Aua le Faapalapala!

“Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.”—KALATIA 6:9.

1, 2. (a) O ā auala e tutuli ai se leona mo ana meaʻai? (e) O ai e naunau tele i ai le Tiapolo i le fia ʻaina?

E ESEESE auala e tutuli ai se leona mo ana meaʻai. O isi taimi e lafi ai ma osofaia mai isi manu o i vaivai po o i ni ala ua iloga lelei. Ae o nisi taimi, ua faamatala mai e le tusi o le Portraits in the Wild, o se leona “e na ona ia faaaogaina lelei lava o se avanoa e tulai mai—mo se faaaoaoga, le osofaia o se tamai solofanua tositosi (zebra) o loo moe.”

² O lo tatou “fili, o le tiapolo lea,” ua faamatalaina mai e le aposetolo o Peteru e faapea, “o loo fealualuai o ia e pei o se leona tagi, ua saili se tasi e ʻaina e ia.” (1 Peteru 5:8) I le iloaina ua puupuu lona taimi, ua matuā faaoo atu ai e Satani le mamafatu o omiga i tagata ina ia taofia ai i latou mai le auauna atu ia Ieova. E ui i lea, o lenei “leona tagi” ua faapitoa lava lona naunau atu e fia ʻaina auauna a Ieova. (Faaaliga 12:12, 17) O ana auala e tutuli ai ua tutusa ma auala a se leona o loo i le lalolagi o meaola tataa. E faapefea?

3, 4. (a) O ā auala ua faaaogā e Satani e maileia ai auauna a Ieova? (e) Ona o “aso faigata” nei, o ā fesili ua lāgā ai?

³ E iai taimi e faia ai e Satani se osofaiga faafuasei—se sauāga po o se teteega e taulai atu i le aveesea o lo tatou faamaoni ina ia taofia ai lo tatou auauna atu ia Ieova. (2 Timoteo 3:12) Ae i le pei o le leona, i nisi taimi e faaaogā ai e le Tiapolo avanoa lelei o se tulaga e tulai mai. E faatalitali lelei o ia seia oo ina tatou faavaivai ma lē lavavā, ona ia taumafai loa lea e faaaogā lo tatou tulaga ua iai o le mafatia i le mafaufau ina ia mafai ona tatou faapalapala ai. E lē tatau ona avea i tatou ma nisi e faigofie ona ia maileia!

⁴ O loo tatou ola i le vaitaimi e sili atu ona faigata i le talafaasolopito uma o le tagata. I nei “aso faigata,” o le toatele o i tatou atonu e lagona le faavaivai po o le omia foi i nisi taimi. (2 Timoteo 3:1) E mafai la faapefea ona tatou alofia le oo atu ina faavaivai ma faapea ai ona avea i tatou ma nisi e maileia e le Tiapolo? Ioe, e mafai faapefea ona tatou utagia le fautuaga faagaeeina a le aposetolo o Paulo e faapea: “Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai”?—Kalatia 6:9.

Pe a Faapogaia e Isi so Tatou Lē Fiafia

5. O le ā na faapogaia ai le vaivai o Tavita, ae o le ā le mea na te lei faia?

⁵ I le vaitaimi o le Tusi Paia, e oo lava i auauna sili ona faamaoni a Ieova sa ono lagona le omia. Na tusi le faisalamo o Tavita e faapea: “Ua ou lailoa [vaivai] i loʻu oi; ua lofia loʻu moega i po uma lava; ua se vai le mea ou te moe ai i oʻu loimata. Ua fole oʻu mata i loʻu tiga.” Aisea na faapea ai le lagona o Tavita? Ua ia faamatala mai e faapea: “Ona o i latou uma o e saua mai ia te au.” O gaoioiga faaonoono a isi na matuā tigā ai le loto o Tavita na faapea ona lē mafai ai ona taofia le maligi o ona loimata. Ae sa lē liliu ese ai lava Tavita mai ia Ieova ona o mea na faia e tagata ia te ia.—Salamo 6:6-9.

