Usiusitai Faaleatua i se Aiga e Lē Lolotu Faatasi

“E SILI atu ona tiga nai lo so o se sasa. . . . Ou te lagona e pei o loo totoulia uma loʻu tino, a e lē o mafai ona iloa mai e se tasi.” “O nisi taimi ou te matuā lagona le lē fiafia ma ua oo mai le musu . . . po o le alu ese foi mai le aiga e lē toe foi atu i ai.” “O nisi taimi ua matuā faigata lava ona toe saʻo lelei le mafaufau.”

O na upu ua tumu i lagona ootia, ua faaalia mai ai lagona o le lē mautonu ma le tuuatoatasi. O faamatalaga na a i latou o ē ua fasia i upu—i tuuaiga, i faamataʻuga, i igoa taufaifai e faaigoa ai, o le matuā lē amanaiaina—ua oo foi ina faaoolima i ai paaga ma tagata o le aiga. Aisea ua soona leaga ai le faiga o nei tagata? O se tali faigofie lava, ona o le eseese o o latou talitonuga faalelotu. O nei la tulaga, ua avea ai le nofo i se aiga e lē lolotu faatasi, o se matuā luʻi moni i le tapuaiga ia Ieova. A e peitai, e toatele ni Kerisiano o i na tulaga, ua latou faaalia ma le taulau manuia le usiusitai faaleatua.

E faafetaia, ona e lē o aiga uma e lē o lolotu faatasi, o loo tutupu ai na feitagaiga ma mafatiaga. E ui i lea, o se mea o loo tupu. Pe o i ai lou aiga i lenei tulaga? Atonu la o loo faafaigata ia te oe ona e tausisia le faaaloalo atu i lau paaga pe i ou mātua foi. Pe afai o oe o se avā o loo e i ai i lena tulaga, po o ni fanau foi i lena siomaga, e mafai la faapefea ona outou taulau manuia i le faaalia o le usiusitai faaleatua i totonu o se aiga e lē lolotu faatasi? O le ā le lagolagosua e mafai ona faia e isi? Ma o le ā foi le silafaga a le Atua i lea mataupu?

Aisea ua Matuā Faafaigata ai ona Usiusitai?

Ua i ai aafiaga a le agaga manatu faapito ma le lē faafetai o le lalolagi, i ou lava faanaunauga lē lelei atoatoa, ma ua faapogaia ai ona avea o se feteenaiga faifai pea i lou usiusitai faaleatua. Ua iloa e Satani lenei mea, ma ua sauniuni o ia e gausia lou maumauai e avea ma Kerisiano. E masani ona ia faaaogā tagata o le aiga o ē itiiti so latou talisapaia ma so latou faaaloalo mo tapulaa faaleatua. O ou tulaga maualuluga faaleagaga ma tau i amioga mamā e masani ona ese mai i tulaga o i tagata o lou aiga lē talitonu. O le uiga o lenei mea o le feteenai o manatu i tulaga o amioga ma mea e fai. (1 Peteru 4:4) Atonu o le a tetele atu omiga ina ia faaliliueseina oe mai lou tulaga faa-Kerisiano, talu ai ua e usiusitai i le poloaiga: “Aua foi tou te amio faatasi ma galuega le aoga a le pouliuli.” (Efeso 5:11) I o latou lava manatu, e lē o toe saʻo se mea o e faia. O na feteenaiga e māfua uma lava ona o lau lotu. Ina ua lē mafai e se tasi tinā ona tatali le mamafa o lana avega i le tausiga o lana fanau mamaʻi, ma ia talosaga atu ai i lana tane mo se fesoasoani, na fetoai ma se tali isā ane, “O lena e tele lou taimi e alu i lau lotu; e lē tatau la ona e manaomia se fesoasoani.” O ituaiga o faaupuga faapena e faaopoopo atu i le luʻi o le faaalia o le usiusitai.

