Faapotopoto Faatasi ma i Latou e Matatau i le Atua

“O TAGATA i so o se mea, o loo momoo mo se saolotoga mai le mataʻu—mataʻu i faiga sauā, mataʻu i le leai o ni galuega, ma le mataʻu i maʻi faigata. O faanaunauga foi na o loo i a i tatou. . . . Aisea la ua tatou talanoaina ai le auala e atiina aʻe ai le mataʻu?” O lena fesili faatupu naunau, na lāgā e le failauga o le lauga autū i Tauaofiaga Itumalo taitasi uma o le “Mataʻu i le Atua” ia na amata i a Iuni, 1994.

O le faitau miliona o ē na auai—muamua i Amerika i Mātū, ma mulimuli ane i Europa, Amerika Tutotonu ma Amerika i Saute, Aferika, Asia, ma motu o le sami—sa naunau e aʻoaʻo e atiina aʻe lea mataʻu. Aisea? Auā o lo tatou mauaina o faamanuiaga ua i a Ieova mo ona tagata, e faalagolago i lo tatou mataʻu i le Atua. O le pogai lea na faapotopoto ai le auusufono, ina ia aʻoaʻo e uiga i le mataʻu i le Atua, ma i le gasologa o aso e tolu o le polokalama, na latou aʻoaʻoina ai mea e tele e uiga i lenei uiga tāua faa-Kerisiano.

‘Ia Mataʻu i le Atua ma Anaana i Ana Poloaiga’

O le matua lena o le uluai aso o le tauaofiaga, na faavae i le Failauga 12:13. O le ā le uiga o le mataʻu i le Atua? I le vaega muamua lava o le polokalama, na faamatala ai e le taitaifono o le tauaofiaga e faapea, o le mataʻu i le Atua, e atagia atu ai le gatete ma se migao uigaese mo Ieova, faapea ma se mataʻu e atoatoa ona mamā ina neʻi faia se mea e lē fiafia ai o ia. O lena mataʻu i le Atua, e lē o se mataʻu valea; o se mataʻu mamā ma tatau.

E faapefea ona aogā i a i tatou lenei mataʻu mamā? O le lauga na sosoo ai, “Aua Neʻi Faavaivai ma Faamaamulu,” na faamatala ai e faapea, o le mataʻu i le Atua, e uunaia ai i tatou e tausia ma le olioli poloaiga a le Atua. Faatasi ma le alofa i le Atua ma tuaoi, o le a faatumuina ai i tatou e lena mataʻu i le malosi faaleagaga. Ioe, o le mataʻu i le Atua, e aogā i a i tatou e alofia ai le faifaiaga i le tausinioga mo le ola e faavavau.

I le polokalama, na sosoo ai ma faatalanoaga, na aumaia ai se faamaoniga olaola i le mafai e le mataʻu i le Atua ona faatumauina i tatou. Na faamatalaina e i latou na faatalanoaina le auala na uunaia ai i latou e le mataʻu ma le migao i le Atua e faaauau i le faiva e ui lava i le lē manatu mai o tagata, le lē ano mai, po o sauaga, ma fesoasoani i a i latou e onosai i le feagai ai ma ō latou lava tofotofoga faigata.

Aisea la e maua ai e nisi le mataʻu i le Atua, ae lē iai i nisi? I le lauga “Atiina aʻe ma Mauaina Aogā Mai i le Mataʻu i le Atua,” na faamatala ai e le failauga na fofogaina lenei lauga autū e faapea, i le Ieremia 32:37-39, na folafola ai e Ieova o le a Ia tuuina i Ōna tagata se loto e mataʻu i le Atua. Ua totō e Ieova le mataʻu i le Atua i ō tatou loto. E faapefea? E ala i lona agaga paia ma lana Afioga faagaeeina, le Tusi Paia. Peitai, e manino mai, e ao ona tatou faia ni taumafaiga filigā e suesue le Afioga a le Atua, ma ia faaaogā atoatoa le tele o sauniuniga faaleagaga ua ia faia. E aofia ai i nei mea a tatou tauaofiaga, ma sauniga a le faapotopotoga, ia ua fesoasoani i a i tatou e aʻoaʻoina ai le mataʻu i a te ia.

