“E na o le Tasi Mai le Tele o Olaga na e Pāʻia”

IA IANUARI 1996, na maʻi ai Carol ona o se tuma i le faiai. I le 60 ma ona tupu o ona tausaga sa avea ai o ia ma se tagata e fiafia, o se fafine malosi ma e faalaeiau i tagata uma. Ae i le taimi lea, na taumafai fomai e foia le tuputupu aʻe o lenei tuma matautia. A o fesagai ma lana tauiviga, na maua ai e Carol le tusi lenei:

“Peleina Carol:

“Ua ou matuā faanoanoa lava ina ua faasolosolo ina lē lelei lou soifua maloloina. Ae o le mea e lelei ai, o loo iai ia i tatou le faamoemoe moni lea ua fesoasoani mai le Tusi Paia ia tatou iloa ma talisapaia. O lenei faamoemoe o le puleaina lea e le Malo o Ieova le lalolagi ina ia mafai ai ona tatou ola i se tulaga faaparataiso, o se taimi lea e tatou te vaavaai atu i ai ma le naunautai.

“Ou te manao ina ia e iloa o lau galuega totino o le talaʻiga ua faasaoina ai ola o le toatele o tagata mai le oti e faavavau. O aʻu o se tasi o nei tagata. Ou te lē mautinoa pe o e manatuaina le taimi muamua na ta feiloai ai. Sa 20 oʻu tausaga i lena taimi. Na uumi loʻu lauulu, na ou faatauina atu fualaau faasaina, ma na ou aumea atu i se kegi. Na tofu i matou uma ma fana, ma na leai so matou alofa vaganā ai le manatu faapito mo lo matou lava lelei.

“Na lua tuʻituʻi mai ma se tasi Molimau i loʻu faitotoa ma ofoina mai Le Olomatamata ma le Ala Mai! Na ou taumafai e avatu se tālā ma ou fai atu ou te lē manao i mekasini. Na e faailoa mai tou te lē o ō mai e ao tupe. Na e faapea mai o loo outou faia se galuega e fesoasoani ai i tagata e faitau le Tusi Paia. Ou te lē mautinoa pe na ou tuua mekasini pe na faitau foi i ai. E ui i lea, ae na e totōina le fatu o le upu moni i loʻu olaga.

“I nai tausaga mulimuli ane na sau ai se tasi o Molimau, e igoa ia Gary i le fale o loʻu tinā a o oʻu iai. Na ou faamatala atu i ai lau asiasiga i nai tausaga ua tuanai. Na ma suesueina ma Gary le Tusi Paia i se vaitaimi umi ma na iu ina ou papatiso i le 1984. I le taimi nei ua ou aʻoaʻoina i laʻu fanau le upu moni e faatatau i le Malo o le Atua.

“Ou te mautinoa o loʻu olaga e na o se tasi mai le tele o olaga na e pāʻia i tausaga o lau auaunaga faamaoni. Ae peitai, e ala i lena agalelei, ua mafai ai ona e fesoasoani ia te aʻu ma loʻu aiga ina ia iloa le Atua Sili, o Ieova, ma lona Alo o Iesu Keriso. Ou te vaavaai atu ma le naunautai i le aso ou te toe vaai ai ia te oe i le faiga fou o mea, i le taimi o le a soloiesea ai e Ieova loimata uma i o tatou mata, ma o le a leai foi se toe oti.—Faaaliga 21:4.

“Ae o aʻu ma loʻu aiga, o se fiafiaga le mauaina o le avanoa ua tatou masani ai ma avea o se vaega o lau galuega talaʻi. Faafetai lava.

“Alofaaga faaleuso,

Peteru”

Na maliu Carol ia Mati 1996, ua atoa ai le ono masina talu ona maʻi, ae ua ia totōina le tele o fatu o le upu moni i tausaga e 35 a o avea ma se faievagelia maelega. Na ia aʻoaʻoina faapea e lē mailoa e se tasi pe fua mai afea se fatu, e ui ina mavae ni tausaga se tele.—Mataio 13:23.