gata ai. (Mataio 5:45; Luka 6:35, 36) Ua tutusa lava le mafuaaga ua faia ai lenei mea ma lea na ia faatuai ai i le faaooina o le faasalaga i le nuu lē faamaoni o Isaraelu. “O loo fetalai mai le Alii o Ieova, Ou te ola aʻu, ou te le fiafia lava i le oti o lē amio leaga, a ia liliu mai lē amio leaga ai lona ala, ma ola ai; liliu ia outou, ina outou liliu ese ia i o outou ala leaga; auā pe se a ea le mea tou te fia oti ai, le aiga o Isaraelu e?”—Esekielu 33:11.

3. O le ā le faaaoaoga ua i a i tatou o le alofa mutimutivale atu o Ieova i ē e lē o ni ona tagata, ma o le ā e mafai ona tatou aʻoaʻoina mai i lenei mea?

³ Na faalautele atu foi le alofa mutimutivale o Ieova i tagata amioleaga o Nineva. Na auina atu e Ieova lana perofeta o Iona ina ia lapataia i latou i le faaumatiaga na faamalumalu atu. Na latou talileleia le talaʻiga a Iona ma salamō. Na faagaeetia e lenei mea le Atua alofa mutimutivale o Ieova e taofia le faaooina atu o le faaumatiaga i le aai i lena taimi. (Iona 3:10; 4:11) Afai na lagona e le Atua le alofa i tagata o Nineva, o ē e maua le avanoa e toetutu mai ai, maeu foi la le tele o lona alofa mutimutivale e ao ona tatou faaalia i tagata i aso nei o ē o le a fetaiai ma le faaumatiaga e faavavau!—Luka 11:32.

Se Galuega o le Alofa Mutimutivale e Leʻi Faapea ona Faia Muamua

4. O faapefea ona faaalia e Ieova le alofa mutimutivale mo tagata i aso nei?

⁴ I le ōgatusa ma lona uiga totino o le alofa mutimutivale, ua poloaia ai e Ieova ana Molimau ina ia faaauau ona asiasi atu i ō latou tuaoi ma faaoo atu i ai le “tala lelei o le malo.” (Mataio 24:14) Ma pe a tali atu tagata ma le loto talisapaia i lenei galuega faasaoola, ona tatala loa lea e Ieova ō latou loto ina ia malamalama i le feau o le Malo. (Mataio 11:25; Galuega 16:14) E ao i Kerisiano moni ona faataitai atu i lo latou Atua i le faaalia lea o le tele o lō latou alofa mutimutivale, e ala i le toe asia o ē naunau fiafia, fesoasoani i a i latou i so o se tulaga e mafai ai, e ala i le faia o se suesuega faale-Tusi Paia. O lea, i le 1993, e silia ma le fa ma le ʻafa miliona Molimau a Ieova i atunuu e 231, na faaaluina le sili mamao atu i le tasi le piliona itula i le talaʻiga mai lea fale i lea fale, ma i le faia o suesuega faale-Tusi Paia ma ō latou tuaoi. O le iuga, ua maua ai e nei tagata fiafia fou le avanoa e tuuina atu ai ō latou ola i a Ieova ma auaufaatasi atu ai i ana Molimau papatisoina. O lea, ua tinou ai foi i latou i lenei galuega o le alofa mutimutivale e leʻi faapea ona faia muamua, mo le lelei o ni soo o faamoemoe e toe maua mai, o loo maileia i le lalolagi a Satani lea o loo mavae atu.—Mataio 28:19, 20; Ioane 14:12.

