Le Filemu Moni—Mai le ā le Puna?
“Ua faaiua e [Ieova] o taua e oo lava i tuluʻiga o le lalolagi.”—SALAMO 46:9.
1. O le ā le folafolaga ofoofogia o le filemu ua tatou maua i le valoaga a Isaia?
“O LE mea e tupu i le amiotonu o le manuia [“filemu,” NW] lea; e tupu mai foi i le amiotonu le filemu ma le saogalemu e faavavau. E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.” (Isaia 32:17, 18) Maeu se folafolaga matagofie! O se folafolaga o le filemu moni e aumaia e le Atua.
2, 3. Ia faamatala mai pe faapeī le filemu moni.
2 Ae, o le ā le filemu moni? Pe ua na ona uiga ea i le lē toe iai o ni taua? Pe ua na o se vaitaimi ea o loo sauniuni ai malo mo se isi taua o sosoo mai? Pe ua na o se miti ea le filemu moni? O fesili na o loo tatou manaomia ni o latou tali maufaatuatuaina. Muamua lava, o le filemu moni ua sili atu nai lo le na o se miti. Sa folafola e le Atua faapea o le a sili mamao atu le filemu nai lo se isi lava mea e mafai ona manatu i ai lenei lalolagi. (Isaia 64:4) E lē o se filemu mo na o ni nai tausaga pe i le na o ni faitau sefulu o tausaga. O se mea e tumau e faavavau! Ma e lē o se filemu mo na o ni tagata faapitoa—ae aofia ai le lagi ma le lalolagi, o agelu ma tagata. E oo atu i tagata o atunuu uma, o ituaiga uma o tupuaga o tagata, o gagana, ma lanu eseese. E leai ni tapulaa, leai ni tuaoi, ma ni lē taulau, e mafai ona aveesea le filemu moni.—Salamo 72:7, 8; Isaia 48:18.
3 O le filemu moni, o lona uiga e filemu i aso uma. O lona uiga e te maleifua mai i taeao taitasi e aunoa ma se mafaufau i taua, e lē popole i lou lumanai, i le lumanai o lau fanau, e oo foi i le lumanai o fanau a lau fanau. O lona uiga o se filemu atoatoa o le mafaufau. (Kolose 3:15) O lona uiga e lē toe iai ni soligatulafono, e lē toe iai ni faiga sauā, e lē toe iai ni aiga malepelepe, e lē toe iai ni tagata ua leai ni aiga e nonofo ai, e lē toe iai ni tagata e matelaina ma feoti i le mālūlū, ma e lē toe iai ni lagona mafatia ma le fiu. Ae sili atu ona lelei, o le a uiga le filemu mai le Atua i se lalolagi e aunoa ma ni maʻi, ni tiga, ni faanoanoaga, po o le oti. (Faaaliga 21:4) Maeu se faamoemoe mataina ua ia i tatou e olioli ai i le filemu moni e faavavau! Pe ua lē o le ituaiga ea lenei o filemu ma le fiafiaga o loo tatou moomoo uma i ai? Pe ua lē o le ituaiga ea lenei o filemu e tatau ona tatou tatalo ma taumafai ina ia maua?
O Taumafaiga Lē Taulau a Tagata
4. O ā taumafaiga mo le filemu ua faatino e malo, faatasi ai ma ā iuga?
4 Mo le tele o senituri, ua talanoaina ai e tagata ma malo le tulaga o le filemu, ua felafolafoai e uiga i le filemu, ua sainia le faitau selau o feagaiga o le filemu. O le ā le iuga? I tausaga e 80 ua tuanai atu, ua manino le aunoa o se vaitaimi na saʻoloto ai le malo po o ni vaega o tagata mai taua. Ua manino mai, ua lē maua le filemu e tagata. O le fesili la, Aisea ua lē taulau ai taumafaiga uma a le tagata ina ia faavaeina se filemu faavaomalo, ma aisea ua lē mafai ai e le tagata ona aumaia le filemu moni lea e tumau?
5. Aisea ua faaauau ai pea ona lē taulau taumafaiga a tagata mo le filemu?
5 O le tali faigofie lava, talu ai e lē o saili atu tagata i le puna tonu mo le filemu moni. Talu ai taaʻiga a Satani le Tiapolo, ua faavaeina ai e tagata faalapotopotoga ua lolo atu i o latou lava vaivaiga ma masei—o lo latou matapeapea ma le fiasili, lo latou tuinanau i le fia pule ma le fia lauiloa. Ua latou liliu atu i aʻoaʻoga maualuluga ma faavaeina ni faalapotopotoga ma faamaopoopoga mo suesuega atili, ae o nei mea uma ua na ona aumaia atili ai o pogai mo mafatiaga ma faatamaiaga. O le ā le puna ua tataʻi atu i ai manatu o tagata? O fea ua latou saili atu i ai?
