Faamaoni i se Lalolagi e Lē Lelei Atoatoa

“OU TE le faia o le mea lelei ou te loto i ai, a o le mea leaga ou te le loto i ai, o le mea lea ou te faia.” O e iloa e moni lena manatu e tusa ai ma lou tulaga? Ia lototele, auā o le faafitauli foi lena na oo i le aposetolo o Paulo; ae peitai, o ia o se tagata na iloga i le faamaoni faa-Kerisiano. Po ua lē feteenai ea lenei mea? I lana tusi i Kerisiano i Roma, na iloaina ai e Paulo le faafitauli: “Afai foi ou te faia le mea ou te le loto i ai, ua le o aʻu e toe faia, a o le agasala o loo nofo i totonu ia te au.” O le ā le agasala ua ia faasino atu i ai, ma na faapefea ona ia manumalo ai ma avea ai o ia o se tagata faamaoni?—Roma 7:19, 20.

I le tau amatamataga o lana tusi, na tusi ai Paulo e faapea: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” O le “tagata e toatasi” o Atamu lea. (Roma 5:12, 14) O le agasala a Atamu—le agasala a le uluai tagata, o Atamu—na faapogaia ona ua tuufaasolo mai i le lē lelei atoatoa i le aiga faaletagata ma o se mafuaaga autū lea ua avea ai o se luitau e matuā faigata ona tausisia le faamaoni.

O le manatu o Paulo “i le uluai agasala,” e pei ona muai taʻua ai, e lē o talia e le lautele i aso nei, ona ua teena e aʻoga faafaifeau le faamatalaga a le Tusi Paia e uiga i le foafoaga ae talia le aʻoaʻoga i le evolusione. Ua faapea mai se tasi tagata fai manatu i aso nei e uiga i le Roma 5:12-14: “Ua lafoai e tagata popoto le vaega atoa lea.” Ae peitai, i le selau tausaga ua mavae, na faamatala maumauai mai ai e le au fai manatu o le Tusi Paia e faapea, “ina ua agasala Atamu . . . na ia faapipisi mai ai lena agasala ma ona iuga i ana fanau uma lava.”a

Leiloa le Faamaoni i le Amataga

E pei lava ona teena e le toatele i aso nei le iai o le uluai tagata o Atamu, ua faapena foi ona teena le iai o Satani le Tiapolo e faapea o se tala fatu po o ni tala faafagogo.b Ae e leai se pule e sili atu ia Iesu Keriso ua faailoaina mai ia i tatou e faapea o lenei peresona o Satani, “e lei tumau ia i le upu moni,” o se isi faaupuga, sa lei maufaatuatuaina o ia. (Ioane 8:44) Ma o le uunaiga a Satani na ala ai ona fouvale Atamu ma lana avā o Eva ia Ieova, ma lafoaia ai lo la faamaoni i lalo o tofotofoga.—Kenese 3:1-19.

Ona o i tatou uma e tupuga mai ia Atamu, ua tuufaasolo mai ai ia i tatou uma le faanaunauga i le agasala. Ua faapea mai le tagata poto o Solomona: “E leai lava se tagata amiotonu i le lalolagi, o le na te faia amio lelei, ma le le agasala.” (Failauga 7:20) Ae e mafai lava ona maufaatuatuaina se tagata. E mafai faapefea lenei mea? Auā e lē tau manaomia ona lelei atoatoa se tagata lelei ina ia tausisia ai le faamaoni.

Le Faavae o le Faamaoni

Sa faia e le tupu o Tavita o Isaraelu le tele o mea sese, e aofia ai ma le mea moni e uiga i lana faiā mulilua ma Patisepa. (2 Samuelu 11:1-27) O le tele o mea na lē taulau ai Tavita, ua faaalia ai na matuā mamao lava o ia mai le lelei atoatoa. O le ā la na silafia e Ieova i lea tagata? I le fetalai atu i le atalii o Tavita o Solomona, na faapea atu ai Ieova: “Ia e savali i oʻu luma, e pei ona savali o lou tamā o Tavita, ma le loto faamaoni ma le amio saʻo.” (1 Tupu 9:4, NW) E ui i le tele o ana mea sese na fai, ae sa silafia e Ieova le faavae o le maufaatuatuaina o le faamaoni o Tavita. Aisea?

