Faailoaina Mai Le Ituaiga Moni o Avefeau

“O aʻu . . . o Lē o loo faamauina le tonu o le upu a lana auauna, ma o Lē na te faataunuuina atoatoa le pule a ana lava avefeau.”—ISAIA 44:25, 26, NW.

1. E faapefea ona faailoaina mai e Ieova le ituaiga o avefeau moni, ae ua faapefea ona ia faaalialia mai avefeau pepelo?

O IEOVA LE ATUA o Lē Sili e Faailoaina maia ana avefeau moni. Na te faailoaina mai i latou e ala i le faataunuuina moni o ana feau ia na latou faaoo maia. O Ieova o ia foi o Lē Sili na te Faaalialia avefeau pepelo. E faapefea ona ia faaalialia i latou? Na te faalēaogaina a latou faailoga ma mea e vavalo i ai. O le auala lenei na te faailoa mai ai o na tagata na latou faia i latou lava ma tagata vavalo, o a latou feau e puna mai i o latou lava mafaufauga sese—ioe, o latou manatunatuga valea, ma le faaletino!

2. O le ā le feteenaiga na tupu i le va o avefeau i taimi o Isaraelu?

² Sa faapea mai Isaia ma Esekielu o i laua uma o avefeau a Ieova le Atua. Pe e saʻo ea? Seʻi o tatou vaai. Sa vavalo Isaia i Ierusalema e amata mai pe tusa o le 778 T.L.M. seia oo i se taimi ina ua mavae le 732 T.L.M. Sa faaaunuua Esekielu i Papelonia i le 617 T.L.M. Sa ia vavalo atu i ona uso Iutaia sa iai iina. Sa faasilasilaina ma le lototele e perofeta e toalua e faapea o le a faaumatia Ierusalema. Sa faapea mai isi perofeta o le a lē faatagaina e le Atua lenei mea. O ai na faamaonia le avea ma avefeau moni?

Ua Faaalialia e Ieova Perofeta Pepelo

3, 4. (a) O ā feau feteenai e lua na tuuina atu i tagata Isaraelu sa iai i Papelonia, ma na faapefea ona faaalialia e Ieova le avefeau pepelo? (e) O le ā na fetalai Ieova o le a tupu i perofeta pepelo?

³ A o iai Esekielu i Papelonia, sa faailoa atu ai ia te ia se vaaiga o mea sa tutupu i totonu o le malumalu i Ierusalema. I le faitotoa e ulufale atu ai i lona ala tatala i le itu i sasaʻe, sa iai tane e toʻa 25. Sa iai ia i latou na ni aloalii e toalua, o Iaasenaia ma Pelatia. O le ā le silasila a Ieova ia i laua? Ua tali mai le Esekielu 11:2, 3: “Le atalii e o le tagata, o tagata ia e tautogafiti i mea leaga, ma latou pule i pulega leaga i le aai nei; o e faapea atu, E le latalata mai; ina fai fale ia.” Sa faapea atu nei avefeau faamaualuluga o le filemu, ‘E lē o lamatia Ierusalema. E lē o toe mamao ona tatou toe fausia lea o nisi fale se tele!’ Ona fetalai atu lea o le Atua ia Esekielu ina ia vavalo atu e faalēaogā ai valoaga a nei perofeta pepelo. I le fuaiupu e 13 o le mataupu e 11, ua taʻu mai ai e Esekielu ia i tatou le mea na tupu i se tasi o i laua: “Ua oti Pelatia le atalii o Penaia o loo ou vavalo atu.” Atonu na tupu lenei mea auā sa avea Pelatia o se aloalii na sili ona logologoā ma fia pule ma sa sili ona ifo i tupua. O lona oti faafuasei na faamaonia ai o ia o se perofeta pepelo!