6. (a) Atonu e faapefea ona aafia i tatou i upu ma gaoioiga a isi? (e) Ua faapefea ona faia e isi i latou ma ē e faigofie ona maileia e le Tiapolo?

⁶ I se tulaga tutusa foi faapena, o upu po o gaoioiga a isi atonu e faapogaia ai ona tatou agaʻi atu ina faavaivai faatasi ai ma le loto ua tumu i le tiga. Ua faapea mai le Faataoto 12:18: “O i ai lē soona tautala, e pei o tutuʻi i le pelu.” Pe afai o lē e soona tautala o se uso po o se tuafafine Kerisiano, o le ‘manuʻa ua tutuʻi i le pelu,’ e mafai ona loloto tele. O le faanaunauga faaletagata atonu o le lē fiafia, pe atonu foi e ita faamoemoe mo se taimi umi. Ua sili ona moni lenei mea pe afai ua tatou lagona ua lē alofa ma lē tonu ni faiga ua fai mai ia i tatou. Atonu o le a faigata ona tatou talanoa atu i lē ua sese, ma atonu foi tatou te alofia ma le loto i ai le toe fesootai atu ma ia. Ona ua omia tele i le lē fiafia, ua faapalapala ai isi ma ua lē toe ō ai i sauniga faa-Kerisiano. E faanoanoa ai, ua faapea ona latou ‘tuuina atu se mea e mautū ai le Tiapolo’ ma ua ia faaaogā ai lena tulaga e faigofie ai ona ia maileia i latou.—Efeso 4:27.

7. (a) E mafai faapefea ona tatou alofia fuafuaga a le Tiapolo pe a faapogaia e isi so tatou lē fiafia po o le faatiga foi ia i tatou? (e) Aisea e tatau ai ona tatou faateʻa ese le ita faamoemoe?

⁷ E mafai faapefea ona tatou alofia faufauga a le Tiapolo pe a faapogaia e isi so tatou lē fiafia po o le faatiga foi ia i tatou? E tatau ona tatou taumafai e aua le ita faamoemoe. Nai lo lea, ia tausolomua ona faatoafilemu po o le faaleleia o mataupu i se vave e mafai ai. (Efeso 4:26) Ua uunaia i tatou e le Kolose 3:13 e faapea: “Ia fefaamagaloai outou, pe afai ua agaleagaina se tasi e se tasi.” Ua fetaui lelei le faamagalo atu pe afai o lē ua sese ua ia taʻutino mai le masei ma ua salamō ma le faamaoni. (Faatusatusa i le Salamo 32:3-5 ma le Faataoto 28:13.) Peitai, ua aogā tele ia i tatou, pe afai tatou te manatua e faapea o le faamagalo o lona uiga o le lē faatagaina po o le lē manatu māmā i sese ua faapea ona faia e isi. O le faamagalo, e aofia ai le faateʻa ese o le ita faamoemoe. O le ita faamoemoe, o se avega e mamafa le tauaveina. E mafai ona pulea ai o tatou manatu, ma aveesea ai le fiafia mai ia i tatou. E mafai foi ona afaina ai lo tatou soifua malōlōina. I sona faaeseesega, o le faamagalo atu pe a talafeagai ai, e aogā mo lo tatou lava lelei. Ia pei i tatou o Tavita, ia aua lava neʻi faavaivai ma tuulafoai Ieova ona o mea ua taʻua pe faia e isi tagata ia i tatou.

Pe a Tatou Sese

8. (a) Aisea ua faapitoa ona oo ai i nisi lagona nofosala i nisi o taimi? (e) O le ā le matautia o loo iai i le matuā faatumulia i lagona ua sese ua faapea ai ona tatou faavaivai?