6, 7. (a) O le ā le talaaga ua faia e Malo Sosoo lava ia? (e) O le ā le talaaga o Malo Aufaatasi?
6 I tuā i le 1919 na faamoemoe atu ai malo i Malo Sosoo mo le faavaeina o le filemu tumau. Na faaleaogaina lena faamoemoe i le 1935 ina ua vagaia e autau a Musolini le malo o Aitiope ma i le 1936 ina ua tau se taua i le va o tagata lava latou i Sepania. Na magoto ifo le faagaoioia o Malo Sosoo ina ua gāpā le Taua Lona Lua a le Lalolagi i le 1939. O le mea lea sa taʻua o le filemu e lei atoa se 20 tausaga le umi.
7 Ae faapefea i Malo Aufaatasi? Pe ua ia aumaia ea se faamoemoe moni o le filemu e faavavau i le lalolagi aoao? E matuā leai lava. E silia i le 150 taua ma fevesiaiga e faaaogā ai auupega ua tauina talu mai ona amata faagaoioia i le 1945! E lētioa ona faamatalaina Malo Aufaatasi e Gwynne Dyer, o se tagata mai Kanata e suesue i tulaga o taua ma mea e faapogaia ai, e faapea o “se asosi o tagata sa gāoi manu a ua suia e avea ma tagata tausi manu, ae ua lē o se faapotopotoga o ni tagata amio lelei,” ma o “se faalapotopotoga ua mātele i faaupuga ae leai ni gaoioiga aogā o faia.”—Faatusatusa i le Ieremia 6:14; 8:15.
8. E ui lava i a latou talanoaga o le filemu, ae o ā mea o loo faia e malo? (Isaia 59:8)
8 E ui lava i a latou talanoaga o le filemu, ae o loo faaauau pea e malo ona gaosia auupega fou. O atunuu o loo taulamua i fonotaga mo le filemu e masani o i latou lava foi na o loo taulamua i le fausiaina o auupega. O manuia tetele mai faiga faapisinisi i nei atunuu ua faateleina ai le fausiaina o auupega matautia e oti ai, e aofia ai maina e sili ona matautia e faapā i le laueleele lea ua fasiotia ai pe faaleagaina ai i tausaga taitasi tino o se toʻa 26,000 o tagata lautele o ē matutua ma tamaiti. O le matapeapea ma le faimea piopio o uunaiga malolosi na. O faiga faatogafalea ma tupe totogi faaālatua o vaega tāua na o fefaatauaiga o auupega faavaomalo. O nisi ʻau faipolotiki ua latou mauoa ai i lenei auala.
9, 10. O le ā ua mātauina e tagata popoto o le lalolagi e faatatau i taua ma taumafaiga a tagata?
9 Ia Tesema 1995, na talosagaina ai e Joseph Rotblat, o se tagata mai Polani e suesue i tulaga o le natura o mea ma o lē na mauaina le faailoga o le Nobel Peace Prize, ia malo uma ina ia faamutaina tauvaga o auupega o loo faia. Na ia faapea atu: “E na o le pau le auala e taofia mai ai [se tauvaga fou o auupega] o le matuā faamutaina lea o taua uma.” Pe e te manatu ea o se mea lenei e ono tupu? Mai le 1928 ma faasolo mai ai, e 62 malo na latou teena le toe faia o ni taua ina ia avea o se auala mo le foiaina o feeseeseaiga. Ae o le Taua Lona Lua a le Lalolagi na matuā faataitaia manino mai ai le lē aogā o le feagaiga tusitusia lea na fai.
10 O le mea moni, ua avea pea taua ma faasalavei i le ala o le talafaasolopito o le tagata. E pei ona tusi mai Gwynne Dyer, “o taua o se vaega autū lea i augatupulaga uma, ma ua iai sona talafaasolopito ua tutusa lelei le umi ma le umi o le iai o le tagata.” Ioe, o le mea moni lava, o augatupulaga ma emepaea taitasi sa iai ni o latou tagata taʻutaʻua i faiga faavaegaʻau, le iai pea o vaegaʻau, o a latou taua taʻutaʻua, o a latou aʻoga faavaegaʻau e lē masuia, ma a latou faaputuga tetele o auupega. Peitai ane, ua sili atu ona faailogaina lo tatou senituri i taua nai lo se isi lava senituri, e lē gata i mea ua faaleagaina ai, ae o ola foi ua faaumatia ai.