⁴ O le faasalaga a Ieova na faaoo ia Pelatia sa lei taofia ai isi perofeta pepelo mai le faia o pepelo e faaaogā ai le suafa o le Atua. Sa faaauau pea nei tagata pepelo i o latou ala leaga o le valoia mai o mea e feteenai ma le finagalo o le Atua. Ona fetalai atu lea o Ieova le Atua ia Esekielu: “Oi talofa i perofeta valelea o e usiusitai i o latou lava loto, a e lei vaaia e i latou se mea.” I le pei o Pelatia, o le a ‘lē toe iai’ i latou e vavalo atu ma le faatautee mo Ierusalema le “faaaliga o le manuia mo ia, a e leai se manuia.”—Esekielu 13:3, 15, 16.

5, 6. E ui lava i avefeau pepelo uma na iai, ae na faapefea ona faasilisilia Isaia e avea o le perofeta moni?

⁵ Ae o Isaia, na faataunuuina moni ana feau uma tauatua e uiga ia Ierusalema. I le tau mafanafana o le 607 T.L.M., sa faaumatia ai e autau a Papelonia le aai ma aveina faatagataotaua i Papelonia se vaega o tagata Iutaia na totoe. (2 Nofoaiga a Tupu 36:15-21; Esekielu 22:28; Tanielu 9:2) Pe na avea ea nei mala e taofia ai perofeta pepelo mai le faatautee atu i tagata o le Atua e ala i a latou faaupuga lē aogā? E leai, sa tumau pea na avefeau pepelo i o latou ala!

⁶ E lē gata i lenei mea, ae sa iloa foi e tagata faaaunuua o Isaraelu feau a le aufaipelē fiasili a Papelonia, o ē fai valovaloga, ma ē saili i fetu mo ni faailoga. Peitai, sa faamaonia e Ieova, o nei avefeau pepelo uma o i latou o ni tagata valea ua faatoilaloina, ua latou valoia mai mea e lē ogatusa ma mea moni na tutupu. Na oo lava i le taimi sa ia faaalia mai ai e faapea, o Esekielu o lana avefeau moni, e pei foi o Isaia. Sa faataunuuina e Ieova fetalaiga uma na ia fetalai atu ai ia i latou, e pei lava ona ia folafola ai: “O loo oʻu faaleaogaina faailoga a ē pepelo, ma o Aʻu e faavaleleaina o ē faataulāitu; o Lē faaliliuina i tua o ē popoto, ma o Lē na te faaleaogaina lo latou atamai e avea ma valea; o Lē o loo faamauina le tonu o le upu a lana auauna, ma o Lē na te faataunuuina atoatoa le pule a ana lava avefeau.”—Isaia 44:25, 26, NW.

Ni Feau Ofoofogia e Uiga ia Papelonia ma Ierusalema

7, 8. O le ā le feau faagaeeina sa avatu e Isaia mo Papelonia, ma o le ā na uiga i ai ana upu?

⁷ O le a faaumatia Iuta ma Ierusalema, e lē toe ʻaināina mo le 70 tausaga. Peitai, na folafola e Ieova e ala mai ia Isaia ma Esekielu e faapea o le a toe fausia le aai ma toe ʻaināina le laueleele i le taimi tonu lava na ia valoia! O se valoaga e matuā ofoofogia lenei. Aisea? Auā sa lauiloa Papelonia i le lē tāitai ona faasaolotoina o ana pagota. (Isaia 14:4, 15-17) O ai la e mafai ona ia faasaolotoina nei tagata ua faaaunuua? O ai e mafai ona faatoilaloina Papelonia malosi, ma ona pa malolosi ma lona vaitafe tele o loo puipuia ai? E mafai e Ieova o Lē Ona le Malosi Uma Lava! Ma na ia fetalai o le a ia faia: “[O aʻu] o le fai atu i mea loloto [lona uiga, o vai o le aai o loo fai ma ona puipuiga], Ia faapaʻumatuina; ou te faamamate foi i ou vaitafe. O lē fai atu ia Kuresa, O loʻu leoleo mamoe o ia; na te faataunuuina foi o mea uma ou te loto i ai; o loo fai atu foi i Ierusalema, E faia lava oe; o loo fai atu foi i le malumalu, E faavaeina lava oe.”—Isaia 44:25, 27, 28.

