O le Olioli i a Ieova o lo Tatou ʻOlo Malosi Lea
“O le aso paia lenei i lo tatou Alii, ma ia aua neʻi tiga foi outou, auā o le olioli a Ieova o lo outou ʻolo malosi lea.”—NEEMIA 8:10, NW.
1, 2. (a) O le ā ua uiga i ai le ʻolo malosi? Na faaalia faapefea e Tavita sa ia avea Ieova ma ona sulufaiga?
O IEOVA o se ʻolo malosi e lē mafaatusalia. O le ā ua uiga i ai le ʻolo malosi? O se nofoaga lea ua malosi lona fausiaina, o se nofoaga mo le saogalemu po o le faasaoina ai foi. Na iloa e Tavita o Isaraelu anamua, o le Atua o lona ʻolo malosi lea. Mo se faataitaiga, seʻi mafaufau i le pese na fatuina e Tavita e faasino i Lē e Silisili ona Maualuga “i le aso na laveai mai ai Ieova ia te ia ai lima o e na ita mai ia te ia uma lava, atoa ma le lima o Saulo” le tupu o Isaraelu.—Salamo 18, upu tomua.
2 Na amataina e Tavita lena pese faagaee loto i upu nei: “Ieova e, loʻu malosi, ou te alofa lava ia te oe. O Ieova o loʻu papa ia, ma loʻu ʻolo, ma loʻu faaola; o loʻu Atua, o loʻu papa, ou te faatuatua ia te ia; o loʻu talita, ma le nifo o loʻu olataga, o loʻu olo maualuga.” (Salamo 18:1, 2) I le avea o ia e pei o se tagata solitulafono ona o ni faiga lē tonu, ma le tuliaupuina e le tupu o Saulo, na fai ai e le tagata amiotonu o Tavita, ia Ieova ma ona sulufaiga, e pei lava o se tagata ua tamoe atu i se nofoaga ua mausali lona fausia ina ia faasaoina ai mai nisi o mala.
3. Aisea na “taufaiolioli tele” ai tagata Iutaia i le vaitaimi o Esera?
3 O le olioli e foaiina mai e Ieova, o se ʻolo malosi lea e lē mafai ona lē taulau mo i latou o loo savavali i ona ala o ē tausisia le faamaoni. (Faataoto 2:6-8; 10:29) E moni, ina ia maua le olioli ua foaiina mai e le Atua, e ao i tagata ona faia le finagalo o le Atua. E faatatau i lea itu, seʻi mafaufau i le mea na tupu i Ierusalema i le 468 T.L.M. Na faamanino atu e le tusiupu o Esera ma isi le Tulafono, e ala i le faitauina ma le uigā. Ona faalaeiau atu loa lea i tagata e faapea: “Inā ō ia outou, inā aai mea lololo, ma inu mea suamalie, ma ia outou ave tufaaga i a te i latou e leʻi saunia se mea mā latou; auā o le aso paia lenei i lo tatou Alii, ma ia aua neʻi tiga foi outou, auā o le olioli i a Ieova o lo outou ʻolo malosi lea.” Na iu i le “taufaiolioli tele” a o faatatauina e tagata Iutaia le malamalama ua latou mauaina ma faia ai se tausamiga o le Fale Apitaga. (Neemia 8:1-12, NW) O i latou na avea ‘le olioli i a Ieova ma ō latou ʻolo malosi,’ na toe maua le malosi faaopoopo mo lana tapuaiga ma le auaunaga. Ona na avea le olioli i a Ieova ma ō latou ʻolo malosi, e tatau foi la ona tatou faatalitalia, e olioli foi tagata o le Atua i aso nei. O ā nisi o mafuaaga o iai i aso nei mo lo latou olioli?
