Le ʻAu Tāfiti o Mato
I TALA ane o le itu i sasaʻe o le matafaga o le Sami Mate o loo tu ai se aai anamuā ma e siomia e le vaomatua e taʻua o En-gedi. O mafa e papa ma tofē ua maua ai se nofoaga lelei e nonofo ai ʻoti o le vao o le Nuu o le Folafolaga, e tai pei o ʻoti o le vao o loo vaaia iinei.
O lenei meaola vaemau o se tasi o manu ofoofogia o le foafoaga. Seʻi o tatou suʻe i le Tusi Paia ma tagai totoʻa i lenei manu e maofa ai.
“O Mauga Maualuluga e mo ʻOti o le Vao Ia”
Na pese ai le faisalamo. (Salamo 104:18) O ʻoti o le vao ua fuafuaina lelei e nonofo i nofoaga maualuluga! E matuā vavave a latou gaoioi, e taufetuli saosaoa atu ma le mautinoa i luga o mea gaoa. E māfua ona o le auala na foafoaina ai o latou vae. O le maga o vae e mafai ona faava telē pe a tulai, e mau lelei ai le tu a le meaola po o le fealuai i luga o vaipapa.
O ʻoti o le vao e uigaese foi le paleni o o latou tino. E mafai ona latou feosofi i se mamao tele ma tuvae i se pito papa lauitiiti e mafai ona tu ai ona vae e fa. Na matauina e se tasi tagata suesue i meaola o Douglas Chadwick se tasi o ituaiga o ʻoti vao e na te faaaogaina le paleni o lona tino e alofia ai le puea faamanu i ofaga i luga o se vaipapa vaiti e faigata ona feliuai ai. Na ia faapea mai: “A o faataupupula atu i le isi vaipapa pe tusa ma le 400 futu (120 mita) le maulalo, e tutū i lalo ona vae pito i luma ae gagau aʻe le vaega i tua o lona tino i luga aʻe o lona ulu agaʻi atu i le papa e pei o loo tāfiti ma savali lemu. Sa ou matuā ofo lava, a o savali pea le ʻoti seia oo ina toe tu ona vae pito i tua i lalo ma faasaga atu i le itu lea na amata mai ai.” (National Geographic) E lētioa taʻua ʻoti o le vao o “le ʻau tāfiti o mato”!
‘Pe E te Iloaina le Taimi e Fananau ai ʻOti o le Vao?’
O ʻoti o le vao o ni meaola e ese le sesegi. E sili atu ia i latou le nonofo mamao ese mai tagata. O le mea moni, e faafaigata i tagata le faalatalata atu i ai mo le suesueina o lo latou olaga faalenatura. O lea la, o Lē e ana “manu e tataa i mauga e afe” sa talafeagai lona fesili atu ia Iopu e faapea: “Ua e iloa ea ona po e fanau ai le ʻoti o le vao o i mato?”—Salamo 50:10; Iopu 39:1.
O le tomai na foaiina mai e le Atua ua iloa ai e le ʻoti vao fafine le taimi e fanau ai. E na te sailia se vaipanoa malu ma fanau ai ni tamai ʻoti se tasi pe lua, e masani lava i le faaiuga o Me po o Iuni. O tamai ʻoti faatoʻā fananau mai e iloa ona laalaa i ni nai aso talu ona faananau mai.
‘Le Aila Pele ma le ʻOti o le Vao e Matagofie’
Na augani atu faapenei le tupu poto o Solomona i tane: “Ia e fiafia i lau avā na fai a o ē taulealea. Ia pei o le aila pele o ia ma le ʻoti o le vao e matagofie.” (Faataoto 5:18, 19) Sa lē o le uiga o lenei mea ia taʻu faatauvaa ai fafine. E foliga mai, sa tautala Solomona i le matagofie, onomea, ma isi uiga matagofie o nei manu.
O le ʻoti vao e iai i le anoanoai o “mea ola” lea e avatu ai le faamaoniga tele o le atamai o Lē na Foafoaina Mea. (Kenese 1:24, 25) Pe tatou te lē fiafia ea ina ua siosiomia e le Atua i tatou i le tele o nei meaola ofoofogia?
[Ē Ana le Ata i le itulau 24]
Courtesy of Athens University