5. Pe a oo atu le alofa mutimutivale tauatua i lona mutaaga, o le ā o le a tupu i lotu o loo latou suiseseina le Atua?

⁵ Ua lē pine ona gaoioi loa lea o Ieova o se “toa” i le taua. (Esoto 15:3) Ona o le mutimutivale o le alofa mo lona suafa ma ōna tagata, o le a na soloiesea ai le amioleaga ae faavae aʻe se lalolagi fou amiotonu. (2 Peteru 3:13) O ē muamua taia i le aso o le toasa o le Atua, o lotu a Kerisinetoma. E pei lava ona lē faasaoina e le Atua lona lava malumalu i Ierusalema mai i le tupu o Papelonia, e faapena foi ona ia lē faasaoina faalapotopotoga lotu o loo suiseseina o ia. O le a uunaia e le Atua loto o sui o Malo Aufaatasi ina ia faaumatia Kerisinetoma ma isi ituaiga o lotu sese uma. (Faaaliga 17:16, 17) Ua folafola mai Ieova e faapea: “O aʻu nei foi, ou te le faasaoina, ou te le faapelepeleina; ou te taui atu a latou amio i luga i o latou ulu.”—Esekielu 9:5, 10.

6. O ā ala ua gaoioi ai Molimau a Ieova e faaalia le alofa mutimutivale?

⁶ A o totoe pea le taimi, ua faaauau ona faaalia e Molimau a Ieova le alofa mutimutivale mo ō latou tuaoi e ala i le talaʻi ma le maelega o le feau a le Atua mo le faaolataga. Ma e masani i tulaga e talafeagai ai, e fesoasoani atu foi i latou i tagata o ē o loo manaomia le fesoasoani faaletino. Peitai, e tusa ai i lenei vala, o lo latou tiute tauave muamua, o le tausia o manaoga o ō latou lava auaiga patino ma ē aiga atu i a i latou i le faatuatua. (Kalatia 6:10; 1 Timoteo 5:4, 8) O le tele o galuega laveai ua faia e Molimau a Ieova mo ō latou uso talitonu o ē ua puapuagatia i mala eseese ua avea o ni faataitaiga ofoofogia o le alofa mutimutivale. Peitai e lē faatalitali Kerisiano seiloga e oo mai ni mala ona faatoʻā faaali atu lea o le tele o le alofa mutimutivale. Latou te vave faaalia lenei uiga e faafetaiaia ai tulaga lelei ma tulaga faaletonu o le olaga i aso taitasi.

O se Vaega o le Tagata Fou

7. (a) I le Kolose 3:8-13, ua faapefea ona fesootai atu le alofa mutimutivale ma le tagata fou? (e) O le ā o le a faafaigofie ona faia e Kerisiano ona o le tele o le alofa mutimutivale?

⁷ E moni ua avea lo tatou tulaga agasala ma faatosinaga o le lalolagi a Satani ma mea e taofia ai lo tatou faaali atu o le tele o le alofa mutimutivale. O le mafuaaga lena ua uunaia ai i tatou e le Tusi Paia ina ia tatou tuu ese “le ita, o le lotoa, o le loto leaga, o le upu leaga, ma le upu matagā ai o [tatou] gutu.” Na i lo le faia o na mea, ua fautuaina i tatou ina ia ʻoofu i tatou i le tagata fou’—o se uiga e talafeagai ma le faatusa o le Atua. E muamua lava, ua poloaiina i tatou ina ia oofu i tatou “i le alofa mutimuti vale, ma le agalelei, ma le loto maulalo, ma le agamalu, ma le onosai.” Ona faailoa mai loa lea e le Tusi Paia i a i tatou le ala aogā e faaali atu ai nei uiga, i lona faapea mai: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii ia te outou, ia faapea foi outou.” O le a sili ona faigofie ona faamagalo atu pe afai ua tatou faatupuina aʻe le ‘tele o le alofa mutimutivale’ mo ō tatou uso.—Kolose 3:8-13.

