Le Auala Va Apiapi i le Saʻolotoga

E TOAITIITI ni nai tagata popoto ua finau mai e faapea, e lē o pulea le vateatea e tulafono o le natura. O nei tulafono, o loo pulea mea uma, e mai lava i nai atoma ninii e oo atu i aniva tetele o loo iai le faitau piliona o fetu. Pe ana faapea e leai ni tulafono o le natura, semanu e leai ni fuafuaga ma e leai foi se malamalama; semanu foi e leai se ola. Ae o le taumafai ia malamalama i tulafono o le natura ma galulue felagolagomai ma ia tulafono, ua mafai ai e le tagata ona faataunuuina ni mea ofoofogia, e pei o le savalia o le masina, ma mafai ai ona vaaia i le televise i o tatou aiga ni ata felanulanuai mai so o se nofoaga i le lalolagi, pe mai fafo atu foi o le ea o le lalolagi.

Ae faapefea tulafono tau amio? Pe faapena foi ona aogā ma fuatele pe a pipiimau atu i ai? E toatele e foliga mai e iai le lagona e faapea, e leai ni tulafono tau amio ma filifili ai so o se ituaiga o filosofia po o se lotu e fetaui ma o latou lava tuinanau.

Ae e iai nisi ua latou filifilia le isi auala, le auala ‘va apiapi e tau i le ola’ e pei ona faaauivi mai i le Tusi Paia. E lē o se mea tatou te ofo ai ona e na o le toaitiiti ua latou filifilia le auala lea, auā na fetalai Iesu e faatatau i le auala va apiapi e faapea: “E toaitiiti foi i latou o e maua.” (Mataio 7:14) Aisea ua toaitiiti ai?

Auā o le auala va apiapi e faasāsā e tulafono ma mataupu silisili a le Atua. E na o se tagata e manao moni e faatatau atu lona olaga i tapulaa a le Atua e fetaui i ai. I le matuā eseese ma le auala va tele, lea e aumaia ai le saʻolotoga faafoliga, ae o le mea moni, e faapologaina ai, a o le auala va apiapi, lea e foliga mai e faasāsā, na te faasaʻolotoina se tagata i vala tāua uma o le olaga. Ua faia aʻe ona tuaoi e “le tulafono o le saʻolotoga ua atoatoa.”—Iakopo 1:25.

Le Auala e Faasaʻoloto ai e le Ala Va Apiapi

E moni e lē faigofie ona tumau i le auala va apiapi. O tagata ola uma, e lē lelei atoatoa ma ua tuufaasolo mai i ai le faanaunauga e faia le mea sese. O lea, e ono faanaunau ai se tagata e faia sina taase teisi. Ae peitai, o lelei e maua i le pipiimau i ‘le auala va apiapi’ e aogā ai so o se taumafaiga i le aoaia o oe lava po o le faia o ni suiga, auā o le Atua ‘o loo aʻoaʻo ia i tatou i mea e aogā.’—Isaia 48:17; Roma 3:23.

O se faataʻitaʻiga: O mātua atamamai, e latou te fuafuaina se ‘auala va apiapi’ tau i meaʻai mo a latou fanau. O lenei mea, i nisi taimi e manaomia ai ona maumauai i le taimi o taumafataga. Ae a oo ina matutua tamaiti, ona latou talisapaia lea o le aoaiga alofa a o latou mātua. Ina ua matutua, o le a latou atiina aʻe ai se manaoga mo meaʻai e maua ai le soifua mālōlōina. Ma ona o le anoanoai o meaʻai e maua ai le soifua mālōlōina, o le a lē oo ai ia i latou se lagona e faapea ua faasāsā.

I le auala faaleagaga, e faia foi faapena e le Atua ia i latou o loo ui i le auala va apiapi e tau i le ola. Na te atiina aʻe i ē agamalu faanaunauga e atoatoa ona mamā e taʻitaʻi atu ai i le fiafia ma le saʻolotoga moni. Ua ia faia lenei mea e ala i le saunia o lana Afioga le Tusi Paia. E faaopoopo i ai, ua ia valaaulia i tatou e tatalo mo lona agaga paia e fesoasoani ia i tatou, ma ua ia poloaiina foi i tatou ina ia auaufaatasi ma uso Kerisiano, o ē e mafai ona latou faalaeiauina i tatou ina ia tumau i le ala va apiapi. (Eperu 10:24, 25) Ioe, o le Atua o le alofa, ma o lenei uiga silisili ua faavae ai ana auala uma ma ana fuafuaga.—1 Ioane 4:8.

