O le ā ua Uunaia Oe ina ia E Auauna i le Atua?

“Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.”—MAREKO 12:30.

1, 2. O ā mea e faagaee fiafia ai ua faataunuuina i le fesootai atu i le galuega talaʻi?

O LE lelei atoatoa o se taavale e lē filifilia i le na o lona foliga mai. Atonu o le lanu o lona vali ua faamatagofie mai ai lona tino, ma le manaia o lona fausaga atonu o le a tosina ai lē o le a ia faatauina; a e o le mea e sili ona tāua o mea ia o loo faigata ona iloa atu—o le afi na te faaolaina le taavale, ma isi lava vaega laiti uma o loo faagaoioia le taavale.

² E tai tutusa lena ma le auaunaga a se Kerisiano i le Atua. Ua anoanoai galuega faaleatua a Molimau a Ieova. I tausaga taitasi, e silia i le piliona itula ua alu i le talaʻia o le tala lelei o le Malo o le Atua. E lē gata i lea, e faitau miliona suesuega faale-Tusi Paia ua faia, ma e faitau selau afe ē ua papatisoina. Pe afai o oe o se tagata talaʻi o le tala lelei, o lena la sa faia ai sou sao—e tusa lava pe foliga mai e laitiiti—i nei faamaumauga faagaee loto. Ma e mafai ona e mautinoa, “e le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa.”—Eperu 6:10.

3. O ā isi mea e ese mai galuega, e ao ona matuā manatu mamafa i ai Kerisiano, ma aisea?

³ Peitai ane, o le tāua moni o la tatou auaunaga—pe fai vaega po o le tagata lava ia—e lē fuaina i ni fuainumera. E pei ona sa taʻuina atu ia Samuelu, “e vaai tagata i le tino, a e vaai Ieova i le loto.” (1 Samuelu 16:7) Ioe, e faitaulia i le Atua le ituaiga o tagata moni e i ai i tatou. E moni, e manaomia galuega. O galuega o le tuutoina atu faaleatua e faamatagofieina ai le aʻoaʻoga a Ieova ma tosina mai ai ē e ono avea ma soo. (Mataio 5:14-16; Tito 2:10; 2 Peteru 3:11) Peitai, e lē faamatalaina e a tatou galuega le tala atoa. Sa i ai le mafuaaga na popole ai Iesu lea na toetu mai, e faatatau i le faapotopotoga i Efeso—e ui lava i le talaaga o a latou galuega lelei. Na ia fetalai atu ia i latou: “Ua ou iloa au galuega. . . . A ua ou le fiafia ia te oe, ona ua e tuua o lou uluai alofa.”—Faaaliga 2:1-4.

4. (a) I le ā le auala e mafai ai ona pei la tatou auaunaga i le Atua o se tiute faalotu ua na ona masani ai? (e) Aisea ua manaomia ai ona suesue ifo e le tagata ia lava?

⁴ O loo i ai se lamatiaga. I le faagasologa o taimi, e ono avea ai la tatou auaunaga i le Atua ua pei o se tiute faalotu ua na ona masani aʻi. Na faamatalaina mai e se tasi fafine Kerisiano lona tulaga na i ai e faapea: “Ou te alu atu i le auaunaga, alu i sauniga, suesue, tatalo—a e na ona ou faataunuuina lava, e lē taitai uigā ia te au se mea e tasi.” O le mea moni, e tatau ona avatu le faamālō i auauna a le Atua pe a latou faamalolosi e ui lava ina i ai lagona e pei ina “lafotuina i lalo” po o le “faamaulaloina.” (2 Korinito 4:9; 7:6) A e peitai, pe afai o le a pei la tatou faasologa faa-Kerisiano o se mea e leai se uiga, e manaomia la ona tatou tagai totoʻa i le afi o le taavale e pei ona taʻua i le faataʻitaʻiga. E oo lava i taavale e sili ona lelei, e manaomia lava ona siakiina mai lea taimi i lea taimi; i se uiga la tali tutusa, e manaomia e Kerisiano uma ona suesue ifo e lē aunoa i latou lava. (2 Korinito 13:5) E mafai e isi ona iloa mai a tatou galuega, a e lē mafai ona latou mautinoa po o ā uunaiga o a tatou gaoioiga. O lea la, e ao ai ia i tatou taitoatasi ona manatu mamafa i le fesili lenei: ‘O le ā ua uunaia aʻu ina ia ou auauna i le Atua?’

