Lipoti a Ē Faalauiloa le Malo

E Sili atu le Malosi o Ieova na i lo Ōna Fili

UA LOA ona taumafai le Tiapolo ma ana temoni ina ia faalavelavea le talaʻiga o le tala lelei e ala lea i tapuaiga sese ma faiga faaagaga. O loo taʻua i le Tusi Paia i le 2 Korinito 4:4, le fuafuaga leaga a Satani ina ia “faatauasoina manatu o i latou o e le faatuatua e le atua o le lalolagi nei, ina neʻi pupula atu ia te i latou le malamalama o le tala lelei i le mamalu o Keriso, o ia foi o le faatusa o le Atua.”

Ae e sili atu ona malosi ia Ieova le Atua i a Satani. E leai se mea e mafaia e fili o Ieova e taofia ai le faataunuuina o lona finagalo tauatua “ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) Ua faamatilatilaina lea tulaga e lipoti o loo sosoo mai, a ē faalauiloa le Malo, i Ausetalia.

◻ Ina ua mavae le 20 tausaga le umi talu ona lē o toe auai atu i lotu se tasi fafine, na toe amata ai ona ia faitauina le Tusi Paia. O lea toe faafouina o lona naunau i le Tusi Paia na mafua ai ona tele ni ana fesili, ma o lea na ia tatalo ai i le Atua mo se fesoasoani ina ia maua tali o ia fesili. Na ia manao e saili le upu moni, peitai na ia iloaina e lē foia ai lona faafitauli e ala i le toe foi atu i lana lotu tuai. Na i lo o lena, na amata lana sailiiliga e ala i le asiasi atu i se fale e faatau ai tusi tuai ma fesili atu pe e iai ni ā latou tusi faalelotu.

Na manatuaina e lē ōna le faletusi o loo iai sana tusi faalelotu, e lē o i le faletusi, ae i le fale. O le igoa o le tusi, E Mafai ona E Ola e Faavavau i Parataiso i Le Lalolagi, na lomia e Molimau a Ieova. Na faitau ma le naunau le fafine i le tusi ma maua ai tali i le tele o ana fesili faale-Tusi Paia. Ina ua uma ona ia sailia Molimau a Ieova i le tusi telefoni, na ia faafesootaia loa i latou ma amataina se suesuega faale-Tusi Paia e faifaipea.

◻ Na faasalalauina e se tamaitai talavou i le nusipepa a le latou vaipanoa lona fia faatauina atu o se tapui. Na taʻua i le faasalalauga e faapea o se ‘tapui ua leva, e malosi tele lona mana.’ Na matauina e se tasi o Molimau a Ieova lenei faasalalauga. Ona ia filifili ai lea ina ia vili atu i le numera o le telefoni o loo taʻua ai, ma talanoa i le tamaitai e tusa ai ma le puna o le mana lea e faapea o loo iai i le tapui. Na sosoo ai lea ma se talanoaga e tusa ai ma le vaaiga a le Tusi Paia i faiga faatemoni. Na faaalia e le tamaitai e ana le tapui e faapea, i le aso na faatoʻā tuanai atu, sa ia tatalo atu ai i le Atua mo se fesoasoani i ōna faafitauli mai temoni. Na faia e le Molimau ni fuafuaga ina ia toe fesootai atu i ai mo le faia o se isi talanoaga i le telefoni.

Ina ua ia toe vili atu, sa leʻi iai le tamaitai talavou i le fale. Na taliina mai e le tinā le telefoni ma faapea mai: “Ou te lē iloa po o le ā na e taʻu i laʻu tama, ae o se vavega le mea na tupu!” Na ia faamatalaina e faapea ina ua uma le la uluai talanoaga i le telefoni, na tiaʻi uma loa e lana tama ana ata ma tusi faasatani ae amata ona faitau le Tusi Paia.

E leʻi leva ae faia fuafuaga e asia lea tamaitai talavou. Na ia taliaina loa se suesuega faale-Tusi Paia e faifaipea ma Molimau a Ieova. Na amata foi ona ia auaufaatasi atu ma Molimau i ā latou sauniga faa-Kerisiano. Ua toe faatoilaloina foi e Ieova temoni, e ala lea i lona faasusuluina atu o le poto saʻo o upu moni faale-Tusi Paia.