Pe a salalau atu le alofa, filemu, lelei, pulea totino, ma isi fua o le agaga o le Atua, ona foliga mai lea ua lē faasāsā nauā le ala va apiapi. E pei ona fai mai le mau, “e le faatulafonoina mea faapena.” (Kalatia 5:22, 23) “O le mea o i ai le Agaga o le Alii [Ieova], o i ai le saʻolotoga.” (2 Korinito 3:17) E oo lava i le taimi nei, ua tofo i ai Kerisiano i lenei saʻolotoga. Ua saʻoloto i latou mai le tele o le mataʻu o loo afaina ai tagata i aso nei, e pei o le fefevale i le lumanai ma le mataʻu i le oti ona o faiga faataulaitu. Maeu le matuā fiafia pe a mafaufau i le lumanai pe a “tumu le lalolagi i le malamalama o Ieova, e pei ona ufitia o le iliti tai i le suāsami”! (Isaia 11:9) Ona lē toe iai lea o se mataʻu i solitulafono. O le a lē toe iai ni loka ma ni papuipui e faavavau. O le a lagona e tagata uma le saʻoloto ma le saogalemu i le ao ma le po, i le aiga ma fafo atu foi. O le a avea lena o se saʻolotoga moni lava!

E Mautinoa le Fesoasoani a le Atua

E moni, o le ola e tusa ai ma tapulaa a le Atua, e manaomia ai ni taumafaiga, peitai “e le mamafa foi ana poloaiga,” e oo lava i tagata le lelei atoatoa. (1 Ioane 5:3) A o tatou faia ni fetuunaiga e faafetaui atu i le ala va apiapi ma lagona aogā i le savavali ai, ua tupu ai ia i tatou le lē fiafia i auala ma mafaufauga ua faatinoina e i latou o i le auala va tele. (Salamo 97:10) O le usiusitai i tulafono a le Atua, ua talafeagai ma uiga lelei o loo ia i tatou uma lava. Nai lo o le “loto tiga” ma le “loto momomo” ua faaalia e le toatele, ua folafola mai e le Atua e faapea: “Faauta, e alalaga aʻu auauna ona o le loto fiafia.” Ioe, o le loto ua aʻoaʻoina e Ieova, e olioli ma saʻoloto.—Isaia 65:14.

Na maliu Iesu ina ia faasaʻolotoina moni ai i tatou. Ua faapea mai le Tusi Paia: “Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) I le taimi nei la, a o avea ma Tupu o le Malo faalelagi o le Atua, ua faasoa mai ai e Iesu aogā o lena taulaga. Ua lē pine lava pe a mavae “le puapuaga tele,” pe a oo mai le faaumatiaga o le auala lautele ma i latou o iai, ona ia taʻitaʻiina loa lea ma le onosai tagata usiusitai ia oo atu i le faaiuga o le auala va apiapi, i le tulaga lelei atoatoa faaletagata. (Faaaliga 7:14-17; Mataio 24:21, 29-31) I le iuga, o le a tatou tofo ai i le faataunuuga o le folafolaga sili e faapea: “Ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.” O lenei saʻolotoga mai le Atua, e silisili atu e lē mafaatusalia. E oo lava i le oti, o le a aveesea.—Roma 8:21; Faaaliga 21:3, 4.

O le iloa ma malamalama lelei i le mea e tau i ai le auala va apiapi, ua sili ai ona mafai e se tagata ona filifilia lenei auala ma tumau pea ona savali ai. O le a mafai ona fesoasoania, ae maise lava le au talavou ina ia vaai mamao ma ʻaua nei fiu e tusa ai ma o latou manatu i faasasaāga ua tuuina mai e tapulaa a le Atua. Ua latou aʻoaʻoina e vaai i nei mea o se faamaoniga o le alofa o le Atua, ma o se puipuiga faasaga i mea leaga o le auala va tele. (Eperu 12:5, 6) O le mea moni, e manaomia e se tasi ona onosai, ia manatua e tele se taimi e faaalu i le atiina aʻe o uiga ma faanaunauga faaleatua, e pei lava ona umi se taimi e faatalitali ai mo se laau e fuaina mai ai fua lelei. Ae o le a fuaina mai e le laau ni fua pe afai e teuteuina lelei ma faasūsūina.

