Se Olaga e Sili ona Lelei—Ua Toeitiiti Oo Mai!

SEʻI manatu i se tagata vāaitau e masani ona toetoe lava o ana vāaiga uma e saʻo. Afai la na te valoia mai i talafou i le afiafi e faapea o le a timu le aso e sosoo ai, e te lē faatalatu la e ave lou faamalu i le taeao e sosoo ai pe a e alu ese mai le fale. O lona talaaga i taimi ua mavae, ua mafai ai ona e talitonu ia te ia. Ua e faia e pei ona ia fai mai ai.

O lenei la, e faapeī le maufaatuatuaina o folafolaga a Ieova e uiga i se olaga e sili ona lelei i se lalolagi parataiso? Ia, o le ā ua faaalia i lona talaaga i aso ua mavae? O le faataunuuina o valoaga o le Tusi Paia ua matuā faamautinoaina ai le talaaga o Ieova. E lē o Ia o se Atua e lē taulau i le faamaoni ma le moni. (Iosua 23:14; Isaia 55:11) E matuā maufaatuatuaina folafolaga a Ieova, o lea, i nisi taimi e fetalai ai o ia i mea o le a tutupu i le lumanai e peiseai ua uma ona tutupu. E mo se faaaoaoga, ina ua uma ona ia folafola mai e uiga i se lalolagi fou lea o le a lē toe iai se oti ma le auē, ua tatou faitau ai e faapea: “Ua uma ona fai [ia faamanuiaga folafolaina].” I se isi faaupuga, “E moni ma le faamaoni ia.”—Faaaliga 21:5, 6, faamatalaga i le pito i lalo, (NW).

Ioe, o le faataunuuina o folafolaga a Ieova i aso ua mavae, ua faamautinoa mai ai ia i tatou le faataunuuina o lana folafolaga i se olaga e sili ona lelei mo tagata. Ae, o afea o le a oo mai ai lenei olaga e sili ona lelei?

Se Olaga e Sili ona Lelei—O Afea?

O se olaga e sili ona lelei o le a toeitiiti oo mai! E mafai ona tatou mautinoa e uiga i lena mea auā ua faapea mai le Tusi Paia, e tele mea leaga o le a tutupu i le lalolagi, a o toeitiiti lava aumaia e le Parataiso se olaga e sili ona lelei. O na mea leaga o loo tutupu i le taimi nei.

Mo se faaaoaoga, na valoia e Iesu Keriso e faapea, o le a iai taua tetele. Na ia fetalai e faapea: “E sii le taua e le tasi nuu i le tasi nuu, ma le tasi malo i le tasi malo.” (Mataio 24:7) Ua faataunuuina lenei valoaga. I le faagasologa o le 1914 e oo i le 1945, sa iai taua e lua a le lalolagi, ma na sosoo mai ai i nei taua le anoanoai o isi taua na fetauaʻi ai atunuu. “E faavae i se faatatauga i tausaga taitasi, o le aofai o i latou na maliliu i taua i lena vaitaimi, [talu mai le Taua Lona Lua a le Lalolagi] e sili atu i le faaluaina le aofai o ē na maliliu i lona 19 o senituri ma e faafitu taimi e sili atu ai ona toatele nai lo ē na maliliu i lona 18 o senituri.”—World Military and Social Expenditures 1993.

O le salalau atu o faamaʻi, o le isi lea faamaoniga o le matuā latalata mai o se olaga sili ona lelei i le Parataiso. Na valoia e Iesu e faapea o le a iai ‘faamaʻi i lea mea ma lea mea.’ (Luka 21:11) Po ua faataunuuina lenei valoaga? Ioe. Ina ua uma le taua muamua a le lalolagi, na maliliu ai le sili atu i le 20 miliona tagata i le fulū Sepania. Talu mai lena taimi, na maliliu ai le faitau miliona o tagata i le kanesa, maʻi o le fatu, malaria, AIDS, ma isi lava faamaʻi. I atunuu tauatiaʻe, o faamaʻi (e pei o le manava tatā ma le palagaau) ua māfua ona o le lē mamā o vai, ua maliliu ai le faitau miliona o tagata i tausaga taitasi.

Na fetalai foi Iesu e faapea: ‘O le a iai oge.’ (Mataio 24:7) E pei ona matauina i le mataupu ua mavae, o tagata matitiva o le lalolagi, ua lē lava a latou meaʻai. O le isi lenei vala e faamaonia ai, ua toeitiiti ona oo mai lea o se olaga e sili ona lelei i le Parataiso.