⁸ Ua faapea mai le Iakopo 3:2: “Auā o mea e tele e sese ai i tatou uma.” Pe a tatou faia faapea, o se mea e masani ai ona iai lagona ua nofosala. (Salamo 38:3-8) O lagona ua nofosala e mafai ona faapitoa le malolosi tele pe afai o loo tatou tauivi ma se vaivaiga o le tino ma toe fefoifoiai e faia i nisi o taimi.a O se tasi o Kerisiano o lē na feagai ai ma sea tauiviga ua ia faamatala mai e faapea: “Ou te lei fia ola pea, ma le lē iloa pe ua ou faia le agasala e lē mafai ona toe faamagaloina pe e leai. Sa oo ia te au le lagona o le lē toe aogā ona faamalosi i le auaunaga ia Ieova auā atonu ua lē o toe iai se faamoemoe mo aʻu.” Pe a oo ina matuā faatumulia i tatou i lagona ua sese ma faapea ai ona tatou faavaivai, ona tatou tuu atu ai loa lea i le Tiapolo se avanoa—ma atonu o le a ia vave faaaogaina loa lea avanoa! (2 Korinito 2:5-7, 11) O le mea o loo manaomia atonu o se vaaiga paleni i le lagona ua sese.

9. Aisea e tatau ai ona ia i tatou le mautinoa i le alofa mutimutivale o le Atua?

⁹ Pe a tatou agasala, e talafeagai ona iai ni lagona ua sese. E ui i lea, i nisi taimi, o lagona ua sese e mafai ona faaauau pea ona ua lagona e se Kerisiano e faapea ua lē aogā le alofa mutimutivale o le Atua mo ia. Peitai, ua faamautinoa mai ma le mafana e le Tusi Paia i tatou e faapea: “A e afai tatou te taʻu atu a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.” (1 Ioane 1:9) Pe e iai ea se mafuaaga tatau e talitonu ai o le a lē faia faapena e le Atua ia i tatou? Ia manatua, i lana Afioga, ua fetalai mai Ieova e sauni o ia e ‘faamagalo mai.’ (Salamo 86:5; 130:3, 4) Talu ai e lē mafai ona pepelo o ia, o le a ia faia e pei ona folafola mai e lana Afioga, e faalagolago i le tatou ō atu ia te ia ma se loto ua salamō.—Tito 1:2.

10. O le ā le faamautinoaga faamafanafana loto sa aumaia e se Watchtower na lomia muamua atu e faatatau i le faafetaiaia o se vaivaiga o le tino?

¹⁰ O le ā e tatau ona e faia pe afai o loo e tauivi ma se vaivaiga ma ua toe fai foi? Aua e te faapalapala ai! O le toe faia o lea vaivaiga e lē faapea ua faaleaogaina ai le agaʻi i luma ua uma ona e faia. Ua ofoina mai e le lomiga o Fepuari 15, 1954, o lenei mekasini se faamautinoaga faamafanafana loto e faapea: “[Atonu] tatou te tausuai ma paʻūū i le tele o taimi i nisi amioga leaga ua mauaa i lo tatou olaga tuai na iai e aunoa ma lo tatou iloaina. . . . Aua le faavaivai ai. Aua e te manatu ua e faia le agasala e lē mafai ona faamagaloina. O le mea tonu lava lena e manao Satani e te mafaufau i ai. O le mea moni ona o lena e te lagona le faanoanoa ma le lē fiafia ia te oe lava, ua faamaonia ai e te lei matuā leaga tele. Aua neʻi faavaivai e liliu atu ma le faamaulalo ma le filigā i le Atua, saili atu mo lana faamagaloga ma le faamamāina ma lana fesoasoani. Alu atu ia te ia e pei ona alu atu o se tamaitiiti ua oo i ai ni faafitauli i lona tamā, e tusa pe ua faia soo le vaivaiga lava lea e tasi, ma o le a aumaia ma le alofa e Ieova ia te oe le fesoasoani ona o lona alofa tunoa, ma afai e te matuā naunau moni, o le a na aumaia ia te oe se loto fuatia ifo lelei.”

