Le Auala e Maua ai le Faamoemoe e Ui i Faanoanoaga

SEʻI MANATU faapea ua oo ia te oe le mea lea o loo faamatalaina mulimuli mai: O au mea faitino uma lava ua faatamaia, ua leai ma sau mea o toe iai. O lau fanau—le olioli o lou olaga—ua lē toe iai. Ua lē lagolagosua lau paaga faaipoipo ia te oe. Ua matuā faaletonu lava lou soifua maloloina. O aso uma lava e fesagai ai ma tofotofoga tiga.

Afai o le tulaga lena e oo i ai lou soifuaga, pe mafai ea ona e maua se mafuaaga e te fia ola ai pea? Po o le a e lagona ea le faavaivai?

O le tulaga faanoanoa na faatoʻā faamatalaina atu o le tala moni lena i le soifuaga o Iopu, o se tagata na soifua i taimi o le Tusi Paia. (Iopu mataupu 1, 2) I se tulaga e sili ona mafatia, na tagi talatala ai Iopu e faapea: “Ua musu loʻu loto i loʻu ola.” Na ono fiafia o ia e oti o se mapusaga mo ia. (Iopu 10:1; 14:13) E ui i ona mafatiaga ogaoga, peitai, na tumau pea Iopu i lona faamaoni i le Atua. O lea la, na “sili foi ona faamanuia e Ieova o le gataaga o Iopu i lona amataga.” Na maliu o ia ma le filemu “ua toeaina, ma ua tuutuluʻi lona ola.”—Iopu 42:12, 17.

Na faataatia e Iopu se faataitaiga o le tumau ma le onosai lea ua lauiloa ai seia oo mai lava i le asō. O ona tofotofoga na faaleleia ai ona uiga totino ma ua uunaia ai isi ina ia faia galuega lelei. (Iakopo 5:10, 11) O le tulaga e sili ona tāua i na mea uma, o le faamaoni atoatoa o Iopu na faafiafiaina ai le finagalo o Ieova. (Faataoto 27:11) O lea o ni mea tiga na avea moni lava ma manumalo tele i le tulaga mamā tauatua, faatuatua, ma le faamaoni lea na maua ai e Iopu faamanuiaga, faapea ma i latou uma lava o ē ua uunaia e lana faataitaiga.

Le Faamoemoe e Ui i Tofotofoga Eseese

Atonu e mafai ona oo ia te oe ni tofotofoga e talitutusa ma ia na oo ia Iopu. O le maliu o se tasi e pele e mafai ona matuā afaina ai ou faalogona. O se maʻi tugā e mafai ona avea ma tofotofoga mamafa i lou olaga. O lou olaga atoa atonu e foliga mai ua lē aogā ona o le loto nutimomoia na māfua mai se talagā faaipoipoga. O le paʻū o le tulaga tau le tamaoaiga atonu e tuua ai oe i le tulaga mativa. Atonu e fai oe ma taulaiga o sauāga matuitui e ala mai ia i latou o ē tetee ma ʻinoʻino i le tapuaiga moni. O le tauivi ina ia faafetaiaia ou tofotofoga atonu e tuua ai oe ma se lagona faapea ua leai sou faamoemoega mo le lumanai.—1 Peteru 1:6.

Nai lo le lolo atu i faanoanoaga, ia fesili ifo ia te oe lava, ‘Aisea ua ou mafatia ai?’ Ua e mafatia ona o loo e soifua i se lalolagi “o loo nofo toilalo i loo leaga,” o Satani le Tiapolo. (1 Ioane 5:19) O le iuga, ua mafatia ai tagata uma. I nisi tulaga ua aafia uma ai i tatou ona o le ʻinoʻino ua faagaeeina e le Tiapolo mo le feau o le Malo, o upu lē alofa a nisi, po o gaoioiga matautia o le lē amioatua ia ua taatele i nei “aso faigata.”—2 Timoteo 3:1-5.

Afai e tupu se mea matuia i lou olaga, atonu ua avea oe ma sē ua aafia fua i le “tausaga ma le mea e tupu ai.” (Failauga 9:11) I se isi itu, o nisi taimi e sese ai le gasologa o mea i le olaga ona o lo tatou lava tulaga agasala tuufaasolo. (Roma 5:12) E tusa lava pe tatou te faia sese matuia ae ua salamō ma sailia le fesoasoani faaleagaga, aua neʻi manatu faapea ua tuulafoaiina oe e le Atua. (Salamo 103:10-14; Iakopo 5:13-15) E sili atu ona manatu mai o ia ia i tatou nai lo se isi lava tagata. (1 Peteru 5:6, 7) E mafai ona e mautinoa faapea e “latalata mai Ieova i e ua loto momomo; ua ia faaola foi i e ua loto nutimomoia.” (Salamo 34:18) E lē afaina po o le ā le matuia po o le tugā o sou tofotofoga e oo i ai, e mafai e Ieova ona foai atu ia te oe le atamai e faafetaiaia ai. (Iakopo 1:5-8) Ia manatua pea e mafai e Ieova ona faamālōlō i manuʻa uma. Pe a e mauaina lona finagalo malie, e leai se mea e mafai ona taofia oe mai le mauaina o le taui o le ola.—Roma 8:38, 39.