A e i ai foi taimi atonu e te lē ioe ai i ni mataupu e lē o solia tuusaʻo ai le Tusi Paia. A e ua e iloa lelei o oe o se vaega o le aiga ma e tatau ai ona i ai ni au avega tauave e faia. Ua faapea mai Connie: “Sa ou lagona le mafatia tele pe a ou mafaufau atu i le auala na fai ai i matou e loʻu tamā talu ai loʻu mafaufau faapea o loo ia lagona le tuuatoatasi. Ou te taumafai pea e manatua ina ia ou lē soona ita i le tetee mai a lou tamā. Ou te faamanatu pea ia te au lava ia e faapea, o loo i ai se pogai malosi o loo māfua ai ona uiga po o lona teena o lo matou talitonuga. O Satani o le pule lea o lenei faiga o mea.” Na sasaa mai lagona o Susana, o lē na faaipoipo atu i se tagata e lē talitonu, i lona faapea mai: “I le amataga lava, sa masani ona ou lagona loʻu toe fia alu ese mai i laʻu tane—a e i le taimi nei ua lē o toe i ai lena lagona. Na ou iloa sa faaaogā o ia e Satani ina ia tofotofoina ai aʻu.”

O taumafaiga a Satani ina ia faapogaia oe ia i ai lagona o le lē aogā atonu e faaauau pea. Atonu e mou atu le tele o aso ua leai lava se lua fesootaiga ma lau paaga. E oo ina matuā oo mai lagona o le tuuatoatasi i le olaga. O lenei mea e matafi ese atu ai le lagona o le mautinoa ma le toe faaaloalogia e oe o ou lava lagona ma tofotofoina ai lou usiusitai faaleatua. E lagona foi e le fanau le tulaga mou mālie atu i faalogona ma i le faaletino. I se faataʻitaʻiga, e ui lava i teteega a nisi mātua, a e na auai atu pea ma le faamaoni ni auauna talavou se toatolu a le Atua, i a latou sauniga faa-Kerisiano. Na taʻutino mai e se tasi o i latou na, o loo ua avea nei ma faifeau faataimi atoa e faapea: “Sa matou lagona le matuā vaivai ma le lē lavā; sa lē mafai ona matou momoe; na faatumulia i matou i le faanoanoa.”

O le ā o loo Faatalitalia e le Atua Mai ia te Oe?

E tatau ona faamuamua pea le usiusitai i le Atua, a e o le usiusitai e fai faatatau i le tulaga ulu o le tane e ao ona faatinoina pea i le auala e pei ona faatonuina ai e Ieova. (Galuega 5:29) Atonu e faigata lena mea, peitai e mafai ona fai. Ia saili pea i le Atua mo se fesoasoani. E finagalo o ia ina ia e “tapuai atu . . . i le agaga ma le faamaoni [“upu moni,” NW]” ma ia anaana ma gauai atu i lana taʻitaʻiga. (Ioane 4:24) A o faatumuina le ituaiga saʻo o loto e le poto mai le Afioga a le Atua, ona uunaia ai lea o le naunautaiga e usiusitai. E ui lava atonu e suia ou tulaga totino, a e lē suia ai Ieova ma lana Afioga. (Malaki 3:6; Iakopo 1:17) Ua tofia mai e Ieova le tulagaulu i le tane. Ua moni pea lenei mea e tusa lava pe talia e le tane le tulagaulu o Keriso pe leai. (1 Korinito 11:3) E ui lava atonu e faigata ona ola faatasi ma lenei tane lē talitonu, a e afai e te fesagai pea ma faiga leaga ma le faalumaina, ua faapea mai le soo o Iakopo: “O le poto mai luga e . . . e ganagofie.” (Iakopo 3:17) O le amanaiaina ma le lē masalosalo o lenei tulagaulu ma ia taliaina, e manaomia ai le agaga o le Atua, a e maise lava i lona fua o le alofa.—Kalatia 5:22, 23.

Pe a e alofa i se tasi, e faigofie ai ona faaalia le usiusitai faaleatua i le pule ua faatuina e le Atua. Ua fautua mai le Efeso 5:33 e faapea: “A o outou, ia taitasi outou ma alofa i lana lava ava faapei o ia lava ia te ia; o le fafine foi ia ava o ia i lana tane.”

Seʻi manatunatu ia Iesu. Sa amusia ma faaoolima tagata ia te ia, a e na te lei taui atu lava i se tasi. Na ia tausisia pea lona tulaga lē mataʻuleagaina. (1 Peteru 2:22, 23) O le mafatia o Iesu i na faiga sili ona leaga, sa ia manaomia ai se matuā lototele ma se alofa lē mafoifoiai mo lona Tamā, o Ieova. A e o le alofa, “e onosai” i mea uma.—1 Korinito 13:4-8.