ʻE na o le Olioli Lava’
4. O le ā se tasi o mafuaaga sili mo le olioli o tagata o Ieova?
4 O se tasi o mafuaaga iloga mo le olioli, o le sauniuniga lea a Ieova o le tauaofia faatasi. O fonotaga ma tauaofiaga a Molimau a Ieova ua faaooina atu ai i a i latou le olioli i aso nei, e pei lava ona sa faaoo atu i tausamiga faaletausaga i tagata Isaraelu le olioli i ō latou loto. Sa taʻuina atu i tagata Isaraelu e faapea: “O aso e fitu e te fai ai le tausamiga [o fale apitaga] ia Ieova lou Atua i le mea e filifilia e Ieova; auā e faamanuia oe e Ieova lou Atua i au mea uma e maua mai, ma mea uma e faia i ou lima, e te olioli ai lava.” (Teuteronome 16:13-15) Ioe, e leai se isi mea na finagalo i ai le Atua mo i latou, ‘e na o le olioli lava.’ E faapena foi mo Kerisiano, auā na faalaeiau atu le aposetolo o Paulo i uso talitonu e faapea: “Ia outou olioli i le Alii e le aunoa; ou te toe fai atu, ia outou olioli.”—Filipi 4:4.
5. (a) O le ā le olioli, ma e faapefea ona mauaina e Kerisiano? (e) E mafai faapefea ona i a i tatou le olioli e ui lava i tofotofoga?
5 Ona e finagalo Ieova tatou te olioli, ua aumaia ai i a i tatou le olioli o se tasi o fua o lona agaga paia. (Kalatia 5:22, 23) Ma o le ā le olioli? O se faalogona lelei e māfua ona o le tatalia po o le maua o mea e aogā ma e faanaunau i ai. O le olioli, o se tulaga o loo fiafia moni, po o le faaeaina foi. O le fua lenei o le agaga paia o le Atua e faatumauina ai i tatou a o tofotofoina. “O lē [Iesu] na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.” (Eperu 12:2) Na tusi mai le soo o Iakopo e faapea: “Oʻu uso e, ia outou manatu, o le mea e fiafia [olioli] tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” Ae faapefea pe afai ua tatou lē iloa le mea e fai pe a oo mai se tofotofoga patino? Ona tatou tatalo atu lea ma le mautinoa mo le poto ina ia iloa ai ona faafetaiaia lea tofotofoga. O le gaoioi e tusa ma le poto mai lugā e mafai ai ona tatou faafetaiaia faafitauli po o le onosaia o se tofotofoga faaumiumi e aunoa ma le mou ese atu o le olioli i a Ieova.—Iakopo 1:2-8.
6. O le ā le faiā o loo iai i le olioli ma le tapuaiga moni?
6 O le olioli e foaiina mai e Ieova e faamalosia ai i tatou e faaauilumaina ai le tapuaiga moni. O le mea lena na tupu i le vaitaimi o Neemia ma Esera. Na faalototeleina tagata Iutaia i lena taimi o ē na avea le olioli i a Ieova ma ō latou ʻolo malosi, ina ia faaauilumaina mea tau i le tapuaiga moni. Ma a o latou faatuputeleina le tapuaiga i a Ieova, na faateleina ai foi lo latou olioli. E faapea foi ona moni lea mea i aso nei. I le avea ma ē e tapuai i a Ieova, ua i a i tatou mafuaaga mo le tele o le olioli. Se’i ō tatou iloiloina nisi o mafuaaga mai le tele o mafuaaga e ala ai ona olioli.
Faiā ma le Atua e Ala i a Keriso
7. O ā mafuaaga ua iai i Kerisiano e olioli ai ona o Ieova?
7 O la tatou faiā vavalalata ma Ieova ua māfua ai ona avea i tatou ma tagata e sili atu ona fiafia o i le lalolagi. A o leʻi avea ma Kerisiano, na avea ai i tatou ma vaega o le sosaiete o tagata amioleaga, o lona uiga sa ‘faapouliuligia ō tatou mafaufau, ma liliueseina i tatou mai le ola o i le Atua.’ (Efeso 4:18) Maeu so tatou fiafia ona ua lē toe tagata ese i tatou mai i a Ieova! O le mea moni, e manaomia taumafaiga ina ia faatumauina ai pea i lona finagalo lelei. E ao ona faaauau pea ona tatou “tutumau i le faatuatua, o faavaeina, ma mausali, ma le le faateaeseina . . . i le faamoemoe o i le tala lelei.” (Kolose 1:21-23) E mafai ona tatou olioli ona ua tosina atu i tatou e Ieova i lona Alo e tusa ai ma fetalaiga a Iesu lava ia e faapea: “E le mafai se tasi ona sau ia te au, pe a le tosina mai e le Tamā ua auina mai aʻu.” (Ioane 6:44) Pe afai tatou te talisapaia moni lava la tatou faiā tautele ma le Atua e ala i a Keriso, o le a tatou puipuia la mai so o se mea e ono faaleagaina ai.
