Lafoai Mea E Tele Mo Se Mea E Sili Atu Ona Tāua

E PEI ONA FAAMATALAINA E JULIUS OWO BELLO

Mo le 32 tausaga, na avea ai aʻu o se Aladura.* Sa ou talitonu o faamalologa i la le faatuatua, ma tatalo o le a foia ai oʻu faafitauli uma ma faamalolo ai maʻi uma. Ou te lei faatauina lava ni vailaau, e oo lava i fualaau o mea tiga o le tino. I na tausaga, e leai lava se tasi o loʻu aiga na taofia i le falemaʻi pe a maʻi. Pe a maʻi se tasi o laʻu fanau, sa ou tatalo i le ao ma le po mo i latou seia oo lava ina toe malolosi. Sa ou talitonu na talia e le Atua aʻu tatalo ma faamanuia mai ia te au.

* E mai le upu Yoruba o lona uiga, “o se tagata tatalo.” E faasino atu i se sui o se lotu Aferika na te faia faamalologa faaleagaga.

SA OU auai i le kalapu o le Egbe Jolly, e sili ona lauiloa i Akure, o se taulaga i Nigeria i sisifo. O aʻu uo, o ni tagata aupito mauoloa ma malolosi a latou taaʻiga i lo matou nuu. Sa masani ona asiasi mai ia te au i loʻu aiga le Deji, le tupu o Akure.

Sa fai foi laʻu autaunonofo, sa iai aʻu avā e toaono ma palake e toatele. Sa olaola laʻu pisinisi. Sa sologalelei lava mea uma mo aʻu. Peitai, i le pei o le tagata faatauoa i le faataoto a Iesu i le penina tautele, na ou maua ai se mea e sili atu ona tāua, o lea na ou faateʻa ai aʻu avā e toalima, aʻu palake, le lotu, le kalapu, ma le fia lauiloa i le lalolagi, ona o lea mea.—Mataio 13:45, 46.

Le Auala na Avea ai Aʻu ma Aladura

Na ou muai faalogo e uiga i le ʻau Aladura i le 1936, ina ua 13 oʻu tausaga. O laʻu uo e igoa ia Gabriel, na ia taʻu mai ia te au e faapea: “Afai e te asiasi atu i le Lotu Aposetoliko a Keriso, o le a e faalogo ai i le Atua o fetalai mai.”

Sa ou fesili atu i ai: “E faapefea ona fetalai mai le Atua?”

Na ia faapea mai: “Sau ona e iloa ai lea.”

Sa ou naunau lava ou te fia faalogo atu i le Atua. O lea, i le po lena na ma ō ai ma Gabriel i le falesa. Sa faatumulia si tamai fale i tagata tapuai. Sa amata loa e le faapotopotoga ona lagi faapese mai ni upu: “Ina ō mai ia, outou! O loo iinei Iesu!”

A o lagi mai nei upu, ona eē lea o se tagata: “Le agaga paia e, afio mai!” Na ta e se isi tagata se logo, ma na saō uma le faapotopotoga. Na sosoo ai ma le tautala faatopetope fiafia mai o se fafine ua tau lē mānava i se gagana ese. Na faafuasei ona ia alaga mai: “Ina faalogo maia outou i le feau mai le Atua! O le mea lenei ua fetalai mai ai le Atua: ‘Ia outou tatalo mo tagata tutulimanu ina ia latou lē fasiotia tagata!’” Sa faatumuina le potu i faalogona ootia.

Sa ou talitonu e faapea, na fetalai mai le Atua e ala i le fafine, o lea, i le tausaga na sosoo ai na papatisoina ai aʻu e avea o se tasi o le Lotu Aposetoliko a Keriso.

Le Uluai Feiloaiga ma Molimau a Ieova

I le 1951, na ou talia ai se kopi o le mekasini o Le Olomatamata mai se Molimau e igoa ia Adedeji Boboye. Sa ou fiafia lava i le mekasini, o lea sa faia ai saʻu tusiga ma faitau i ai e lē aunoa. I le 1952, sa ou auai i se tauaofiaga itumalo a Molimau a Ieova e fa aso, na faia i le aai o Ado Ekiti.

Na matuā faafiafiaina aʻu i mea na ou vaai i ai i le tauaofiaga. Sa ou mafaufau loloto lava e uiga i le avea o aʻu o se tasi o Molimau a Ieova ae na ou toe faagaloina lea manatu. O loʻu faafitauli, ona o le taimi lea, sa iai aʻu avā e toatolu ma le palake e toatasi. Sa ou manatu, e lē mafai ona ou nofo ma se avā e toatasi.

