E Mafai Faapefea ona E Ola aʻe i se Nofoaga Matautia?

FAI mai Maria: “Sa ou lagona le fefe i taimi uma. Sa ou lagona le fefe e alu i le lifi. Sa ou lagona foi le fefe i totonu o laʻu taavale. Sa ou fefe a o iai i loʻu fale ou te nofo totogi ai. Sa iai le solitulafono i so o se mea. Sa masani ona faoa mea a tagata.” Po o ia te oe se lagona e pei o lenei fafine Pasili, e te fefe i ou tuaoi, a e maise lava pe a oo i le pogisa o le po?

O le faitau i tusi i tala e uiga i leoleo nanā, atonu e faafiafiaina ai oe, a e i le olaga moni, e masani lava ona lē maua ai se iuga fiafia. Atonu o loo iai pea se solitulafono e lei maua lava po o ai na ia faia. Po o tulaga i le fasiotia e le tasi tagata o le isi, ma ola ai se tasi e aunoa ma se tane, tamā, po o se atalii, e aunoa ma se avā, tinā, po o se afafine. Po o faateteleina solitulafono sauā i lou vaipanoa? Po o e moomoo mo se nofoaga toafilemu o le a mafai ona saogalemu ai lou aiga? A e afai lava e te maumauai e tausia aʻe lau fanau i se vaipanoa e tele ai le solitulafono, o le ā e mafai ona e faia ina ia faasaoina ai?

E moni, o loo iai pea aai o loo lipotia mai ai le tau leai o ni solitulafono. I le tele o atunuu, o loo ola pea tagata i nuu i tua i tulaga toafilemu ma le mafana. A e ua vave ona suia tulaga o mea e oo lava i vaipanoa sa manatu i ai muamua e faapea e leai ni solitulafono. Mo se faaaʻoaʻoga, i Pasili i le 50 tausaga ua mavae, o le 70 pasene o le faitau aofai o le atunuu sa nonofo i vaega maotua. Nei la, e 70 pasene ua nonofo i aai. E faaopoopo atu i le mauaina o avanoa faigaluega, ua faateteleina ai foi faafitauli i nofoaga taulata ane, e pei o le solitulafono ma faiga sauā. E tusa lava po o e ola i se vaipanoa matautia pe leai, a e e te tuua ai lava le fale a e alu e faigaluega pe alu i le aʻoga ma faia le tele o isi gaoioiga.

I le faailoaina mai o le taatele o “āuga o le mataʻu i tagata,” ua taʻua ai e le taʻitaʻi leoleo i le aai o Rio de Janeiro le lē faamaoni i le vafealoai ma solitulafono fuafuaina e faapea, o mea moni na ua saosaolaumea i le faateleina o faafitauli. Ua ia lagona foi e faapea, o nusipepa ma televise ua saosaolaumea i le salalau atu o le mataʻu, “ua faavaivaia ai loto o tagata ona o tala matautia.” O le pulea e vailaau faasaina, aiga malepelepe, ma aʻoaʻoga sese faalotu, ua saosaolaumea i le faatuputeleina o le solitulafono. Ma o le ā o le a aumaia e le lumanai? Po o le a avea le faaalia soo mai o vaaiga sauā, na o loo taʻufaatauvaaina i tusi ma ata tifaga e avea o ni faafiafiaga, ma mafuaaga ua lē lagona ai e tagata le alofa agaʻi i isi? Po o le a oo ina matautia foi vaipanoa ia sa manatu i ai e lē o iai ni solitulafono?

Ona e lē o se mea lelei mo lē ua aafia fua i faiga sauā, ua tatou matuā faanaunau ai ina ia malupuipuia i tatou. E lē tioa mananao tagatanuu ina ia toatele leoleo i ala tetele ma ia mamafa faasalaga i le falepuipui pe faaoo foi i ai ni faasalaga oti! E ui e lamatia ai, a e ua umia e nisi ni fana e puipuia ai i latou. A e o loo mananao isi ina ia matuā faasaina e malo le faatauina atu o auupega. A e ui lava i tala leaga i le faateleina o le solitulafono, e leai se mea e fefe ai. O le mea moni, o le toatele o tagata e aināina na aai e pei o Johannesburg, le aai o Mekisikō, Niu Ioka, Rio de Janeiro, ma São Paulo, e lei vetea lava ni a latou mea. Seʻi o tatou iloiloina le auala ua taulau manuia ai tagata a o iai i tuaoi matautia.

Tausia se Vaaiga Saʻo

E faatatau i se vaipanoa e maualuga ai le solitulafono, ua faamatala ai e se tagata tusitala e uiga i “le tomai ma le finafinau o le faitau afe o tagata i Pasili o ē ua mafai ona ola i ni olaga amio lelei ma le mamalu e ui i tulaga faigata ma le matautia.” Ina ua mavae le 38 tausaga i Rio de Janeiro, fai mai Jorge: “Ou te alofia nisi o auala ma vaipanoa ma ou te lē fia isuisu fua i ai. Ou te alofia foi le savalivali i le auala i le leva o le po, ma ou te lē faaalia foi le soona fefevale fua. E ui lava ou te faaeteete, ou te manatu i tagata e peiseai e faamaoni, ou te āva ma faaaloalo ia i latou.”

Ioe, ia aloese mai faalavelave e lē tatau. Aua e te aiā fua i isi. Aua lava neʻi manatu māmā i le mea moni e faapea o le fefevale, e mafai ona aafia ai ou neura, ma oo ina amio faavalevalea ai tagata amio lelei. E faatatau i lana galuega i oganuu lamatia, ua matauina ai e Odair e faapea: “Ou te taumafai pea ina ia ou mautinoa, e lē teuina i loʻu mafaufau le fefe i ni mea leaga e ono tutupu mai, ona o le mea lenei e faapogaia ai omiga e lē manaomia ma fefevale ai. Ou te taumafai e faaalia le faaaloalo i tagata uma lava.” E lē gata i lea, o le mataalia ma taumamao mai tagata e ono masalomia, ua ia faaopoopo mai, o se isi fesoasoani i le puleaina o faalogona o se tasi: “I lo o mea uma lava, ou te atiina aʻe le mautinoa ia Ieova le Atua, i le manatuaina e leai se mea e lilo i lana silafaga, ma e so o se mea e tupu, o loo iai lana faatagaga.”

Peitai, e leai se tasi e manao e ola pea ma le mataʻu. E lē gata i lea, o ai o le a na faafitia e faapea, o le mataʻu ma omiga e matuā afaina ai faalogona ootia ma le soifua mālōlōina? I lea, o le ā se faamoemoe o iai mo i latou o ē matataʻu e faapea, e ono osofaia i latou i so o se taimi? Ona e toatele ua matataʻu e faapea, o le tulaga e sili atu ona leaga o solitulafono o loo faaloloʻi mai, po o le a tatou vāai ea i le iuga o faiga sauā? Matou te valaaulia oe ina ia faitau le mataupu lea o loo mulimuli mai e faapea, “O Afea o le a Iu ai le Mataʻu?”