11. O le ā le vala autū ua lē amanaia e taʻitaʻi o le lalolagi i a latou sailiiliga mo le filemu?
11 Ua manino mai le lē amanaia e taʻitaʻi o le lalolagi o le atamai faavae o loo i le Ieremia 10:23: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” Pe a lē amanaiaina le Atua, e lē mafai ona iai se filemu moni. Po o nei ea la mea uma ua uiga ai faapea, e lē mafai ona toe alofia le iai o taua i se sosaiete o tagata o le malamalama? Po o lona uiga ea o le filemu—le filemu moni—ua na o se miti e lē mafai ona faataunuuina?
Le Pogai Autū
12, 13. (a) O le ā ua faaalia mai e le Tusi Paia e faatatau i le pogai autū, ma le lē vaaia, o taua? (e) Ua faapefea ona taumafai Satani ina ia aua neʻi uaʻi atu manatu o tagata i le vaifofo moni o faafitauli o le lalolagi?
12 Ina ia taliina na fesili, e manaomia ona tatou malamalama i pogai e māfua ai taua. Ua taʻua manino i le Tusi Paia e faapea o Satani le agelu fouvale, o ia o le uluai “fasioti tagata” ma le uluai “pepelo” ma “o le lalolagi uma o loo nofo toilalo i loo leaga.” (Ioane 8:44; 1 Ioane 5:19) O le ā ua ia faia e faatupu atili ai ana faufauga? Tatou te faitau ai i le 2 Korinito 4:3, 4: “Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le faatuatua e le atua o le lalolagi nei, ina neʻi pupula atu ia te i latou le malamalama o le tala lelei i le mamalu o Keriso, o ia foi o le faatusa o le Atua.” E faia e Satani so o se mea na te mafai ina ia aua ai neʻi uaʻi atu manatu o tagata i le Malo o le Atua o le vaifofo lea i faafitauli o le lalolagi. Na te faatauasoina ma faasese solo manatu o tagata e ala i mataupu fevaevaeai o le olaga lautele, o mataupu faapolotiki, ma mataupu faalotu, ina ia faafoliga mai ai nei mea e sili atu ona tāua nai lo o le pule a le Atua. O se tasi o faaaoaoga lata mai nei o le faatupulaia lea o faiga faalotonuu.
13 Ua faatupulaia e Satani le Tiapolo le lotonuu ma le lotoituaiga, le talitonuga e sili atu le isi nuu, le isi lanu, po o le isi ituaiga nai lo isi. O feitagaiga ua leva ona teuloto sa tau taofiofi mai i le tele o senituri, ua oo ina toe mapuna aʻe e uunaia ai le tele o taua ma fetauaiga. O Federico Mayor, o le faatonu aoao o le UNESCO, sa ia lapatai e faatatau i lenei faiga ua aliali mai, i lona faapea mai: “E oo lava i atunuu sa masani ona iai le faapalepale, ua amata nei ona matuā manino mai ai le tele o le fefefe i tagata ese, ma o faaupuga e faaalia ai le faaituʻau po o le faailoga tagata sa foliga mai o mea ua tuanai ae ua toe faalogoina pea lava pea.” O le ā le iuga? O fasiotigā tagata matautia i atunuu sa avea muamua ma Yugoslavia, ma le toto masaa i fasiotigā tagata i le va o ituaiga i Rwanda o nisi na o mea matautia e lua ua faaautū i ai tala o le lalolagi.
14. Ua faapefea ona faamatala mai e le Faaaliga 6:4 le ata o taua ma ona aafiaga i o tatou taimi?
14 Ua valoia mai i le Tusi Paia e faapea i le taimi o le iuga o lenei faiga o mea, o le a tamoʻe saoasaoa atu ai i le lalolagi atoa le solofanua lanu mūmū, o loo faatusaina i ai taua. Tatou te faitauina faapea le Faaaliga 6:4: “Ona alu atu lea o le isi solofanua mūmū; ua avatu foi le pule i lē o tietie ai na te aveeseina le filemu i le lalolagi, a e latou te fefasiai ai; ua avatu foi ia te ia le pelu tele.” Talu mai le 1914 ua tatou vaaia ai le ‘aveesea o le filemu’ e lenei tagata tietie solofanua faafaatusa, ma ua faaauau pea ona siitaua ma fetauai malo.