Pe a Tatou Lagona e Faapea e Lē o Lava Mea o Tatou Faia

11. (a) E ao faapefea ona tatou lagona e faatatau i le faia o se sao i le galuega talaʻi o le Malo? (e) O ā lagona e faatatau i le auai i le faiva o tauivi ma isi Kerisiano?

¹¹ O le galuega talaʻi o le Malo, e tāua sana vaega o loo faia i le olaga o se Kerisiano, ma maua ai le olioli pe a faia ai se vaega. (Salamo 40:8) E ui i lea, ua lagona e nisi Kerisiano e pei ua matuā sese ona o le lē mafai ona faia nisi mea e sili atu i le faiva. O lagona faapena ua sese e mafai ona tafiesea ai le olioli ma faapogaia ai lo tatou faapalapala, i le manatu faapea o le lagona o Ieova ia i tatou e lē o lava mea o tatou faia i le faiva. Seʻi manatu i lagona o loo faapea ona tauivi ma nisi.

“Po o e iloaina le tele o le taimi e faaaluina ona o le mativa?” o le tusi lea a se tasi tuafafine Kerisiano o loo la tausia aʻe ma lana tane ni fanau se toatolu. “E tatau ona faasao le tupe i so o se avanoa ou te mafai ai. O le uiga o lenei mea o le faaaluina lea o le taimi e saili atu ai i faleoloa o faatau ai mea sa faaaogā muamua, le mea o faia ai le paʻū, po o le tasuʻi foi o ofu. Ou te faaaluina foi le itula e tasi pe lua i vaiaso taitasi i pepa faatumu (coupons) [e paʻū mai ai tau o meaʻai]—i le tatipiina, teuina, ma faafoi atu. E iai taimi ou te lagona ai ua ou matuā sese i le faia o nei mea, i le mafaufau faapea e tatau ona ou faaaluina na taimi e alu atu ai i le auaunaga i le fanua.”

“O loʻu manatu e faapea, e lei lava loʻu alofa moni ia Ieova,” o le faamalamalamaga lena a se tuafafine e toafa lana fanau ma le tane e lē talitonu. “O lea sa ou tauivi ai mo laʻu auaunaga ia Ieova. Sa ou matuā taumafai lava, ae sa lē oo ia te au se lagona faamalieina i mea na fai. E te iloa, sa leai ma sina lagona aogā sa ia te au, o lea e faigata ona ou manatu atu pe faapefea ia Ieova ona taliaina mai laʻu auaunaga ia te ia.”

Na fai mai se fafine Kerisiano o lē na tatau ona ia tuua le auaunaga faataimi atoa e faapea: “Sa faigata ia te au ona ou feagai ai ma le manatu e faapea ua ou lē taulau i laʻu taʻutinoga o le auauna atu ia Ieova faataimi atoa. E faigata ona e iloaina le lē fiafia na ou iai! Ua ou tagi nei ona ua ou manatuaina lenei mea.”

12. Aisea ua iai ai i isi Kerisiano le lagona ua matuā nofosala i le lē mafai ona latou faia ni galuega se tele i le faiva?

¹² O le mea e masani ai le manao e auauna ia Ieova i le atoatoa e mafai ai. (Salamo 86:12) E ui i lea, aisea ua iai ai i isi le lagona ua matuā nofosala ona ua lē mafai ona faia ni mea e sili atu? Mo nisi, e aliali mai e fesootai atu i se lagona e masani ai o le lē toe aogā, atonu e māfua mai i se mea faalemanuia na tupu i le olaga. I nisi o tulaga, o lagona lē tonu ua nofosala atonu e māfua mai i se vaaiga lē saʻo i mea o faatalitalia mai e Ieova mai ia i tatou. Na taʻutino mai e se tasi Kerisiano e faapea: “Na ou lagona e faapea, afai e te lē o matuā tigaina, o lona uiga e lē o lava mea o e faia.” O le iuga, na ia faatutū ai ni tulaga maualuluga mo ia lava—ma na atili ai ona lagona le nofosala ona sa lē taulau ona ia ausiaina na tulaga.

