‘Tatou te Manaomia ni Tagata Faamaoni’

O LE faamaoni ua seāseā ona maua i le lalolagi i aso nei. Ae peitai, o se manaoga autū lea mo Kerisiano. Na tusi Paulo e faapea: “O loo loto i matou e amio lelei [“faamaoni,” NW] i mea uma lava.” (Eperu 13:18) O le faanaunauga lea sa ia Wilma, o se tasi o Molimau a Ieova i Faenza, i Italia.

Na faamatala e le nusipepa o le Il Resto del Carlino e faapea ina ua ia mauaina se ato tupe lea na iai se tupe tele i fafo o se faleoloa i lona aai, na ia avatuina “vave loa” i leoleo ina ia mafai ona toe faafoi atu i lē ana le ato tupe.

Ina ua faalogo le pulenuu i lenei mea, na ia avatu loa se tamai tusi faafetai ia Wilma. Na ia tusi atu faapea: “E fai aʻu ma sui o le aai, ou te matuā faafetai atu ai ia te oe mo lau gaoioiga lelei. E manaomia e lo tatou aai lauiloa o Faenza ni tagata lelei ma faamaoni.”

Pe e iloa e tagata a tatou galuega lelei pe leai, e tatau ona tatou taumafai pea e faamaoni. E pei ona faalaeiau mai le Tusi Paia, “o loo tatou taumafai e faia mea e tonu, e lē na o luma o le Atua, ae atoa ma luma o tagata.”—2 Korinito 8:21, The Jerusalem Bible.