Na avatu e Tavita le tali ina ua ia taʻu atu ia Solomona: “E suesue e Ieova o loto uma, ma ua silafia o mafaufau uma o manatu.” (1 Nofoaiga a Tupu 28:9) Sa faia e Tavita mea sese, ae sa loto maulalo o ia, ma sa ia manao e faia le mea e tonu. E na te talia pea ma le maumauai aoaiga ma faasaʻoga—o le mea moni na ia talosaga atu mo na mea. O lana talosaga e faapea: “Ieova e, ia e suesue ia te au, ma tofotofo ia te au; ia e faamamā i oʻu manatu ma loʻu loto.” (Salamo 26:2) Ma o le mea moni, sa faamamāina Tavita. Mo se faaaoaoga, o aafiaga na iu i ai ona o lana agasala ma Patisepa, sa iai pea seia oo i le iuga o lona soifua. Ae sa lei taumafai lava Tavita e taʻutonuina ana mea sese na faia. (2 Samuelu 12:1-12) O le mea e sili ona tāua, e lei liliu ese lava o ia mai le tapuaiga moni. Ona o lenei mea, ma ona o le loto maulalo faamaoni ma le salamō moni o Tavita, na nofo sauni ai Ieova e faamagalo ana agasala ma talia o ia o se tagata faamaoni.—Tagai foi i le Salamo 51.

Faamaoni i Lalo o Tofotofoga

Na tofotofoina Iesu e Satani le Tiapolo i se taumafaiga ia lafoaia lona faamaoni. Sa tatau ona ia tausia lona faamaoni i tulaga faigata ma mafatiaga, pe a faatusatusa atu ia Atamu, le tagata lelei atoatoa, o lē na tofotofoina lona usiusitai o se tagata lelei atoatoa i le na o le faatonuina ina ia usitaia se tulafono tauatua. E lē gata i lea, sa mafatia foi Iesu i lona silafia e faapea, o lona faamaoni, o loo faalagolago i ai le faaolataga o le aiga faaletagata.—Eperu 5:8, 9.

Sa maumauai Satani ina ia lepetia le faamaoni o Iesu, i lona faalatalata atu lea ia Iesu a o iai i lona tulaga matuā sili ona vaivai—ina ua mavae le 40 aso na iai o ia i le vao e mafaufau ma anapogi ai. E faatolu ona ia tofotofoina Iesu—ina ia faaliu areto maa, ina ia oso ifo mai luga o le tumutumu o le malumalu, i le manatu e faapea o le a fesoasoani mai agelu e laveai ia te ia ma i lea, o le a avatua ai se faailoga faavavega e faamaonia ai lona tulaga faa-Mesia; ma ia talia le avea ma pule i malo uma o lenei lalolagi i le tau lava ina “faapaʻū e ifo” tasi atu ia Satani. Ae na teena e Iesu ia faaosoosoga taitasi, i le tausia o lona faamaoni ia Ieova.—Mataio 4:1-11; Luka 4:1-13.

Le Faamaoni o Iopu

Ua lauiloa le tumau o Iopu i le tausia o lona faamaoni i lalo o tofotofoga. O le mea e malie ai, e lei iloa e Iopu le mafuaaga ua oo mai ai mala ia te ia. Na te lei iloa ua tuuaia o ia e Satani i le faia o ni gaoioiga sese, i le tuuaia e faapea, e ala ona auauna Iopu i le Atua ona o ni mafuaaga manatu faapito ma faapea mai, ina ia faasaoina lona ola, o le a loto atu Iopu e lafoaia lona lava faamaoni. Na faataga e le Atua mea matuitui e oo ia Iopu ina ia faaalia ai le sese o Satani.—Iopu 1:6-12; 2:1-8.

Na oo atu ai ma uo pepelo e toatolu i le mea na tupu. Na latou suiseseina ma le loto i ai tapulaa ma fuafuaga a le Atua. E oo lava i le avā a Iopu sa lei mafai ona ia malamalama i le mataupu, na lē taulau ona ia faamalosiau atu i lana tane i le taimi ua matuā mafatia ai. (Iopu 2:9-13) Ae sa tumau pea Iopu. “Seia oo lava i loʻu oti ou te le faateaina lava laʻu amio sao. Ou te taofimauina laʻu amiotonu, ou te le tuua lava; e le faaleagaina aʻu i loʻu loto i oʻu aso uma.”—Iopu 27:5, 6.

O le faaaoaoga sili ona lelei a Iopu, faatasi ma le faamaoni o le toatele o isi tane ma fafine faatuatua, e pei ona faamauina i le Tusi Paia, ua faamaonia ai le pepelo o Satani.

Faamaoni ma le Faiva Faa-Kerisiano

Po o le faamaoni o se uiga e faatāuaina e Ieova ina ia faamalieina ai tau o ia lava? E leai. O le faamaoni e iai sona uiga tāua mo i tatou o tagata. Sa faia mo lo tatou lelei o lea na apoapoai mai ai Iesu ia i tatou ina ia ‘alolofa ia Ieova lo tatou Atua ma o tatou loto atoa ma o tatou tagata atoa, ma o tatou mafaufau atoa.’ E moni “o le poloaiga muamua lena ma le sili,” ma e mafai e se tamaloa, fafine, po o se tamaitiiti faamaoni ona usitaia. (Mataio 22:36-38) O ā mea e aafia ai, ma o ā ni taui?