13. O le ā o faatalitalia e Ieova mai ia i tatou?

¹³ O le ā o faatalitalia e Ieova mai ia i tatou? I ni upu faigofie, ua faatalitalia e Ieova i tatou e auauna ia te ia ma le loto atoa, faia o mea e tusa ai ma o tatou tulaga o iai. (Kolose 3:23) E ui i lea, atonu e iai se eseesega tele i le va o mea tatou te mananao e fai ma mea e mafai moni lava ona tatou faia. E mafai ona iai mea e faatapulaa mai ai i tatou e pei o le tino matua, soifua mālōlōina, malosi o le tino, po o tiute tauave faaleaiga. E ui i lea, pe a tatou faia mea uma tatou te mafaia, atonu o le a tatou maua le faamautinoaga e faapea o la tatou auaunaga ia Ieova o loo faia ma le loto atoa—e lē tele atu pe itiiti ifo mai le auaunaga ma le loto atoa a se tasi ua mafai e lona soifua malōlōina ma ona tulaga ona faatagaina o ia e auai i le faiva faataimi atoa.—Mataio 13:18-23.

14. O le ā e mafai ona e faia pe afai e te manaomia le fesoasoani i le fuafuaina o mea e mafai ona e faia moni lava e tusa ai ma lou lava tagata?

¹⁴ E mafai la faapefea ona e fuafuaina po o ā mea e mafaia moni lava ona e faia? Atonu e te manao e talanoaina lenei mataupu ma se uo maufaatuatuaina, se uo Kerisiano taʻumatuaina, atonu o se toeaina po o se tuafafine ua lava le poto masani, o sē na te iloaina ou tomai, ou tapulaa, ma ou tiute tauave faaleaiga. (Faataoto 15:22) Ia manatua, i le silasila a le Atua, o lou aogā o se tagata e lē faavasegaina lea i le tele o mea e te faia i le faiva i le fanua. O auauna uma a Ieova, e tāua ia te ia. (Hakai 2:7; Malaki 3:16, 17) O mea e te faia i le galuega talaʻi atonu e tele atu pe itiiti ifo i lo mea e faia e isi, ae afai o avea ia ma mea silisili e te mafaia, e fiafia i ai Ieova, ma e leai la se mafuaaga e iai ai ia te oe se lagona ua pei e nofosala.—Kalatia 6:4.

Pe a Tele ni Mea ua Manaomia Mai ia i Tatou

15. O ā auala ua tele ai mea o faatalitalia mai i toeaina o le faapotopotoga?

¹⁵ Na fetalai Iesu e faapea: “O ia foi ua tuuina atu i ai o mea e tele, latou te fai atu ia te ia e au mai mea e sili ona tele.” (Luka 12:48) E mautinoa lava e ‘tele mea ua manaomia’ mai ia i latou o auauna o ni toeaina i le faapotopotoga. E pei o Paulo, ua latou galulue malolosi mo le faapotopotoga. (2 Korinito 12:15) Latou te sauniuni mo lauga, o asiasiga faaleoleo mamoe e ao ona faia, o mataupu faafaamasinoga e ao ona taulimaina—e faia na mea uma lava e aunoa ma le tuulafoaiina ai o o latou lava aiga. (1 Timoteo 3:4, 5) O nisi toeaina o loo faapea foi ona pisi i le fesoasoani atu i le fausiaina o Maota o le Malo, galulue i le Komiti mo Fesoasoani Manaomia Faafomaʻi, ma o loo galulue tauofo i fonotaga ma tauaofiaga. E mafai faapefea e nei tane tuutoina atu e galulue mamafa, ona alofia le oo atu ina faavaivai i le mamafa o na tiute tauave?

