Le Auala e Toleni ai Lou Loto Fuatia Ifo

“O SE loto fuatia ifo mamā, e te moe lelei ai.” O lenei muagagana faaanamua, ua faamatilatila ai se mea moni tāua e faapea: Pe afai tatou te utagiaina o tatou loto fuatia ifo, ona tatou olioli ai lea i le filemu ma le loto malie.

Ae peitai, e lē o tagata uma e mananao e faia faapea. Na faalauiloa mai e Adolf Hitler ia lava e faapea, o loo ia faia se taumafaiga e faasaoloto ai tagata mai le mea taufaasese, o le loto fuatia ifo. O lana pulega matautia ua aumaia ai se vaaiga e mataʻu ai i le matautia o le sauā e mafai ona oo i ai le tagata pe afai e latou te lē amanaiaina o latou loto fuatia ifo. E faapena foi ona leai se alofa i le tele o faiga sauā a tagata solitulafono i aso nei—i latou o loo faia ma le lē alofa ma le lē salamō le toso teine ma le fasioti tagata. O le fuainumera faateleina o nei tagata solitulafono, o tamaiti laiti. O se tusi o loo faaalia ai se suesuega na faia i lenei tulaga, o loo iai se ulutala e faapea, Children Without a Conscience (Tamaiti e Leai ni Loto Fuatia Ifo).

A o toatele tagata e lē o mafaufau lava e faia se solitulafono sauā, ae toatele foi e lē o iai ni lagona ilitata e uiga i le auai i feusuaiga lē mamā, pepelo, po o le faaʻoleʻole. Ua matuā paʻū maulalo le tulaga tau amio i le lalolagi aoao. I le faasino atu i le aposetasi tele mai le tapuaiga moni, na tusi ai le aposetolo o Paulo e faapea, o nisi Kerisiano o le a lolo atu i taaʻiga a le lalolagi ma i lea ua oo ina “faailogaina o latou lava loto fuatia ifo i le uamea aasa.” (1 Timoteo 4:2) Ua oo lava ina faateteleina le faamataʻu mai o amioga faapiopio i nei “aso e gata ai.” (2 Timoteo 3:1) O lea e tatau ai i Kerisiano ona faia ni taumafaiga malolosi ina ia puipuimaluina o latou loto fuatia ifo. E mafai ona tatou faia lenei mea e ala i le toleniina ma ati ae le loto fuatia ifo.

Le Mafaufau, le Loto, ma Lou Loto Fuatia Ifo

Na faapea mai le aposetolo o Paulo: “O le upu moni ou te fai atu ai i luma o Keriso, ou te le pepelo, ua molimau mai ia te aʻu loʻu loto fuatia ifo i le Agaga Paia.” (Roma 9:1) O lea la, e mafai ona avea ma molimau le loto fuatia ifo. E mafai e le loto fuatia ifo ona suesueina ala o amioga pe faamaonia pe tausalaina. O le tele o o tatou faalogona e iloa ai le saʻo ma le sese, ua tuuina i totonu ia i tatou e Lē na Foafoaina i tatou. Ae e manaomia pea ona faatulaga lelei ma toleni o tatou fuatia ifo. E faapefea? E ala i lo tatou aʻoaʻoina o le poto saʻo mai le Afioga a le Atua. Ua faapea mai le aposetolo o Paulo: “Ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) A o e tamauina manatu ma le finagalo o le Atua i lou mafaufau, o le a amata ona gaoioi lou loto fuatia ifo i se auala amioatua.

Ua fesoasoani atu Molimau a Ieova i le faitau miliona o tagata i le lalolagi aoao e ‘aʻoaʻoina le poto e uiga ia Ieova le Atua ma Iesu Keriso.’ (Ioane 17:3) E ala i la latou fuafuaga o le faia o suesuega faale-Tusi Paia i aiga e aunoa ma se totogi, ua latou aʻoaʻoina ai ē loto faamaoni i tapulaa a Ieova le Atua e faatatau i feusuaiga faaleituaiga, le ʻava malosi, faaipoipoga, feutagaiga faapisinisi, ma le tele lava o isi mataupu.a (Faataoto 11:1; Mareko 10:6-12; 1 Korinito 6:9, 10; Efeso 5:28-33) O le aʻoaʻoina o lenei “poto saʻo” o se laasaga tāua lea i le atiina ae o se loto fuatia ifo faaleatua. (Filipi 1:9) O le mea moni, e tusa lava po ua uma ona mauaina e se Kerisiano se malamalamaga saʻo o le Tusi Paia, ae tatau lava ona faaauau pea ona fafagaina e lē aunoa lona mafaufau i le Afioga a le Atua pe afai e manao ia malosi lelei pea lona loto fuatia ifo.—Salamo 1:1-3.

