O Faaipoipoga e Viia ai Ieova

O le mataupu o i lalo e faatatau i faaipoipoga Kerisiano na uluai saunia mai i Aitiope ina ia tuuina atu ai se fesoasoani aogā i le gagana Amharic mo le toatele o i lena atunuu o ē e lei leva tele ona avea ma Molimau a Ieova. O loo faatatau i nisi o agaifanua ma tu e masani ai i lea vaipanoa atonu e ese mai aganuu masani i le mea o e soifua ai. O le a e naunau fiafia e iloa le eseesega. Ae i le taimi foi e tasi, ua aumaia e le mataupu se fautuaga paleni faale-Tusi Paia o le a e iloa e talafeagai ai e tusa lava pe e ese tu e masani ai i lou vaipanoa.

“O FAAIPOIPOGA Faa-Kerisiano e Aumaia ai le Olioli” o le matua lena o se mataupu matagofie mo suesuega i le Watchtower o Aperila 15, 1984. O le mataupu e sosoo ai o lena lomiga sa faapea lona matua: “Ia Sailia Faafiafiaga Paleni i ‘Aiga o Faaipoipoga.” (Mo se tasi o loo fuafua e faaipoipo, o loo iai nisi fautuaga atamai i le tusi, Faia o Lou Olaga Faaleaga ia Fiafia, mataupu 2, ma le tusi Lou Talavou—Mauaina mai ai Aogā Silisili, mataupu 19 ma le 20.)a E toatele ua avea ma Molimau a Ieova talu ona aliai mai na mataupu, o lea tatou te mananao ai e toe autalu nisi o faamatalaga e fetaui tonu lava i lo tatou tulaga, faapea foi ma nisi o manatu autū talafeagai o le a fesoasoani ia i tatou ina ia avea ai faaipoipoga o ni faatasiga e viia ai Ieova, o Lē na Amataina faaipoipoga.

O se fesili atonu e muai talanoaina o lenei, O le ā le taimi e tatau ona faia ai se faaipoipoga? Pe tatau ea i le aso o le faaipoipoga ona fuafuaina i ni aso o le vaitau o faaipoipoga e tusa ai ma le aganuu masani a lou atunuu? O le talitonuga masani a nisi atunuu e faapea, so o se faaipoipoga lava e faia i se isi taimi o le tausaga o le a lē iu manuia. O se uputuu lenei e leai sona faavae, auā o le toatele lava o ulugalii faaipoipo o loo auauna fiafia ma autasi ia Ieova, sa lei faaipoipo i latou i le vaitau e tusa ai o tu masani faaleaganuu. Tatou te lē talitonu i ni laki lelei po o ni laki leaga. (Isaia 65:11; Kolose 2:8) O le a tatou lē fesoasoani i o tatou tauaiga lē talitonu ina ia latou iloa le eseesega o le mea moni ma le mea pepelo, pe afai tatou te faatulaga le aso o se faaipoipoga e tusa ai ma a latou uputuu. O le mea moni lava, e mafai ona faaipoipo se Kerisiano i so o se masina lava.

Pe a fuafuaina se lauga o le faaipoipoga pe a uma se sauniga talafeagai faalemalo, o se mea poto pe a lē tele ni aso e va aʻi nei fuafuaga e lua. Pe afai e mananao le ulugalii e faia le faaipoipoga i le Maota o le Malo, e tatau ona lava se taimi la te muai faatoai atu ai i toeaina o le faapotopotoga ina ia talosagaina le faaaogaina o le maota. O le a faamautinoa e toeaina o le faapotopotoga e faapea, o fuafuaga uma mo le sauniga o le a tuua ai i latou ma ni loto fuatia ifo mamā. E tatau ona fuafua le taimi o le lauga o le faaipoipoga ia lē faalavelavea ai so o se gaoioiga a le faapotopotoga. O le uso lea ua filifilia e faia le lauga o le faaipoipoga o le a muamua ona latou feiloai ma le alii ma le tamaitai o le a faaipoipo, ina ia avatu i ai ni fautuaga aogā ma ia faamautinoa e lē o iai ni mea e ono taofia mai ai le faaipoipoga i le tulaga tau amioga mamā po o le tulafono, ma o loo ia ioeina foi ni fuafuaga mo se faatasitasiga mo faafiafiaga o le a sosoo ai. E tatau ona tusa ma le ʻafa itula le umi o le lauga o le faaipoipoga ma ia avatua i se uiga faaaloalo, e faamamafa ai vala faaleagaga. E mautinoa lava e sili atu ona tāua le lauga o le faaipoipoga nai lo le ʻaiga lea e ono sosoo mai.

