Fesili Mai le Au Faitau
Pe mafai ea ona faapea atu, ona o le malamalamaga lea na toe faasaʻoina talu ai nei i le upu “tupulaga” o loo i le Mataio 24:34, ua aumaia ai se manatu faapea e mafai ona tolopo mamao atu i se taimi i le lumanai le oo mai o le iuga o le faiga o mea?
E mautinoa lava e lē o le manatu lena. Ae nai lo lea, o le malamalamaga lea ua toe faasaʻoina i lenei mataupu, e tatau ona fesoasoani ia i tatou ina ia tatou faatalitalia ai pea ma le mataalia le oo mai o le iuga. Aisea ua fai atu ai faapea?
E pei ona faamatala mai i Le Olomatamata o Novema 1, 1995, sa faatatau atu e Iesu le fuaitau “lenei tupulaga” i tagata amioleaga sa ola ai i lena vaitaimi. (Mataio 11:7, 16-19; 12:39, 45; 17:14-17; Galuega 2:5, 6, 14, 40) Sa lei faatatauina lena faamatalaga, i se taimi faatulagaina e amata mai i se aso patino.
O le mea moni, o “Fesili Mai le Au Faitau” i lena lava lomiga o Le Olomatamata sa taulai saʻo atu i ni manatu autū se lua: “O se tupulaga o tagata, e lē mafai ona manatu i ai faapea o se vaitaimi ua uma ona faatulaga le aofai o ni tausaga” ma, “O tagata mo se tupulaga e feola mo na o sina vaitaimi puupuu talafeagai.”
O le manatu lena ua masani ona tatou faaaogā i ai le “tupulaga.” Mo se faaaoaoga, atonu tatou te faapea atu, ‘Sa lē iloa e fitafita o le tupulaga a Napoleone ni mea e faatatau i vaalele ma pomu atomika.’ Pe tatou te faasino atu ea la i na o fitafita lava, o ē na fananau mai i le tausaga tonu lava na fanau mai ai Napoleone? Pe tatou te faasino atu ea i na o fitafita Falani o ē na maliliu a o lei maliu Napoleone? O le mea moni e leai; e faapena foi ona tatou lē faaaogaina le “tupulaga” e taumafai ai e faatulaga se aofaiga patino o tausaga. Nai lo lea, o le a tatou faasino atu i se vaitaimi puupuu e talafeagai, ae lē o le faitau selau o tausaga mai taimi o Napoleone ma faasolo atu ai i le lumanai.
Ua tutusa lena ma lo tatou malamalamaga i ai i le mea na fetalai i ai Iesu i lana valoaga na tuuina mai i le Mauga o Olive. O le faataunuuga o vala eseese o lena valoaga e faamaonia ai ua latalata mai le iuga o lenei faiga o mea. (Mataio 24:32, 33) Ia manatua, e tusa ai o le Faaaliga 12:9, 10, e faatatau i le faavaeina o le Malo faalelagi o le Atua i le 1914, sa lafo ifo ai Satani i le lalolagi. Ua faapea atili mai le Faaaliga ua matuā lotoa lava Satani i le taimi nei. Aisea? Auā ua ia iloa “ua saasaa ona po.”—Faaaliga 12:12.
Sa talafeagai la le iai i Le Olomatamata o Novema 1 le tamai ulutala “Ia Tausia Pea le Mataala!” Na taʻua ma le tonu e le palakalafa o loo sosoo ai: “Tatou te lē manaomia ona iloa le taimi tonu e tutupu ai mea. Nai lo lena, e ao ona tatou taulai atu i le tausia pea o le mataala, atiina ae o le faatuatua ia malosi, ma pisi i le auaunaga a Ieova—ae lē o le faitauina o se aso.” Ona sii mai ai lea o fetalaiga a Iesu: “Ia outou, ina mataala ia, auā tou te le iloa pe oo mai afea ia aso. O le mea ou te fai atu ia te outou, ou te fai atu ai i tagata uma: Ina mataala ia.”—Mareko 13:33, 37.