O lea la, ia suesue le Afioga a le Atua, auaufaatasi ma isi Kerisiano, ma “tatalo e le aunoa” mo le agaga paia. (1 Tesalonia 5:17) Ia e faatuatua i le Atua e fesoasoani ia te oe ‘e faasaʻoina ou ala.’ (Faataoto 3:5, 6) Ae pe e mafai ea ona faatinoina uma? Pe e aogā moni ea? Ioe, sa aogā ia Toma ma Maria, o ē na taʻua i le mataupu na seʻi mavae atu.

Na La Lē Toe Savavali i le Auala Lautele

Ua tusi mai Toma e faapea: “I le taulotoaiga o tausaga mai le 1970 i le 1980, na matou feiloai ai ma Molimau a Ieova ina ua asiasi mai se tasi o i latou i lo matou aiga. O le talanoaga na iu i se suesuega faale-Tusi Paia. Sa faasolosolo mālie lava ona ou faamamāina loʻu olaga. Na ou papatiso i le 1982 ma o loo ou auauna nei i la matou faapotopotoga. Ua uma foi ona papatiso la ma tama tama. Ou te faafetai i laʻu avā ona o le onosai ia te aʻu i na tausaga uma ae ou te lei maua le upu moni. Ma ae maise lava, ou te faafetai ia Ieova ma lona Alo o Iesu Keriso, mo mea uma na la foaiina mai ia i matou faapea ma le faamoemoe ua matou maua nei e faatatau i le lumanai.”

Ae faapefea Maria? Sa ia lagona e faapea, o le a lē mafai ona faamagaloina o ia e le Atua, ae sa manao e aʻoaʻo e uiga ia te ia ona o lana fanau. Ina ua faalogo o ia e faapea, o loo aʻoaʻo e Molimau a Ieova lona tuaoi i le Tusi Paia, o lea na ia talosaga atu ai foi mo se fesoasoani. Ae peitai, ona ua mauaa ona uiga leaga, na faafaigata ai ona ia agaʻigaʻi i luma. Sa agaʻigaʻi i luma le suesuega ma toe solomuli. E ui i lea, o lana tama teine e fitu tausaga na pogai ai ona ia faaauau pea i le suesuega i le faamalosiau atu pea ia te ia i le faapea atu: “Oi se Mama, taumafai, aua le faavaivai. E te mafaia lava!” Ona taumafai malosi lea o Maria.

Ae ina ua toe foi ane i le aiga lana tane, e la te lei faaipoipo, ma o sē na te tagofia foi fualaau faasāina, sa auai foi o ia i le suesuega. Mulimuli ane, na manumalo uma i laʻua i a la masaniga leaga. Ina ua uma ona faamauina faaletulafono la la faaipoipoga, sa tuuina atu loa i le papatisoga, na la maua le fiafia tele ma lagona ai mo le uluai taimi le avea o i latou o se aiga moni. E faanoanoa ona na iu ina maliu Maria i le AIDS, ae na maliu o ia ma lona loto o loo taulai atu i le folafolaga a le Tusi Paia e uiga i le toetu ma le ola e faavavau i le lalolagi parataiso ua faamamāina mai mea uma e mafatia ai o le auala lautele.

Ioe, e mafai ona alu ese mai le auala lautele e tau i le faaumatiaga. Na fetalai Keriso Iesu: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Aisea la e lē faia ai se faaiuga e ui i le auala va apiapi e tau i le ola? E ala i le aveina i fale ma faatatauina mea ua e aʻoaʻoina mai le Afioga a le Atua, e mafai ai ona e tofo totino i le folafolaga faamafanafana loto a le Tusi Paia e faapea: “E iloa foi e outou le mea moni, e tuu saʻoloto foi outou e le upu moni.”—Ioane 8:32.