8. Ua faapefea ona fesoasoani mai Iesu i lo tatou tulaga olioli?
8 O le faamagaloina o ā tatou agasala i le faatuatua i le taulaga togiola a Iesu, o se mafuaaga tele lea o le olioli ona ua mafua ai ona iai sa tatou faiā ma le Atua. Ona o lona agasala ma le loto i ai, ua tuufaasolo mai ai e lo tatou augatama o Atamu le oti i tagata uma. Peitai, ua faamatala mai e le aposetolo o Paulo e faapea: “A ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.” Na tusi mai foi Paulo e faapea: “O lenei foi, faapei ona faasalaina o tagata uma lava i le agasala e tasi, e faapea foi ona taʻuamiotonuina o tagata uma lava i le amiotonu e tasi, latou te ola ai. Auā faapei ona avea ma agasala o le toatele i le le anaana o le tagata e toatasi, e faapea foi ona avea ma amiotonu o le toatele i le anaana o le toatasi.” (Roma 5:8, 18, 19) Maeu le tele o le olioli e mafai ona i a i tatou ona ua finagalo Ieova e togiolaina le fanau a Atamu o ē latou te faaaogā lena sauniuniga alofa!
Saolotoga Mai Lotu ma le Faamalamalamaina
9. Aisea ua tatou olioli ai e tusa ai ma le vaaiga faaletapuaiga?
9 O le saoloto mai i a Papelonia le Aai Tele, le emepaea o lotu sese, o se tasi lea mafuaaga e olioli ai. O le upu moni mai le Atua ua tatou saoloto ai. (Ioane 8:32) Ma o le faasaolotoina mai lenei fafine talitane faaletapuaiga, o lona uiga, ua tatou lē auai i ana agasala, e lē oo ai i a i tatou ōna mala, ma faaumatia faatasi ai ma ia. (Faaaliga 18:1-8) E leai se mea e faanoanoa ai i le sola ese mai na mea!
10. O le ā le faamalamalamaina o loo tatou olioli ai ona o le avea ma tagata o Ieova?
10 O le malamalama ma le faatatauina o le Afioga a le Atua i le olaga e faapogaia ai le olioli tele. O le tuusaoloto mai i taaʻiga a lotu sese, tatou te olioli ai i le malamalama faaleagaga ua sili ona manino, lea ua saunia e lo tatou Tamā faalelagi, e ala mai i lana “auauna faamaoni ma le mafaufau.” (Mataio 24:45-47) Mai i tagata uma lava o ē o loo soifua i le lalolagi, e na o i latou lava o ē e tuutoina atu atoatoa i a Ieova, latou te mauaina lona agaga, ma faamanuiaina e malamalama i lana Afioga ma lona finagalo. E pei lava ona taʻua e Paulo e faapea: “A ua faaalia mai ia mea [o mea ua ia saunia mo i latou o ē alolofa i a te ia] e le Atua ia te i matou e lona Agaga; auā e suesue ifo le Agaga i mea uma, e oo lava i le uiga loloto o le Atua.” (1 Korinito 2:9, 10) E mafai ona tatou loto faafetai ma olioli ona o lea tatou te olioli i le agaigai i luma o le malamalama e pei ona faailoaina mai i le Faataoto 4:18 e faapea: “A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.”