O se faaipoipoga faa-Kerisiano o se avanoa lelei lea e faaali atu ai o tatou “e le ni o le lalolagi.” (Ioane 17:14; Iakopo 1:27) E tatau ona tumatilatila mai lo tatou maopoopo. O le uiga o lenei mea, o le a tatou taunuu i le taimi tonu nai lo le fiu o tagata e faatali, e mafai ona faalavelavea ai fuafuaga a le faapotopotoga. O se mea lenei e ao ona matuā manatunatu mamafa i ai le tamaitai faaipoipo, talu ai atonu o le a uunaia o ia e ona tauaiga faalelalolagi ina ia faifaiaga—e peiseai o loo faaalialia ai sona tāua. O le tausisi i le taimi tonu e mafai ai e se tuafafine taʻumatuaina faa-Kerisiano ona faaalia atu e tāua ia te ia uiga faaleagaga, e pei o le loto maulalo ma le magafagafa! E lē gata i lea, pe a valaaulia se tagata pueata na te pueina le sauniga, e tāua tele le maopoopo. E lelei pe a talosagaina le tagata pueata [pe afai o se tama] ina ia laei lelei mai i se peleue, se fusiua, ma se ofuvae vaeuumi e talafeagai, ma ia lē faalavelave o ia i le lauga pe a tapue ana ata. E lē tatau ona pueina ni ata a o fai le tatalo. O lo tatou maopoopo o le a viia ai Ieova ma avatu ai se molimau lelei. E lē manaomia ona taumafai e faafetaui atu i teuga o faaipoipoga a le lalolagi lea o le a misia ai le uiga moni o le faatasiga.

O le ʻaiga e lē o se manaoga lea ina ia taulau manuia ai se faaipoipoga, ae peitai e leai se mea o teena ai e le Tusi Paia se faatasiga fiafia faapena. Peitai, o lena potopotoga mo Kerisiano moni e ao ona ese mai ʻaiga faalelalolagi lea e maitaulia i le soona faatetele ma sasalu naʻuā, le inu tele i le ʻava, le soona ʻai, le matuā leotetele o musika, o siva lē talafeagai, pe oo lava foi ina fai ai ni misa. Ua faavasega e le Tusi Paia “poula” o galuega a le tino. (Kalatia 5:21) E sili atu ona faigofie ona puleaina lelei pe a lē o se faatasitasiga ua toatele naʻuā. E lē manaomia ona faia faapitoa se faleie ina ia faia ai ni tu masani faaleaganuu ua masani ai. Ae a mananao nisi e fai se faleie ia lava ai le avanoa pe ona o le tau, o se mataupu totino lena.

Ua faaalia i mea tutupu e faapea, o se faiga lelei e faatapulaa mai ai le aofai o malo valaaulia o le tusi atu lea o ni tusi valaaulia. E sili ona atamai pe a valaaulia taitoatasi nai lo le valaaulia atoa o faapotopotoga, ma pe afai o i tatou o ni Kerisiano maopoopo, e tatau ona tatou faaaloalo i lena aofaiga faatapulaa. O valaaulia tusitusia e fesoasoani foi ia i tatou ina ia alofia ai se maasiasi pe a teʻi ua auai atu se tagata faateʻaina i le ʻaiga, auā a tupu lena mea, atonu e toatele ni uso ma ni tuafāfine o le a filifili e toe tuumuli ese. (1 Korinito 5:9-11) Pe afai e valaaulia e le ulugalii ni o la tauaiga po o uo lē talitonu, e mautinoa e tatau ona faalaiti le aofai o na valaaulia, ina ia sili ai ona faatāuaina atu i latou o ‘ē aiga ia i tatou i le faatuatua.’ (Kalatia 6:10) Ua filifili nisi e valaaulia a latou uo faalelalolagi po o tauaiga lē talitonu mo na o le lauga o le faaipoipoga ae lē o le ʻaiga. Aisea? Ioe, ua iai ni tulaga ua faatupu ai e tauaiga faalelalolagi ni tulaga e maasiasi ai i se ʻaiga o se faaipoipoga, lea na lagona ai e le toatele o uso ma tuafāfine ua lē fia nonofo ai. O nisi ulugalii ua latou filifili e faia na o sina ʻaiga e faalaitiiti mo na o tagata lava o o la aiga e vavalalata i ai, ma a la uo faa-Kerisiano.