Ua faafesootaia foi e le Tusi Paia le loto fuatia ifo ma le loto, lea o loo aafia ai o tatou lagona ma faalogona ootia. (Roma 2:15) Afai e manao ina ia galue sologa lelei le loto fuatia ifo, e tatau ona galulue faatasi foi le loto ma le mafaufau. O lona uiga, e sili atu nai lo o le tau ina tuuina o faamatalaga i lou mafaufau. E tatau foi ona e faatulaga lelei lou loto—ou faalogona loloto, faanaunauga, ma tuinanauga. Ua faaaogaina e le tusi o Faataoto faaupuga faapenei, “e faasaga atu ai lou loto,” “taʻitaʻi tonu lou loto,” ma ia ‘mafaufau lou loto.’ (Faataoto 2:2; 23:19; 27:23) O le tasi o auala e faia ai lenei mea, o le mafaufau loloto ma manatunatu i le Tusi Paia. Fai mai le Salamo 77:12: “Ou te manatunatu foi i au galuega uma, ou te mafaufau i mea na e faia.” O le manatunatu loloto e fesoasoani lea ia i tatou e pāʻia o tatou faalogona i totonu ma uunaiga.

O se faaaoaoga, seʻi faapea o loo e faia se masaniga lē mamā e pei o le ulaula tapaa. I le pei o le toatele o tagata, e lē taumatea ua e iloa lelei lava e lamatia ai le soifua maloloina i le tapaa. Ae e ui lava i uunaiga a uo ma aiga, ae o loo faafaigata pea ia te oe ona taofia. E faapefea i lou mafaufau loloto i le feau a le Tusi Paia ona faamalosia ai lou loto fuatia ifo e tusa ai ma lenei mea?

Mo se faaaoaoga, taumafai e mafaufau loloto i upu a le aposetolo o Paulo o loo maua i le 2 Korinito 7:1: “O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” Ia maua le uiga moni o na upu. Fesili ifo ia te oe lava, ‘Po o ā “ia upu ua folafolaina mai” o loo taʻua e Paulo?’ O le faitauina o le manatu autū o le mau, o le a mafai ai ona e iloaina le uiga o fuaiupu muamua: “O lea ia o mai ai outou nai totonu ia te i latou, ma ia outou vavae mai, ua fetalai mai ai le Alii [Ieova], aua foi tou te papai atu i se mea leaga; ona ou talia ai lea o outou, e fai foi aʻu mo outou Tamā, e fai foi outou moʻu atalii ma oʻu afafine, ua fetalai mai ai le Alii e ona le malosi uma lava.”—2 Korinito 6:17, 18.

O le poloaiga a Paulo ina ia ‘faamamā i tatou mai mea e faaleagaina ai,’ ua iai nei se isi uunaiga faaopoopo! Ua avea le folafola mai a le Atua na te ‘talia i tatou,’ o lona uiga, o le tuuina lea o i tatou i lana puipuiga o se uunaiga malosi e faia ai faapea. Atonu o le a e fesili ifo ia te oe lava, ‘Po o le a mafai ona ou olioli i se faiā mafana ma ia—e pei o se faiā a se atalii po o se afafine ma se tamā?’ Pe e lē o se mea faaoso fiafia le manatu faapea, o loo ‘taliaina’ po o loo alofaina e se Atua atamai, ma le alofa? Afai e foliga mai e ese lena manatu ia te oe, ia mātau le auala e faaalia atu ai e tamā alolofa le alofa ma le agalelei i a latou fanau. Seʻi mafaufau nei la i le iai o se faiā faapea i le va o oe ma Ieova! O le tele o lou mafaufau loloto i ai, o le tele foi lena o lou naunau ina ia faatupuina lena faiā.

Ae mātau: E faatoʻā mafai ona iai se faiā mafana ma le Atua pe afai e te ‘lē papai atu i se mea leaga.’ Fesili ifo ia te oe lava: ‘Pe e lē o aofia ai i “mea leaga” e inosia e le Atua le masani lea o le ulaula tapaa? Po o le faaaogaina ea o lenei mea e “faaleagaina ai le tino,” ma oo ai ina ou aafia i lamatiaga uma o le soifua maloloina? Talu ai o Ieova o se Atua mamā, ma e “paia,” pe faamata e fiafia o ia i loʻu faaleagaina o aʻu lava ma le loto i ai i lenei auala?’ (1 Peteru 1:15, 16) Ia mātau foi le lapataiga a Paulo faasaga i le ‘faaleagaina o le agaga,’ po o mafaufauga o le loto o se tasi. Ia e fesili ifo: ‘Po o pulea e lenei masaniga leaga oʻu mafaufauga? Po o le a ou oo atu i se mamao ina ia faamalieina ai oʻu tuinanauga, ma atonu e oo ai ina lamatia loʻu soifua maloloina, loʻu aiga, e oo lava i loʻu tulaga i luma o le Atua? O le ā le tele ua oo i ai loʻu faaaogaina o le tapaa e faaleagaina ai loʻu olaga?’ I le feagai ai ma nei fesili e faaoso ai le lē fiafia, atonu o se mea lelei lea mo oe e maua ai le lototele e tuu ai!

