Lipoti a Ē Faalauiloa le Malo

Saoloto Mai i Aafiaga Faatemoni

O FAIGA faatemoni ua leva ona puleaina ai olaga o le faitau miliona o tagata. Ae e mafai ona saoloto mai ai! O le mea lena sa tupu i le toatele o tagata i le aai anamuā o Efeso. E tusa ai ma le faamatalaga a le Tusi Paia, “e toatele foi o e na fai togafiti faataulāitu, na faapotopoto e i latou a latou tusi, ma susunu . . . O lea ua matuā tupu tele ai ma ua manumalo le afioga a le Alii.”—Galuega 19:19, 20.

Ua faapena ona matauina le tuputupu aʻe o le faapotopotoga Kerisiano i aso nei. E pei ona sa iai i Efeso, o i latou na avea ma ē talitonu, o i latou ia sa auai muamua i faiga faatemoni. O le mea na tupu i Zimbabwe o loo mulimuli mai ua faataitaia ai lenei tulaga.

O Gogo Mthupha (Tinā Matua) na lauiloa i ona malosiaga faatemoni. Sa gasolo ane ia te ia tagata mai mea mamao e pei o Zambia, Botswana, ma Aferika i Saute ina ia togafitia i latou i ana vai faataulaitu. Sa aʻoaʻo foi e Gogo Mthupha isi ina ia avea ma n’anga, po o se taulasea faataulaitu. Ma o isi taimi na te faia ai vai faalauatau!

I le taeao o se tasi Aso Sa, na asiasi atu ai ia Gogo Mthupha ni Molimau a Ieova o ē na auai i le faiva mai i lea fale i lea fale. Sa fiafia atoatoa o ia i le talanoaga ma i laua e uiga i le folafolaga a le Tusi Paia i le lalolagi fou amiotonu, se lalolagi e saoloto mai i aafiaga leaga uma. Sa ia taliaina le tusi E Mafai ona E Ola e Faavavau i Parataiso i Le Lalolagi ma malie ai e faia se suesuega faale-Tusi Paia i le aiga.a Ina ua faatolu ona faia o le suesuega, na amata ai loa ona ia auai i sauniga.

E ala i lona suesueina o le Tusi Paia, na aʻoaʻoina ai e Gogo Mthupha e faapea o ona malosiaga faapitoa e sau mai agaga leaga o ē na fouvale faasaga i le pule silisili ese a Ieova. (2 Peteru 2:4; Iuta 6) Sa ia aʻoaʻoina foi e faapea o nei temoni ua maumauai e faaliliu ese tagata uma latou te mafaia ina ia faasagatau atu ia Ieova ma faasagatau ai i lana tapuaiga mamā. Talu ai o le tausia o ia faaletino sa faalagolago atu lea i le fesoasoani mai o nei agaga leaga, o le ā la sa ia faia?

Na faailoa atu e Gogo Mthupha le faanaunauga ina ia aveesea uma ana tapui ma ana mea totino lea e fesootai atu ma faiga faataulaitu. Na aofia ai i lenei lona tūiga (headdress) faapitoa ma “seu povi e tautatala,” lea sa ia faaaogaina e fai ai ana faamalologa faataulaitu. Sa manao Gogo Mthupha e aveesea uma ia mea ina ia mafai ai ona ia auauna i le Atua moni e toatasi ma o loo soifua, o Ieova.

Ae o nisi o ona tauaiga, na tetee ona sa ia fesoasoani atu ia i latou i le tulaga tau tupe. Sa latou augani atu ia te ia ina ia tuuina atu mea ia sa faaaogā i faiga faataulaitu ia te i latou, faatasi ai ma ona malosiaga uigaese ina ia mafai ai pea ona maua mai ai ni tupe. Sa teena e Gogo Mthupha.

Faatasi ai ma le fesoasoani a le faapotopotoga o Molimau a Ieova lea sa i lona vaipanoa, na ia aoina ai mea sa ia faaaogā i ana togafiti faataulaitu i ni taga lapopoa se tolu ma susunu uma. A o mumū aʻe le afi ma mū ai ana mea sa faaaogā mo le tapuaiga faatemoni, na ia faapea mai, “Seʻi vaai! O lena seu, e lē o mafai ona ia faasaoina o ia lava.”

I le taimi mulimuli ane ai, na faailoa ai e Gogo Mthupha lona tuuina atu ia Ieova ma le olioli e ala i le papatisoga i le vai. O faapefea la ona tausia o ia i le taimi nei? E ala i le faatauina atu o fualaau ʻaina. Ioe, e ala i le malosi o le Afioga a le Atua e mafai ai e se tasi ona saoloto mai tapuaiga faatemoni. Na faapea mai Gogo Mthupha: “Ou te lei lagonaina muamua lava se saolotoga faapenei.”

[Faaopoopoga i lalo]