Ina ua ou foi i Akure, sa ou taʻu atu ia Adedeji ina ia aua neʻi toe asiasi mai ia te au, ma sa lē toe faafouina laʻu tusiga o Le Olomatamata. Sa oo ina ou matuā maelega i laʻu lotu. Auā foi sa ou manatu, na faamanuia aʻu e le Atua talu ona ou auai i le Lotu Aposetoliko a Keriso. Sa ou faaipoipo i avā e toatolu ma maua ai se fanau e toatele. Sa ou faia loʻu lava fale. E lei taofia lava aʻu i se falemaʻi. Ona e foliga mai sa talia e le Atua aʻu tatalo, aisea la o le a suia ai laʻu lotu?

Faateleina le Taʻutaʻua Faatasi ma se Faamoemoega Lē Taulau

Sa amata ona ou foaiina le tele o tupe mo le lotu. E lei pine ae latou faia aʻu ma tiakono o le lotu, o se tulaga sa mafai ai ona ou iloa le faagaoioiga o mea i totonu o le lotu. Na matuā faateʻia aʻu i mea na ou vaai i ai. Sa mananao tele faifeau ma “perofeta” i tupe; sa ou ofo lava i lo latou matapeapea.

Mo se faaaoaoga, ia Mati 1967, na fananau ai laʻu fanau e toatolu i aʻu avā eseese. O se tū a le lotu o le faia o se sauniga i le taimi e faaigoaina ai se tamaitiiti. O lea, na ou ave ai mea alofa i le faifeau—o iʻa, vai tipolo, ma fagu suamalie mo lea sauniga.

I le aso o le sauniga lotu, na faapea mai ai le faifeau i luma o le aulotu atoa: “Ua faateʻia lava aʻu i tagata mauoa i lenei lotu. Ua latou mananao e faia se sauniga mo le faaigoaina o a latou fanau, ae ua latou aumai e na o iʻa ma fagu suamalie. E leai se aano o se manu! E leai se ʻoti! Seʻi manatu ifo! Na ofo atu e Kaino i le Atua se taulaga o ufi lapopoa, ae lei talia e le Atua lena taulaga ona sa leai se toto. E manao le Atua i mea e iai le toto. Na avatu e Apelu se manu, ma na talia lana taulaga.”

Ona o lena mea, na ou tū ai i luga ma alu ese atu ma le lē fiafia. Ae peitai, sa ou auai pea i le lotu. Sa ou faaaluina le tele o le taimi e auaufaatasi ai ma auai i fonotaga a laʻu kalapu. O nisi taimi, sa ou auai i sauniga i le Maota o le Malo, ma sa toe faafou laʻu tusiga o Le Olomatamata. Ae peitai, ou te lei nofo sauni lava e avea o se tasi o Molimau a Ieova.

Le Filifiliga e Auauna ia Ieova

Na oo mai le taimi na suia ai loʻu olaga i le 1968. I se tasi aso, na ou faitau ai i se mataupu i Le Olomatamata na faamatala ai ni faiga matuā sauā i Molimau a Ieova i Malawi. Na faamatala mai ai e uiga i se teine e 15 tausaga le matua o lē na saisai i se laau ma e faaono ona faia i ai ni faiga faamalosi faaleituaiga ona o le musu e lafoai lona faatuatuaga. Na matuā faateʻia lava aʻu, o lea na ou faapaʻū ai i lalo le mekasini ou te lei toe faitauina, ae sa ou mafaufau pea lava i ai. Sa ou iloa lelei, e leai se teine i laʻu lotu e na te mafaia ona faaalia lea ituaiga o faatuatua. Mulimuli ane i lena po, na ou tago ai i le mekasini ma toe faitau le itulau lava lena.

Sa amata loa ona ou suesueina ma le uigā le Tusi Paia. A o faateleina loʻu malamalama, sa amata ai ona ou iloa le tele ua faaseseina ai i matou e le lotu. E pei lava ona moni i aso anamua, e leai lava se mea lelei na faia e o matou ositaulaga, ua na ona ‘faia o amioga matagā.’ (Hosea 6:9) O na tagata sa tutusa lava ma perofeta pepelo ia na lapatai mai ai Iesu! (Mataio 24:24) Ou te lei toe faatuatua i a latou valovaloga ma vavega. Sa ou filifili e vavae ese mai lotu sese ma fesoasoani i isi e faia faapea.

Taumafaiga e Taofiofi Aʻu i le Lotu

Ina ua iloa e tiakono o le lotu ua ou filifili e tuua le lotu, sa latou auina mai ni sui e talosaga mai ia te au. Sa lē mananao i latou e alu ese se poutū tāua o le lotu. Sa latou ofo e tuuina mai ia te au se tofiga tāua o le Baba Egbe, o se tofi e tuuina atu i se tagata e lagolago malosi i lotu Aposetoliko a Keriso i Akure.

Na ou teena lea ofo ma taʻu atu ia i latou le pogai. Sa ou fai atu: “Ua pelogia i matou e le lotu. Ua latou faapea mai, o tagata lelei uma lava e ō i le lagi. Ae o lea ua ou faitau i le Tusi Paia, ma ua ou talitonu e na o le 144,000 tagata o le a ō i le lagi. O isi tagata amiotonu o le a ola i se lalolagi parataiso.”—Mataio 5:5; Faaaliga 14:1, 3.