O Toʻatugā i Uunaiga Saʻo

5. O le ā le poloaiga na fetalai ai Iesu e sili i poloaiga uma?

⁵ Ina ua fesiligia Iesu po o lē fea o tulafono ia na tuuina atu ia Isaraelu e sili, na ia sii mai se poloaiga o loo faaautu, e lē i foliga mai i fafo, a e o le uunaiga i totonu o le loto: “Ia e alofa foi i le Alii [Ieova] lou Atua ma lou loto atoa, ma lou agaga atoa, ma lou manatu atoa, ma lou malosi atoa.” (Mareko 12:28-30) Sa faasino atu la e Iesu le mea e ao ona avea ma uunaiga malosi i la tatou auaunaga i le Atua—o le alofa.

6, 7. (a) O le ā le auala ua osofaia faatogafiti ai e Satani le lio o le aiga, ma aisea? (2 Korinito 2:11) (e) E mafai faapefea e le auala na tausia aʻe ai ona aafia ai uiga o se tasi agai i le pule tauatua?

⁶ E manao Satani ina ia faagesegese lo tatou taumafai e atinaʻe le uiga tāua lea o le alofa. Ina ia faataunuu lenei sini, o se tasi o auala ua ia faaaogā, o osofaiga i le lio o le aiga. Aisea? Auā o i inei le nofoaga e fafau aʻe ai faailoaga muamua lava ma faailoaga sili o le alofa. Ua iloa lelei e Satani le mataupu silisili faale-Tusi Paia e faapea, o le mea e aʻoaʻoina i le taimi o le tamaitiiti e mafai ona aogā i le taimi o le tagata matua. (Faataoto 22:6) E taumafai faatogafiti o ia e faaleagaina lo tatou uiga o le alofa i le tau amatamataga lava o o tatou olaga. Ona o ia o le “atua o le lalolagi nei,” e iloa ai e Satani o loo taulau ana fuafuaga pe a toatele tagata e ola aʻe i ni aiga ua lē o i ai se siomaga o le alofa a e ua na o nofoaga o taua o feitagaiga, le lotoa, ma upu leaga.—2 Korinito 4:4; Efeso 4:31, 32; 6:4, faamatalaga i lalo o le NW; Kolose 3:21.

⁷ Ua taʻua i le tusi Faia o Lou Olaga Faaleaiga ia Fiafia e faapea, o le auala e taulimaina ai e le tamā lana matafaioi faalematua “e mafai ona i ai sona aafiaga e faavavau i le manatu o lana fanau pe a matutua i le tulaga tau pule, e lē gata i pulega faaletagata a e i le pule tauatua.”a Ua taʻutino mai e se tasi tamaloa Kerisiano o lē na ola aʻe i le taʻitaʻiga a se tamā sa sili ona sauā e faapea: “Ia te au ia, o le usiusitai ia Ieova e faigofie; a e sili atu ona faigata le alofa ia te ia.” O le mea moni, e tāua tele le usiusitai, auā i le silafaga a le Atua, o le “usiusitai e sili lea i le gaʻo o le mamoe poa.” (1 Samuelu 15:22) A e o le ā e mafai ona fesoasoani ia i tatou ina ia taumafai atili ai, nai lo le tau ina usiusitai, ia atinaʻe le alofa mo Ieova e avea o se malosi o loo uunaia la tatou tapuaiga?

‘Ua Pulunaunauina i Tatou i le Alofa o Keriso’

8, 9. E ao faapefea i le taulaga togiola a Iesu ona faagaeeina ai lo tatou alofa mo Ieova?

⁸ O le uunaiga sili ia atinaʻe le alofa mai le loto atoa mo Ieova, o le talisapaia lea o le taulaga togiola a Iesu Keriso. “O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi, ina ia tatou ola ia te ia.” (1 Ioane 4:9) O le taimi lava tatou te malamalama ai ma talisapaia lea mea, ona faaalia loa lea e lenei alofa, gaoioiga o le alofa. “Ua tatou alolofa, auā na ia [Ieova] muai alofa mai ia te i tatou.”—1 Ioane 4:19.