8. Aisea e tāua ai le maua o se loto faamagalo?

⁸ I le isi itu, o le lē taulau ona faaalia o le faamagalo atu ma le alofa mutimutivale, e afaina ai la tatou faiā ma Ieova. Na faaalia ma le mautinoa lenei mea i le faataitaiga a Iesu e faatatau i le auauna lē loto faamagalo, o lē na faafalepuipuiina e lona matai “seia tauia mai ana mea uma.” Ua tatau lenei faiga i lena auauna, auā o se mea e ofo ai lona lē faaalia o le alofa mutimutivale i lona uso a auauna na aioi atu i a te ia mo le faaalia atu o le alofa. Na faaiu e Iesu lana faataitaiga i lona faapea atu: “E faapea foi ona faia ia te outou e loʻu Tamā o i le lagi, pe afai tou te le taitasi ma faamagalo ma o outou loto atoa i o outou uso.”—Mataio 18:34, 35.

9. Ua faapefea ona fesootai atu le tele o le alofa mutimutivale ma le vala e sili ona tāua o le tagata fou?

⁹ O le tele o le alofa mutimutivale o se vala tāua lea o le alofa. Ma o le alofa o le faailoga lea e mataulia ai le Faa-Kerisiano moni. (Ioane 13:35) O lea ua faaiu mai le faamatalaga a le Tusi Paia i uiga o le tagata fou e faapea: “A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:14.

O le Lotoleaga—E Taofia ai le Faaalia o le Alofa Mutimutivale

10. (a) O le ā e ono mafua ai ona mauaa le lotoleaga i ō tatou loto? (e) O ā iuga leaga e mafai ona oo mai ona o le lotoleaga?

¹⁰ Ona o le tulaga agasala o le tagata, e faigofie ai lava ona mauaa lagona o le lotoleaga i ō tatou loto. Atonu ua faamanuiaina se uso po o se tuafafine i ni tomai e masani ai, po o ni manuia faaletino tatou te lē o mauaina. Pe atonu foi ua maua e se tasi ni faamanuiaga po o ni faaeaga faapitoa faaleagaga. Pe afai tatou te lotoleaga i a i latou ia, pe o le a mafai ea ona tatou feagai ai ma i latou i le faaalia i ai o le tele o le alofa mutimutivale? Atonu e leai. Na i lo le fai faapea, o lagona lotoleaga atonu o le a mulimuli ane ai lava aliai mai i ni faamatalaga faitio po o ni faiga lē alofa, auā na fetalai Iesu e faapea: “O le tele o mea i le loto e tautala mai ai lona gutu.” (Luka 6:45) E ono lagolagoina e isi na faitioga. O lea o le filemu o se aiga po o le faapotopotoga o tagata o le Atua o le a ono faavevesia.

11. Na faapefea i uso e toasefulu o Iosefa ona lē tuua se avanoa mo le alofa mutimutivale i ō latou loto, ma o le ā le iuga?

¹¹ Seʻi manatunatu i le mea na tupu i se aiga e toatele. Na tupu le lotoleaga o atalii matutua e toasefulu o Iakopo i lo latou uso laitiiti o Iosefa ona sa avea o ia ma lē na alofa tele i ai lo latou tamā. O le mea na oo i ai, “ua le mafai ona [latou] tautala filemu ia te ia.” Mulimuli ane na faamanuiaina Iosefa i le tuuina atu i ai o ni miti mai le Atua, ua faamaonia ai foi i lea ua alofagia o ia e Ieova. Ua “atili ai ona . . . ʻinoʻino” ōna uso i a te ia ona o lenei mea. Ona talu ai sa latou lē faateaeseina le lotoleaga mai i ō latou loto, o lea na lē maua ai se avanoa mo le alofa mutimutivale i ō latou loto ma oo atu ai i le faia o le agasala matuia.—Kenese 37:4, 5, 11.

12, 13. O le ā e ao ona tatou faia pe a oso aʻe lagona o le lotoleaga i ō tatou loto?