Sa taumafai le faifeau o le lotu ina ia faasagatau mai aʻu avā ia te au. Na ia fai atu ia i latou ina ia taofia Molimau a Ieova ia ʻaua le ō mai i loʻu fale. Na tuu e le tasi o aʻu avā le vai oona i aʻu meaʻai. O le toalua o i latou na lapatai mai ia te au e uiga i se faaaliga na la iloa i le falesa. Na taʻu mai ai i le faaaliga e faapea, o le a ou oti pe a ou tuua le lotu. E ui lava i na mea, sa faaauau pea ona ou molimau atu i aʻu avā, ma valaaulia i latou matou te ō i sauniga. Sa ou fai atu i ai: “O le a outou maua ai nisi tane iina.” Ae peitai e leai se isi o i latou na faaalia le naunau, ma sa latou faaauau pea ona taumafai e faalotovaivaia aʻu.

O le iuga, ia Fepuari 2, 1970, ina ua ou foi mai i le aiga mai saʻu malaga i se nuu tuaoi, na ou tau mai ai, ua gaogao lava le fale. Ua sosola uma aʻu avā ma ave tamaiti.

Nonofo ma le Avā e Toatasi

Sa ou manatu, ‘Ua mafai nei loa ona ou faasaʻosaʻoina tulaga tau i laʻu faaipoipoga.’ Sa ou valaaulia laʻu avā muamua lava o Ianeta, ina ia foi mai i le aiga. Sa malie i ai o ia. Ae peitai, sa matuā tetee malosi lava lona aiga i lea manatu. Ina ua iloa e isi aʻu avā e faapea o lea ua ou fai ia Ianeta e toe foi mai, sa latou ō atu i le aiga o le tamā o Ianeta ma taumafai e fasi Ianeta. Ona tāpā mai lea o aʻu e lona aiga mo se talanoaga.

Pe tusa ma le toʻa 80 tagata na iai mo le talanoaga. Na faapea mai le uso o le tamā o Ianeta, o ia lea o le ulu o le aiga: “Afai e te manao e te toe faaipoipo i lo matou afafine, e tatau foi la ona e toe taliaina isi au avā. Ae afai e te manao e faia lau lotu fou ma nonofo ma le avā e toatasi, e tatau la ona e saili atu i se isi fafine. Afai e te toe aveina Ianeta e fai ma au avā, o le a fasiotia o ia e isi au avā, ma e matou te lē mananao e oti lo matou afafine.”

Ina ua mavae se talanoaga umi, sa iloa ai e le aiga ua ou filifili maumauai e nonofo ma le avā e toatasi. Sa iu lava ina latou gauai mai. Na faapea mai le uso o le tamā o Ianeta: “O le a matou lē aveesea la lau avā. E mafai ona e alu ma ave o ia.”

Ia Me 21, 1970, na ma faaipoipo faaletulafono ai ma Ianeta. I le iva aso mulimuli ane, na ou papatiso ai loa e avea o se tasi o Molimau a Ieova. Ia Tesema o le tausaga lava lena, na papatiso ai Ianeta.

Olioli i Faamanuiaga a Ieova

Na folafola e tagata o laʻu lotu muamua e faapea, afai e avea i maʻua ma Molimau, o le a ma feoti. Ua toetoe lava 30 tausaga ua mavae talu ona tupu o lena mea. E tusa lava pe ou te oti i le taimi nei, pe ona ua avea ea aʻu o se tasi o Molimau a Ieova? Pe afai e oti laʻu avā i le taimi nei, pe e mafai ona faapea mai se tasi, ona ua avea o ia o se tasi o Molimau a Ieova?

Ua ou tauivi e faailoa atu i laʻu fanau e toʻa 17 le auala i le upu moni. E ui o le toatele o i latou o ni tagata matutua i le taimi na avea ai aʻu ma Molimau, ae ou te faalaeiauina i latou ia suesue le Tusi Paia, ave i latou i sauniga ma tauaofiaga. O se mea e sili ona ou olioli ai ona e toalima i latou o loo auauna faatasi ma aʻu ia Ieova. E toatasi o loo ma galulue faatasi i le avea o se toeaina o le faapotopotoga. O le tasi ua avea o se auauna o le faiva i le faapotopotoga e latalata mai. E toalua laʻu fanau o loo auauna o ni paeonia sauatoa.

Pe a ou toe tepa i tua, ou te maofa ai i le alofa mutimutivale o Ieova ona ua fesoasoani mai ia te au e avea ma ana auauna. Maeu le moni o fetalaiga a Iesu: “E le mafai se tasi ona sau ia te au, pe a le tosina mai e le Tamā ua auina mai aʻu”!—Ioane 6:44.