Se Olaga e Sili ona Lelei ua Folafolaina Mai
E TE fia saʻoloto mai faafitauli ia ua faafaigata ai le olaga? E te fia ola i se lalolagi e matuā olioli ai i le olaga e pei ona faaatagia mai i le vaaiga lea e i luma ma tua o le faavaa o lenei mekasini? Seʻi tagai lelei ane i le ata lena. E tele mea taumafa a tagata. O le a matuā olioli moni i latou i na taumafa susua. E fiafia tagata uma. O tagata o ituaiga ma lanu eseese o loo nonofo fealofani. E oo lava i manu o loo filemu! E leai nisi o fetauaʻi. E leai se tasi e mativa. E leai se tasi e maʻi. E iai siomaga mananaia, laau matagofie, ma vaiauli mamā. Maeu se vaaiga matagofie!
Po o le a mafai ea ona faapena foliga o lenei lalolagi? Ioe, o le a avea ma parataiso. (Luka 23:43) O le Atua o lē na foafoaina le lalolagi, ua fuafuaina e faapea o le a olioli ai tagata i se olaga e sili ona lelei i se lalolagi parataiso. Ma e mafai ona e iai i inā!
O lē Fea Olaga o le a E Filifilia?
O le a faapefea ona ese le lalolagi Parataiso i le lumanai ma le lalolagi lea tatou te ola ai nei? I le taimi nei, e silia i le piliona tagata e matelaina i aso taitasi. Ae i le Parataiso ua saunia e le Atua mo le lalolagi, o le a tele ai meaʻai mo tagata uma. Ua folafola mai e le Tusi Paia e faapea: “E faia e Ieova o ʻau . . . mo nuu uma le faigaai o mea lelei, o le tausamiga o uaina ua tuu ai ʻalu.” (Isaia 25:6) O le a leai se mea e faapea ua lē lava meaʻai, auā ua faapea mai le Tusi Paia: “O le a tele le saito i le lalolagi; o le a fau ma soloi i tumutumu o mauga.”—Salamo 72:16, NW.
I aso nei, e toatele o loo nonofo i faleoo ma fale malepelepe, po o pologa foi e totogi o latou fale o loo mau totogi ai. O isi e leai ni fale e nonofo ai, ma e momoe i auala. E tusa ma le lipoti a le Faalapotopotoga o le Soifua Mālōlōina a le Lalolagi (World Health Organization), e tusa ma le 100 miliona tamaiti i le lalolagi e leai ni aiga. Ae i le Parataiso o loo fotuaʻi mai, o le a iai le aiga o le tagata lava ia. Ua faapea mai le Afioga a le Atua: “Latou te faia fale, ma latou mau ai; latou te totō tovine, ma latou aai i o latou fua.”—Isaia 65:21.
E toatele lava o loo galulue tiga i galuega latou te lē mananao ai. E masani ona mamafa galuega e fai ma galulue ova taimi ai ae itiiti se tupe e latou te maua mai ai. E tusa ma le toatasi mai le toalima o tagata uma o le lalolagi e ola i se tupe maua e itiiti ifo i le $500 i le tausaga. Ae peitai, i le Parataiso o loo sau, o le a olioli tagata i a latou galuega ma vaai atu i iuga lelei mai a latou galuega. Ua folafola mai e le Atua: “O mea na faia e o latou lima, o le a faamalieina atoatoa ai ē ua ou filifilia. Latou te lē galulue fua.”—Isaia 65:22, 23, NW.
I le taimi nei ua salalau atu i so o se mea maʻi ma faamaʻi. E toatele ua tauaso. O nisi ua tutuli. A o isi ua lē mafai ona savavali. Ae i le Parataiso, o le a lē toe mamaʻi tagata pe pesia foi i ni faamaʻi. Ua fetalai mai Ieova: “E le fai mai foi se tasi ua mau ai, Ou te maʻi.” (Isaia 33:24) Ae mo i latou ua lē atoatoa le malosi, ua faapea mai le folafolaga faamafanafana loto: “Ona faapupulaina ai lea o mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū [“ona o le fiafia,” NW].”—Isaia 35:5, 6.
I le taimi nei, o loo iai le puapuaga ma tiga, le faanoanoa ma le maliu. Ae i le Parataiso i le lalolagi, o le a lē toe iai nei mea uma. Ioe, e oo lava i le oti o le a lē toe iai! Ua faapea mai le Tusi Paia: “E mau foi [le Atua] ma i latou. E sōloiesea foi [e ia] loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.
O lea, ma le manino lava, o le Parataiso faalelalolagi ua folafolaina mai e Ieova, o lona uiga, o le a avea o se olaga e sili ona lelei mo le tagata. Ae mafai faapefea ona tatou mautinoa o le a oo mai lea olaga? O afea o le a oo mai ai, ma e faapefea? O le ā e tatau ona e faia ina ia e iai i inā?