Fesili Mai le Au Faitau

I lona tulaga moni, pe e i ai se eseesega o faaupuga faale-Tusi Paia, o “isi mamoe” ma le “motu o tagata e toatele”?

Ioe, e ui i lea e lē tatau ona o tatou soona ilitata i le faaaogaina o upu pe lē fiafia foi pe a fesuiai le faaaogaina e se tasi o ia faaupuga.

O le toatele o Kerisiano ua masani ma fuaitau ia tatou te mauaina ai nei faaupuga. O le Ioane 10:16 le tasi. I inā ua fetalai ai faapea Iesu: “Ua ia te au foi isi mamoe e le o i lenei lotoā; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” O le isi faaupuga, “motu o tagata e toatele,” ua aliali mai i le Faaaliga 7:9. Tatou te faitau ai e faapea: “Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai Mamoe, ua oofu i latou i ofu sisina, ua i ai foi lau pama i o latou lima.”

Seʻi o tatou iloiloina muamua le Ioane 10:16. O ai mamoe? Ioe, e lelei ona teu i mafaufau, o soo faamaoni uma lava o Iesu, ua faasino i ai o mamoe. I le Luka 12:32, na ia taʻua ai i latou na o ona soo o ē o le a ō i le lagi, o le ‘lafu itiiti.’ O se lafu o ā? O mamoe. O “mamoe” o le ‘lafu itiiti’ o le a avea ma vaega o le Malo i le lagi. A e peitai, o loo i ai isi, ua i ai se faamoemoe ese, o i latou ia e taʻua foi e Iesu o mamoe.

E mafai ona tatou iloaina lenei mea i le Ioane mataupu e 10. Ina ua uma ona ia taʻua mamoe e i ai ona aposetolo o ē na ia valaauina e ola i le lagi, na toe faaopoopo mai Iesu i le fuaiupu e 16: “Ua ia te au foi isi mamoe e le o i lenei lotoā; e tatau ona ou taʻitaʻiina mai o i latou foi.” Ua loa ona iloaina e Molimau a Ieova faapea o lenei fuaiupu, sa tautala ai Iesu i tagata o loo i ai le faamoemoe i le olaga i le lalolagi. O le toatele o tagata faatuatua a o leʻi oo i le Faa-Kerisiano, e pei o Aperaamo, Sara, Noa, ma Malaki, sa i ai foi na faamoemoega. O lea la e mafai ona tatou faaaofiaina ai i latou o se vaega o “isi mamoe” o le Ioane 10:16. Pe a faagasolo le Meleniuma, o le a toe faatutuina mai ai ia molimau faamaoni na soifua a o leʻi oo i le Faa-Kerisiano, ma aʻoaʻoina ai e uiga ia Iesu ma taliaina o ia, i le avea ai o “isi mamoe” a le Leoleo Mamoe Lelei.

Ua tatou iloa foi talu ona maea le valaauina faalauaitele o le vasega faalelagi, e faitau miliona ua avea ma Kerisiano moni. O i latou foi nei ua taʻua ma le saʻo o “isi mamoe,” talu ai e lē o i latou o se vaega o le ‘lafu itiiti.’ Na i lo lea, ua vaavaai atu isi mamoe o aso nei i le ola atu nei lava ma agaʻi ai i le parataiso faalelalolagi.

A e faapefea nei la le “motu o tagata e toatele” o loo taʻua i le Faaaliga 7:9? Ia, tagai i le fuaiupu e 13, ma le fesili o i ai, “O ai ea i latou, po o fea foi na latou o mai ai?” E tatou te mauaina le tali i le Faaaliga 7:14 e faapea: “O i latou ia o e o mai nai le puapuaga tele.” O lea, o le “motu o tagata e toatele,” ua faia aʻe i latou i ē o mai, pe faasaoina mai le puapuaga tele. E pei ona fai mai le fuaiupu e 17, o le a ‘taʻitaʻia i latou i puna o vai ola’ i luga o le lalolagi.

Ma le malamalama lelei lava la, ina ia faasaoina i latou ia i le puapuaga tele ua lalata mai, e tatau ona muai faasinasinaina o latou ofu i le toto o le Tamai Mamoe, i le avea ma ē tapuai moni. E ui la ina faamatalaina mai e le Faaaliga 7:9 lenei motu o tagata i le mavae o le puapuaga, a e e mafai foi ona tatou faatatauina le faaupuga “motu o tagata e toatele” ia i latou uma ua i ai le faamoemoe faalelalolagi o ē o loo avatua le auaunaga paia ia Ieova i le taimi nei, a o leʻi pa le puapuaga tele lea e osofaia ai e malo ia lotu sese.

I lona aotelega la ia tatou manatuaina, e lautele le faaupuga o “isi mamoe,” e aofia ai auauna uma a le Atua o loo i ai le faamoemoe e ola e faavavau i luga o le lalolagi. Ua aofia ai le isi vaega patino i aso nei o ē pei ni mamoe ua aoaoina o se “motu o tagata e toatele” ua i ai le faamoemoe e soifua atu nei lava ma sao atu i le puapuaga tele ua lata mai. O le toatele o Kerisiano faamaoni ia o loo ola i aso nei o “isi mamoe,” e avea foi ma vaega o le “motu o tagata e toatele.”

E aogā tele ona toe taʻua e faapea, e lelei ona manino i nei faamalamalamaga, auā e lē tatau i so o se Kerisiano ona soona manatu mamafa i upu—po o nisi faaupuga, o le faitio i upu. Na lapatai mai Paulo e faatatau i nisi o ē na “faafefeteina” ma “finau i upu.” (1 Timoteo 6:4) Afai ua i ai so tatou lava iloa i le eseesega o faaupuga, ia lelei. A e peitai, e lē tatau ona tatou faitio atu pe faitio ifo i se manatu o se tasi e lē o faaaogā patino tonu ai faaupuga faale-Tusi Paia.