Le Faamoemoe i le Malo ma le Ola e Faavavau
11. Ua faapefea ona tufaina atu i isi le olioli i le faamoemoe i le Malo?
11 O lo tatou faamoemoe i le Malo, e mafua ai foi ona tatou olioli. (Mataio 6:9, 10) I le avea ma Molimau a Ieova, ua loa ai ona tatou faalauiloa atu e faapea, o le Malo o le Atua, ua na o lea le faamoemoe o tagata uma. Seʻi manatu i le tausaga e 1931 e fai ma faataitaiga, ina ua faaigoaina i tatou o Molimau a Ieova i se iugafono na taliaina ma le olioli i tauaofiaga e 51 na faia i le lalolagi aoao. (Isaia 43:10-12) O lena iugafono ma le tauaofiaga tāua na lauga ai J. F. Rutherford (le peresitene o le Sosaiete o le Olo Matamata i lea taimi) na lomia i le tamai tusi, The Kingdom, the Hope of the World (Le Malo, le Faamoemoe o le Lalolagi). Na aofia ai foi i lea se tasi o iugafono na taliaina i lea tauaofiaga, lea na tuuaia ai Kerisinetoma i lona tulaga faaaposetate ma le lē amanaiaina o fautuaga a Ieova. Na faalauiloa ai foi e faapea: “O le faamoemoe o le lalolagi, o le malo lea o le Atua, ma ua leai lava ma se isi faamoemoe.” I le na o ni nai masina lava, na tufa atu ai e Molimau a Ieova le silia i le lima miliona kopi o lenei tamai tusi i tulimanu uma o le lalolagi. Talu mai lena taimi, ua tatou faamautinoa atu ai pea e faapea, o le Malo ua na o lea le faamoemoe mo tagata.
12. O le ā le faamoemoe olioli mo le ola o taatia mai i le lumanai mo i latou o auauna i a Ieova?
12 Tatou te olioli foi i le faamoemoe o le ola e faavavau i le pulega a le Malo. Ua iai i le “lafu mamoe itiiti,” o Kerisiano faauuina se faamoemoe olioli faalelagi. Na tusi le aposetolo o Peteru: “Ia faafetaia le Atua, le Tamā o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola, i le toe tu mai o Iesu Keriso nai e ua oti, ia iu i le tofi e le pala, e leai se leaga o i ai, e le mamae lava, o loo teu i le lagi mo outou.” (Luka 12:32; 1 Peteru 1:3, 4) I aso nei, o le toatele o Molimau a Ieova o loo tepa taulai atu mo le ola e faavavau i le Parataiso i le pulega a le Malo. (Luka 23:43; Ioane 17:3) E leai ni isi tagata o i le lalolagi ua i a i latou se mea e mafai ona faatusatusa atu i ai lo tatou faamoemoe olioli i le lumanai. Maeu le tatau ona tatou faatauaina o lea faamoemoe olioli o iai!
Le Auuso Faamanuiaina
13. E ao faapefea ona tatou manatu i le aufaatasiga o le auuso i le lalolagi aoao?
13 O le avea ma vaega o le auuso i le lalolagi aoao ua faamaonia e le Atua, o se tasi foi lea o puna o le olioli. Ma le fiafia lava, ua i a i tatou se aufaatasiga e sili atu ona moomia i le lalolagi. Ua faasino mai ma le tonu e Ieova le Atua i ō tatou aso ma faapea mai: “Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula.” (Hakai 2:7) E moni, o Kerisiano uma lava e lē lelei atoatoa. E ui i lea, ua faalatalataina atu e Ieova i a te ia tagata taitoatasi e ala i a Keriso Iesu. (Ioane 14:6) Ona ua faalatalata atu e Ieova i a te ia tagata ua ia finagalo i ai e manaomia, o le a faateleina lo tatou olioli pe afai tatou te faaalia i a i latou le alofa faaleuso, tuu i latou i se tulaga faaaloalogia, soosoo tauʻau ma i latou i le sailia o mea tau i le Atua, ia faamausali i latou i ō latou tofotofoga, ma tatalo mo i latou.