O se tagata faamaoni e mafai ona maufaatuatuaina, e le na o ona uso faaletagata, ae sili ona tāua o le maufaatuatuaina e le Atua. O lona loto mamā e mafai ona vaaia i ana gaoioiga; e lē faaʻoleʻole. E lē faitogafiti pe faapiopio. Ua faapea ona faamatala mai e le aposetolo o Paulo: “A ua matou lafoai mea lilo e masiasi ai, e le o savavali ma le amio pepelo, e le o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni.”—2 Korinito 4:2.

Ia mātau, ua taʻua e Paulo uiga e aafia ai i le faiva faa-Kerisiano. E mafai faapefea e se faifeau Kerisiano ona auauna i isi pe afai e lē mamā ona lima, pe afai e lē o ia o se tagata faamaoni? Ua faaalia manino lenei manatu i le faauluuluga o le pulega o le lotu Aialani lea na faamavae talu ai nei. E tusa ai ma le faamatalaga a le nusipepa o le Independent, na ioe o ia e faapea, na ia “faatagaina le patele lea sa faia faiga faaleituaiga i tamaiti e galulue pea ma tamaiti ae ua leva ona iloa lona faaleagaina o tamaiti.” Ua faapea mai le faamatalaga, e sili atu i le 24 tausaga o ia faaleagaina tamaiti. Na faafalepuipuiina le patele mo le fa tausaga, ae seʻi manatu i mafatiaga na oo i tamaiti i na tausaga e tele ona o le leai o se faamaoni o lona pule e faia le mea sa tatau ona fai!

Faamaoni—Taui e Maua Mai Ai

O le aposetolo o Ioane, sa avea o se tagata e lē fefe. Ona o lo la maelega aasa, na taʻua ai e Iesu o ia ma lona uso o Iakopo o “Atalii o le Faititili.” (Mareko 3:17) Ona o se tagata e iloga lona faamaoni, na faamatala atu ai e Ioane faapea ma Peteru i taʻitaʻi o Iutaia, e ‘lē mafai ona lē tautala’ o ia e uiga i mea na ia vaai ma faalogo i ai a o faatasi o ia ma Iesu. O Ioane foi o se tasi o aposetolo na faapea mai: “E tusa ona sili o lo matou anaana i le Atua i lo matou anaana i tagata.”—Galuega 4:19, 20; 5:27-32.

E foliga mai ina ua oo le matua o Ioane i le 90 ma ona tupu o ona tausaga, na faaaunuua ai o ia i le Motu o Patamo “ona o le tautala atu i le afioga a le Atua ma le mau ia Iesu.” (Faaaliga 1:9, NW) Ona o lona tulaga matua, atonu na manatu ai o ia e faapea, ua faaiuina lana faiva. Ae e na o se tagata faamaoni e pei o ia e mafai ona maufaatuatuaina e tuuina atu i ai le tofiga e tusia ia vaaiga faafiafia loto o le Faaaliga. Sa faamaoni Ioane i le faataunuuina o lenei tofiga. Maeu se faaeaga mo ia! Ma sa iai nisi faaeaga atili na oo i ai mulimuli ane. Atonu i le itumalo o Efeso, na ia tusia mulimuli ane ai lana Evagelia ma tusi e tolu. Maeu ni faaeaga sili ua faapaleina i le 70 tausaga o tumau i le tausia o le faamaoni i le auaunaga!

I le avea o se tagata e maufaatuatuaina i le tulaga lautele, e maua ai le matuā loto malie. O le maufaatuatuaina i le silafaga a le Atua, e maua ai taui e tumau e faavavau. I aso nei, ua nofo sauni ai “se motu o tagata e toatele” o ē tapuai faamaoni e ulu atu i le lalolagi fou o le filemu ma le maopoopo, faatasi ma le faamoemoe i le ola e faavavau. (Faaaliga 7:9) O le faamaoni i mataupu e matuā tāua tau amio ma le tapuaiga, e tatau ona faatumauina, e ui lava i tofotofoga mai lenei faiga o mea ma le tele o mea faigata ua aumaia e Satani i auauna a le Atua. Ia mautinoa, o le mana mai ia Ieova, e mafai ai ona taulau manuia!—Filipi 4:13.

I le talanoa e uiga i le taimi nei ma le lumanai, ua toe faamautinoa mai ai e le faisalamo o Tavita ia i tatou uma i lona faapea atu i se tatalo e faafetai ai ia Ieova: “A o aʻu nei, e te taofia aʻu i luga i laʻu amio sao; e te faatuina foi aʻu i ou luma e faavavau. Ia faafetaia Ieova, . . . Amene ma Amene.”—Salamo 41:12, 13.

[Faaopoopoga i lalo]

[Ata i le itulau 4]

E ui i ana mea sese, ae sa faamaonia le maufaatuatuaina o Tavita

[Ata i le itulau 5]

Na tuua e Iesu mo i tatou se faaaoaoga aupito sili ona lelei o le maufaatuatuaina

[Ata i le itulau 7]

O le maufaatuatuaina e maua ai le loto malie sili