Na tatalaina le polokalama o le afiafi i se apoapoaiga ina ia faatuatua i a Ieova ma lana Afioga. Na sosoo mai ai i lea le talanoaina o auala autū e ao ona faaaafia ai e le Malo ō tatou olaga i le avea o ni Kerisiano.

Ona sosoo lea ma le uluai lauga o lauga faasolo e tolu na fofogaina i le tauaofiaga. O le matua o lenei lauga faasolo, “O le Mataʻu i le Atua e Uunaia ai i Tatou e Usiusitai i Faatulagaga a le Atua,” lea na taulai atu i le aiga. O manatu o loo mulimuli mai o se faaaoaoga o fautuaga aogā—faale-Tusi Paia—na aumai.

□ Mo tane: O le mataʻu i le Atua, e ao ona uunaia ai se tamaloa e alofa i lana avā e pei o lona lava tino. (Efeso 5:28, 29) E leai se tane e manao e faamanuʻa i lona lava tino, faalumaina o ia lava i luma o ana uo, pe faitatala e uiga i ona lava masei. O lea la, e ao ai ona ia āva i lana avā, ma ia faaaloalo i ai e pei ona ia manao e faia i a te ia lava.

□ Mo avā: O le mataʻu o Iesu i le Atua, na uunaia ai o ia ‘e faafiafia pea le Atua.’ (Ioane 8:29) O se agaga lelei lenei mo avā ia faataitaia i le feagai ai ma ā latou tane.

□ Mo mātua: E mafai e mātua Kerisiano ona mataʻu i le Atua e ala i le manatu mamafa i tiute tauave faamātua, i le vaai i ā latou fanau o ni tofi mai i a Ieova. (Salamo 127:3) O le sini muamua o mātua, o le tausia o ā latou fanau ina ia avea ma Kerisiano moni.

□ Mo fanau: Ua faatonuina e Ieova fanau ina ia usiusitai i ō latou “matua i le Alii.” (Efeso 6:1) O lea, o le usiusitai i ō latou mātua, o le usiusitai lava lea i le Atua.

O le lauga faaiu o lena aso na faagaeetia ai ō tatou loto, auā na talanoaina ai faalogona faanoanoa e oo i a i tatou uma pe afai e maliu sē pele i a i tatou. Ae peitai, ina ua oo i le ʻafa o le lauga, na iai se mea na faateia ai. Na faafiafiaina e le failauga le aofia i le faasilasilaina mai o le tatalaina o le polosiua fou, Pe a Maliu se Tasi e Pele i a te Oe. O lenei lomiga felanulanuai e 32 ona itulau, o loo taʻua ai ni mea se tele e mafai ona fesoasoani i a i latou o loo moomoo ina ia malamalama ma ia faafetaiaia faalogona ma lagona ootia na oo mai ona o le maliu o se tasi e pele. Pe na e oo i se tulaga ua e lē iloa po o ā ni upu e fai atu ai i se tagata faanoanoa? O loo talanoaina i se vaega o lenei polosiua le auala e mafai ai ona tatou fesoasoani i a i latou o faanoanoa. A o faalogologo atu i le failauga, e toatele tagata i le aofia sa manatunatu i se tasi e ono mafai ona aogā i ai lenei polosiua fou.

ʻTuuina atu le Auaunaga Paia ma le Mataʻu i le Atua ma le Gatete’

O le matua lena o le aso lona lua, sa faavae mai le Eperu 12:28. I le polokalama o le taeao, na faia ai le lauga faasolo lona lua, “Faapotopotoga o Savavali i le Mataʻu i a Ieova.” O le uluai vaega, sa faatatau i le auai i sauniga. O lo tatou auai i sauniga ua faaalia ai lo tatou faaaloalo i le Atua ma ana sauniuniga faaleagaga. O le auai, ua tatou faaalia ai, tatou te matatau i lona suafa ma naunau ia ogatasi ma lona finagalo. (Eperu 10:24, 25) Na faamatala e le failauga lona lua e faapea, ina ia savavali faatasi le faapotopotoga atoa i le mataʻu i a Ieova, e tatau i tagata taitoatasi ona faia lana lava vaega i le tausisia o amioga lelei. Na talanoaina e le failauga mulimuli se faaeaga ma se tiute o loo iai i Kerisiano uma—le folafola atu lea o le tala lelei ma le lē faavaivai. O le ā le umi o le a faaauau ai pea ona tatou talaʻi? Seia fetalai mai Ieova, ua lava.—Isaia 6:11.