⁸ Manatu i lena mea! O le Vaitafe o Eufirate, o se matuā papupuni e lē mafai e tagata ona osofaia, ae ia Ieova sa pei o se matāua i luga o se paʻu mātū. O le a faapaʻumatuina le papupuni! O le a paʻū Papelonia. E ui o lena valoaga sa faia e tusa ma le 150 tausaga a o lei fanau mai Kuresa le Peresia, ae na valoia e Ieova e ala mai ia Isaia le faatoilaloina o Papelonia e lenei tupu, ma le faasaolotoina o tagata Iutaia sa faaaunuua, e ala i lona faatagaina o lo latou toe foi atu e toe fausia Ierusalema ma lona malumalu.

9. O ai na faaigoa e Ieova e avea ma ana auala mo le faasalaina o Papelonia?

⁹ Tatou te maua le valoaga lenei i le Isaia 45:1-3: “O loo faapea ona fetalai mai o Ieova i le ua faauuina e ia, o Kuresa, o le ua ou taofia lona lima taumatau, ia faatoilaloina nuu i ona luma, . . . e tatalaina i ona luma o puipui vae lua; e le punitia foi faitotoa. O aʻu lava, ou te savali atu i ou luma, ma ou faalauleleiina mea maupuepue; ou te nutininii i puipui ʻapa memea; ou te gauia foi faamau uamea. Ou te foai atu foi ia te oe oloa o loo i le pogisa, ma oloa lilo o loo i mea nanā; ina ia e iloa o aʻu lava o Ieova, o lē valaau i lou lava igoa.”

10. I le ā le itu na “faauuina” ai Kuresa, ma na faapefea ona fetalai atu Ieova ia te ia i le silia ma le selau tausaga a o lei fanau mai?

¹⁰ Seʻi mātau o loo fetalai Ieova ia Kuresa e pei lava o lea ua ola mai o ia. Ua ogatusa lenei ma le faamatalaga a Paulo e faapea o Ieova “na te valaauina mea ua leai, peiseai ua i ai.” (Roma 4:17) Ua faailoa mai foi e le Atua faapea o Kuresa o “le ua faauuina e ia.” Aisea na ia faia ai faapea? Ae maise lava, sa lei liligiina e le ositaulaga sili a Ieova le suauu paia mo faauuga i luga o le ulu o Kuresa. E saʻo, peitai o se faauuga faavaloaga lenei. E faailoa mai ai le amata galue i se tulaga faapitoa. O lea sa mafai ai e le Atua ona muai fetalai mai e uiga i lona muai tofia o Kuresa e avea o se faauuga.—Faatusatusa i le 1 Tupu 19:15-17; 2 Tupu 8:13.

E Faataunuu e le Atua Upu a Ana Avefeau

11. Aisea na lagona ai e tagata na ʻaināina Papelonia le saogalemu?

¹¹ I le taimi na faasagatau atu ai Kuresa ia Papelonia, sa lagona e tagatanuu o Papelonia le malupuipuia ma le saogalemu. Sa siosiomia lo latou aai e se tafega loloto ma le lautele sa matuā puipuia ai, lea e māfua mai i le Vaitafe o Eufirate. I le mea sa tafe atu ai le vaitafe e agaʻi atu i le aai, sa iai se uafu e faataamilo i le auvai i sasaʻe o le vaitafe. Ina ia vavae ese lena mea mai le aai, na fausia ai e Nepukanesa se mea na ia taʻua o “se papuipui tele, sa pei o se mauga e lē mafai ona tuleiina . . . O lona tumutumu sa [ia] faamaualuga e pei o se mauga.”a Sa iai i lenei papuipui ni pa tatala ma ni ona faitotoa tetele e fai i le apa memea. Pe a ulu atu se tasi i totonu, sa tatau ona ia aʻe i se malifa mai le faatausiusiuga o le vaitafe. E lētioa lotovaivai pagota Papelonia pe faamata e toe faasaolotoina i latou!

