Seʻi o Tatou Taofi Mau i lo Tatou Faatuatua Tautele!

“I e ua maua le faatuatua e tusa lona lelei ma lo matou.”—2 PETERU 1:1.

1. O le ā na fetalai ai Iesu i le lapataiaina o ona aposetolo, ae o le ā na fai atu ai ma le faamaualuga Peteru?

I LE afiafi a o lei maliu Iesu, na ia fetalai ai faapea o le a lafoaia o ia e ona aposetolo uma. Ae na fai atu ma le faamaualuga se tasi o i latou, o Peteru lea: “E ui lava ina tausuai o tagata uma ona o oe, ou te le tausuai lava aʻu.” (Mataio 26:33) Peitai e ese le mea na silafia e Iesu. O le pogai lea na ia fetalai atu ai ia Peteru i lena lava faatasiga: “Ua ou faatoga mo oe, ina neʻi mavae lou faatuatua; a o oe foi, pe a liua mai oe, ona e faamalosi ai lea i ou uso.”—Luka 22:32.

2. E ui lava i le soona mautinoa naʻuā o Peteru, ae o ā ana gaoioiga na iloa ai sa vaivai lona faatuatua?

² O Peteru, lea na soona mautinoa naʻuā i lona faatuatua, na ia faafitia Iesu i lena lava po. E faatolu lava ona ia faafitia lona iloaina o Keriso! (Mataio 26:69-75) Ina ua toe “liua” o ia, atonu sa matuā tagitagi atu ma le leotele ma le manino i ona taliga fetalaiga a lona Matai, “ona e faamalosi ai lea i ou uso.” E tele se aafiaga mai i lena taimi o le olaga o Peteru i lena timaiga, e pei ona faamaonia mai i tusi e lua na ia tusia, lea o loo faatumauina i totonu o le Tusi Paia.

Le Pogai na Tusia ai e Peteru Ana Tusi

3. Aisea na tusia ai e Peteru lana uluai tusi?

³ Pe tusa ua 30 tausaga talu ona mavae le maliu o Iesu, na tusia ai e Peteru lana uluai tusi, sa tusi atu ai i ona uso i Pono, Kalatia, Kapatokia, Asia, ma Pitunia, o vaipanoa o loo avea nei ma vaega i mātū ma sisifo o Take. (1 Peteru 1:1) O tagata Iutaia, o nisi o i latou na avea ma Kerisiano i le Penetekoso i le 33 T.A., e mautinoa sa aofia ai i latou i ē na tusi atu i ai Peteru. (Galuega 2:1, 7-9) E toatele tagata o Nuu Ese o ē na fesagai ma tofotofoga ogaoga mai tagata tetee. (1 Peteru 1:6, 7; 2:12, 19, 20; 3:13-17; 4:12-14) O lea na tusi atu ai Peteru i nei uso ina ia faalaeiauina i latou. O lona faanaunauga ina ia fesoasoani ia i latou e maua “le iuga o lo [latou] faatuatua, o le faaolaina lea o o [latou] agaga [“solu,” NW].” O lea, i lana timaiga faamavae, na ia faamalosiau atu ai: “Ia outou tetee atu [i le Tiapolo], [ia] mausali outou i le faatuatua.”—1 Peteru 1:9; 5:8-10.

4. Aisea na tusia ai e Peteru lana tusi lona lua?

⁴ Mulimuli ane, ona tusi atu lea e Peteru le tusi lona lua i nei Kerisiano. (2 Peteru 3:1) Aisea? Talu ai sa tulai mai se isi lamatiaga e sili atu ona matautia. Sa taumafai nisi tagata o ē sa faia amioga lē tatau e faaofi mai a latou amioga leaga i tagata talitonu ma sa taitaiseseina ai nisi! (2 Peteru 2:1-3) E lē gata i lea, sa lapatai atu Peteru e faatatau i ē tauemu. Sa ia tusia i lana uluai tusi e faapea, “ua lata mai le gataaga o mea uma lava,” ma e foliga mai o lea ua aamu i ai nisi i lena manatu. (1 Peteru 4:7; 2 Peteru 3:3, 4) Seʻi o tatou iloiloina le tusi lona lua a Peteru ma vaai pe na faapefea ona faamalosia ai le au uso ina ia mausalī i le faatuatua. I lenei uluai mataupu, o le a tatou iloiloina ai le 2 Peteru mataupu 1.