Na faamanatu atu e Paulo i lana aumea faigaluega o Timoteo, ma ua ia toe faamanatu mai foi ia i tatou i aso nei e faapea: “Ua le foaiina mai e le Atua ia te i tatou le agaga e mataʻu ai, a o le agaga e faamalosi ai, ma alofa ai, ma pulea ai o tatou loto.” (2 Timoteo 1:7) O le alofa loloto mo Ieova ma Iesu Keriso e mafai ona uunaia ai oe ina ia faaalia le usiusitai faaleatua pe a foliga mai ua faafaigata ona onosaia se mea. O le mafaufau saʻo o le a fesoasoani ia te oe ina ia tausia ai pea se vaaiga paleni ma taulai atu pea i la oulua faiā ma Ieova ma Iesu Keriso.—Faatusatusa i le Filipi 3:8-11.

O Paaga ua Taulau Manuia i le Faaalia o le Usiusitai Faaleatua

O nisi taimi e tatau ai ona e faatalitali mo se taimi umi e vaai atu ai i le auala o le a faafoeina ai e Ieova ou faafitauli. A e lē mafai ona lē oo mai lana fesoasoani. O le fautuaga lenei a se tasi o lē na taulau manuia i le faaalia o le usiusitai faaleatua: “Ia faia pea mea ua tuuina mai e Ieova ia te oe le aiā ma le faaeaga e faia ai—ia tapuai ia te ia i sauniga ma fonotaga, ia suesue, ia auai atu i le auaunaga, ma ia tatalo.” E faamanuia Ieova i au taumafaiga, a e lē o mea ua e faataunuuina. I le 2 Korinito 4:17, na faapea mai ai le aposetolo o Paulo, ‘o tofotofoga e mo na o sina taimi, a e maua ai lo tatou mamalu lea e faavavau.’ Ia mafaufau loloto i lenei mea. O le a avea o se vala e faamautuina ai oe. Ua toe taʻua mai e se tasi avā e faapea: “E lē o agaigai ina faaleleia loʻu tulaga faaleaiga, ma i nisi taimi ou te taumānatu ai pe faamata o fiafia le finagalo o Ieova ia te au. A e tasi le mea ua ou manatu o loo ia faamanuia mai ai, o le mea moni lea e faapea, o loo oʻu sao mai i nei tulaga faigata i se tulaga lelei o le mafaufau, nai lo laʻu tane. O le iloaina o loo faafiafiaina le finagalo o Ieova i a tatou gaoioiga o ni Kerisiano, ua lē afaina ai po o ā lava tulaga faigata e oo i ai.”

Na folafola mai e Ieova lona lē tuuina o i tatou i ni tulaga e sili atu nai lo le mea tatou te gafatia ona onosaia. Ia faatuatua ia te ia. E sili atu lona silafia nai lo i tatou, ma e sili atu foi ona ia silafia lelei oe nai lo lou iloa o oe lava. (Roma 8:35-39; 11:33; 1 Korinito 10:13) O le tatalo atu ia Ieova i taimi faigata e fesoasoani lea. Ia tatalo atu mo lona agaga ina ia taʻitaʻia oe, a e maise lava pe a e lē iloa po o lē fea auala e te ui ai po o le auala e te taulimaina ai se mea. (Faataoto 3:5; 1 Peteru 3:12) Ia faatoga atu pea ia te ia mo le onosai, le pulea o le loto, ma le lotomaulalo ina ia usiusitai ai i lē o pule i lou olaga. Na faapea mai le faisalamo: “O Ieova o loʻu papa ia, ma loʻu ʻolo, ma loʻu faaola.” (Salamo 18:2) O le manatuaina o lenei mea ua avea o se fesoasoani faalaeiau mo i latou o loo nonofo i aiga e lē lolotu faatasi.

A e o le sili o na mea uma, ia faia ni taumafaiga uma ina ia maua ai le fiafia i lau faaipoipoga. Ioe, na valoia e Iesu le avea o le tala lelei ma pogai o fevaevaeaiga. E ui i lea, ia tatalo atu ina ia leai se feeseeseaiga e māfua ona o ou uiga po o lau amio. (Mataio 10:35, 36) I le manatua o lenei mea, o le a avea ai le felagolagomai ma itu e faaitiitia ai faafitauli i le faaipoipoga. E tusa lava pe afai e na o oe o loo faaalia lenei uiga lelei, a e mafai lava ona tele sona aogā i le puipuia ai o le ono oo atu o faafitauli i se tulaga o ni misa ma ni feteenaiga matuiā. E tāua le onosai ma le alofa. “Ia agamalu” ma “ia onosai” i lalo o mea faigata.—2 Timoteo 2:24.