Na fetalai Iesu: ‘O le a i ai mafuie tetele.’ (Luka 21:11) Ua faamaonia foi lea mea moni i o tatou taimi. Talu mai lava le 1914 e faitau selau afe tagata na maliliu i mafuie matautia.

Ua faapea atili mai le Tusi Paia, “o aso e gata ai” o le a faailogaina i se suiga o uiga o tagata. O le a avea ma “e alolofa i latou i a i latou,” ma “e mananao i tupe,” o fanau o le a “le faalogo i mātua.” O tagata lautele o le a avea ma “e ua tele le manao i mea faafiafia a e leai se manao i le Atua.” (2 Timoteo 3:1-5) Pe e te lē ioe e toatele ua fetaui i ai lenei faamatalaga?

A o faateleina tagata e faia mea leaga, ua faateleina ai foi le amio leaga. Na valoia foi lenei mea. E tusa ai ma le Mataio 24:12, na fetalai Iesu e uiga i le “faateleina o le amio leaga.” Atonu o le a e ioe i le faateteleina ona leaga o le solitulafono i le taimi nei nai lo o tausaga ua mavae. O tagata i so o se mea ua matatau ina neʻi faoa a latou mea, ʻolegiaina i latou, pe afaina foi i nisi auala.

O taua, le pepesi o faamaʻi, le lē lava o meaʻai, mafuie, faateleina o le solitulafono, ma suiga i le lē lelei o faiā faaletagata—o nei mea uma, ua vaaia manino i aso nei e pei lava ona valoia e le Tusi Paia. Ae atonu e te fesili mai, ‘pe e lē o mea uma ea nei na tutupu talu mai le faagasologa o le talafaasolopito o le tagata?’ ‘O le ā le mea ua ese ai o tatou aso?’

E iai ni vala sili ona mataina o mea o loo tutupu i aso nei. E lē o faapea mai le Tusi Paia e so o se vala lava, e pei o oge, o le a na o lea lava le vala e faamaonia ai ua tatou ola i taimi o le iuga ma ua latalata mai se olaga e sili ona lelei. O valoaga o le Tusi Paia e uiga i le taimi o le iuga, fai mai o le a faataunuuina i luga o se tupulaga e lē amioatua.—Mataio 24:34-39; Luka 17:26, 27.

E lē gata i lea, o se mea e matuā ese lava e faapea o nisi o vala o le valoaga a Iesu—ae maise lava vala e faatatau i le lē lava o meaʻai ma le pepesi atu o faamaʻi—ua faataunuuina lava i aso nei. Aisea? Auā ua matuā sili atu ona tele mea ua ausia e le faasaienitisi i se tulaga sa lei faapea ona iai muamua. Ua matuā sili atu foi ona agaʻi i luma ma salalau atu le poto faafomaʻi ma togafitiga eseese. E na o le Atua lava e mafai ona ia valoia mai i lana Afioga le Tusi Paia e faapea, i lea taimi, o le a faateteleina ai ona leaga faamaʻi ma oge, ae lē faasolo ina lelei.

Talu ai o valoaga uma o le Tusi Paia e uiga i taimi o le iuga, po o “aso e gata ai,” ua faataunuuina nei, o le ā sa tatou faaiuga e tatau ona faia? Ona tatou faapea lea, ua lata mai se olaga e sili ona lelei! Ae o le a faapefea ona oo mai?

Se Olaga e Sili ona Lelei—E Faapefea?

Pe e te manatu e mafai e tagata ona aumaia le Parataiso? I le faagasologa o talafaasolopito e oo mai i le asō, o loo iai le tele o ituaiga o faigamalo eseese faaletagata. O loo taumafai malosi nisi e faamalieina manaoga o tagata. Peitai, ua faasolo ina matuā leaga ai le tele o faafitauli. I atunuu mauoa ma atunuu matitiva, o loo tauivi ai malo ina ia foia le faaaogaseseina o fualaau faasaina, le lē lelei o mea e nonofo ai, le mativa, solitulafono, leai ni galuega, ma faigā taua.

E tusa lava pe mafai e malo ona foia nisi o nei faafitauli, ae lē mafai lava ona latou aumaia le saolotoga atoatoa mai maʻi; e lē mafai foi ona latou taofia le soifua matutua ma le oti. E manino lava, o le a lē mafai e tagata ona aumaia le Parataiso i lenei lalolagi.

Ua faapea mai ma le poto le Tusi Paia: “Aua tou te faatuatua i alii, po o le tagata, e le o iai se olataga.” Ae ia te ai la e ao ona tuu i ai lo tatou faatuatua? Ua tali mai le Tusi Paia: “Amuia le tagata o i ai le Atua o Iakopo e fai mona fesoasoani; o i ai lona faamoemoe ia Ieova lona Atua.” (Salamo 146:3, 5) Afai e tuu lo tatou faatuatua ia Ieova le Atua, o le a lē tāitāi ona tatou faanoanoa.