12, 13. Na faapefea i fetalaiga a Ieova e ala atu i lana avefeau o Isaia ona taunuu moni ina ua faatoilaloina e Kuresa Papelonia?

¹² Peitai e lē o le tulaga lena o tagata Iutaia na ave faatagataotauaina sa faatuatua atu ia Ieova! Sa ia i latou se faamoemoe pupula. E ala i ana perofeta, na folafola atu ai e le Atua le faasaolotoina o i latou. Na faapefea ona faataunuu e le Atua lana folafolaga? Na poloaia e Kuresa ana autau ina ia faatafe ese le Vaitafe o Eufirate i se isi alavai e tusa ma ni nai maila le mamao ese i le itu i mātū o Papelonia. O lea, na liua ai le puipuiga sili o le aai e avea o se vaitafe ua matuā mātūtū. I lena po e lē mafaagaloina, na lafoaia ma le faatalale e autau a Papelonia ua onanā, faitotoa e lua o le aai o loo matalatala pea, e agaʻi atu i le vaega e fesagai ma le Eufirate. Sa lei talepeina moni e Ieova faitotoa uamea; na te lei talepeina foi i lalo uamea faalalava na sa faamauina ai faitotoa, ae o lona liua ofoofogia o mea ina ia faamatalatala pea ma lē lokaina na oo mai ai iuga na. Sa leai se aogā o papuipui a Papelonia. Sa lei tau manaomia e autau a Kuresa ona aʻea na pa ina ia oo atu ai i totonu. Sa afio Ieova e muamua atu ia Kuresa, e faalauleleiina “mea maupuepue,” ioe, o mea uma sa faalavelavea ai. Sa faamaonia le avea o Isaia ma avefeau moni a le Atua.

¹³ Ina ua pulea atoa e Kuresa le aai, sa ia mauaina uma o latou oa, e aofia ai ma oa sa nanā i ni potu pogisa na loka. Aisea na faia ai e Ieova le Atua lenei mea mo Kuresa? Ina ia ona iloa ai o Ieova, ‘o Lē ua faaigoaina o ia i lona igoa,’ o ia o le Atua o valoaga moni ma o le Alii Pule Silisili Ese i le aoao o mea. O le a ia iloa ai o le Atua na fuafuaina lona oo mai i le pule ina ia faasaoloto ai Ona tagata, o Isaraelu.

14, 15. E faapefea ona tatou iloa e ā Ieova le viiga mo le manumalo o Kuresa ia Papelonia?

¹⁴ Faalogo foi i fetalaiga a Ieova ia Kuresa: “Ona o laʻu auauna o Iakopo, ma Isaraelu le na aʻu filifilia, o le mea lea ua ou valaauina ai oe i lou lava igoa; ua ou taʻua lou igoa, a o e lei iloa aʻu. O aʻu o Ieova, a e leai lava se tasi; e leai se Atua, na o aʻu lava; ua ou fusia oe, a o e lei iloa aʻu; ina ia latou iloa, e afua mai i le mea e alu ae ai le la, e oo i le mea e alu ifo ai, e leai se tasi na o aʻu; o aʻu o Ieova, a e leai lava se tasi; o aʻu lē faia le malamalama, ma faatupuina le pouliuli; o lē faia le manuia [o le filemu mo ona tagata o loo faaaunuua], ma faatupuina le mala [mo Papelonia]; o aʻu o Ieova, o lē faia ia mea uma.”—Isaia 45:4-7.