¹² I se uiga faalealofa, na latou faatauina atu ai Iosefa e fai ma pologa. Ina ia nanā la latou mea sese, na latou ooleina lo latou tamā ma manatu ai faapea, ua ʻaina Iosefa e se manufeai. I tausaga mulimuli ane, na aliali mai i lumāmea la latou agasala ina ua faamalosia i latou e ō atu i Aikupito e faatau mai ai ni meaai ona o le oge. O lē na pule i le vaaiga o meaai o Iosefa, lea na latou leʻi iloaina, na ia tuuaia i latou o ni tagata ua aauina atu faalilolilo i le nuu, ma na taʻu atu i a i latou e aua neʻi toe ō atu i a te ia mo se fesoasoani seʻi vaganā ua ō atu ma avatu lo latou uso laitiiti o Peniamina. I lea taimi, ua avea ai Peniamina ma lē ua alofa tele i ai lo latou tamā, ma na latou iloa lelei e lē manao Iakopo e tuu atu o ia e alu.

¹³ O lea, a o tutū i luma o Iosefa, na uunaia ai i latou e ō latou loto fuatiaifo e taʻutino atu e faapea: “E moni lava, ua tatou sala ona o lo tatou uso [o Iosefa], na tatou iloa le puapuaga o lona loto, ina ua aioi mai o ia ia te i tatou, a e tatou te lei mafafai lava; o le mea lea ua oo mai ai ia te i tatou lenei puapuaga.” (Kenese 42:21) I lona alofa mutimutivale ae i le taimi e tasi na maumauai ai i ana feutagaiga, na fesoasoani atu ai Iosefa i ona uso ia faamaonia ua moni lo latou salamō. Ona ia faailoa atu ai loa lea o ia i a i latou ma faamagalo atu i latou ma le agalelei. Na toe maua ai loa le autasi o le aiga. (Kenese 45:4-8) Ona o i tatou o ni Kerisiano, e ao ona tatou aʻoaʻoina se lesona mai i lenei mea. I le iloaina o āuga leaga o le lotoleaga, e ao ai ona tatou tatalo atu i a Ieova mo se fesoasoani e aveesea ai lagona o le lotoleaga ae sui i le ‘tele o le alofa mutimutivale.’

Isi Mea e Taofia ai le Faaalia o le Alofa Mutimutivale

14. Aisea e tatau ai ona tatou alofia le matamata po o le iai i mea o loo faaalia ai faiga sauā pe afai e lē o se tulaga tatau?

¹⁴ O se isi mea e taofia ai lo tatou faaalia o le alofa mutimutivale, o lo tatou matamata po o le iai i mea o loo faaalia ai faiga sauā pe afai e lē o se tulaga tatau. O taaloga ma faafiafiaga o faaalia ai faiga sauā e faatupuina ai se faanaunauga o le faafiafiaina ona o faiga sauā. I le vaitaimi amata o le Tusi Paia, sa lē aunoa ona matamata tagata faapaupau i fetauiga a manu ma tagata po o le tau foi o pologa, ma isi lava sauaga na faaoo i tagata i malae mataaga i le emepaea o Roma. O faafiafiaga faapena na taʻua e se tasi tusitala o talafaasolopito e faapea, “na faamuta ai lagona alofa mo mafatiaga, o le mea e ese ai tagata mai meaola.” O āuga tutusa lava na ua iai i le tele o faafiafiaga a le lalolagi i aso nei. O Kerisiano o taumafai e faaalia le tele o le alofa mutimutivale, e manaomia ona filifili ma le tonu i mea o faitau i ai, o tifaga, ma polokalama o TV. Latou te manatua ma le atamai upu a le Salamo 11:5 e faapea: “A ua inosia e lona finagalo [o Ieova] lē . . . fiafia i le faasaua.”

15. (a) E ono faaalia faapefea e se tagata le leai o se alofa mutimutivale? (e) E faapefea ona tali atu Kerisiano moni i manaoga o uso talitonu ma tuaoi?