⁹ Sa taliaina ma le lotomalie e Iesu lona tofiga ina ia avea ma Faaola o tagata. “O le mea lava lenei ua tatou iloa ai le alofa, ina ua tuuina atu e ia o lona lava soifua e sui aʻi i tatou.” (1 Ioane 3:16; Ioane 15:13) O le alofa faataulaga a Iesu e ao ona mapuna aʻe ai se tali talisapaia ia i tatou. Seʻi faataʻitaʻi: Seʻi faapea o lea faatoʻā uma lava ona laveaia oe mai se mea na e malemo ai. Po o le a na ona e alu atu loa i le fale, solo mago lou tino, ma faagalo atu ai le mea na tupu? E mautinoa lava e leai! O le a ia te oe se lagona aitalafu i le tagata na faasaoina lou ola. O le mea moni o lena ua e aitalafu i lea tagata ona o lou ola. Pe e le sili atu ai ea la ona tatou aitalafu ia Ieova le Atua ma Iesu Keriso? Pe ana leai le togiola, semanu ua tatou malelemo uma, e tusa ai o lea faaupuga, i le agasala ma le oti. Peitai ane, ona o lenei gaoioiga tele o le alofa, ua tatou maua ai le faamoemoe o le ola e faavavau i se lalolagi parataiso.—Roma 5:12, 18; 1 Peteru 2:24.

10. (a) E mafai faapefea ona tatou faatāuaina totino le togiola? (e) Ua faapefea e le alofa o Keriso ona pulunaunauina ai i tatou?

¹⁰ Ia mafaufau loloto i le togiola. Ia e faatatauina ia te oe lava, e pei ona faia e Paulo: “O le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia mo aʻu.” (Kalatia 2:20) O lena mafaufau loloto o le a mapuna aʻe ai se uunaiga mai le loto, auā na tusi Paulo i uso i Korinito: “Ua pulunaunauina i matou i le alofa o Keriso; [auā] . . . na maliu foi o ia ona o tagata uma, ina ia le usiusitai pea o e ola ia te i latou lava, a o ia o le na maliu ma toe tu mai mo i latou.” (2 Korinito 5:14, 15) Ua taʻua i le Jerusalem Bible, o le alofa o Keriso e “faagaeetia ai i tatou.” Pe a tatou manatunatu pea i le alofa o Keriso, ona pulunaunauina ai lea o i tatou, e matuā uunaia, e oo lava ina faagaeetia. E pāʻia ai o tatou loto ma uunaia ai i tatou e gaoioi. E pei ona toe faaupu mai e le faaliliuga a J. B. Phillip e faapea, “o le puna autū lava o a tatou gaoioiga o le alofa lea o Keriso.” O le a lē faatupuina e so o se isi lava uunaiga ni uiga tumau ia i tatou, e pei ona faaalia e le faaaʻoaʻoga a le au Faresaio.

“Ia Matuā ʻAlo ese i le Mea Faafefete a le Au Faresaio”

11. Faamatala mai manatu o le au Faresaio e faatatau i galuega faalelotu.

¹¹ Sa matuā aveese e le au Faresaio le uigā moni o le tapuaiga i le Atua. Nai lo le faamamafaina o le alofa mo le Atua, sa latou faamamafa galuega e peiseai o le mea lena e fua i ai le tulaga faaleagaga. O lo latou māfuli i le faia o tulafono mamafa sa foliga mai ai i latou i le vaaiga i fafo o ni ē amiotonu, a e i totonu sa “tutumu i ivi o tagata oti, ma mea leaga uma.”—Mataio 23:27.

12. Ina ua maeʻa ona faamaloloina e Iesu se tamaloa, na faapefea ona faailoa mai e le au Faresaio le maaa o o latou loto?