Sa faapei le aposetolo o Paulo o “mea uma mo tagata uma.” (1 Korinito 9:22) I se tulaga tutusa, a o lē o faagutugutulua i tiute faa-Kerisiano, atonu i nisi taimi e manaomia ai ona fetuutuunai lau faasologa ina ia faateleina sou taimi e faaalu i lau paaga ma lou aiga. Ia e faaalu se taimi tele e te mafaia ma lē ua e filifilia e te lua faifaimea faatasi i lou olaga. Ia faaalia le magafagafa faa-Kerisiano. O se faaleoga atu lena o le usiusitai faaleatua.

O se avā e mataʻu i le Atua ma gauai, o lē e fetuutuunai ma i ai faalogona alofa, e faigofie ia te ia ona faaalia le usiusitai faaleatua. (Efeso 5:22, 23) O upu e matagofie, ua “faamai i le masima,” e aogā ia e faaitiitia ai le ono oo atu o feteenaiga faifaipea.—Kolose 4:6; Faataoto 15:1.

Ua faalaeiauina oe e le atamai o le Atua ina ia vave ona e faafilemuina ni feeseeseaiga ma ia toe faafoisia le filemu i ni upu lelei e atinaʻe ai, nai lo le moe ai lava i se tulaga “ita.” (Efeso 4:26, 29, 31) E manaomia ai i lenei mea le lotomaulalo. Ia e matuā faalagolago atu ia Ieova na te foai mai ia te oe le malosi. Na taʻutino mai ma le lotomaulalo e se tasi avā Kerisiano e faapea: “Pe a uma saʻu tatalo faatauanau, ou te lagonaina lava le faamalosiau mai o le agaga o Ieova ia te au ina ia ou faaalia atili uiga alofa i laʻu paaga.” Ua fautua mai le Afioga a le Atua: “Aua le taui atu le leaga i le leaga i se tasi. . . . Ia e faatoilaloina le leaga i le lelei.” (Roma 12:17-21) O se fautuaga atamai lenei, ma o le puna lena o le usiusitai faaleatua.

O Fanau e Faaalia le Usiusitai Faaleatua

O le fautuaga a Ieova ia te outou le fanau o loo nonofo i aiga e lē lolotu faatasi, e faapenei: “Ia outou faalogo i o outou mātua i mea uma; auā o le mea mālie lea i le Alii.” (Kolose 3:20) Ia mātau, o loo taʻua le Alii o Iesu Keriso e tatau ona manatunatu i ai. O lea, o le usiusitai i mātua e lē faatatauina i mea uma lava. O le uiga o le fautuaga lea o loo taʻua i le Galuega 5:29, ina ia ‘sili le anaana i le Atua o ia o le pule nai lo le anaana i tagata,’ e faatatau foi i talavou Kerisiano. O le a i ai ni mea e tutupu o le a tatau ai ia te outou ona filifili po o le ā e ao ona fai e faavae i mea ua tou iloa e talafeagai ma le Tusi Paia. Atonu e iu ai ina tou oo i se faasalaga ona o lo outou mumusu e auai atu i se gaoioiga o tapuaiga sese. E ui o se iuga lē manuia lenei, a e mafai ona faamafanafanaina outou ma tou te olioli foi i le mea moni e faapea, o loo outou mafatia ona o le faia o le mea tonu i le silafaga a le Atua.—1 Peteru 2:19, 20.

Talu ai e taʻitaʻia e mataupu silisili o le Tusi Paia o outou manatunatuga, atonu ai o le a tou eseese ma outou mātua i nisi o mataupu. E lē faapea la o le a fai ai i latou ma o outou fili ona o lenei mea. E tusa lava pe e lē o i latou o ni auauna tuuina atu a Ieova, a e o loo tatau lava ona avatu le ava e tatau ai ia i latou. (Efeso 6:2) Na faapea mai Solomona: “Ia e faalogo i lou tamā, o le na fanaua oe; aua foi e te ʻinoʻino i lou tinā.” (Faataoto 23:22) Taumafai ia tou malamalama i le tiga o loo i o latou faalogona ona o lo outou sailia o le faatuatua lea e lē o iloa e i latou. Ia talatalanoa atu ia i latou, ma “ia iloa lo outou agamalu.” (Filipi 4:5) Ia taʻu atu i ai tou faalogona ma popolega. Ia tou maumauai e tausisia mataupu silisili faaleatua, a e “afai e mafaia ia te outou, ia outou nofo lelei ma tagata uma lava.” (Roma 12:18) O lo outou usiusitai i le pule a mātua i le taimi nei e faaali atu ai ia Ieova lo outou faanaunauga tou te fia usiusitai pea o ni tagatanuu o le Malo.

