Lau Lotu—Po o se Vaa e Lē Tatau ona Tuulafoaiina?
O SE vaa, o loo i le ogatotonu o se afā malosi. O le auvaa o ē o loo tauivi ma le atuatuvale ina ia faasaoina lo latou vaa, ua fesagai nei ma se filifiliga maʻoti: pe nonofo ai pea i luga o le vaa pe lafoai ma faasaoina o latou ola. Pe na e iloa o lenei vaaiga matautia ua faaaogaina e fai ma tala faataitai faalelotu?
O tagata lotu ae maise lava tagata popoto o le Katoliko, e masani ona faatusaina la latou lotu i se vaa, o loo fesagai ma se afā malosi. Ua latou faapea mai, o lenei vaa, o loo faatautaia e Iesu po o Peteru, ua na o lea le auala i le faaolataga. O le manatu o taʻitaʻi lotu e faapea: ‘Aua lava neʻi tuulafoaiina le vaa. Na feagai le lotu ma le tele o faalavelave matuiā i aso ua mavae, ae ua avea o se vaa ua sao mai matagi malolosi uma o le talafaasolopito.’ Ua faapea mai nisi, ‘Aisea o le a tuulafoaiina ai le Lotu? O ā nisi mea e filifili mai ai? Aisea e lē tumau ai pea i le lotu ma fesoasoani e tataʻi atu i se ogasami e sili ona toafilemu?’
I le ogatasi ma lenei tala faatusa, ua manatu ai le toatele o tagata mai lotu eseese uma e faapea, ‘Ua ou iloa e tele lava mea e sese ai laʻu lotu, ae ou te faamoemoe o le a iai se taimi e suia ai. Ou te lē manao e lafoai laʻu lotu. Ou te manao e faia saʻu vaega e fesoasoani ai ina ia foia le tele o ona faafitauli.’ O lenei ituaiga o manatu, atonu ua māfua ona o le lagona alofa moni i le lotu a tuaā, po ona o le fefe ina neʻi “faalataina” le lotu.
O se faaaoaoga patino o lena mea, o Hans Küng, o se aʻoaʻo Katoliko e lauiloa i le faatuiese, o lē na mafaufau loloto ma faapea mai: “Pe tatau ona ou tuulafoai le vaa i le taimi o le afā, ma tuua ai i latou o ē na matou folau faatasi mai e fesagai ma le matagi malosi ma tatā le liu, ma atonu e tauivi ai mo le faasaoina?” Na tali mai o ia e faapea: “Ou te lē lafoaiina lava loʻu aogā i totonu o le lotu.” A lē o lea, o le “vavae ese lea mai lenei lotu ona ua ponā, ma suia ai ona o le manao i tulaga amiotonu, ma atonu ia avea ai o ni Kerisiano e sili atu ona faamaoni.”—Die Hoffnung bewahren.
Ae pe mafai e se tagata ona tumau ai pea i lana lotu i le faamoemoe e faapea, ona o le alofa tunoa o le Atua, o le a ia faatagaina se vaitaimi e lē faatapulaaina mo lotu uma e toe fuataʻi ai? O se fesili tāua lenei. E pei ona faaalia i le tala faatusa, o le tuua faanatinati o se vaa ua lamatia i le ō atu i vaa faaola e lē malupuipuia, e tutusa lava le matautia ma le nofo ai i se vaa ua goto. Pe atamai la le nofo ai i se lotu e tusa lava po o ā tulaga e oo i ai? O ā ni avanoa e toe fuataiina ai ua ofoina mai e lotu o aso nei? O le ā le umi o le a faataga ai i latou e le Atua e faatautee i lona finagalo?
[Ē Ana le Ata i le itulau 3]
Chesnot/Sipa Press