¹⁵ O se tagata e manatu faapito mo ia lava, e lē o iai foi le alofa mutimutivale. E matautia lenei mea, auā ua faamatala mai e le aposetolo o Ioane e faapea: “O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata?” (1 Ioane 3:17) O le talafaatusa a Iesu i le tuaoi Samaria agalelei ua faaalia mai ai se uiga foi lava e tasi o le leai o se alofa mutimutivale i le ositaulaga ma le sa Levī faafiaamiotonu. Ina ua iloa atu ua manaomia se fesoasoani e lo laua uso Iutaia o loo taatia mai ua tali oti, ona ʻaloese lea o i laua i le isi itu o le ala ma faaauau ai pea le la malaga. (Luka 10:31, 32) I se tulaga tuufaafeagai, o Kerisiano e alolofa mutimutivale, e vave ona tali atu i manaoga faaletino ma le faaleagaga o ō latou uso. Ma i le pei o le tagata Samaria i le tala faatusa a Iesu, e manatu atu foi i latou i manaoga o tagataese. O lea latou te fiafia ai e faaaogā ō latou taimi, lo latou malosi ma mea faitino e faalautele atu ai le galuega o le faia ma soo. I lenei auala ua latou fesoasoani atu ai i le faaolaina o le faitau miliona o tagata.—1 Timoteo 4:16.

Alofa Mutimutivale mo Ē Mamaʻi

16. O ā tapulaa tatou te fetaiai a o feagai ai ma ē o mamaʻi?

¹⁶ O le maʻi o le tofi lea o tagata lē lelei atoatoa, o loo i le tulaga oti. E lē sao mai ai Kerisiano i lea mea, ma o le toatele o i latou e lē o iai ni tomai faapitoa i le faafomai, ma e lē mafai foi ona latou faia ni vavega e pei ona sa faia e nisi o uluai Kerisiano o ē na latou maua lea mana mai i a Keriso ma ona aposetolo. Ina ua maliliu aposetolo o Keriso ma ā latou aumea vavalalata, ona mavae atu ai foi lea o lena mana e faia ai vavega. O lea, o lo tatou tomai e fesoasoani atu i ē ua afaina i maʻi faaletino e aofia ai ma le faaletonu o le mafaufau ma fāsaga o le mafaufau, ua faatapulaaina.—Galuega 8:13, 18; 1 Korinito 13:8.

17. O le ā le lesona tatou te aʻoaʻoina mai i le auala na feagai ai nisi ma Iopu, o lē na maʻi ma tumu i le loto faanoanoa?

¹⁷ E masani lava ona ō mai faatasi lagona faanoanoa ma maʻi. Mo se faataitaiga, na matuā faanoanoa Iopu o lē na mataʻu i le Atua ona o se maʻi tigaina ma mala na faaoo atu e Satani i a te ia. (Iopu 1:18, 19; 2:7; 3:3, 11-13) Na ia manaomia ni uo o ē o le a feagai ma ia i le tele o le alofa mutimutivale, ma o le a tautatala atu “faamafanafana.” (1 Tesalonia 5:14) Na i lo lea, na asiasi atu i a te ia ē faamafanafana pepelo e toatolu ma faanatinati ona faia ni faaiuga sese. Na latou faatupu atili le faanoanoa o Iopu ina ua latou faapea atu o ona puapuaga e mafua mai ona o ana mea sese. I le faaalia o le tele o le alofa mutimutivale, o le a alofia ai e Kerisiano lena lava mea sese pe a mamaʻi ni uso talitonu po o le mafatia foi i le faanoanoa. O nisi taimi, o le mea tāua o loo manaomia e i latou ia o ni nai asiasiga alofa mai toeaina po o isi Kerisiano taumatuaina o ē o le a faalogologo atu ma le loto alofa, faaali atu ni uiga malamalama, ma tuuina atu ni fautuaga alofa mai le Tusi Paia.—Roma 12:15; Iakopo 1:19.

