“Feagaiga Tuai” po o “Tusitusiga Eperu”—O Lē Fea?

I ASO nei, o se mea masani i Kerisinetoma ona faaaogā le faaupuga “Feagaiga Tuai” ma le “Feagaiga Fou” e faamatala ai vaega o le Tusi Paia ia e lomia i le gagana Eperu/Arama ma le gagana Eleni. Ae po o iai se faavae faale-Tusi Paia mo le faaaogaina o nei faaupuga? Ma mo ā mafuaaga e masani ai ona lē faaaogaina e Molimau a Ieova ia faaupuga i ā latou lomiga?

E moni, i le 2 Korinito 3:14, e tusa ai ma le Tusi Paia faa-Samoa o le faaliliuga fou (i le 1969) ma le faaliliuga tuai (i le 1884) faapea ma isi faaliliuga, e foliga mai ai e lagolagoina lenei faiga masani. I le Tusi Paia faa-Samoa, ua faitauina ai faapenei lena fuaiupu: “A e peitai sa faatauasoina o latou manatu; auā ua oo mai i nei ona po o tumau pea lea lava ufiufi pe a faitauina le feagaiga tuai, auā ua na o Keriso ua faaumatia ai.”

Ae peitai, po o tautala ea i inei le aposetolo e uiga i tusi e 39 na o loo masani ona taʻua o le “Feagaiga Tuai”? O le upu Eleni i inei ua faaliliuina i le “feagaiga,” o le di·a·theʹke. Ua faapea mai le lomifefiloi taʻutaʻua faalelotu a Siamani, le Theologische Realenzyklopädie e uiga i le 2 Korinito 3:14, ‘o le faitauina o le di·a·theʹke tuai’ i lena fuaiupu, e tutusa lelei lava ma le ‘faitauina e Mose’ o le fuaiupu o loo mulimuli mai. I lea, ua faapea mai ai, o ‘le di·a·theʹke tuai’ ua fai ma sui o le Tulafono a Mose, po o i se tulaga sili, o le Penetatuka. O le mea moni, e lē o suitulaga i Tusitusiga faagaeeina atoa i taimi a o leʻi oo i le Faa-Kerisiano.

O loo faasino atu e le aposetolo i na o se vaega o Tusitusiga Eperu, o le feagaiga tuai o le Tulafono, lea na faamauina e Mose i le Penetatuka; e lē o faasino atu o ia i Tusitusiga Eperu ma Arama atoa. E lē gata i lea, e leʻi uiga o ia e faapea o tusitusiga Kerisiano faagaeeina o le uluai senituri T.A. ua faia aʻe i se “feagaiga fou.”

E tatau foi ona matauina e faapea, o le upu Eleni o le di·a·theʹke o loo faaaogaina i inei e Paulo, o lona uiga moni o le “feagaiga.”—Mo nisi faamatalaga atili, tagaʻi i le New World Translation of the Holy Scriptures—With References, Faasinoupu 7E, itulau e 1585, lomia e le Watchtower Bible and Tract Society of New York, Inc., 1984.

Ae tusa ai ma lenei manatu, ua taʻua ai e le “National Catholic Reporter” e faapea: “O le faaupuga ‘Feagaiga Tuai’ ua faia ai ma le lē maalofia se taaʻiga o le manatu faatauvaa ma ua lē toe aogā.” Ae o le Tusi Paia o se tusi e tutasi moni na saunia i taumafaiga tomai ma le fitā, ma e leai sona vaega e faapea ua lē aoga, po ua “tuai.” O lana feau e tutusa lava mai le uluai tusi i le vaega ua tusia i le gagana Eperu e oo i le tusi mulimuli i le vaega i le gagana Eleni. (Roma 15:4; 2 Timoteo 3:16, 17) O lea ua i a i tatou mafuaaga tāua e alofia ai nei faaupuga e faavae i manatu lē saʻo, ma ua tatou filifili ai e faaaogā faaupuga e sili atu ona saʻo, o “Tusitusiga Eperu” ma “Tusitusiga Kerisiano Eleni.”