15, 16. (a) O le ā le vaega ua faia e lotu i taua ma fefasiotiaiga? (e) E faapeī le silafaga a Ieova e faatatau i mea ua faia e lotu?
15 O le mea ia aua neʻi faagaloina o le vaega ua faia e lotu i nei taua ma fefasiotiaiga. O le talaaga faamasaatoto o le tagata ua matuā māfua lava ona o taaʻiga taufaasese a lotu sese. Na tusi mai se faifeau Katoliko o Hans Küng e faapea: “E lē teena le manatu e faapea, sa faia ma o loo faia pea e [lotu] se aafiaga e sili ona leaga ma sili ona faatamaia ai. Ua tuuaia lotu i le tele o fevesiaiga i malo, o fetauaiga faamasaatoto, ioe o ‘taua faalelotu’; . . . ma ua faapena foi ona tuuaʻia mo taua uma e lua a le lalolagi.”
16 E faapeī le silafaga a Ieova le Atua e faatatau i le vaega ua faia e lotu sese i fasiotiga tagata ma taua? O le faamasinoga a le Atua i lotu sese, e pei ona faamauina i le Faaaliga 18:5 ua faapea mai: “Ua paʻi atu ana agasala i le lagi, ua manatua foi e le Atua ana amioleaga.” O le faifaimea leaga faatasi o lotu sese ma pule faapolotiki o le lalolagi ua iu atu ai i lena faamasaatoto, i lena anoanoai o agasala, lea ua lē mafai ona faagaloina e le Atua. Ua lē o toe mamao ona ia tafiesea atoatoa lea o lenei mea o loo faasalavei mai i le filemu moni.—Faaaliga 18:21.
Le Ala i le Filemu
17, 18. (a) Aisea ua lē na o se miti ai e lē moni le talitonu faapea e mafai ona iai se filemu tumau? (e) O le ā le mea ua uma ona faia e Ieova e faamautinoa ai o le a oo mai le filemu moni?
17 Pe afai ua lē mafai e tagata, e ala mai i faalapotopotoga e pei o Malo Aufaatasi, ona aumaia le filemu moni ma le saogalemu tumau, o le ā la le puna o le a oo mai ai le filemu moni, ma e faapefea? Pe ua na o se miti ea e lē moni le talitonu faapea e mafai ona iai se filemu tumau? E leai, pe afai tatou te liliu atu i le puna saʻo o le filemu. Ma o ai ia lena? Ua tali mai le Salamo 46:9 i le taʻu mai ia i tatou e faapea o Ieova “ua faaiua e ia o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foi e ia kariota i le afi.” Ma ua maeʻa ona amataina e Ieova le faagasologa e faaiuina ai taua ae faavae le filemu moni. E faapefea? E ala i le faanofotupuina o Keriso Iesu i lona nofoalii amiotonu o le Malo i le 1914, ma e ala i lona uunaia atili o le tulaga tau aʻoaʻoga sili mo le filemu i le talafaasolopito o le tagata. Ua faamautinoa mai i tatou e upu faavaloaga o le Isaia 54:13 e faapea: “E aʻoaʻoina lau fanau uma lava e Ieova; e tele foi le manuia o lau fanau.”
18 O lenei valoaga ua faamaonia mai ai le mataupu faavae o le pogai—ma lona aafiaga, o aafiaga uma lava e tatau ona iai sona pogai. I lenei mataupu, o aʻoaʻoga a Ieova—o le pogai—ua toe fuataʻiina ai tagata sa iai uiga fia fai taua i le avea ma tagata e alolofa i le filemu o ē ua iai i le filemu ma le Atua. O aafiaga, o le suia lea o le loto ua avea ai tagata ma ē alolofa i le filemu. O lenei aʻoaʻoga ua suia ai loto ma mafaufau o tagata ua oo nei foi ina salalau atu i le lalolagi aoao a o mulimuli atu le faitau miliona o tagata i le faaaoaoga a le “Alii o le filemu” o Iesu Keriso.—Isaia 9:6.
19. O le ā na aʻoaʻoina e Iesu e uiga i le filemu moni?
19 Ma o le ā na aʻoaʻoina e Iesu e uiga i le filemu moni? Sa ia fetalai e faatatau e lē na o le filemu i le va o malo ae o le filemu i le va o tagata i a latou faiā faapea foi le filemu o le loto e puna mai se loto fuatia ifo lelei. I le Ioane 14:27 (NW), ua tatou faitau ai i fetalaiga a Iesu i ona soo e faapea: “Ou te tuuina atu ia te outou le filemu, o loʻu filemu ou te avatu ai ia te outou. Ou te lē avatu ia te outou faapei ona avatu e le lalolagi. Aua le atuatuvale o outou loto, aua foi tou te matataʻu.” Sa faapefea ona ese le filemu a Iesu mai le filemu a le lalolagi?