Alofa Mutimutivale i Ē ua Vaivai

18, 19. (a) E ao faapefea i toeaina ona feagai ai ma ē ua vaivai po o ē ua sese? (e) E tusa lava pe ua tatau ona tofia loa se komiti tau faamasinoga, aisea e tāua ai le feagai pea o toeaina ma ē ua agasala i le faaalia i ai o le tele o le alofa mutimutivale?

¹⁸ E faapitoa le tatau i toeaina ona faaalia le tele o le alofa mutimutivale. (Galuega 20:29, 35) Ua faatonu mai faapea le Tusi Paia: “O i tatou o e malolosi ia tatou fesoasoani i le vaivai o e ua le lavā e tatau ai.” (Roma 15:1) Ona o le lē lelei atoatoa, tatou te faia uma ai lava mea sese. (Iakopo 3:2) E manaomia le faapelepele a o feagai ai ma lē “ua faia ni laasaga sese ae na te lē o iloaina.” (Kalatia 6:1, NW) E lē tatau ona fia pei toeaina o le ʻau Faresaio faafiaamiotonu o ē na lē magafagafa i lo latou soona faatatauina o Tulafono a le Atua.

¹⁹ I se tulaga tuufaafeagai, e mulimuli atu toeaina i le faaaoaoga a Ieova le Atua ma Iesu Keriso i le faaalia lea o le tele o le alofa mutimutivale. O le autū o la latou galuega o le faasūsū, faamafanafana, ma faafouina le malosi o mamoe a le Atua. (Isaia 32:1, 2) Na i lo le taumafai e pulea mataupu i le faaaogā o le tele o tulafono, latou te vaai atu i mataupu silisili lelei o i le Afioga a le Atua mo le fesoasoani. O lea, o le galuega a toeaina e ao ona ia atiina aʻe, ia maua ai le olioli ma le talisapaia o le lelei o Ieova i loto o ō latou uso. Pe afai e faia e se uso talitonu se mea sese itiiti, e masani ona alofia e le toeaina le faasaʻoina o ia a o lagona mai e isi. Pe afai e manaomia ona talanoa atu, o le tele o le alofa mutimutivale o le a uunaia ai le toeaina ina ia ave lena tagata i se mea o le a lē lagona mai ai e isi le la talanoaga, ma talatalanoa ai i le faafitauli. (Faatusatusa i le Mataio 18:15.) E tusa lava po o le ā le faigata ona mafuta atu i se tasi ona o ona uiga faaalia, e ao ona talanoa atu le toeaina ma le onosai, ma i se tulaga e fia fesoasoani atu. Na te lē vaavaai mo ni faamolemolega ia faateaeseina ai lena tagata mai le faapotopotoga. E tusa lava pe ua tatau loa ona tofia se komiti tau faamasinoga, o le a faaalia pea e toeaina le tele o le alofa mutimutivale i le feagai ai ma lē ua aafia i se agasala matuia. O uiga faapelepele o toeaina e ono fesoasoani ina ia maua ai e lea tagata le salamō.—2 Timoteo 2:24-26.

20. O ā taimi e lē tatau ai ona faaali atu lagona o le alofa mutimutivale, ma aisea?

²⁰ Peitai, e iai taimi e lē mafai ai e se auauna a Ieova ona faaali atu le alofa mutimutivale. (Faatusatusa i le Teuteronome 13:6-9.) O se tofotofoga tele i se Kerisiano le “aua lava neʻi . . . feoai,” ma se uo mamae po o sē e aiga i ai ae ua faateaeseina. I lea tulaga, e tāua tele le lē lolo atu o se tasi i lagona o le mutimutivale o le alofa. (1 Korinito 5:11-13) O le maumauai faapea, e ono faalaeiauina ai lē ua sese ina ia salamō. E faaopoopo atili atu i ai, e ao i Kerisiano ona alofia le faaalia ma le lē tatau o le alofa mutimutivale e ono taitaia atu ai i faiga lē mamā faaleituaiga, a o feagai ma tagata o le isi ituaiga.

