Le Atua, Le Faiga Malo, ma Oe

“Ua Feteenai le Lotu ma le Faiga Malo i le Palota i Talagā Faaipoipoga i Aialani”

O LE ulutala lea o le nusipepa The New York Times ua faailoa mai ai le auala e mafai ona feteenai ai tagata i aso nei ma se filifiliga i le mea e manao i ai le Faiga Malo ma mea o aʻoaʻoina e a latou lotu.

Na taʻua e le mataupu e faapea: “E tusa o le masina a o lei faia le palota pe aveesea atoatoa le faiga faavae i le faasaina o talagā faaipoipoga, a ua molimauina e Aialani o loo pito sili ona toatele ai tagata Katoliko Roma se feeseeseaiga e lei masani ai i taʻitaʻi o le Malo ma taʻitaʻi o ona lotu.” Na fuafuaina e le Faiga Malo le aveesea o le sā i talagā faaipoipoga, lea e tetee malosi i ai le Lotu Katoliko i talagā faaipoipoga ma le toe faaipoipo. Sa tatau ona fai se filifiliga a Katoliko Aialani i le va o le Lotu ma le Faiga Malo. Ae o le iuga, na malo le Malo i ni nai palota laiti lava.

O se tulaga e sili ona mataina ai, ona e tele tausaga ua feagai ai tagata o Aialani i Mātū ma se fefinauaiga matuitui i le pulega a le malo. E toatele ua

maliliu ai. Ua iai manatu tetee o Katoliko Roma ma Porotesano po o fea le Faiga Malo e gauai i ai: o le pule faaauau a Peretania i Aialani i Mātū po o se malo e faaautū i ai Aialani atoa.

E tutusa lava ma le tulaga sa iai Yugoslavia, ua manaomia e pule o le malo ia sui o lotu eseese, e aofia ai le Katoliko ma le Orthodox, ina ia tau i se taua mo laufanua. O fea na faamuamua e le toatele o tagatānuu? Pe na latou manatu ea e mulimuli ia i latou na faapea mai o sui o le Faiga Malo o le atunuu, pe na latou manatu e usiusitai i le Atua, o lē ua faapea mai: “Aua le fasioti tagata, . . . Ia e alofa atu i lē lua te tuaoi, ia pei o oe lava ia te oe”?—Roma 13:9.

Atonu e te manatu o le a lē taitai mafai ona aafia ai oe i lenei tulaga. Ae e mafai. O le mea moni, atonu o loo aafia ai lava oe i le taimi nei. I lana tusi The State in the New Testament, ua taʻua ai e le faifeau Porotesano o Oscar Cullmann ia “faaiuga e iu ai i le ola po o le oti e tatau ona faia pe o le a faia foi e Kerisiano i tulaga faigata pe a faamataʻuina e malo tautalatasi o loo puleaina i latou.” Ae peitai, ua ia taʻua foi “le tiute tauave moni lava ma le tāua a Kerisiano uma—faapea foi le Kerisiano o loo ola i le olaga ua taʻua o tulaga ‘masani,’ o ‘aso taitasi’—ina ia faafeagai ai ma foia se faafitauli matuia o la fesagai talu ai le avea o ia ma Kerisiano.”

Pe e tatau la ona fia iloa e Kerisiano i aso nei le faiā a lotu ma Faiga Malo? E matuā tatau lava. Mai le tauamataga lava o le uluai senituri, ua taumafai ai Kerisiano e atiina aʻe se vaaiga e paleni lelei e faatatau i faipule silisili faalemalo. O lo latou Taʻitaʻi, o Iesu Keriso, sa faamasinoina, taʻuleagaina ma faasalaina i le oti e le Faiga Malo o Roma. Sa tatau i ona soo ona faapaleni a latou avega tauave faa-Kerisiano ma o latou tiute i le Emepaea o Roma. O se autaluga o la latou faiā ma faipule silisili o le a faapea ona aumaia ai taʻiala mo Kerisiano i aso nei.

[Ē Ana le Ata i le itulau 3]

Tom Haley/Sipa Press