Po o Oe ea o se Uo a le Atua?—O Mea e Faaalia e Au Tatalo
PE UA iai se taimi ua e faalogo ai i ni tagata se toalua o talanoa e aunoa ma lo la iloaina o loo e faalogologo atu? E lē taumatea sa lei pine ae e iloaina le ituaiga faiā a na tagata—pe e iai se faiā mafana pe o ni tagata ese, pe na ona masani foi pe vavalalata, o uo e fefaatuatuaai. I se tulaga talitutusa, o a tatou tatalo e mafai ona faaalia ai la tatou faiā ma le Atua.
Ua faamautinoa mai e le Tusi Paia ia i tatou e faapea o le Atua “e le mamao o ia ma i tatou taitoatasi.” (Galuega 17:27) O le mea moni, ua ia valaauliaina i tatou ina ia iloa o ia. E mafai foi ona avea i tatou ma ana uo. (Salamo 34:8; Iakopo 2:23) E mafai ona tatou olioli i se faiā moni vavalalata ma ia! (Salamo 25:14) O le mea mautinoa, o la tatou faiā ma le Atua o se mea lea e sili ona tautele ua mafai ona maua e i tatou o tagata lē lelei atoatoa. Ma e faapelepele Ieova i la tatou faauooga. Ua faamaonia lenei mea ona o la tatou faauooga ma ia e faavae mai i lo tatou faatuatua i lona Alo pele e toatasi, o lē na tuuina atu lona ola e sui aʻi i tatou.—Kolose 1:19, 20.
O a tatou tatalo la e ao ona atagia mai ai lo tatou alofa loloto ma le talisapaia mo Ieova. Pe ua e lagona ea faapea, e ui ina faailoa atu au tatalo ma le faaaloalo, ae e foliga mai e lē o matuā loloto moni ou faalogona? O se tulaga masani lea. O le ā la le ki mo le faaleleia o lea tulaga? Ia faamalosia la oulua faiā ma Ieova le Atua.
Mauaina o se Taimi e Tatalo Ai
Muamua lava, e manaomia se taimi e faamalosia ma ati ae ai se faigauo. Atonu e te feiloai e lē aunoa pe oo lava foi ina talanoa ma nisi o tagata—tuaoi, aumea faigaluega, ave pasi, ma tagata faatauoloa. O le mea moni, o lenei tulaga ua lē faapea ai o au uo moni ia tagata. E tupu aʻe se faauooga pe a talatalanoa ma se tasi mo se taimi, a o agaʻi atu talanoaga faasamasmanoa i le faaalia o faalogona ma mafaufauga mai totonu.
I se tulaga talitutusa, ua fesoasoani ai tatalo ia i tatou e faalatalata atu ai ia Ieova. Ae e tatau ona lava le taimi e tuutoina atu i ai; e tele mea e manaomia nai lo le na o se faafetai faatopelau i le taimi o meaʻai. O le tele o lou talanoa atu ia Ieova, o le tele foi lena e mafai ai ona e iloiloina ou lava faalogona, uunaiga, ma gaoioiga. O vaifofo mo faafitauli faigata e amata ona aliae a o faamanatu mai e le agaga o le Atua ia mataupu silisili mai lana Afioga. (Salamo 143:10; Ioane 14:26) E lē gata i lea, a o e tatalo, e oo ai lava ina avea Ieova ma sē e moni ia te oe, ma o le a sili ai foi ona e iloa lona alofa naunau mai ma lona manatu mamafa mai ia te oe.
E faapitoa lava lenei mea pe afai e talia au tatalo. O lea, o Ieova e mafai ona ia “faia o mea uma e faasilisili lava i mea tatou te ole atu ai ma mafaufau i ai”! (Efeso 3:20) E lē o le uiga o lea mea e faia e le Atua ni vavega mo oe. Peitai, e ala mai i lana Afioga tusia, lomiga mai le vasega o le auauna faamaoni, po o upu foi mai uso ma tuafāfine alolofa, e mafai ona ia saunia ai mo oe se fautuaga po o le taitaiga. Pe atonu foi na te avatu ia te oe le malosi manaomia e onosaia ai pe teena ai se tofotofoga. (Mataio 24:45; 2 Timoteo 4:17) O ia tulaga e faatumulia ai o tatou loto i le talisapaia o la tatou Uo faalelagi!
O lea, e tatau i se tasi ona faia se taimi e tatalo ai. O le mea moni, ua avea le lava o le taimi ma se mea e mauagata a o faagasolo nei aso leaga. Ae afai e te manatu mamafa lava i se tasi, e masani lava ona e faaavanoa le taimi mo lena tagata. Mātau le auala na faailoa atu ai e le faisalamo ia lava: “Le Atua e, e faapei ona naunau o le aila i vaitafe, o loo faapea ona naunau o loʻu agaga ia te oe. Ua fia inu loʻu agaga i le Atua, o le Atua soifua; o afea ea ou te alu atu ai ia iloa ai aʻu i luma o le Atua?” (Salamo 42:1, 2) Po o ia te oe ea lea lava faanaunauga fia talanoa i le Atua? Ia faaavanoa la le taimi e faia ai faapea!—Faatusatusa i le Efeso 5:16.