“O le Olioli i a Ieova o Lo Outou ʻOlo Malosi Lea” sa avea ma matua o le lauga na sosoo ai, e pei ona talanoaina nei i mataupu mo suesuega i lenei mekasini. (Neemia 8:10) Aisea e olioli ai tagata o Ieova? Na otooto mai e le failauga nisi o mafuaaga. O le mafuaaga e sili ona tāua, o se faiā mafana ma le Atua, ua avea ai i tatou o ni tagata e aupito sili ona olioli i le lalolagi. Seʻi tau lava ina manatu, na faamanatu mai e le failauga i le ʻau usufono e faapea, ua i a i tatou le faaeaga o le avea ma nuu ua tosina atu e Ieova i a Iesu Keriso. (Ioane 6:44) Maeu se mafuaaga malosi mo le olioli!

O le tumutumuga o tauaofiaga uma, o le papatisoga, ma e faapena foi tauaofiaga o le “Mataʻu i le Atua.” I le lauga “Tuuina atu ma Papatisoina i le Mataʻu ia Ieova,” na faamatala ai e le failauga e faapea, o avega tauave totino a tagata papatiso uma, e sautuafā: (1) E tatau ona tatou suesue le Afioga a le Atua faatasi ma le fesoasoani a lomiga e fesoasoani i a i tatou ina ia malamalama ma faatinoina; (2) e tatau ona tatou tatalo; (3) e tatau ona tatou auaufaatasi ma uso talitonu i sauniga a le faapotopotoga; ma lona (4) e tatau ona tatou molimau atu i le suafa o Ieova ma le Malo.

Na amataina le polokalama o le afiafi o le Aso Toonai i se mataupu e faamautinoa ai i tatou e faapea, “Se Nuu e Lē o Tuulafoaiina e Ieova.” I le tolusefulu lima senituri ua mavae, ina ua fesagai le nuu o Isaraelu ma taimi faigata, na tuuina atu ai e Ieova se faamaoniga e ala i a Mose, i le faapea atu: “O Ieova lou Atua . . . na te le tuuna oe, na te le lafoai ia te oe.” (Teuteronome 31:6) Sa faamaoni Ieova i lena folafolaga e ala i le puipuia o tagata Isaraelu ina ua latou ulufale atu i le Nuu o le Folafolaga ma nonofo ai. I aso nei, pe a fesagai ma tofotofoga faigata, e mafai foi ona tatou mautinoa atoatoa o le a lē tuulafoaiina i tatou e Ieova, tau lava ina ia tatou pipiimau atu i a te ia ma utagia fautuaga mai lana Afioga.

E mafai faapefea ona tatou maua le fiafia i le faitauina o le Tusi Paia? I le lauga, “Faitau le Afioga a le Atua, le Tusi Paia, i Aso Taitasi,” na fautuaina ai e le failauga se mafaufau filigā pe a faitauina le Tusi Paia ma fesiligia fesili e pei o nei: O le ā ua aʻoaʻo mai e lenei faamatalaga i a te aʻu e faatatau i uiga ma ala o Ieova? E mafai faapefea ona sili atu ona ou pei o Ieova i nei vala? O le faitauina o le Tusi Paia i lenei auala, ua avea o se mea e fiafia ai ma o se taui.

Na sosoo ai ma le taulai atu o manatu i le lauga faasolo lona tolu o le polokalama, “Sauniuniga e Fesoasoani ia i Latou e Matatau ia Ieova.” E ui e lē o faia e Ieova ni vavega mo ana auauna i aso nei, ae e mautinoa lava lona fesoasoani i a i latou o ē matatau i a te ia. (2 Peteru 2:9) O le lauga faasolo lenei na talanoaina ai sauniuniga e fa mai i a Ieova e fesoasoani ai i a i tatou i nei taimi faigata: (1) E ala i lona agaga, ua faamalosia ai i tatou e Ieova ina ia faataunuuina galuega e lē mafai e lo tatou malosi ona faia. (2) E ala i lana Afioga, ua ia saunia ai fautuaga ma taiala mo i tatou. (3) E ala i le togiola, ua ia foaiina mai ai i a i tatou se loto fuatiaifo mamā. (4) E ala i lana faalapotopotoga, e aofia ai le autoeaina, ua ia saunia ai mo i tatou taiala ma le puipuiga. (Luka 11:13; Efeso 1:7; 2 Timoteo 3:16; Eperu 13:17) O le faaaogā atoatoa o nei sauniuniga, o le a mafai ai ona tatou tumau ma maua ai le faamaoniga a Ieova.