E tusa ai ma le Ioane 2:8, 9, pe afai o le a faia se ʻaiga, e tāua le filifilia o se “pule i le tausamaaga.” O le a manao le alii faaipoipo e filifilia se Kerisiano maufaatuatuaina o lē o le a ia faamautinoa o loo tausisia le maopoopo ma tapulaa maualuluga uma. Pe a aumai e le au valaaulia ni mea alofa, e tatau ona faia lenei mea e aunoa ma le “faalialia.” (1 Ioane 2:16) E mafai ona maua le fiafia i musika e aunoa ma le pisipisia i ni pese lē lelei, ni leo e soona leotetele po o ni fatuga e matuā lē logoleleia. E toatele ua latou iloa e sili atu ona lelei le iai o se toeaina e faalogologo muamua i pese ia o le a tātā. E mafai foi e siva ona maileia ai, auā o le tele o siva masani faaleaganuu ua puna mai siva o loo faaaʻe mai e tupulaga ma ua faamatilatila ai faalogona faaleituaiga e lē talafeagai. O le taimi “e tipi ai le keke ma tufa atu ai ma le uaina” o nisi taimi o se faailo lea mo tagata o le lalolagi e faia ai ni amioga lē talafeagai. O le mea moni, ua filifili e le toatele o ulugalii Kerisiano ia matuā lē iai lava se ava malosi i ʻaiga o faaipoipoga, ma ua alofia ai faafitauli.

Talu ai tatou te mananao e viia Ieova, o le a tatou alofia ai ni faaaliga faalialia vale e tataʻi mai ai ni manatu ia i tatou lava. E oo lava i tusi a le lalolagi ua latou teena le agaga ua taatele o le fia faalialiavale. Pagā se valea mo se ulugalii le oo ina nofoaitalafu ona o le faia o se faaipoipoga faalialia vale ae iu ai ina mafatia mo le tele o tausaga i le taumafai e tau totogi tupe na faaalu i lena aso e tasi! O le mea moni, so o se ofu lava e laeiina i lena faatasiga e tatau ona onomea ma fetaui lelei, e talafeagai ma se tagata o loo faapea mai o loo faaaloalo i le Atua. (1 Timoteo 2:9, 10) I le mataupu, “E Tatau i Faaipoipoga Faa-Kerisiano Ona Atagia Mai ai le Magafagafa,” i le Watchtower o Ianuari 15, 1969, ua taʻua ai faamatalaga nei e faatatau i le auala e laei ai:

“O le faaipoipoga a se tasi o se faatasiga faapitoa, e masani la ona faamautinoa ua manaia ma aulelei foliga mai. Peitai e lē o le uiga o lenei mea faapea e tatau i lea tagata ona laeiina se ituaiga faapitoa o ofu faaipoipo po o se suti [mo le alii faaipoipo]. E lelei i lea tagata ona manatunatu i ituaiga o laei o loo faia e le atunuu, o tupe e alu ai ma lagona totino i ai. . . . E ui i lea, pe talafeagai ea ona faatau se ofu taugata ae faapogai ai se avega mamafa tau tupe mo i laʻua po o isi? . . . O nisi tamaitai faaipoipo ua fiafia e faaaogā se ofu faaipoipo o se uo pele po o se tauaiga. O isi ua faamalieina pe a suʻi e i latou lava o latou ofu faaipoipo, atonu i se fua e mafai ai ona faaaogā lea ofu mo nisi faatasiga i le lumanai. Ma e talafeagai atoatoa foi pe a faaipoipo se ulugalii i ni o la laei mananaia e masani lava ona ofu . . . O isi atonu e mafai ona la faia se faaipoipoga telē ae ua faanaunau i laʻua lava e ‘faalaitiiti le la faaipoipoga’ ona o le tulaga faigata ua iai aso.”

