O le Tagata Mataua
E NA o le tasi le upu e maua mai ai le upu “fuā” i le gagana Eperu. Pe a faasino atu i tagata agasala, ona faaliliuina lea o le upu Eperu i le “lotoleaga” po o le “mataua.” (Kenese 26:14; Failauga 4:4) Ae peitai i le gagana Eleni, ua sili atu ai nai lo le tasi le upu mo le upu “fuā.” O le upu zeʹlos, e pei o le upu lea e tutusa i le faa-Eperu, e mafai ona faasino atu i le fuā e amiotonu ma le fuā e agasala ai. O le isi upu Eleni o le phthoʹnos, e na o le leaga e uiga i ai. Ae ua faasino atu pea e le New World Translation, i le “mataua.”
Na faapefea ona faaaogaina le upu phthoʹnos i Eleni anamua? Ua faamatala mai e le Anchor Bible Dictionary e faapea: “E lē pei o le tagata manao tele, o le tagata ua aafia i le phthonos, e lē faapea ona o lona manao moni i mea, e lē fiafia ona ua maua e le isi; e lē manao lava e maua e le isi. E ese mai ona faamoemoega mai le tagata e iai le agaga faatavā, i le lē pei o le tagata fia faatavā, e lē manao ia malo, ae ia taofia isi mai le manumalo.”
O le tagata e mataua e masani ona ia lē iloaina ona lava uiga, lea ua avea ma pogai autū o ona faafitauli. Ua faamatala mai e le lomifefiloi lava lea e tasi e faapea: “O se tasi uiga matilatila o le phthonos, o le leai o se iloa o ona lava uiga totino. Pe a valaauina le tagata phthoneros (mataua), e faamatala atu le pogai e manatu ai e saʻo lana amio, e masani ona ia faapea ifo ia te ia lava ma taʻu atu foi i isi, o se mea tatau lona osofaia o ē na ia osofaia, ma ona o le lē saʻo o le tulaga o mea, ua māfua ai ona ia faitio. Pe a fesiligia pe faapefea ona ia tautala i se auala faapea i sana uo, o le a ia fai mai o ana faitioga e mo le lelei o lana uo.”
Na faaaogaina e tusitala o Evagelia, o Mataio ma Mareko le upu Eleni phthoʹnos e faamatala ai le uunaiga sa ia i latou na tuuaʻia i le fasiotiga o Iesu. (Mataio 27:18; Mareko 15:10) Ioe, na uunaia i latou e le mataua. O le lagona matautia lava foi lea, ua avea ai aposetate ma tagata e matuā feita ia i latou na avea muamua ma o latou uso. (1 Timoteo 6:3-5) E letioa a aveesea tagata mataua mai le ulu atu i le Malo o le Atua! Ua poloaiina e Ieova le Atua i latou uma e faaauau ona “tumu saisai i le mataua” e “tatau ai ona oti.”—Roma 1:29, 32; Kalatia 5:21
[Ata i le itulau 7]
Aua neʻi faatagaina le mataua e faaleagaina lou olaga