O le matua o le lauga faaiu i le afiafi o le Aso Toonai e faapea, “Ua Lata mai le Aso Matautia o Ieova,” sa faavae mai le valoaga a Malaki. Sa iai aso matautia i le talafaasolopito ua mavae, e pei o le tuuina atu o le faamasinoga i a Ierusalema i le 70 T.A. Ae o le aso e sili ona matautia i mea uma na tutupu i tagata, o le aso o loo sau o Ieova, e aumaia ai le ‘taui ma sui i a i latou o ē lē iloa le Atua, ma ē lē anaana i le tala lelei a lo tatou Alii o Iesu.’ (2 Tesalonia 1:6-8) O le ā le umi o totoe mo lena mea? Na taʻua e le failauga e faapea: “Ua lata mai le iuga! E silafia e Ieova le aso ma le itu aso. Na te lē suia lana faasologa. Ua valaauina i tatou ina ia tumau ma le onosai.”

Na foliga na vave ona oo mai le aso lona lua i lona mutaaga. O le a faapeī la le aso faaiu?

“Ia Matatau i le Atua ma Avatu ia te Ia le Viiga”

O le matua lena o le aso lona tolu, sa faavae mai i le Faaaliga 14:7. I le polokalama o le taeao, na faamatilatila ai e se faasologa o lauga, nisi o aʻoaʻoga faavae ua ese ai Molimau a Ieova mai isi faalapotopotoga uma faalotu.

I le lauga, “O le a Iai se Toetu mo Ē Amiotonu,” na lāgā ai e le failauga se fesili faaoso naunau e faapea: “I lena Aso Faamasino i le afe o tausaga, o afea o le a toe faatutuina ai i latou o ē na maliliu i nei aso e gata ai o le faiga o mea a Satani?” O le tali? Na faamatala mai e le failauga e faapea: “E lē o taʻua mai e le Tusi Paia. Ae peitai, pe lē moni ea, o i latou na maliliu i ō tatou aso o le a muamua ona toe faatutuina ina ia auai faatasi ma le motu o tagata e toatele o le a faasaoina mai i a Amaketo, i le galuega tele tau aʻoaʻoga lea o le a faia a o faagasolo le Aso Faamasino? Ioe, o le mea moni lena!” Po o le a iai ni ē faasaoina? E mautinoa lava o le a iai. O aʻoaʻoga faale-Tusi Paia ma faaaoaoga na faamautinoa mai ai i a i tatou lenei mea, sa faamatalaina manino i le lauga na sosoo ai e faapea, “Faasaoolaina atu i le Puapuaga Tele.”

Ua leva ona malamalama Molimau a Ieova, e lua ni taunuuga o loo taofia e le Tusi Paia—o le ola e faavavau i le lalolagi mo le faitau miliona o tagata, ma le ola e lē mafai ona toe oti i le lagi mo se aofaiga faatapulaaina o ni tagata o ē o le a pule faatasi ma Keriso i lona Malo. O le faamoemoe faalelagi na talanoaina i le lauga e faapea, “Aua e te Fefe Oe le Lafu Mamoe Itiiti e.” (Luka 12:32) I le vaai atu i tulaga o iai le lalolagi i le taimi nei, e tatau i le lafu mamoe itiiti ona ʻaua le fefefe; e tatau i a i latou taitoatasi ona tumau seia oo i le iuga. (Luka 21:19) Na faapea mai le failauga, “O lo latou lē fefefe, ua avea lea o se mea e faamalosia ai i latou o le motu o tagata e toatele. E ao foi i a i latou ona atiina aʻe se uiga o le lē fefefe a o latou āloālo atu mo le faasaoina a o faagasolo le taimi aupito sili o faalavelave e leʻi faapea ona iloa muamua i le lalolagi.”