¹⁵ E ā Ieova le viiga mo le manumalo o Kuresa ia Papelonia, auā o Ia na avatua ia te ia le malosi e faataunuu ai Lona finagalo e tetee atu i lena aai amioleaga ma faasaʻoloto mai ai Ona tagata sa faatagataotauaina. I le faia o lenei mea, na faatonuina ai e le Atua lona lagi ina ia faatotō ifo le malosi amiotonu. Na ia faatonuina lona laueleele ina ia faamaga ma fua mai ai gaoioiga amiotonu ma le olataga mo ona tagata sa faaaunuua. Ma sa usiusitai lona lagi ma le laueleele faafaatusa i lenei poloaiga. (Isaia 45:8) E silia i le selau tausaga talu ona mavae le maliu o Isaia, ae faailoa mai loa le avea o ia o se avefeau moni a Ieova!

Le Tala Lelei a le Avefeau mo Siona!

16. O le ā le tala lelei sa mafai ona folafola atu i le aai faatafunaina o Ierusalema ina ua faatoilaloina Papelonia?

¹⁶ Peitai o loo iai ma nisi mea. Ua taʻua i le Isaia 52:7 le tala lelei mo Ierusalema: “E matuā matagofie i luga o mauga o vae o le ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga; ua fai mai ia Siona, O loo pule lou Atua.” Seʻi manatu faalemafaufau i le fiafia sa iai ina ua vaaia se avefeau ua fotuai mai i totonu o Ierusalema mai atumauga! Atonu o loo iai sana tala. O le ā lea tala? O se tala fiafia mo Siona. O le tala o le filemu, ioe, o le tala i le finagalo lelei o le Atua. O le a toe fausia Ierusalema ma lona malumalu! Ma ua folafola mai ma le mautinoa e le avefeau e faapea: “O loo pule lou Atua.”

17, 18. Na faapefea i le manumalo o Kuresa ia Papelonia ona aafia ai le suafa o Ieova lava ia?

¹⁷ Ina ua faataga e Ieova autau a Papelonia e faatoilaloina lona nofoalii na avea ma ata lea sa soloai ane i ai tupu mai le gafa o Tavita, atonu na foliga mai ai ua lē toe avea o Ia ma Tupu. O Marduk, le atua sili o Papelonia, sa foliga ua avea ma tupu. Peitai, ina ua faatoilaloina e le Atua o Siona Papelonia, na ia faataitaia mai ai lana pule silisili ese aoao—o ia lava le Tupu silisili. Ma ina ia faamautuina lenei mea moni, sa tatau ai ona toe faavaeina “le aai . . . a le Tupu silisili,” faatasi ai ma lona malumalu. (Mataio 5:35) Ma o le avefeau na aumaia lena tala lelei, e ui sa pefua ona vae, na palapalā, ma maosiosia, ae i le vaaiga a ē sa alolofa ia Siona ma lona Atua, sa foliga mai o na vae ua matuā matagofie lava!

¹⁸ I se uiga faavaloaga, sa uiga le paʻū o Papelonia faapea ua faavaeina le malo o le Atua ma o lē na folafolaina le tala lelei o ia lea na folafolaina atu lena mea moni. E lē gata i lea, o lenei avefeau anamua, na valoia e ala mai ia Isaia, sa faaatagia ai se avefeau o tala e sili atu ona lelei—e sili atu ona lelei ona o mea mananaia sa iai ma lona matua o le Malo, faatasi ai ma faatatauga ofoofogia mo tagata faatuatua uma.

19. O le ā le feau e uiga i le laueleele o Isaraelu na tuuina atu e Ieova e ala ia Esekielu?

¹⁹ Sa tuuina atu foi ia Esekielu ni valoaga matagofie o le toe faafoisiaga. Na ia vavalo mai: “Ua faapea ona fetalai mai o le Alii o Ieova, . . . o aʻu e āina ai a outou aai, e atiina ae foi mea ua faatafunaina. Ona latou fai ane lea, O lenei laueleele sa faatafunaina, ua avea e pei o le faatoaga o Etena.”—Esekielu 36:33, 35.