16. (a) O le ā le vaifofo aogā na ofoina atu e Iairo ia Mose? (e) O le ā le uiga o le a mafai ai e se toeaina ona faia se sao i tiute tauave talafeagai ma isi?

¹⁶ Ina ua vaivai Mose o se tagata faamaulalo ma le agamalu i lona tauaveina na o ia o faafitauli o isi, na tuuina atu ai e Iairo, le tamā o lana avā, se vaifofo aogā: faasoa atu nisi tiute tauave i isi tane agavaa. (Esoto 18:17-26; Numera 12:3) Ua faapea mai le Faataoto 11:2: “O i ai le poto i e faamaulalo.” O le faamaulalo, o lona uiga o le iloa ma talia ou tapulaa. O se tane e faamaulalo, e lē faatalatu o ia e faasoa atu galuega i isi, e lē fefe foi o ia neʻi aveesea le pule mai ia te ia pe a faasoa atu nisi o tiute tauave talafeagai ai i isi tane agavaa.b (Numera 11:16, 17, 26-29) Nai lo lea, e naunau o ia e fesoasoani atu ia i latou ina ia agaʻi i luma.—1 Timoteo 4:15.

17. (a) E mafai faapefea e sui o le faapotopotoga ona faamāmā le avega a toeaina? (e) O ā faataulagaina ua faia e avā a toeaina, ma e faapefea ona tatou faaali atu ia i latou tatou te lē o manatu māmā i na mea?

¹⁷ E tele mea e mafai ona faia e sui o le faapotopotoga e faamāmā ai le avega a toeaina. I le malamalama lelei e iai foi aiga o toeaina e ao ona tausia, o le a lē faamaimau ai la e isi le taimi ma le uaʻi atu o toeaina ia i latou i ni mea e faalētāua. E faapena foi ona lē tatau ona latou faaleamanaiaina le agaga faataulagaina o avā a toeaina a o latou faasafuaina mai ma le lē manatu faapito a latou tane mo le faapotopotoga. Ua faamatala mai e se avā a se toeaina e toatolu le fanau e faapea: “O le mea ou te lē faitio ai lava, o le avega faaopoopo lea o loo oʻu faia ma le fiafia i le aiga ina ia mafai ona auauna laʻu tane o se toeaina. Ou te iloa e anoanoai faamanuiaga a Ieova i lo matou aiga ona o lana auaunaga, ma ou te fiafia i lana foai atu. Peitai, i le tulaga moni lava, e masani ona tele galuega mamafa ou te faia i le teuina o le fanua, ma tele foi le aʻoaʻiga e faia mo le ma fanau nai lo le mea e masani ai talu ai e pisi tele laʻu tane.” E faanoanoa ai, ua iloa e lenei tuafafine, o isi, nai lo le latou talisapaia o ana avega faaopoopo, ae ua latou faia atu ni faamatalaga e teʻi ai, e pei o lenei, “Aisea ua e lē paeonia ai?” (Faataoto 12:18) Maeu le sili atu ona lelei le faamālō i isi i mea o loo latou fai nai lo le faitioina o i latou i mea e lē mafai ona latou faia!—Faataoto 16:24; 25:11.

Talu ai e Lei Oo mai Lava le Iuga

18, 19. (a) Aisea e lē o se taimi lenei e mālōlō ai mai le taufetuliga i le ola e faavavau? (e) O le ā le fautuaga fetaui lelei ma le taimi na tuuina atu e le aposetolo o Paulo i Kerisiano i Ierusalema?

