Molimau a Ieova i le Lalolagi Aoao—Puerto Rico

I LE va o le Sami Karipeane ma le Vasa Atalani, o loo taatia ai le motu lauolaola o le teropika, o Puerto Rico. I le 1493, na maua ai e Christopher Columbus le motu lea ma avea ma oganuu o Sepania, ma faaigoaina i a San Juan Bautista, e faamanatu ai Ioane le Papatiso. O lona aai aupito telē, sa faaigoaina mo se taimi umi lava i a Puerto Rico, po o “Rich Port.” I lena taimi, sa oo ai ina faasino lenei igoa i le motu atoa, a o le aai sa faaigoa i a San Juan.

Sa faamaonia le avea o Puerto Rico ma taulaga tamaoaiga i le tele o itu. Sa matuā tele auro na aauina ese atu mai i inei i uluai tausaga o le pulega a Sepania. I le taimi nei, o loo faatauina atu ai e le motu le tolo, kofe, faʻi, ma fua o moli ma tipolo, e ui lava o le tele o le tamaoaiga i aso nei, o loo maua mai i mea e gaosia ma galuega e faia mo isi. Ae peitai, ua faamaonia le avea o Puerto Rico o se taulaga e tamaoaiga i se uiga e sili mamao atu lona tāua.

Na amata talaʻiina le tala lelei o le Malo o le Atua i inā i le 1930 ma agaʻi mai ai. I aso nei, e sili atu i le 25,000 le autalaʻi o le tala lelei o loo iai i Puerto Rico. I le 1993, na faateleina ai le aufaigaluega i lenei lālā o le Sosaiete o le Olo Matamata mai le 23 i le sili atu i le 100. Sa manaomia lenei faatelega ina ia mafai ai e le lālā ona vaavaaia le faaliliuina o lomiga faale-Tusi Paia i le gagana Sepania, ua mafai ai ona maua na lomiga e le 350,000,000 o tagata e tautala i le gagana Sepania i le lalolagi aoao.

Se Oganuu Fou

Ua lipotia mai foi e le ofisa o le lālā e faapea: “Ua tatalaina nei se oganuu fou i Puerto Rico, auā sa matou faia ni taumafaiga e faaoo atu ai le feau o le Malo i ē logonoa. Ua faamatala mai e se tasi tuafafine le mea lenei na tupu: ‘Sa ou galue faatasi ma tagata logonoa, ma sa ou asiasi atu i se tasi mafine e toalua lana fanau laiti. Ina ua ia iloa o aʻu o se Molimau, sa ia teena loa aʻu, ona o lana tane, e logonoa foi, e lē fiafia i Molimau a Ieova.

“ʻI ni nai masina mulimuli ane, na asiasi atu ai lenei lava tamaitai i sana uo, o lē na suesueina le Tusi Paia ma Molimau. Sa auai o ia i le suesuega, ma sa ia matuā fiafia i ai. Sa ou toe asiasi atu i lea tamaitai, ma sa ia toe fai mai foi, e lē fiafia lana tane i Molimau. Ae peitai, sa fia malamalama o ia i le Tusi Paia, auā sa fiu o ia i lana lotu, ona e leai se mea o latou aʻoaʻoina e uiga i le Tusi Paia. Sa amata ona ma suesue, e faaaogā ai se sāvali. I se tasi aso, na ia fai mai ai i a te aʻu ou te toe alu atu i le aso Toonai, auā o le a iai lana tane i inā. Sa ou fesili atu, “Ae e lē fiafia o ia i a i matou, a ea?” Na tali mai o ia: “O loo ona fia iloa po o le ā tonu lava le mea o aʻoaʻo e Molimau a Ieova.”

“ʻI le aso na sosoo ai, na tuʻituʻi mai ai i laua uma i loʻu faitotoa! Ona sa tele ni fesili a le tane, sa ou valaaulia ai i laua i ā matou sauniga mo tagata logonoa. Na taunuu muamua atu o ia i inā ae ou te leʻi taunuu atu, ma e leʻi toe misia ai lava se sauniga talu mai lena taimi. O loo talaʻi atu o ia i isi tagata logonoa, sa auai o ia i se fonotaga, ma o loo āloālo atu o ia mo le papatisoga.’”

Ua faaauau mai le lipoti a le lālā: “I la matou tauaofiaga itumalo i le tausaga nei, na faia ai le polokalama atoa i le gagana e faaaogā ai tāga, ma sa matuā toatele tagata logonoa ma ō latou aiga na auai. I le lauga mulimuli, o se taimi lea na matuā ootia ai faalogona ina ua taʻua e le failauga le galuega o loo faia i tagata logonoa ma faapea mai, e tusa ma le 70 i latou o auai. Na lagona se pati tele o le fiafia, ae e pei ona matauina e le failauga, sa leʻi lagona e tagata logonoa. O lea, na talosaga atu ai i ē logonoa ina ia vaavaai atu i le aofia, ona toe fai atu lea e le failauga o le fesili, ‘Po o outou fiafia i le faatasi ma ō outou uso logonoa?’ ma talosaga atu i le aofia ina ia patipati—e ala i le tālotālo atu o ō latou lima uma e lua. Sa o se vaaiga matagofie le vaaia o le 11,000 o uso ma tuafāfine o patipati fiafia i le tālotālo atu o ō latou lima. Sa matuā faatumulia ō tatou uso ma tuafāfine logonoa i le fiafia, ma na latou lagona ua avea i latou o se vaega o le auuso e sili ona toatele. E toatele na maligi loimata o le olioli.”

A o auai Molimau a Ieova i le galuega o le seleselega i Puerto Rico, e lē taumatea o le a faaauau pea ona avea o se taulaga tamaoaiga. O “mamoe” a le Atua, o ē ua ia taʻua “o mea ua manaomia e nuu uma,” o le a faaauau pea ona ō mai i totonu ina ia faatumuina ai le fale o Ieova i le mamalu.—Ioane 10:16; Hakai 2: 7.

[Pusa i le itulau 9]

FAAMAUMAUGA A LE ATUNUU

Tausaga Faaleauaunaga o le 1994

TUMUTUMUGA O LE AU TALAʻI: 25,428

FAATATAUGA: 1 Witness to 139

Ē NA AUAI I LE FAAMANATUGA: 60,252

TUUFAATATAUGA O PAEONIA: 2,329

TUUFAATATAUGA O SUESUEGA FAALE-TUSI PAIA: 19,012

AOFAI O Ē NA PAPATISOINA: 919

AOFAI O FAAPOTOPOTOGA: 312

OFISA O LE LĀLĀ: GUAYNABO