Ma le mautinoa lava, o Lē e atamai ma e ona le malosi e foafoaina ai le lalolagi, le la, ma fetu, e mafai foi ona ia faia le lalolagi e avea ma parataiso. E mafai ona ia faia tagata ina ia olioli i se olaga e sili ona lelei. E so o se mea lava e finagalo i ai Ieova le Atua e fai, e mafai ma o le a ia faataunuuina lava. Ua faapea mai lana Afioga: “Auā e leai lava se mea e tasi e le mafaia e le Atua.” (Luka 1:37) Ae o le a faapefea ona aumaia e le Atua se olaga e sili ona lelei?

O le a aumaia e Ieova i le tagata se olaga e sili ona lelei e ala i lona Malo. Ma o le ā le Malo o le Atua? O se pulega moni, ua tofia ai Iesu Keriso e avea ma Pule. O le Malo o le Atua e i le lagi, ae ua lē pine ona aumaia lea e lea Malo faamanuiaga ofoofogia faapea ma se olaga e sili ona lelei i ē o le a mau ai i le lalolagi Parataiso.—Isaia 9:6, 7.

Atonu ua e masani ma le tatalo faaaʻoaʻo a Iesu, lea o loo maua i le Tusi Paia i le Mataio 6:9-13. Ua faapea mai se vaega o lena tatalo i le Atua: “Ia oo mai lou malo. Ia faia lou finagalo i le lalolagi, e pei ona faia i le lagi.” E tusa ai ma lena tatalo, o le a “oo mai” le Malo o le Atua e faataunuuina le fuafuaga a Ieova le Atua mo le lalolagi. Ma o lana fuafuaga, ia avea le lalolagi ma parataiso.

Ua mapuna aʻe ai le fesili mulimuli e tasi e faapea: O le ā e tatau ona e faia ina ia olioli ai i se olaga e sili ona lelei i le Parataiso o loo sau?

Le Mea e Manaomia ona E Faia

Ua taofia ma le alofa e Ieova le Atua le faamoemoe mo se olaga e sili ona lelei i le Parataiso mo i latou uma e faia lona finagalo. Ua taʻu mai e le Tusi Paia ia i tatou e faapea: “E fai lava le nuu mo tagata amiotonu, e nonofo ai pea i latou.” (Salamo 37:29) Ae o le ā e taʻuamiotonuina ai se tasi i le silafaga a le Atua?

Ina ia faafiafia Ieova, e manaomia ona tatou aʻoaʻoina atili e uiga i mea e finagalo o ia tatou te faia. Afai tatou te ave i fale le poto i le Atua ma faatatau i o tatou olaga, ona mafai lea ona tatou ola e faavavau. I se tatalo i le Atua, na faapea atu ai Iesu: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

O le tusi o taʻuina mai ia i tatou e uiga ia Ieova le Atua atoa ma Iesu Keriso, o le Afioga lea a le Atua, le Tusi Paia. O se tasi lea o meaalofa aupito sili ona tāua a Ieova. O le Tusi Paia ua pei o se tusi mai se tamā alofa i lana fanau. O loo taʻu mai ai ia i tatou e uiga i le folafolaga a le Atua e aumaia se olaga e sili ona lelei mo le tagata ma faailoa mai ai ia i tatou le auala e mafai ai ona tatou mauaina. Ua faailoa mai e le Tusi Paia ia i tatou le mea na faia e le Atua i aso ua mavae, faapea ma le mea o le a ia faia i le lumanai. Ua aumaia ai foi ia i tatou fautuaga aogā e uiga i le auala tatou te faafetaiaia ai ma le manuia o tatou faafitauli i le taimi nei. O le mea moni, ua aʻoaʻoina i tatou e le Afioga a le Atua i le auala e mafai ai ona tatou maua le fiafia e ui lava i lenei lalolagi o faalavelave.—2 Timoteo 3:16, 17.

O le a fiafia Molimau a Ieova e faia se suesuega faale-Tusi Paia ma oe, i lou fale e aunoa ma se totogi. Ia aʻoaʻo le auala e mafai ai ona e maua se olaga fiafia i le taimi nei, faatasi ma le faamoemoe i se olaga e sili ona lelei i le lumanai lata mai.

[Ata i le itulau 5]

Ua faaalia i valoaga o le Tusi Paia e faapea ua latalata mai se olaga e sili ona lelei

[Ata i le itulau 7]

O le a aumaia e le Malo o le Atua se olaga e sili ona lelei mo tagata