O le a E Lē Fia Misia!
MISIA le ā? Le Tauaofiaga Itumalo ua lalata mai a Molimau a Ieova “O Avefeau o le Filemu Mai le Atua”! I le tele o nofoaga, o le a amata ai le tauaofiaga i le 9:30 i le taeao o le Aso Faraile i le tātāina o musika. Pe a maeʻa ona faalogologo atu i faatalanoaga e faamalosia ai le faatuatua e faia a o faagasolo le vaega le “Faalogologo Atu i Ē Folafolaina ma le Maelega le Filemu,” o le a outou olioli ai i le lauga faalaeiau e sosoo ai “O le ā e Manaomia e le Atua Mai ia i Tatou?”
O le ʻauʻau i le aoauli o le Aso Faraile o le lauga autū e faagaeeina ai o lona matua “La Tatou Matafaioi o ni Avefeau o le Filemu Mai le Atua.” Ona oo lea i le vaega “Fesoasoani i Isi ia Iloa Mea e Manaomia e le Atua” lea o le a aumaia ai fautuaga i le aʻoaʻoina o ē fou. O le a mulimuli mai ai le faasologa o lauga e fetaui lelei ma lenei taimi “Ia Mataala i Mailei Lilo o Faafiafiaga.” O le a faaiuina le polokalame o le Aso Faraile i lauga “Tetee Atu i le Tiapolo—Aua Neʻi Faatagaina se Mea Leaga” ma le “Ia Faamaoni i le Tausisia o le Moni o le Afioga a le Atua.”
O le polokalame o le taeao o le Aso Toonai o le a faamamafa ai le tāua o le galuega o le faia ma soo i le lauga faasolo e tolu ona vaega “O Avefeau o Loo Aumaia le Tala Lelei o le Filemu.” O le a faaiuina le polokalame i lauga “Le Foai ma le Olioli o Loo Faia i Totonu o le Faalapotopotoga a Ieova” ma “Le Filemu ma le Ola e Ala i le Tuuina Atu ma le Papatisoga,” lea o le a maua ai e ē fou le avanoa e papatisoina ai pe a maeʻa le lauga.
O le lauga o le aoauli o le Aso Toonai “Ia Manatunatu i le Silafaga a Ieova i Mataupu” o le a taliina ai fesili ia e pei o le ‘Pe o auai ea Kerisiano i le galuega o le tuueseeseina i aso nei? ma le ‘O le ā le vaaiga a le Tusi Paia i le faasalaga oti?’ O le a e olioli foi i le faagaeeloto o le lauga faasolo e lua ona vaega o le “E Manatu Mai le Atua o le Filemu ia te Oe” ae maise foi le lauga faaiu “Ia Sailia le Filemu Mai le Atua i le Olaga Faaleaiga.”
O le polokalame o le taeao o le Aso Sa o le a aofia ai le lauga faasolo e tolu vaega “Faailoaina Ituaiga Moni o Avefeau” ma le lauga “Faalogo ma Usitai i le Afioga a le Atua.” O le a faaiuina le polokalame o le taeao i le tala e faatinoina i teuga faaanamua o le a aumaia ai lesona aogā mai le tala o le Tusi Paia i le faamasino o Kitiona.
O le polokalame mulimuli o le tauaofiaga i le aoauli o le Aso Sa o le a faatomuaina ai le lauga lautele o lona matua e faapea “Le Filemu Moni ua Iai Nei!—Mai le ā le Puna?” Ona faaiuina ai lea o le tauaofiaga i le lauga mulimuli e uunaia ai, e faapea “Agaʻi i Luma o ni Avefeau o le Filemu Mai le Atua.”
Ia faia nei loa fuafuaga ina ia auai. Ina ia iloa po o le ā le tauaofiaga o latalata ane i lou aiga, faafesootai le Maota o le Malo o Molimau a Ieova i lou vaipanoa po o le tusi atu i ē na lomia lenei mekasini. O le lomiga o Le Olomatamata o Fepuari 15, 1996 o loo tusia mai ai tuatusi o nofoaga uma o tauaofiaga i le Pasefika i Saute, Ausetalia ma Niu Sila.