21. O fea isi vala e manaomia ai ona tatou faaali atu le tele o le alofa mutimutivale, ma o ā ona aogā?

²¹ E lē lava le avanoa i itulau o lenei mataupu tatou te talanoa ai i vala uma e manaomia ai le faaalia o le tele o le alofa mutimutivale—i le feagai ai ma ē ua matutua, o ē ua loto mafatia, ma ē o feagai ai ma sauaga mai paaga lē talitonu. O toeaina o galulue fitā, e tatau foi ona faaali atu i ai le tele o le alofa mutimutivale. (1 Timoteo 5:17) Faaaloalo i a i latou ma avatu i ai le lagolagosua. (Eperu 13:7, 17) Na tusi mai le aposetolo o Peteru e faapea: “Ia mutimuti vale [outou uma] i le alofa.” (1 Peteru 3:8) I le faia faapea i so o se tulaga e manaomia ai ona faaali atu le tele o le alofa mutimutivale, tatou te faatupuina ai le autasi ma le fiafia i le faapotopotoga ma taaina mai ai ē o i tua i le upu moni. Ae e sili i mea uma lava, tatou te viia ai lo tatou Tamā o Ieova, e tumu i le alofa mutimutivale.

Fesili o le Autaluga

◻ E faaalia faapefea e Ieova le alofa mutimutivale i tagata agasala?

◻ Aisea e tāua ai le faaalia o le tele o le alofa mutimutivale?

◻ O ā nisi o mea ua faalavelavea ai lo tatou faaali atu o le tele o le alofa mutimutivale?

◻ E ao faapefea ona tatou feagai ai ma ē o mamaʻi ma ē ua faanoanoa i faalogona?

◻ O ai tonu i latou e ao ona faaali atu le tele o le alofa mutimutivale, ma aisea?

[Pusa i le itulau 19]

LE AU FARESAIO E LEAI SE ALOFA MUTIMUTIVALE

O LE malologa o le aso Sapati na faia ina ia maua ai e tagata o le Atua faamanuiaga faaletino ma le faaleagaga. Peitai ane, na faia e taʻitaʻi lotu Iutaia le anoanoai o tulafono e faaleaogaina ai tulafono a le Atua mo le Sapati ma avea ai o se avega mamafa i tagata. Mo se faataitaiga, pe afai e tupu se faalavelave faafuasei po o le maʻi foi o se tasi, e lē mafai ona ia maua se fesoasoani i le aso Sapati seʻi vaganā ai ua oo atu lona ola i se tulaga lamatia.

O se tasi o vasega o Faresaio sa matuā mamapo tele i le faatatauina o tulafono o le Sapati, ma ua faapea mai ai: “E sā i se tagata ona faamafanafana atu i ē faavauvau po o le asiasi atu foi i tagata mamaʻi i le Sapati.” Na faataga e isi taʻitaʻi lotu le asiasi atu faapea i le Sapati, ae na tuutapulaa e faapea: “E sā ona maligi ni loimata.”

O lea, na tonu ai le taʻusalaina e Iesu o taʻitaʻi lotu Iutaia ona ua latou faaleamanaiaina mea e sili ona tāua o le Tulafono, e pei o le faamasinotonu, le alofa, ma le alofa mutimutivale. E lēlētioa ona ia fetalai atu faapea i le ʻau Faresaio: “Ua outou faaleaogaina . . . le afioga a le Atua i a outou uputuu”!—Mareko 7:8, 13; Mataio 23:23; Luka 11:42.

[Ata i le itulau 17]

I atunuu e 231, o loo faia ai e Molimau a Ieova se galuega o le alofa mutimutivale e leʻi faapea lava ona faia muamua i aiga o tagata, i fetaulaiga o ala, e oo foi i falepuipui

[Ata i le itulau 18]

O le matamata atu i faiga sauā, e pei o ia e faaalia mai i TV, e tineia ai le faaali atu o le tele o le alofa mutimutivale