Lipoti a Ē Faalauiloa le Malo

E Talaʻiina atu Foi le Tala Lelei o le Malo

MO LE faitau senituri, ua faaaogā ai ma le poto e le fili sili o le Atua, o Satani le Tiapolo, ia mālō faapolotiki ma lotu sese i ana taumafaiga e taofiofia le faasalalauina o le Faa-Kerisiano moni. Peitai o le a lē taulau nei faiga. Na valoia e Iesu faapea, “e talaʻiina atu foi [le] tala lelei o le malo [e leʻi faapea mai, “e ono talaʻiina” pe, “e mafai ona talaʻiina”] i le atu laulau uma, e fai ma molimau i nuu uma.”—Mataio 24:14.

Ua iai faamaoniga o le lē taulau o Satani i Eleni. I lena atunuu ua fai ai ni taumafaiga e le Lotu Orthodox a Eleni e faasāsā Molimau a Ieova mai le talaʻiina atu o le tala lelei o le Malo. Ae e pei ona faamatilatila mai i le mea na tupu o sosoo mai, ua faaalia ai le oo atu lava o le tala lelei i tagata loto faamaoni e ui i sauaga.

Pe tusa ma le 30 tausaga ua mavae, na talia ai e se patele o le Lotu Orthodox a Eleni le tala lelei ma faaalia lona faanaunauga e fia avea ma se tasi o Molimau a Ieova. Ae peitai na matuā teena e ōna aiga lenei laasaga ma uunaia o ia e motusia ana fesootaiga ma Molimau. Ina ia faafiafia lona aiga, na ia faaauau ai pea i lona tofiga o se patele; ae na ia mautinoa pea o Molimau a Ieova na fesoasoani i a te ia e aʻoaʻoina le upu moni ae o lea ua ia tuua ona o se faafesuiaiga mo se tulaga aloaia i le lotu sese.

E ui i lea, i nisi taimi e tu ai o ia mo Molimau a Ieova pe a tulai mai ni avanoa e faia ai faapea. I nisi o mea na tutupu, na ia uunaia ai tagata a latou fia aʻoaʻoina upu moni o le Tusi Paia, e tatau ona latou suesue ma Molimau. I le faagasologa o tausaga, na mulimuli moni atu ai lava nisi i ana fautuaga.

E leʻi leva tele atu na maʻi tigaina ai le patele ma na ia mautinoa ua lē o toe mamao ae oti. A o iai la i le falemai, na ia tāloina ai lana fanau ma na latou potopoto uma ane lava i lona moega.a Sa ia faamatalaina loa i a i latou faapea afai e oti, atonu latou te toe feiloai ma ia. Na ia talanoa atu i a i latou e uiga i le aʻoaʻoga a le Tusi Paia o le toe faatutuina mai o tagata e Ieova ina ia ola i se parataiso i luga o le lalolagi, ae afai latou te mananao moni lava e vaai i le faatinoga o lena mea, e tatau ona latou aʻoaʻoina le upu moni mai le Tusi Paia ma ō ese mai lotu sese. Na ia faatauanauina i latou e auaumea ma Molimau a Ieova ma aʻoaʻo mai i a i latou pe faapefea ona avea ma Kerisiano moni.

E leʻi umi se taimi mulimuli ane, ae maliu loa le patele. E ui i lea, o ana upu faamavae i lana fanau na iai ni iuga lelei. O lona afafine, e pei lava foi o le toatele o ōna tauaiga, sa matuā tetee i Molimau a Ieova ma la latou galuega. Ae na ia leʻi faaleamanaiaina le olega naunautai mai a lona tamā i le taimi na vaivai ai, o lea sa ia faafesootaia loa Molimau a Ieova ma amata suesueina le Tusi Paia. E leʻi leva talu ai nei ona avea o ia ma Molimau, tuuina atu lona ola i a Ieova le Atua ma faailogaina lea i le papatisoina i le vai.

I Eleni, ma le sili atu i le 230 isi atunuu, e faalagolago atu ai Molimau a Ieova i le mana o le agaga paia o le Atua. Faatasi ma le lagolagosua atoatoa a le agaga paia ua latou faia ai se sao i le faataunuuina o le valoaga a Iesu e faapea: “O le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema, ma Iutaia uma lava, ma Samaria, e oo lava i le tuluʻiga o le lalolagi.”—Galuega 1:8.

[Faaopoopoga i lalo]