20. O le ā le auala o le a aumaia ai e Iesu le filemu moni?
20 Muamua lava, o le filemu a Iesu sa fesootai lelei ma le feau e faatatau i lona Malo. Na ia silafia, o le faiga malo amiotonu faalelagi, ua faia aʻe ia Iesu ma pule lagolago e 144,000, o le a latou faaiuina taua ma ē o loo faatupuina. (Faaaliga 14:1, 3) Sa ia silafia o le a aumaia ai tulaga matagofie i se parataiso na ia ofoina atu i le pagota lea na maliu i ona autafa. Sa lei ofo atu e Iesu ia te ia se nofoaga i le Malo faalelagi, ae na ia fetalai atu: “E moni, ou te fai atu ia te oe i le asō, ta te faatasi ma oe i le Parataiso.”—Luka 23:43.
21, 22. (a) O le ā le faamoemoe ofoofogia ua aofia ai i le filemu moni? (e) O le ā e ao ona tatou faia ina ia tatou molimauina ai lena faamanuiaga?
21 Na silafia foi e Iesu o le a aumaia e lona Malo se faamafanafanaga ia i latou uma o loo mapuitiga o ē faaalia le faatuatua ia te ia. O lona filemu e aofia ai le faamoemoe ofoofogia ua faalaeiauina ai o le toetu. Ia manatua ana fetalaiga faalaeiau o loo maua i le Ioane 5:28, 29: “Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.”
22 Po o e nofo tatali atu ea mo lena taimi? Pe ua motusia ea la outou mafutaga ma nisi e pele ia te oe ona o le oti? Po o e moomoo ea i le toe fia vaai atu ia i latou? Ia talia la le filemu lea ua ofoina mai e Iesu. Ia ia te oe le faatuatua e pei o lea sa ia Mareta, le tuafafine o Lasalo, o lē na faapea mai ia Iesu: “Ua ou iloa e toe tu mai lava ia i le toe tu i le aso gataaga.” Ae mātau le tali faafiafia loto a Iesu ia Mareta: “O aʻu nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea?”—Ioane 11:24-26.
23. Aisea e manaomia tele ai le poto saʻo o le Afioga a le Atua i le mauaina o le filemu moni?
23 E mafai foi e oe ona talitonu i ai ma maua ai aogā mai lena folafolaga. E faapefea? E ala i le mauaina o le poto saʻo o le Afioga a le Atua. Mātau le auala na faamamafa ai e le aposetolo o Paulo le tāua o le poto saʻo: “O i maua foi ma te lei mapu ai lava i le tatalo mo outou, . . . ma te aioi atu foi ina ia atoatoa ona outou iloa lelei [“maua le poto saʻo,” NW] o lona finagalo i le poto uma atoa ma le mafaufau faaleagaga; ia outou savavali e tusa ma le Alii, ina ia fiafia mai o ia ia te outou i mea uma, ma ia outou fua mai galuega lelei uma lava, ma ia tupu pea lo outou iloa lelei [“poto saʻo,” NW] o le Atua.” (Kolose 1:9, 10) O lenei poto saʻo o le a faatalitonuina ai oe o Ieova le Atua o le puna lea o le filemu moni. O le a taʻu atu ai foi ia te oe le mea e ao ona e faia nei ina ia mafai ona e aufaatasi atu ma le faisalamo i le faapea atu: “Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.”—Salamo 4:8.
Pe Mafai Ona E Faamatala?
◻ Aisea ua faaauau ai pea ona lē taulau taumafaiga a tagata mo le filemu?
◻ O le ā le pogai autū o taua?
◻ Aisea ua lē avea ai le filemu tumau o se miti e lē moni?
◻ O le ā le puna o le filemu moni?
[Ata i le itulau 8]
E lē o se miti le filemu moni. O le folafolaga a le Atua
[Ata i le itulau 10]
Talu mai le 1914 ua aveesea ai e lē tietie i le solofanua faafaatusa o le solo- fanua mūmū le filemu mai le lalolagi
[Ata i le itulau 11]
Pe mafai e lotu ma Malo Aufaatasi ona aumaia le filemu?
[Ē Ana le Ata]
UN photo