O Mea e Mafai e Isi ona Fai

O Kerisiano o loo nonofo i aiga e lē lolotu faatasi e manaomia e i latou na le lagolagosua ma le loto malamalama mai isi o latou uso talitonu. Ua faamaonia mai lenei mea i upu a se tasi na faapea mai: “Ua ou matuā lagona le leai o se faamoemoe ma loʻu lē mafesoasoania, auā ua leai se mea e mafai e se tasi ona fai, ma ua leai foi se mea e mafai ona ou faia e suia ai. Ou te faamoemoe atu ia Ieova ina ia faataunuuina lona finagalo i lo matou aiga, po o le ā lava o le a oo i ai.”

O se maluāpapa le auaufaatasi ma uso ma tuafafine faaleagaga i sauniga faa-Kerisiano. O le tagata lava lenei na ia faamatalaina foi lona olaga ua “pei o ni lalolagi eseese se lua. O le tasi lalolagi e tatau ona ou i ai i totonu, a o le isi ou te fiafia i le i ai i totonu.” O le alofa mai le au uso ua mafai ai e i latou nei o loo aafia ona tutumau ma auauna ai i nei tulaga uma. Ia taʻua i latou i a outou tatalo. (Efeso 1:16) Ia faifai pea, i faatasitasiga uma, ona tautala atu ia i latou i upu faalaeiau, upu mautinoa, ma upu faamafanafana. (1 Tesalonia 5:14) Pe a fetaui ma talafeagai, ia faaauai i latou i au gaoioiga faatiokarate po o ni mea faasamasamanoa foi.

O Faamanuiaga ma Aogā o le Usiusitai Faaleatua

Ia mafaufau loloto i aso taitasi i faamanuiaga ma aogā o le faaalia o le usiusitai faaleatua i totonu o se aiga e lē lolotu faatasi. Ia taumafai pea e usiusitai. “Aua neʻi . . . faapalapala.” (Kalatia 6:9) O le onosaia o tulaga lē manuia ma le lē faamasinotonu “ona o le loto fuatia ifo i la le Atua . . . o le mea malie lea” i le Atua. (1 Peteru 2:19, 20) Ia usiusitai i le tele e oo i ai ina ia mautinoa ai le lē faagutugutulua i mataupu silisili amiotonu ma tulafono a Ieova. O lenei mea e faaalia ai le faamaoni i faatulagaga a Ieova. Atonu foi e oo ina faasaoina ai le ola o lau paaga, lau fanau, po o ou mātua, ona o lau amioatua.—1 Korinito 7:16; 1 Peteru 3:1.

A o e tauivi e faataunuu manaoga ma mea o loo faatalitalia mai e se aiga e lē lolotu faatasi, ia manatua le tāua o le tausia o le faamaoni ia Ieova le Atua ma Iesu Keriso. Atonu o le a e lafoaia ni mea se tele, a e o lou lafoaia o le faamaoni ua tusa lena ma lou lafoaia o mea uma lava, e aofia ai ma le ola. Na faapea mai le aposetolo o Paulo: “O le Atua . . . ua fetalai mai ia te i tatou i nei ona aso e gata ai e ala mai i le Alo, o le ua tofia e ia e fai mea uma lava mona tofi, na ia faia foi mea uma e ala ia te ia.” O le amanaiaina o lenei “faaolataga e matuā tele” o le a faamalosia ai oe ina ia e usiusitai.—Eperu 1:1, 2; 2:3.

O lou usiusitai lē faagutugutulua ma lou maumauai i amioga ma tapulaa saʻo, o se puipuiga lelei lea mo oe ma lau paaga lē talitonu. O le faamaoni e atinaʻe ai noataga malolosi o le aiga. Ua faapea mai le Faataoto 31:11 e uiga i se avā faamaoni: “Ua faatuatua ia te ia le loto o lana tane.” O lau amio tausaafia ma lou faaaloalo loloto atonu o le a pupula ai mata o lau tane lē talitonu. Atonu o le a taʻitaʻia ai i lona taliaina o le upu moni a le Atua.

O le usiusitai faaleatua e matuā tautele ma e faasaoola. Ia e tatalo atu ina ia i ai i lou olaga faaleaiga. O le a iu ai i le filemu o le mafaufau ma aumaia ai le viiga ia Ieova.