¹² I se tasi o mea na tupu, na faamaloloina ai ma le alofa mutimuti vale e Iesu se tamaloa sa pē lona lima. Maeu se fiafia atonu na oo i lenei tamaloa ina ua ia tofo i le faamalologa vave o se maʻi e mautinoa na faapogaia ai le tele o mafatiaga e lē gata i le tino a e i faalogona foi! Peitai sa lei fiafia le au Faresaio e pei ona lagona e lenei tamaloa. Nai lo lea, sa latou faitio ma le lē saʻo e faavae i se tulafono—e faapea ua faia e Iesu se fesoasoani i le aso Sapati. I le mafuli atu i a latou faaliliuga faafiapopoto o le Tulafono, na misia atoatoa ai e le au Faresaio le uiga moni o le Tulafono. E lē tioa ona ‘matuā tiga le finagalo o Iesu i le maaa o o latou loto’! (Mareko 3:1-5) E lē gata i lea, sa ia lapataia ona soo: “Ia matuā ʻalo ese i le mea faafefete a le au faresaio ma le au satukaio.” (Mataio 16:6) O a latou gaoioiga ma amioga ua matuā faaalialia mai i le Tusi Paia mo se aʻoaʻoga ia i tatou.

13. O le ā le lesona ua tatou maua mai le faaaʻoaʻoga a le au Faresaio?

¹³ O le faaaʻoaʻoga a le au Faresaio ua aʻoaʻo mai ai ia i tatou le manaomia ona i ai se vaaiga paleni e faatatau i galuega. O le mea moni, e tāua galuega, auā ‘e mate le faatuatua pe a leai ni galuega.’ (Iakopo 2:26) A e peitai, e mafuli tagata lē lelei atoatoa ina faamasino atu i isi i ni mea o latou faia nai lo le ituaiga o tagata e i ai i latou. I nisi taimi, e oo ai foi ina tatou faamasinoina i tatou lava i lenei tulaga. Atonu tatou te soona faamamafa nauā le faia o galuega, e peiseai o le fua lea e fua i ai lo tatou tulaga faaleagaga. E mafai ai ona tatou faagaloina le tāua o le suesueina o uunaiga o o tatou loto. (Faatusatusa i le 2 Korinito 5:12.) E ono avea i tatou ma nisi e matuā tausisia tulafono, o ē ua “faapilia le namu, a ua . . . folo atoa le kamela,” e ala lea i lo tatou usiusitai atu i le na o le tusi o le tulafono a e tatou te solia ona vaega autū.—Mataio 23:24.

14. Na faapefea ona avea le au Faresaio e pei o se ipufaiau po o se ipumafolafola e lē mamā?

¹⁴ O le mea sa lei malamalama i ai le au Faresaio e faapea, pe a alofa moni se tasi ia Ieova, o le a sosoo atu ai lava ma galuega o le tuutoina i le Atua. O le faaleagaga e puna mai i totonu ma tafe atu ai fafo. Na matuā taʻusalaina e Iesu le au Faresaio ona o o latou mafaufauga sese i lenei itu, i lona faapea atu: “Oi talofa ia te outou tusiupu ma faresaio, tagata faafiaamiotonu! Ua outou faamamā i le tua o le ipu ma le tanoa, a o totonu ua tutumu i mea ua faoa ma le amio leaga. O oe na le faresaio tauaso, ia e muai faamamā i totonu o le ipu ma le tanoa, ina ia mamā atoa ma le tua.”—Mataio 23:25, 26.

15. Taʻu mai ni faaaʻoaʻoga e faaalia ai e silasila Iesu e sili atu nai lo na o foliga mai fafo.

¹⁵ O le tino mai i fafo o se ipufaiau, se ipumafolafola, po o se fale foi, e itiiti lava se mea e faaalia mai ai. Sa maofa le au soo o Iesu i le matagofie o le malumalu o Ierusalema, lea na taʻua e Iesu o le “ana o e fao mea” ona o mea sa faia ai i totonu. (Mareko 11:17; 13:1) O le mea sa faamaonia e uiga i le malumalu, o le mea foi lea ua faamaonia e uiga i le faitau miliona o le au faatagā Kerisiano, e pei ona faaalia i le talaaga o Kerisinetoma. Na fetalai Iesu o le a ia faasalaina ē na latou faia “vavega” i lona igoa o ni “e fai amio leaga.” (Mataio 7:22, 23) I se faaeseesega tele, na ia taʻua ai se fafine ua oti lana tane o lē na ia foai sina tupe faatauvaa i le malumalu e faapea: “O mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai . . . a o ia ua mativa ua ia lafo ana mea uma sa ia te ia, o ana mea uma e ola ai.” (Mareko 12:41-44) Pe o se faaiuga ea ua lē fetaui? E leai lava. I na mea uma e lua, na faaatagia ai e Iesu le silafaga a Ieova. (Ioane 8:16) Sa silasila o ia i uunaiga na māfua ai galuega ma ia faia ai faatatau lana faaiuga.