Pe e Iai se Mea Aogā e Maua Mai Tofotofoga?

E iai se alagaupu faaanamua e faapea, “O ao uma lava e iai lava se pito e malamalama.” O le auala faigofie lena e faaupu ai le faapea atu e tusa lava po o le ā le leaga e oo i ai le tulaga o mea, e mafai lava ona e mauaina se mafuaaga mo le faamoemoe. O le fuafuaga o loo lautua i mea uma na tusia i le Afioga a le Atua, ina ia “tatou maua le faamoemoe.” (Roma 15:4) E tusa lava po o le ā le matuia o lou tulaga faanoanoa, e mafai lava e folafolaga ma mataupu silisili o le Tusi Paia ona aumaia ia te oe se faalogona faafouina o le olioli ma le faamoemoe.

Ua faaalia e le Tusi Paia e faapea o le ‘puapuaga e mamasagia ma vave mavae’ pe a faatusatusa atu i faamanuiaga e faavavau ia ua fotuai mai i luma o i latou e alolofa i le Atua. (2 Korinito 4:16-18) Ua faaalia foi e le Tusi Paia e faapea e tutupu ae uiga tauatua e ui o feagai ai ma tofotofoga, e sili mamao atu ona tāua nai lo le lauiloa po o oa faitino. (1 Ioane 2:15-17) E faapea foi ona maua aogā mai le tulaga mafatia. (Eperu 5:8) O le mea moni, o le faatatauina o mea ua aʻoaʻoina i le faagasologa o tofotofoga e mafai ona aumaia ai ia te oe ni faamanuiaga e te lei faatalitalia.

O se tofotofoga faigata atonu e te agavaivai atili ai. Atonu e te taʻutino mai faapea i le taimi ua teʻa sa iai sou uiga totino na faatiga atu ai i isi ma oo foi lava ina faatuatuai ai lou agaigai i luma faaleagaga. Atonu o lea uiga o lou soona mautinoa naʻuā. Ina ua mavae ona oo ia te oe nisi o puapuaga, ona faatoʻā e iloa ai lea o lou faatauvaa tele ma le tele o lou manaomiaina o isi. Afai o lou tulaga puapuagatia ua e aʻoaʻoina ai lena lesona ma ua e faia ni suiga manaomia, ua aogā la ia te oe.

Ae ā pe afai, o le taimi muamua, sa faigata i isi ona feutagai ma oe ona sa iai sou faafitauli i le puleaina o ou uiga? O lenei mea atonu e faapogaia ai ni faanoanoaga ia te oe i le fesootai atu ma lou soifua maloloina. (Faataoto 14:29, 30) Peitai, i le taimi nei, atonu ua sili atu ona lelei le tulaga ua iai ona ua e faalagolago i le agaga o le Atua e fesoasoani ia te oe ina ia faaalia le pulea totino.—Kalatia 5:22, 23.

I le pei o isi, atonu e te lē taulau i se isi taimi i le faaalia o le alofa mutimutivale ia i latou o ē ua faia mea sese. Ae afai na oo patino lava ia te oe se tulaga na e lagonaina ai lou manaomia tele ona faaalia mai o le alofa mutimutivale, atonu ua sili atu nei la ona e faanaunau ina ia faaalia atu le alofa mutimutivale i isi. O lagona ootia moni mai le loto, le manatu mamafa, ma le alofa mutimutivale na faaalia atu ia te oe, e mafai ona e iloa ai e ao ona e faaalia ia lava uiga i ē fai mea sese ua salamō. Afai o lou tiga ua uunaia ai oe e faasaʻo nei vaivaiga i ou uiga totino, o se tasi lea o aogā e te maua mai se mea na tupu i lou olaga. Ua e iloa ai faapea, “e faatāuaina le alofa mutimutivale i lo le faasalaga.”—Iakopo 2:13, NW; Mataio 5:7.

Ae ā pe afai o le aoaiga e ala mai i le faapotopotoga Kerisiano ua aveesea ai ou faaeaga e te faapelepele i ai ma faapena foi ma le faaaloalogia e isi? Aua neʻi faatoilaloina e le faanoanoa. O le gaoioiga e aoaia ai e fesoasoani lea i le tausia o le mamā o le faapotopotoga, ae o ona aogā e aofia ai le toe faafoisia o le tulaga faaleagaga o le tagata fai mea sese. O le mea moni, “o aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aʻoaʻoina ai.” (Eperu 12:11) E ui lava e mafai ona avea le aoaiga ma ta malosi, ae na te lē tuua le tagata loto maulalo ua salamō e aunoa ma se faamoemoe. Na matuā aoaia lava le tupu o Isaraelu anamua o Tavita ona o lana mea sese na fai, ae na salamō o ia ma na iu lava ina ia mauaina se faamālō i le avea ai ma tagata sa taʻutaʻua i le faatuatua.—2 Samuelu 12:7-12; Salamo 32:5; Eperu 11:32-34.