20. O le ā le timaiga fiafia na avatu faavaloaga e Isaia ia Ierusalema?

²⁰ I le faatagataotauaina i Papelonia, sa faanoanoa ai tagata o le Atua ona o Siona. (Salamo 137:1) Ae o lenei, ua mafai ona latou olioli. Na timai atu Isaia: “Ia alalaga fiafia faatasi outou o mea faatafunaina i Ierusalema; auā ua faamafanafanaina lona nuu e Ieova, ua na faatauina Ierusalema. Ua to ese e Ieova le ofu i lona aao paia i luma o nuu uma; ua iloa foi e tuluiga uma o le lalolagi le olataga mai lo tatou Atua.”—Isaia 52:9, 10.

21. Sa faapefea ona faataunuuina upu o le Isaia 52:9, 10 ina ua mavae le faatoilaloina o Papelonia?

²¹ Ioe, sa iai i tagata filifilia o Ieova se mafuaaga tele mo le olioli. O lea ua latou agaʻi atu e toe ʻaināina na nofoaga sa faatafunaina, ma toe faia ia faapei o le faatoaga o Etena. Sa ‘to ese e Ieova le ofu i lona aao paia’ mo i latou. Sa peiseai ua afe i luga lima o lona ofu, ina ia mafai ona faia galuega mo le toe faafoisia o i latou i lo latou laueleele faapelepeleina. Sa lē na o sina mea itiiti lenei ma le lē faitaulia i le talafaasolopito. E leai, sa vāai uma lava tagata na ola ai iina i le ‘faaloloa atu e le Atua o lona aao’ ma tuuina atu le pule i mataupufai a tagata ina ia mafai ona aumaia le faaolataga tele o le nuu. Sa tele faamaoniga maumaututu na tuuina atu i tagata ina ia latou iloa ai o Isaia ma Esekielu o avefeau moni a Ieova. E leai se tasi sa tau masalomia e faapea o le Atua o Siona ua na o ia le Atua o loo soifua ma o le Atua moni i le lalolagi uma. I le Isaia 35:2, tatou te faitau ai: “Latou te vaavaai i le pupula o Ieova, o le matagofie o lo tatou Atua.” O i latou na talia lenei faamaoniga o le tulaga tauatua o Ieova sa liliu atu ma tapuai ia te ia.

22. (a) O le ā e mafai e i tatou i aso nei ona loto faafetai ai? (e) Aisea e tatau ai ona tatou matuā loto faafetai ona ua faaalialia mai e Ieova avefeau pepelo?

²² Maeu se loto faafetai e ao ona ia i tatou ona ua faailoa mai e Ieova ana avefeau moni! O ia moni lava o Lē “o loo faamauina le upu a lana auauna, na te faataunuuina foi le pule a ana sāvali.” (Isaia 44:26) O valoaga o le toe faafoisiaga na ia tuuina atu ia Isaia ma Esekielu ua faasilisilia ai lona alofa tele, le alofa tunoa, ma le alofa mutimutivale i ana auauna. E mautinoa lava, ua ono ma tatau ia Ieova a tatou viiga uma mo lenei mea! Ma e tatau foi ia i tatou i aso nei ona matuā loto faafetai ona ua ia faaalialia mai avefeau pepelo. Ua lelei lea auā ua toatele i latou na i le lalolagi i aso nei. O a latou feau ofoofogia ua faatuatuanai ai fuafuaga a Ieova ua uma ona folafola mai. O le mataupu o loo sosoo mai o le a fesoasoani ia i tatou e maitaulia ai na avefeau pepelo.

[Faaopoopoga i lalo]

Pe Mafai Ona E Faamatala?

◻ E faapefea ona faailoaina mai e Ieova ana avefeau moni?

◻ E ala mai ia Isaia, o ai na faaigoaina e Ieova e avea ma ana auala mo le faatoilaloina o Papelonia?

◻ Sa faapefea ona faataunuuina valoaga a Isaia ia na faamatala ai le faatoilaloina o Papelonia?

◻ O le ā le iuga lelei na iai i le suafa o Ieova ina ua faatoilaloina Papelonia?

[Ata i le itulau 9]

Sa foliga ane Papelonia i nuu ia sa iai i aso o Esekielu, e lē mafai ona faatoilaloina