E faapena foi, i le solo o le faaipoipoga (o aumeamamae a le alii ma aumeamamae a le tamaitai) ona lē manaomia ona faatoatele. O le a lē mananao foi e soona tataʻi atu ni manatu ia i latou i o latou ofu ma gaoioiga. E ui e mafai ona faataga se tagata faateʻaina e auai atu i le lauga i le Maota o le Malo, ae ua faapea mai le Watchtower o Aperila 15, 1984: “O le a lē talafeagai ona iai i le solo o le faaipoipoga ni tagata o loo faateʻaina po o nisi o loo feteenai o latou olaga matagā o loo ola ai ma mataupu silisili o le Tusi Paia.”

E ui lava sa auai atu Iesu i se faaipoipoga, ae lē mafai ona tatou mafaufauina sona faatagaina o ni tu masani o le iai o ni solo uumi o taavale e faataamilomilo solo i le taulaga ma soona faaʻeʻe solo pu; ua oo lava ina faasala e leoleo nisi avetaavale mo le soona faaʻeʻe o a latou pu i solo o faaipoipoga. (Tagai i le Mataio 22:21.) I se aotelega la, nai lo le faataitai atu i le faalialia po o gaoioiga ua masani ai tagata o atunuu, ae ao i Kerisiano ona latou faaalia le atamai o loo iai faatasi ma le onomea.—Faataoto 11:2.

Ae faapefea le auai atu i ni faaipoipoga a tuaoi, ni uo faalelalolagi i le galuega, po o ni tauaiga ma ni uo e vavamamao sootaga? E tatau i Kerisiano taitoatasi ona filifili i lenei mea. E lelei ona teu i mafaufau faapea, e tāua tele o tatou taimi, talu ai tatou te manaomia le taimi mo la tatou faiva, o a tatou suesuega totino, ma isi fuafuaga a le aiga ma le faapotopotoga. (Efeso 5:15, 16) I faaiuga o vaiaso, e iai a tatou sauniga ma le auaunaga i le fanua tatou te lē fia misia. (Eperu 10:24, 25) O le taimi e fai ai le tele o faaipoipoga e feteenai ma taimi o fonotaga po o ni fuafuaga faapitoa mo le auaunaga i le fanua, po o ni fuafuaga e fesootai atu i le Talisuaga Afiafi a le Alii. E lē tatau ona tatou tosina ese mai le faia o na lava fuafuaga faapitoa o loo faapea foi ona faia e o tatou uso i le lalolagi aoao ina ia auai atu i le Talisuaga Afiafi a le Alii. A o lei mauaina le poto o le upu moni, sa tatou faaaluina ai le tele o le taimi ma tagata o le lalolagi, atonu i ni mea sa lē viia ai le Atua. (1 Peteru 4:3, 4) I le taimi nei, ua ese mea o loo tatou faamuamuaina. E mafai lava ona tatou faaoo atu ni moomooga lelei mo se ulugalii o le lalolagi e ala i le auina atu i ai o se tusi pe asiasi puupuu atu i ai i se isi aso. O nisi ua latou faaaogā na taimi e avatu ai se molimau, e tufa atu i ai nisi o mau o loo talafeagai ma ulugalii fou.

O se faaipoipoga e pulea ai e vala faaleagaga ni ala faalelalolagi, o le a viia moni ai lava Ieova. E ala i le faamautinoa o loo latou vavae ese mai le lalolagi ma ana uputuu ma faiga soonafai, e ala i le lē faalavelaveina ai o gaoioiga masani faatiokarate, ma e ala i le faaalia ai o uiga onomea nai lo faiga faalialiavale, o le a olioli ai Kerisiano i lena faatasiga. E lē gata i lea, o le a mafai ai ona latou toe tomānatu i le faatasiga ma se loto fuatia ifo lelei ma ni manatunatuga fiafia. I le faaalia o le atamai ma le fuafua lelei, tau ina ia avea a tatou faaipoipoga uma faa-Kerisiano e avatu ai se molimau i tagata loto faamaoni o loo matamata mai.

[Faaopoopoga i lalo]

[Ata i le itulau 24]

E lē faataitai atu ma le faalialia Kerisiano i tu masani uma o faaipoipoga i o latou atunuu