“Ua Faatatau i le Mea e Mafai e le Tagata Lava Ia”

16. Aisea tatou te lē manaomia ai pea ona faatusatusa a tatou galuega i galuega a le isi Kerisiano?

¹⁶ Pe afai e saʻo uunaiga o o tatou loto, e lē manaomia la ona faia soo ni faatusatusaga. Mo se faaaʻoaʻoga, e itiiti lava se lelei e maua pe a tauivi i le agaga tauvā e maua itula tutusa i le faiva lea foi e maua e le isi Kerisiano, po o le faatutusa atu foi i mea ua mafaia ona ausia e se tasi tagata i le talaʻiga. Na fetalai Iesu ina ia alofa atu ia Ieova ma lou loto atoa, mafaufau atoa, agaga atoa, ma le malosi atoa—a e lē o le loto, le mafaufau, le agaga ma le malosi o le isi tagata. E eseese uma lava tomai, o malosi, ma tulaga o tagata taitoatasi. Pe afai e talafeagai ma lou tulaga, o le a uunaia oe e le alofa ina ia faaaluina ai se taimi tele i le faiva—pe oo lava ina avea ma paeonia faataimi atoa. Peitai ane, afai o loo e tauivi ma se maʻi, atonu o le a faaitiitia ai le taimi e te faaaluina i le faiva nai lo le tele sa e faamoemoeina. Aua e te faavaivai. O le faatuatua i le Atua e lē fuaina i itula. O le i ai o uunaiga saʻo o le loto, o le a e maua ai le pogai mo le olioli. Na tusi mai Paulo: “A ia taitoatasi ma faamasino i lana lava galuega, ona ia te ia lea o se mea e mitamita ai ia te ia lava, a e le o se tasi.”—Kalatia 6:4.

17. I au lava upu, seʻi faamatala puupuu mai le faataoto i taleni.

¹⁷ Seʻi manatunatu i le faataoto a Iesu e uiga i taleni, lena o loo faamauina i le Mataio 25:14-30. A o latalata ina faimalaga ese atu se tamaloa, na ia valaauina ai ana auauna ma tuuina atu ia i latou ana meatotino latou te tausia. “Ua avatu e ia taleni e lima i le tasi, a e lua a le tasi, a e tasi i le tasi; ua faatatau i le mea ua mafai ai e le tagata.” Ina ua toe foi mai le matai e faavasega ana mea ma ana auauna, o le ā na ia tau mai i ai? O le auauna lea na ave i ai taleni e lima, na ia mauaina mai ma nisi taleni e lima. E faapena foi i le auauna na ave i ai taleni e lua, na ia mauaina mai ma isi taleni e lua. O le auauna na ia ave i ai le taleni e tasi, na ia tanu le taleni i le palapala ma e leai sana gaoioiga na faia ina ia faateleina ai le tamaoaiga a lona matai. O le ā le faaiuga i ai a le matai i lea tulaga?

18, 19. (a) Aisea na lē faia ai e le matai se faatusatusaga i le auauna lea na i ai taleni e lua, ma le auauna na i ai taleni e lima? (e) O le ā ua aʻoaʻo mai e le faataoto i taleni ia i tatou e uiga i le faia o se faamālō ma ni faatusatusaga? (i) Aisea na mamafa ai le faasalaga o le auauna lona tolu?