Mo se faataitaiga, atonu e te taumafai e ala vave i luga i le taeaopo ina ia maua ai se taimi paganoa e tatalo ai. (Salamo 119:147) Pe e iai ea ni taimi o le po e te lē moe ai? Ia, ona e faataitai lea i le faisalamo, e mafai ona e manatu i na taimi faigata o se avanoa e faamatala atu ai ou popolega i le Atua. (Salamo 63:6) Pe e na ona ofoina atu foi o ni tatalo pupuu a o faagasolo le aso. Na faapea atu le faisalamo i le Atua: “Ou te valaau atu ia te oe i aso uma lava.”—Salamo 86:3.
Faaleleia le Uigā o a Tatou Tatalo
I nisi taimi o le a e iloaina ai foi le lelei o le faateleina o le umi o au tatalo. A o faia se tatalo puupuu, atonu e te taumafai e tautala e uiga i mataupu e faalētāua. Ae afai e te ofoina atu tatalo uumi ma loloto, o le a sili atu ona e sauni e faamatala atu ou manatu ma ou faalogona mai totonu. A itiiti mai e faatasi ona faaaluina e Iesu se po atoa e tatalo ai. (Luka 6:12) E lē taumatea o le a e iloaina faapea o au lava tatalo o le a sili atu ona mafana ma uigā pe afai e alofia le faatopelauina.
E lē o le uiga o lenei mea o le tau lava ina faataamilo solo pe afai e itiiti mea e fia taʻu atu; e lē o uiga foi faapea o le faifai pea o talosaga i se tulaga e lē uigā. Na lapatai mai Iesu e faapea: “A outou tatalo, aua neʻi tāutu i a outou upu, e pei o nuu ese; auā fa te i latou, o le tele o a latou upu e talia ai i latou. O lenei, aua neʻi outou faapei o i latou; auā ua silafia e lo outou Tamā mea ua outou matitiva ai, a o lei ole atu outou ia te ia.”—Mataio 6:7, 8.
E sili atu ona uigā le tatalo pe afai e te muai manatunatu i mataupu e te manao e talanoa i ai. E tele mataupu e tatalo ai—o lo tatou olioli i le faiva, o o tatou vaivaiga ma lē taulau, o mea tatou te faanoanoa ai, o o tatou popolega tau tamaoaiga, o omiga mai le galuega po o le aʻoga, le sologa lelei o o tatou aiga, ma le tulaga faaleagaga o la tatou lava faapotopotoga, o nai mea ia ua taʻua.
Pe e iai ni taimi e tafaofao solo ai lou mafaufau a o e tatalo? Ia faia se taumafaiga e sili atu ina ia uaʻi atu ai. O le mea moni, o Ieova e naunau o ia ‘e liliu mai ia tatou faatoga.’ (Salamo 17:1) Pe e lē ao ai ea la ona tatou naunau ina ia taumafai atili e uaʻi atu i a tatou lava tatalo? Ioe, ‘ia e loto atu i mea a le agaga,’ ma alofia le mafaufau solo.—Roma 8:5.
E tāua foi le uiga e tatou te faalatalata atu ai ia Ieova. E ui lava ina finagalo o ia ina ia tatou manatu ia te ia o se uo, ae ia aua lava neʻi galo o loo tatou talanoa atu i le Pule Silisili Ese o le lalolagi aoao. Ia faitau ma mafaufau loloto i le vaaiga mamalu ma le faagaeeina o loo i le Faaaliga mataupu 4 ma le 5. O iina na vaaia ai e Ioane i se faaaliga le matagofie o Lē na ia faalatalata atu i ai e ala i le tatalo. Maeu se faaeaga ua tatou maua ua mafai ai ona tatou faalatalata atu ma maua aogā mai “Lē tietie i le nofoalii”! Ia aua lava neʻi o tatou mananao e soona tautala atu pe faia ni upu e lē migao. Nai lo lea, e ao ona tatou faia ni taumafaiga autasi ina ia ‘mālie ai ia Ieova upu a o tatou gutu, ma mafaufauga o o tatou loto.’—Salamo 19:14.
Ia mātau foi, e tatou te lē faagaeeina Ieova i ni faaupuga fia mamalu. E fiafia o ia i a tatou upu faaaloalo, faaupuga e alu aʻe mai le loto e tusa lava po o le ā le faigofie o le auala e faaupuina ai.—Salamo 62:8.