O le mea moni, atonu o le a e manaomia le fesoasoani ma le lagolagosua mai isi e maua ai le malosi e manumalo ai i le tapaa. Ae o le mafaufau loloto pea i le Tusi Paia, o le a tele ai mea e mafai ona faia e toleni ma faamalosia ai lou loto fuatia ifo e tuusaoloto ai oe mai lena masaniga leaga.

Pe a Tatou Faia se Mea Sese

E ui lava i a tatou taumafaiga e sili ona lelei e faia le mea saʻo, i nisi taimi, e manumalo ai lava lo tatou lē lelei atoatoa ma tatou faia ai le mea sese. Ona faalavelavea ai lea o i tatou e o tatou loto fuatia ifo, ae atonu o le a tofotofoina i tatou e faaleamanaiaina. Pe oo foi ina tatou matuā loto vaivai ai ma ua tatou mananao e lafoai taumafaiga uma ina ia auauna i le Atua. Ae peitai, seʻi manatu i le tulaga o le tupu o Tavita. Ina ua uma ona ia faia le mulilua ma Patesepa, na matuā ōia lona loto fuatia ifo. Ua ia faamatala mai le lagona mafatia na oo ia te ia: “Auā sa mamafa lou aao i luga ia te au i le ao atoa foi ma le po; ua liua lava loʻu malosi i le vevela o le tausaga vevela.” (Salamo 32:4) E tiga? E mautinoa lava! Ae o lenei faanoanoa faaleatua na uunaia ai Tavita e salamō ma oo ai ina faia se leleiga ma le Atua. (Faatusatusa i le 2 Korinito 7:10.) O le olega ma le tiga a Tavita mo le faamagaloga, ua matuā faamaonia ai lona salamō faamaoni. Talu ai sa tali atu o ia i lona loto fuatia ifo, na maua ai e Tavita se fesoasoani e suia ai ma iu ina toe maua lona olioli.—Salamo 51.

E mafai foi ona tupu lena mea i aso nei. O nisi sa suesue le Tusi Paia ma Molimau a Ieova i aso ua mavae, ae na taofia ina ua latou iloa e lē ogatusa o latou olaga ma tapulaa maualuluga a le Atua. Atonu sa latou nonofo ma se tasi o le isi ituaiga e aunoa ma le faaipoipoina, pe sa avea foi ma pologa i ni masaniga lē mamā. Na faatigaina i latou e o latou loto fuatia ifo!

Afai o e iai i se tulaga faapena, manatunatu i upu a le aposetolo o Peteru i le aso Penetekoso. Ina ua ia faaalialia agasala a tagata Iutaia o lona nuu, ona “tuia lea o latou loto.” Nai lo o le faavaivai, na latou utagia le fautuaga a Peteru ina ia salamō, ma na latou maua ai le finagalo malie o le Atua. (Galuega 2:37-41) E mafai foi ona e faia lena mea! Nai lo le lafoaia o le upu moni ona o le ōia o lou loto fuatia ifo, ia uunaia oe e lou loto fuatia ifo ina ia ‘salamō ma liliu ese.’ (Galuega 3:19) I le faia o ni taumafaiga ma le maumauai, e mafai ona e faia suiga manaomia ina ia maua ai le finagalo malie o le Atua.

‘Ia Iai se Loto Fuatia Ifo Lelei’

E tusa lava pe faatoʻā amata ona e aʻoaʻoina ala o Ieova po ua tele tausaga o le poto masani i le avea o se Kerisiano taumatuaina, ua talafeagai ai le apoapoaiga a Peteru e faapea: “Ia ia te outou le loto fuatia ifo lelei.” (1 Peteru 3:16) O se mea e lelei ai, ae lē o se avega mamafa. Ia toleni le loto fuatia ifo e ala i le fafagaina o lou mafaufau ma le loto i le atamai o loo i le Afioga a le Atua, le Tusi Paia. Ia utagia lou loto fuatia ifo pe a lapataia oe. Ia olioli i le filemu o le mafaufau e mafai ona aumaia pe a usitaia e se tasi lona loto fuatia ifo.

O le mea moni, o le toleniina ma le faatulagaina lelei o lou loto fuatia ifo e lē o se gaoioiga faigofie. Ae peitai, e mafai ona e tatalo ia Ieova le Atua e fesoasoani ia te oe. E faatasi ma lana fesoasoani, o le a mafai ai ona e auauna i le Atua “ma le loto fuatia ifo ua lelei, ma le faatuatua faamaoni.”—1 Timoteo 1:5.

[Faaopoopoga i lalo]

[Ata i le itulau 6]

O le faitau ma mafaufau loloto i le Afioga a le Atua, ua fesoasoani ia i tatou i le toleniina o o tatou loto fuatia ifo