14. O le ā le faalaeiauga e mafai ona tatou mauaina mai i le 1 Peteru 5:5-11?
14 O nei mea uma o le a faaopoopo i lo tatou olioli. E mautinoa, o le olioli i a Ieova o le ʻolo malosi lea i lo tatou aufaatasiga o uso faaleagaga i le lalolagi aoao. Ioe, o i tatou uma lava ua oo i ai sauaga ma isi faigata. Peitai, e ao i lenei mea ona fusia faatasi ai i tatou ma aumaia ai i a i tatou se lagona o le autasi, o se vaega o le faalapotopotoga moni e tasi a le Atua i le lalolagi. E pei ona fai mai Peteru, e ao ona faamaulalo i tatou i lalo o le aao malosi o le Atua, ma tuu atu i le Atua mea uma tatou te popole vale ai, ma ia iloa lelei e manatu mai o ia i a i tatou. E manaomia ona tatou faaeteete ona o loo saili le Tiapolo e ʻaina i tatou, ae ua lē tuua ai na o i tatou i lea itu, auā na faaopoopo mai Peteru e faapea: “Ia outou tetee atu ia te ia, o mausali outou i le faatuatua, ina ua outou iloa o loo oono lo outou au uso o i le lalolagi i ia lava mea tiga.” Ma o lenei auuso olioli faavaomalo o le a lē mafai ona faaleaogaina, auā ua faamautinoa mai i a i tatou e faapea, ‘pe a uma foi ona tigaina tatou i ni nai aso, ona faaiu ai lea e le Atua le toleniina o i tatou, ma o le a faatumauina i tatou ma faamalosia.’ (1 Peteru 5:5-11) Seʻi manatunatu i ai. O le a tumau e faavavau lo tatou auuso olioli!
Se Olaga e Iai se Fuafuaga
15. Aisea e mafai ai ona faapea atu o loo iai i Molimau a Ieova se olaga e iai se fuafuaga?
15 Ua i a i tatou le olioli e ui ina pagatia le lalolagi, ona ua i a i tatou se olaga e iai se fuafuaga. Ua tuuina mai i a i tatou se faiva tatou te fiafia ai atoa ma isi. (Roma 10:10) E mautinoa o se faaeaga e olioli ai le avea ma sē faigaluega faatasi ma le Atua. Na faapea mai Paulo e tusa ai i lenei vala: “O ai . . . Paulo? O ai ea Apolo? O i maua ua na o auauna, o ē ua ala ai ona outou faatuatua, e pei ona tofusia i maua ma le galuega na tuuina mai e le Alii. Na ou totōina, na faasūsūina e Apolo; a e peitai o le Atua ua faatupuina. O lenei e le o lē totō, e le o lē faasūsū; a e peitai o le Atua o le na te faatupuina. A o lē totō foi ma lē faasūsū, e tasi lava i laua; a e taitasi ma lona lava taui e maua, e tusa ma lana lava galuega. Auā o le aufaigaluega i matou faatasi ma le Atua; o outou o le faatoaga a le Atua, o outou o le fale o fai o le Atua.”—1 Korinito 3:5-9.
16, 17. O ā faaaoaoga e mafai ona tatou toe taʻua e faamaonia ai o loo ola aʻe tagata o Ieova i ni olaga e olioli ma e iai ni fuafuaga?
16 E tele faaaoaoga e mafai ona taʻua e faaalia ai o le auauna ma le faamaoni i a Ieova, e iu ai i se olaga e iai se fuafuaga e faatumulia ai i tatou i le olioli. O se faamatalaga faapenei e masani ona faalogo pea i ai: “Ou te tilotilo atu i le Maota o le Malo ua faatumulia, [i le aso o lona faapaiaga] ma ou iloa atu ai le toavalu o loʻu auaiga o faatasi ai, e aofia ai aʻu ma laʻu avā, ma le ma fanau e toatolu ma ō latou taʻitoalua. . . . Ua matuā faafiafiaina aʻu ma laʻu avā i se olaga e iai se fuafuaga i le auaunaga i le Atua.”