¹⁸ Pe a iloa e se tagata tamoe e faapea ua ia latalata atu i le iuga o se taufetuliga umi, e lē faavaivai o ia. Atonu ua oo atu lona tino i le mea e gata mai ai le malosi—ua matuā vaivai lava, ua mu i le vevela, ma ua matuā matūtū lava le tino—ae ona ua lalata atu lava i le iuga ua leai ai se taimi e mālōlō ai. I se tulaga foi faapea, i le avea ma Kerisiano, o loo tatou iai i se taufetuliga mo le taui o le ola, ma ua tatou lalata tele atu i le tini. E lē o se taimi la lenei mo i tatou e mālōlō ai!—Faatusatusa i le 1 Korinito 9:24; Filipi 2:16; 3:13, 14.

¹⁹ E faapena foi le tulaga sa feagai ai ma Kerisiano i le uluai senituri. Pe tusa o le 61 T.A., na tusi atu ai le aposetolo o Paulo i Kerisiano i Ierusalema. Na utiuti le taimi na totoe—o le “tupulaga” amioleaga, o le faiga o mea faaaposetate faa-Iutaia, na toeitiiti lava a “mavae atu.” Sa faapitoa lava le manaomia ona mataala ma faamaoni Kerisiano i Ierusalema; sa manaomia ona sosola ese i latou mai le aai pe a latou vaaia ua siosiomia e autau. (Luka 21:20-24, 32) Na fetaui lelei ai le taimi mo le fautuaga faagaeeina a Paulo e faapea: ‘Aua le faavaivai ma lē lavavā o outou agaga.’ (Eperu 12:3) Na faaaogā e le aposetolo o Paulo iinei veape e lua e matuā manino lelei: “faavaivai” (kaʹmno) ma le ‘lē lavatia’ (e·klyʹo·mai). E tusa ai ma se tasi tagata aʻoga o le Tusi Paia, o nei upu Eleni ua “faaaogā e le au taufetuli Aristotle, o ē e mālōlō ma pauu ina ua taunuu i le tini. O ē na faitau [i le tusi a Paulo] sa iai pea i latou i le taufetuliga. E lē tatau ona latou vave faapalapala. E lē tatau ona latou faatagaina i latou ia matapogia ma pauu ona o le vaivai. E toe faapea atu foi, o loo manaomia ona finafinau pe a feagai ai ma faigata.”

20. Aisea ua talafeagai lelei ai le fautuaga a Paulo mo i tatou i lenei taimi?

²⁰ Maeu le talafeagai o le lapataiga a Paulo mo i tatou i nei aso! A o feagai ai ma omiga ua faateteleina, atonu e tulai mai taimi tatou te lagona ai e pei o se tagata tamoʻe ua matuā vaivai, ua toetoe lava ina paʻū i lalo. Ae ua lalata tele atu i le tini, e lē tatau lava ona tatou faapalapala! (2 Nofoaiga a Tupu 29:11) O le mea tonu lava lena o loo manao i ai lo tatou Fili, le “leona tagi,” tatou te faia. E faafetai ai ona ua faia e Ieova sauniuniga e faapea ona avatu ai “i e ua vaivai . . . le malosi.” (Isaia 40:29) O ā nei sauniuniga ma pe faapefea foi ona tatou faaaogaina tatau o le a talanoaina i le isi mataupu o sosoo mai.

[Faaopoopoga i lalo]

O le ā Lau Tali?

◻ E faapefea ona tatou alofia le faapalapala pe a lē fiafia ona o isi po o lo latou faatiga mai foi ia i tatou?

◻ O le ā le vaaiga paleni o le lagona ua nofosala e taofia ai i tatou mai le faapalapala?

◻ O le ā ua faatalitalia e Ieova mai ia i tatou?

◻ E faapefea ona fesoasoani le faamaulalo i toeaina o le faapotopotoga ia taofia ai mai le faavaivai?

◻ Aisea ua fetaui ai le fautuaga a Paulo o i le Eperu 12:3 mo i tatou i aso nei?