I le iuga o le polokalama o le taeao, na matamata fiafia ai le aofia i le tala faale-Tusi Paia e faapea, O Filifiliga O Lua Feagai. I aso o Iosua, faapea foi le perofeta o Elia, sa faalotolotolua tagata Isaraelu i le faia o sa latou filifiliga. E tatau ona faia se filifiliga. Na faapea atu Elia: “Pe tou te faaletonu i manatu e lua seia afea? Afai o Ieova o le Atua [moni] ia, ia outou mulimuli atu ia te ia; a e afai o Paala, ia outou mulimuli atu ia te ia.” (1 Tupu 18:21) I aso nei foi, ua manaomia ai ona faia se filifiliga a tagata. E lē o le taimi lenei e faaletonu ai i manatu e lua. O le ā le filifiliga saʻo? Le filifiliga lea na faia e Iosua i aso anamua. Na faapea mai o ia: “A o aʻu nei ma loʻu aiga, matou te auauna ia Ieova.”—Iosua 24:15.

Na foliga mai, ua oo faafuasei mai le aoauli o le Aso Sa, ma o le taimi lea mo le lauga lautele, o lona matua, “Le Pogai e Ao ai Nei ona Mataʻu i le Atua Moni.” I le Faaaliga 14:6, 7, na uunaia ai tagata uma lava e faapea: “Ia outou matatau i le Atua ma avatu ia te ia le viiga.” Aisea e faanatinati ai ona matatau nei i le Atua? Auā e pei ona faaauau mai le mau e faapea, “auā ua oo mai le itu aso o lana faamasinoga.” E ala i lona Alo, lea ua faapaleina nei e avea ma Tupu o le Malo faalelagi, o le a faaiuina ai e Ieova lenei faiga o mea lē mamā ma le fouvale. Na faamatala mai e le failauga e faapea, e na o le pau lava lenei o le auala e aumaia ai le mapusaga i a i latou o ē matatau i le Atua, faapea ma le faasaoina o lo tatou aiga faalelalolagi. Talu ai o aso faaiu nei o lenei faiga o mea, ua faanatinati ai ona tatou matatau nei i le Atua moni!

Ina ua uma le otootoga o le mataupu mo suesuega i Le Olomatamata mo lena vaiaso, sa tulai mai loa le failauga mulimuli i le pulelaa mo le fofogaina o lana lauga. Na ia faamatala mai e faapea: O le iuga, na matuā tele ni aogā na maua e le auusufono mai le polokalama o le tauaofiaga, o le mataʻu i le Atua. Sa ia faamamafa aogā e tele na maua e i latou o ē matatau i le Atua. Na faalauiloa mai ai e le failauga le tatalaina o se lipine vitiō fou—United by Divine Teaching (Autasia e Ala i Aʻoaʻoga Mai le Atua). O loo faatāuaina ai le vala tutasi o Tauaofiaga Faavaomalo o “Aoaoga Mai le Atua” na usuia i le 1993-1994. A o faaiuiu le lauga, e toatele sa tau mānatu e faapea, ‘Po o le ā se mea o le a tatou āloālo atu i ai i isi tausaga o sosoo mai?’ O ni tauaofiaga itumalo mo aso e tolu, i le tele o nofoaga.

I le faaiuga, na sii mai ai e le failauga le Malaki 3:16, lea e faapea mai: “Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.” Sa taʻape le fuāmanusina, ua tofu ma si ana iʻa, faatasi ma se filifiliga manino ina ia mafaufau i le suafa o Ieova ma auauna i a te ia ma le mataʻu i le Atua.

[Ata i le itulau 24]

E manaomia e sui papatiso ona faaalia pea le mataʻu i le Atua

[Ata i le itulau 25]

Le tala “O Filifiliga o Lua Feagai” na lagona ai e le ʻau faalogologo le manaomia ona faia se filifiliga e uiga i le auaunaga i a Ieova

[Ata i le itulau 26]

Sa olioli uma le auusufono e talia le polosiua fou “Pe a Maliu se Tasi e Pele i a te Oe”