O se tofotofoga e mafai ona tele sona aafiaga i lau vaaiga. I le taimi ua mavae, atonu sa faaautū ou manatu i sini ma fuafuaga matapeapea e faataunuuina ina ia amanaia ai oe ma lauiloa ai i lenei lalolagi. Atonu o se tofotofoga e fesootai atu i le suia o tulaga tautupe ua mafatia ai po o le leiloa o ni mea faitino ua faapea ai ona taulai atu ou mafaufauga i mea e sili ona tāua. (Faatusatusa i le Filipi 1:10.) O lea ua e iloa nei faapea o aogā e maua mai mea faaleagaga ma sini i le auaunaga paia ua na o le pau ia o mea e aumaia ai le olioli moni ma le faamalieina tumau.

Faatuatua ia Ieova

O le tuuina atu o le auaunaga paia ia Ieova e mafai ona iu ai i sauāga ma mafatiaga i lima o i latou e tetee i talitonuga faa-Kerisiano. Atonu ua e lagonaina le puapuagatia ona o lenei tofotofoga, ae e mafai ona maua mai ai se mea lelei. O lenei luʻi e mafai ona faamalosia ai lou faatuatua. E lē gata i lena, o isi o loo mafatia i sauāga atonu e faalaeiauina ma faamalosia i latou i le vaai mai i lou finafinau. O molimau e vaaitino i lau amio lelei atonu e uunaia ai i latou e vivii atu i le Atua. E oo lava i ē na tetee atu ia te oe e mafai ona faamaina ai ma latou amanaiaina ai au galuega lelei!—1 Peteru 2:12; 3:16.

Ina ia alofia le faanoanoaga pe a sauāina, e manaomia ona e faatuatua ia Ieova. Ua faaalia e lana Afioga e faapea o le mapusaga mai se tofotofoga e mautinoa e oo mai, ae atonu e lē vave oo mai e tusa ai ma lou manao. I le taimi e tasi, “aua neʻi outou faavaivai i le amio lelei.” (2 Tesalonia 3:13) Ia faaauau pea ona sailiili i auala e faafetaiaia ai tofotofoga ma onosaia ai. E tusa lava foi pe foliga mai ua leai se mea e toe faamoemoe atu i ai, ia “tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.” (Salamo 55:22) Nai lo le faalofia o oe i ou faanoanoaga, ia mafaufau i le faamanuiaina o oe i lou iloaina o Ieova, i le iai faatasi ma ona tagata, ma le mauaina o le faamoemoe o le ola e lē gata uma.—Ioane 3:16, 36.

Ia taulai atu pea lou mafaufau i mea tāua. Ia e faasaga atu ia Ieova i aso uma lava e ala i le tatalo, ia talosaga atu mo le malosi e onosai ai. (Filipi 4:6, 7, 13) Ia aveesea so o se manatu fia taui ma sui ia i latou na māfua ai ona e mafatia. Ia tuu atu ia Ieova. (Roma 12:19) Ia faaauau pea ona e sailia auala e faaleleia ai ou uiga totino, atiina ae uiga faa-Kerisiano. (2 Peteru 1:5-8) Ia talisapaia mea uma lava ua faia e isi mo oe, e aofia le au toeaina o ē o loo tausia ma le alofa ou manaoga faaleagaga. (Eperu 13:7, 17) Ia faatuatua i le Atua, ma ia taulai atu pea lau vaai i le taui o le ola, ia mautinoa faapea e oo lava i le oti e lē mafai ona aveesea ai mai ia te oe.—Ioane 5:28, 29; 17:3.

Afai ua oo nei ia te oe le faanoanoa tele po o ni tofotofoga matuia, ia “faatuatua ia Ieova ma lou loto atoa,” ma o le olioli tele o le a suia moni ai lou tulaga faavauvau ma tulaga faigata. (Faataoto 3:5, 6; Ioane 16:20) O tiga o le a taʻitaʻia ai oe i le fiafiaga pe a faamanuiaina oe e le Atua e pei ona sa ia faia ia Iopu. O mafatiaga i aso nei e lē mafaatusalia pe a faatusatusa atu i lou taui. (Faatusatusa i le Roma 8:18.) O lou tumau ma le faatuatua e mafai ona faalaeiauina ai isi ma e fesoasoani foi ia te oe e atiina ae uiga matagofie faa-Kerisiano e ō mai faatasi ma “le tagata fou.” (Efeso 4:23, 24; Kolose 3:10, 12-14) O lea la, ia e maua le lototele mai le fautuaga poto a le aposetolo o Peteru: “O lenei, o i latou ua tigaina e tusa ma le finagalo o le Atua, ia latou tuuina atu ma le amio lelei o latou lava ola i le na faia mea uma, o ia e faamaoni.”—1 Peteru 4:19.

[Ata i le itulau 23]

Ia faapei o Iopu. Aua lava neʻi mou atu le faamoemoe

[Ata i le itulau 24]

Ia faatuatua ia Ieova ma lou loto atoa