Tumau i le Faamaoni ma Ola Pea!

“INA faifai ia e oe o le Atua, ma e oti ai.” Ua faaatagia i le faavaa o la tatou mekasini le avā a Iopu, o lē na osofai atu i a te ia i na upu. E tusa lena ma le 3,600 tausaga ua mavae. Peitai, o na upu faifai i le auauna faamaoni a le Atua, ua faamatilatila ai se finauga na fesagai ma tagata seia oo mai lava i aso nei. Sa matuā puapuagatia lava le tagata faamaoni o Iopu i le tele o ana mea na leiloa—o ana lafu manu, o lona fale, o lana fanau e toasefulu. Ae o lea ua matuā faatigaina nei lona tino i se maʻi tiga, ua tofotofoina ai o ia e oo lava i le mutaaga o lona onosai. O le ā le mafuaaga? Ona sa taotaotua atu le fili o le Atua ma tagata, o Satani le Tiapolo ma se luʻi e faapea, e lē mafai e le tagata ona tumau i le faamaoni i le Atua pe a oo i ai ni tofotofoga ogoogo.—Iopu 1:11, 12; 2:4, 5, 9, 10.

I aso nei, e pei lava o aso o Iopu, “o le lalolagi uma o loo nofo toilalo i loo leaga,” o Satani le Tiapolo. (1 Ioane 5:19) E mautinoa, ua sili atu ona moni lea i aso nei, auā i le taimi nei “o lē ua igoa i le tiapolo, i le ma Satani, o lē faasese i le lalolagi uma,” ua lafo ifo mai le lagi i lenei lalolagi. (Faaaliga 12:9) O le pogai lea ua faateleina ai puapuaga faigata o tagata i o tatou aso. O le taua muamua a le lalolagi lea na pa i le 1914, na faailogaina ai “le amataga o puapuaga” lea ua faaauau pea ona faateteleina i lenei 20 senituri.—Mataio 24:7, 8.

I lenei lalolagi sauā ma le paʻū maulalo, pe e lē o logo ea i ou tino ua e oo i le mutaaga o le onosai o le tagata? Po o e tau manatu ea, ‘Po o iai se fuafuaga o le olaga?’ E lē taumatea sa faapena le lagona na oo i a Iopu, ae sa leʻi tāitāi ona vaivai le faatuatua o Iopu i le Atua, e ui lava sa ia faia ni mea sese. Sa ia faaalia lona lotomau i upu nei: “Seia oo lava i loʻu oti ou te le faateaina lava laʻu amio sao.” Sa ia mautinoa o le a ‘silafia lona faamaoni’ e le Atua.—Iopu 27:5; 31:6.

O Iesu Keriso, le Alo e toatasi o le Atua, sa tatau foi ona onosai o ia i tofotofoga a o iai i inei i le lalolagi. E eseese auala na osofaia ai e Satani ia Iesu. Sa ia faaaogā manaoga faaletino o Iesu ma tofotofoina ai Lona faalagolago atu i le Afioga a le Atua, e pei ona faia i le tofotofoina o ia i luga o le mauga. (Mataio 4:1-11) Sa ia faasoesa i a Iesu e ala i le faapogaia o tusiupu ma Faresaio aposetate ma ō latou soo e faasauā, tuuaia, ma upuleaga i a te ia, ma taupulepule e fasiotia o ia. (Luka 5:21; Ioane 5:16-18; 10:36-39; 11:57) Sa matuā sili mamao atu mea leaga na latou faia i a Iesu na i lo o mea na faia e faamafanafana pepelo e toatolu i a Iopu.—Iopu 16:2; 19:1, 2.

I le faatoaga i Ketesemane, a o tulata atu Iesu i le mutaaga o lenei tofotofoga, na ia taʻu atu i ona soo: “Ua matuā tiga loʻu loto e oo i le oti.” Ona “faapaū fao ai lea o ia ma tatalo, ua faapea atu, ‘Loʻu Tamā e, afai e mafai, ia ave ese lenei ipu ia te au; a e aua le faia loʻu loto, a o lou finagalo.’” Mulimuli ane, i luga o le satauro, na alaga ai Iesu, na faataunuuina ai upu faavaloaga o le Salamo 22:1, e faapea: “Loʻu Atua e, loʻu Atua e, se a ea le mea ua e tuulafoai mai ai au?” Ae i le iuga, sa leʻi tuulafoaiina e le Atua Iesu, auā sa tumau le faamaoni atoatoa o Iesu i a te Ia, ma saunia ai se faaaoaoga mo Kerisiano moni uma e mulimuli ai. Na tauia e Ieova le tumau o le faamaoni o Iesu e ala i le toe faatuina o ia ma faaeaina o ia i le lagi aupito sili ona maualuga. (Mataio 26:38, 39; 27:46; Galuega 2:32-36; 5:30; 1 Peteru 2:21) O le a tauia foi e le Atua isi uma o ē e faapena ona tumau i le faamaoni i a te ia.

E lē gata ina aumaia e le faamaoni o Iesu se tali atoatoa i le luʻi a Satani, ae o le faataulagaina o lona soifua lelei atoatoa faaletagata, na saunia ai le togiola, ina ia mafai ai e tagata e tumau i le faamaoni ona maua le ola e faavavau. (Mataio 20:28) Muamua lava, na aoaoina e Iesu se “lafu mamoe itiiti” faauuina, o ē ua avea ma suli faatasi ma ia i le Malo o le lagi. (Luka 12:32) Ina ua mavae lea, ona aoaoina ai lea “o le motu o tagata e toatele” ina ia faasaoina mai “i le puapuaga tele,” ua ō mai ai ina ia ulu atu i le ola e faavavau i le lalolagi i le pulega a le Malo o le Atua.—Faaaliga 7:9, 14-17.

O Iopu na tumau i le faamaoni, o le a iai faatasi ma le faitau piliona o i latou ua maliliu o le a toe faatutuina i lena taimi e avea ma vaega o lena sosaiete filemu i le “lalolagi fou.” (2 Peteru 3:13; Ioane 5:28, 29) E pei ona faaatagia i le faavaa i tua o la tatou mekasini, sa tauia Iopu ona o lona faamaoni ina ua “sili ona faamanuia e Ieova o le gataaga o Iopu i lona amataga.” Sa ia maua le malosi faaleagaga e pei o sē “ua le agasala . . . i ona laugutu.” Na faafualoa e le Atua le ola o Iopu i le faaopoopoina i ai o isi tausaga e 140. Na ia foaiina atu foi i a Iopu e tailua o ana mea faitino uma sa iai muamua, na “ia te ia foi o atalii e toafitu, ma afafine e toatolu,” sa sili foi ona lalelei o afafine o Iopu i fafine uma o le nuu. (Iopu 2:10; 42:12-17) Ae o nei faamanuiaga uma, sa na o ni faataimuaga o faamanuiaga o le a maua e ē tumau i le faamaoni i le Parataiso i le “lalolagi fou.” E mafai foi ona e maua lena olioli, e pei ona o le a faamatalaina i itulau o sosoo mai!

[Ata i le itulau 4]

Sa faataatia e Iesu le faaaoaoga lelei atoatoa i le avea o sē tumau i le faamaoni