Faamafanafanaga ma Uiga Malamalama i Taimi e Manaomia Ai
Pe afai tatou te manaomia se fesoasoani ma se faamafanafanaga, e masani lava ona tatou liliu atu i se uo mamae mo se lagolagosua ma se faamaisega. Ia, e leai se uo e sili ona latalata ane nai lo Ieova. O ia o se “fesoasoani silisili i puapuaga.” (Salamo 46:1) I le avea o ia ma “Atua . . . e ana le faamafanafanaga uma,” ua sili ai ona malamalama o ia i mea tatou te fetaiai nai lo o se isi lava tagata. (2 Korinito 1:3, 4; Salamo 5:1; 31:7) Ma e silafia lelei e ia ma faapalepale ia i latou o iai i se tulaga faigata. (Isaia 63:9; Luka 1:77, 78) I le iloaina o Ieova o se uo e malamalama, ua tatou lagona ai le saʻolotoga e talanoa atu ai ma le naunautai ma vavalalata atu ai ia te ia. Ua uunaia ai i tatou e faailoa atu o tatou popolega ma mafatiaga e sili ona loloto. Ua faapea ai ona tatou iloa totino le auala a Ieova ‘ua fiafia ai o tatou agaga ona o [ana] faamafanafanaga.’—Salamo 94:18, 19.
O nisi taimi atonu tatou te lagonaina ai faapea ua lē aogā ona faalatalata atu i le Atua ona o o tatou sese. Ae faapefea pe afai e sese sau uo mamae ia te oe ma ole atu mo se faamagaloga? Pe e lē uunaia ea oe e faamafanafana atu ma toe faamautinoa lena uo? Aisea la e itiiti ai mea e te faatalitalia mai ia Ieova? E na te faamagaloina ma le agalelei ana uo o ē agasala ona o āuga lē lelei atoatoa faaletagata. (Salamo 86:5; 103:3, 8-11) O le iloaina o lenei mea, e tatou te lē taofia ai i tatou mai le faailoaina atu ma le saʻoloto o o tatou sese ia te ia; e mafai ona tatou faatuatuaina lona alofa ma lona alofa mutimutivale. (Salamo 51:17) Afai e tatou te faanoanoa ona o o tatou sese, e mafai ona tatou maua le faamafanafanaga i upu a le 1 Ioane 3:19, 20 e faapea: “Ua tatou iloa ai ua i le upu moni i tatou, e mautinoa foi o tatou loto i ona luma, auā pe afai e faasala o tatou loto ia i tatou, ua sili lava le Atua i o tatou loto, ua silafia foi e ia mea uma.”
Peitai, e tatou te lē mananao ia iai i ni tulaga faigata, ina ia olioli ai i le manatu alofa mai o le Atua. E naunau Ieova i so o se mea e ono aafia ai o tatou lelei faaleagaga ma lelei tau faalogona. Ioe, aua lava neʻi mafaufau faapea o o tatou faalogona, manatunatuga, ma popolega e faalētāua ma e lē tatau ona taʻua i le tatalo. (Filipi 4:6) Afai e te lua faatasi ma se uo mamae, pe e na o mea tetele ea e tutupu i le olaga e te lua talanoaina? Pe lua te lē fetufaai ea foi i popolega laiti? I se tulaga talitutusa, e mafai ona e saʻoloto e talanoa atu ia Ieova i so o se vala o lou olaga, i le iloaina faapea ‘o loo manatu mai o ia ia te oe.’—1 Peteru 5:7.
O le mea moni, e lē umi se faigauo pe afai e na o le pau lava le mea e te talanoa i ai, o oe. Ia faapena foi i a tatou tatalo ona lē faapito ia i tatou lava. E ao ona tatou faailoa atu lo tatou alofa ma lo tatou manatu mamafa ia Ieova ma lona finagalo. (Mataio 6:9, 10) O le tatalo ua lē gata o se avanoa e talosagaina ai se fesoasoani mai le Atua ae ua avea foi ma avanoa e ofoina atu ai se faafetai ma le viiga ia te ia. (Salamo 34:1; 95:2) O le “mauaina pea o le poto” e ala i suesuega totino o le a fesoasoani ia i tatou i lenei tulaga, e pei ona fesoasoani ia i tatou ina ia atili ai ona masani lelei ma Ieova ma ona ala. (Ioane 17:3) E mafai ona e maua patino fesoasoani i le faitauina o le tusi o Salamo ma mātau le auala na mafai ai e isi auauna faamaoni ona faailoa atu i latou lava ia Ieova.
O le faauooga ma Ieova o se meaalofa e tautele moni lava. Tau ina ia faaalia lo tatou talisapaiaina e ala i lo tatou tatalo atu i se tulaga e sili ona mafana, e sau mai le loto, o lagona totino. Ona tatou olioli ai lea i le fiafiaga lea na faailoa atu e le faisalamo e faapea: “Amuia le ua e filifilia, ma e faalatalataina o ia ia te oe.”—Salamo 65:4.
[Ata i le itulau 28]
E mafai ona tatalo atu i le Atua i le gasologa o le aso pe a tulai mai ni avanoa