17 O se mea foi e faamafanafanaina ai le loto, le iloa e mafai e so o se tagata e tusa lava po o le ā le matua, ona saili atu i se olaga e olioli, e iai se fuafuaga moni i le auaunaga a Ieova. Mo se faaaoaoga, na aʻoaʻoina e se tasi fafine le upu moni o le Tusi Paia i se fale tausimaʻi, ma na papatisoina e avea ma Molimau a Ieova i le 102 o ōna tausaga. Ma na faaiuina lona soifua ma se fuafuaga olioli, ‘o le mataʻu lea i le Atua moni ma tausi i ana poloaiga.’—Failauga 12:13.
O se ʻOlo Malosi e Taulau Pea
18. O le ā e ono mafai ona fai ina ia alofia ai le faatumulia i le lē fiafia ma faateleina ai le olioli?
18 O le olioli i a Ieova o se ʻolo malosi e taulau pea mo i latou o ē faamaoni. E ui i lea, o le iai o lea olioli e lē faapea o le a lē oo mai ai i a i tatou ni taimi faanoanoa, e pei o le taimi lea na uunaia ai Iesu e fetalai faapea i Ketesemane: “O loo matuā tiga lava loʻu loto e oo i le oti.” (Mareko 14:32-34) Seʻi faapea ua oo i se tulaga ua matuā lē fiafia ai ona o le lolo atu i sailiga manatu faapito. E ao la ona sui loa le ituaiga olaga o tatou ola ai. Pe afai foi ua faaitiitia lo tatou olioli ona o lo tatou tauaveina ma le manatu faapito o se avega mamafa o tiute tauave faale-Tusi Paia, atonu e mafai ona tatou faia ni fetuunaiga e aveesea ai le popole ma toe faafoisia mai ai le olioli i le loto. E faaopoopo i na mea, o le a faamanuia i tatou e Ieova i le olioli pe afai tatou te saili e faafiafia o ia e ala i le tetee malosi atu i le tino agasala, le lalolagi amioleaga, ma le Tiapolo.—Kalatia 5:24; 6:14; Iakopo 4:7.
19. E ao faapefea ona tatou manatu i so o se faaeaga ua tatou mauaina i le faalapotopotoga a Ieova?
19 O mafuaaga ua tatou talanoaina, ma le tele foi o isi, ua maua ai e i tatou le tele o le olioli. E tusa lava pe o i tatou o ni tagata talaʻi o le faapotopotoga, po o auai i se vala o le auaunaga faataimi atoa, o i tatou uma lava e mafai ona tele ni mea e fai i le galuega a le Alii, ma e mautinoa e fesoasoani lea i lo tatou olioli. (1 Korinito 15:58) E tusa lava po o ā faaeaga o tatou mauaina i le faalapotopotoga a Ieova, seʻi ō tatou faafetai ia ona o na mea ma tuuina atu ma le olioli le auaunaga paia i lo tatou Atua alofa, ma o se Atua fiafia.—1 Timoteo 1:11.
20. O le ā lo tatou faaeaga silisili, ma o le ā le mautinoa e mafai ona iai i a i tatou?
20 E faapitoa lo tatou olioli i le faaeaga ua i a i tatou o le tauaveina o le suafa sili o Ieova i le avea o ni ana Molimau. Ioe, o i tatou e lē lelei atoatoa ma e feagai ma le tele o tofotofoga, ae seʻi teu mau pea i ō tatou mafaufau lo tatou faamanuiaga matagofie o ni Molimau a Ieova. Ma ia manatua, o le a lē tuulafoaiina i tatou e lo tatou Tamā alofa faalelagi. E mafai ona tatou mautinoa o le a faamanuiaina pea i tatou pe afai e avea le olioli i a Ieova ma ō tatou ʻolo malosi.
O le a Faapefea ona E Tali Atu?
◻ O le ā le uiga “o le olioli i a Ieova”?
◻ E faapefea ona maua e Kerisiano le olioli moni?
◻ O ā nisi o mafuaaga ua ala ai ona olioli Molimau a Ieova?
◻ Aisea ua avea ai le olioli i a Ieova ma ʻolo malosi e taulau pea?