¹⁸ Muamua lava, seʻi o tatou manatunatu i auauna o ē na avatu i ai taleni e lima ma taleni e lua. Na faapea atu le matai i nei auauna uma e toalua: “Le auauna lelei e, ma le faamaoni.” Faamata na te faia atu nei upu i le auauna lea na i ai taleni e lima, pe ana fai e maua mai e lena auauna na o ni taleni e lua? Atonu e leai! I se isi foi itu, sa lei fai atu o ia i le auauna lea na ia mauaina mai taleni e lua: ‘Aisea na e lē maua mai ai ni taleni se lima? Auā seʻi vaai atu i lou uso a auauna lea ma le tele o mea ua ia maua mai mo aʻu!’ E leai, o le matai alofa mutimuti vale, o lē na faaataina mai Iesu, sa ia lei faia ni faatusatusaga. Na ia tofia atu taleni ‘i tagata taitoatasi ua faatatau i le mea e mafai e le tagata lava ia,’ ma na te lē o faatalitalia foi nisi mea e sili atu nai lo mea e mafai e se tasi ona ia aumaia. Sa tutusa lelei le faamālō na avatu i auauna uma e toalua, auā sa la taufai galulue ma le loto atoa mo lo la matai. E mafai e i tatou uma ona maua se lesona mai lenei mea.

¹⁹ E mautinoa, e lei i ai se faamālō mo le auauna lona tolu. O le mea moni, na lafoina o ia i fafo i le pogisa. I le avatuina i ai na o le taleni e tasi, sa lei faatalitalia la o ia na te maua mai ni mea se tele e pei o le auauna na i ai taleni e lima. Peitai, sa ia lei faia ma sina taumafaiga! Sa matuā tonu lona faasalaga mamafa ona o lona uiga i lona loto o le “leaga ma le paie,” lea na atagia mai ai le leai o se alofa mo le matai.

20. O le ā le silafaga a Ieova i mea e gata mai ai lo tatou mafai?

²⁰ O loo faatalitalia e Ieova i tatou taitoatasi ina ia alolofa atu ia te ia ma o tatou malosi atoa, a e maeu foi se faamafanafanaloto ona “ua silafia lava e ia le mea na fai aʻi i tatou; ua manatu ia o le efuefu lava i tatou”! (Salamo 103:14) Ua faapea mai le Faataoto 21:2, o “Ieova, na te fuatia loto”—a e lē o fuainumera faamaumau. E malamalama o ia i so o se mea e gata mai ai lo tatou mafai, pe i ni tulaga tau tupe, i le tino, i faalogona, po o nisi lava mea. (Isaia 63:9) I le taimi lava e tasi, na te faatalitalia i tatou ina ia tatou faaaogā i se tulaga e sili ona lelei ni mea uma o loo tatou maua. E lelei atoatoa Ieova, a e pe a feutagai o ia ma ona tagata tapuai lē lelei atoatoa, e lē faafiaamiotonu o ia. E paleni o ia i ana feutagaiga, e magafagafa foi i mea na te faatalitalia.

21. Pe afai o le alofa e uunaia ai la tatou auaunaga i le Atua, o ā iuga lelei o le a mulimuli mai?

²¹ O le alofa ia Ieova ma o tatou loto atoa, ola atoa, mafaufau atoa, ma le malosi atoa, ua “sili lea i taulaga mu atoa, ma taulaga uma.” (Mareko 12:33) Pe a uunaia i tatou e le alofa, o le a tatou faia ai mea uma tatou te mafaia i le auaunaga i le Atua. Na tusi Peteru e faapea, o uiga faaleatua, e aofia ai le alofa, “pe a maua e outou ia mea, ma ua faateleina, ona avea ai lea o outou ma e ua le paie, a e o e fua mai le iloa lelei o lo tatou Alii o Iesu Keriso.”—2 Peteru 1:8.

[Faaopoopoga i lalo]

I le Autaluga

◻ O le ā e tatau ona avea ma malosi e uunaia ai la tatou auaunaga i le Atua?

◻ Ua faapefea ona pulunaunauina i tatou e le alofa o Keriso ia auauna ia Ieova?

◻ O le ā le mea na mafuli le au Faresaio e fai, e ao ona tatou ʻalo ese mai ai?

◻ Aisea e lē atamai ai ona faatusatusa pea la tatou auaunaga ma le auaunaga a le isi Kerisiano?

[Ata i le itulau 16]

E eseese tomai, le malosi, ma tulaga o tagata taitoatasi