Le Fuafuaga o le Mataupu 1

5. Ua faapefea ona sauniunia e Peteru lana au faitau mo le talanoaina o ni faafitauli?

⁵ E lē o vave ona faailoa atu e Peteru faafitauli matuia. Nai lo lea, ua ia sauniunia se auala e talanoaina ai nei faafitauli e ala i lona taumafai ia faateleina le talisapaia e lana au faitau o mea ua latou maua ina ua avea i latou ma Kerisiano. Ua ia faamanatu ia i latou folafolaga ofoofogia a le Atua ma le maufaatuatuaina o valoaga a le Tusi Paia. Ua ia faia faapea e ala i le faamatala atu o le liliuga, le vaaiga na ia vaai moni ai lava ia Keriso i le mana o le Malo.—Mataio 17:1-8; 2 Peteru 1:3, 4, 11, 16-21.

6, 7. (a) O le ā se lesona e mafai ona tatou aʻoaʻoina mai le faatomuaga o le tusi a Peteru? (e) Pe afai tatou te avatu ni fautuaga, o le ā se ituaiga o taʻutinoga atonu e aogā ona fai atu i nisi o taimi?

⁶ Pe mafai ona tatou aʻoaʻoina se lesona mai le faatomuaga a Peteru? Pe e lē sili ea ona taliaina fautuaga pe a muamua ona tatou autaluina ma ē o loo faalogologo mai, vala o le faamoemoe sili o le Malo lea o loo tatou taufai faapelepele uma i ai? Ae faapefea le faaaogaina o se mea na oo moni i ai? E foliga mai, ina ua mavae le maliu o Iesu, sa masani ona taʻua e Peteru le vaaia o lena vaaiga ia Keriso i le mamalu o le Malo.—Mataio 17:9.

⁷ Ia manatua foi, i faamaoniga uma lava, e foliga mai i le taimi na tusia ai e Peteru lana tusi lona lua, ae ua tele le salalau atu o le Evagelia a Mataio ma le tusi a le aposetolo o Paulo i Kerisiano i Kalatia. Atonu la o vaivaiga faaletagata o Peteru faapea ma le talaaga o lona faatuatua e foliga mai ua lauiloa uma i ē na latou tupulaga faatasi. (Mataio 16:21-23; Kalatia 2:11-14) Peitai ane, e lei avea lena mea e taofia ai lona saolotoga e tautala atu. O le mea moni, atonu ua atili ai ona logoleleia lana tusi ia i latou o ē sa iloa o latou lava vaivaiga. O lea la, pe a fesoasoani atu ia i latou o iai ni faafitauli, pe e lē aogā ea pe a tatou taʻutino atu i ai o i tatou foi e lē lelei atoatoa?—Roma 3:23; Kalatia 6:1.

Se Faafeiloaiga Faalaeiau

8. I le ā le uiga e foliga mai na faaaogā ai e Peteru le upu “faatuatua”?

⁸ Seʻi manatu nei i le faafeiloaiga a Peteru. Ua vave lava ona ia taʻua le mataupu o le faatuatua, i lona taʻua o lana au faitau e faapea o “e ua maua le faatuatua e tusa lona lelei ma lo matou.” (2 Peteru 1:1) Iinei e foliga mai o le faaupuga “le faatuatua” e faauiga atu i le “faatauanauina maumauai” ma o loo faasino atu i talitonuga po o aʻoaʻoga faa-Kerisiano, lea e taʻua i nisi taimi i le Tusi Paia o “le upu moni.” (Kalatia 5:7; 2 Peteru 2:2; 2 Ioane 1) O le upu “faatuatua” ua masani ona faaaogā i lenei uiga nai lo le uiga lautele o le faatuatuaina po o le mautinoa lea e lagona ai agaʻi i se tagata po o se mea.—Galuega 6:7; 2 Korinito 13:5; Kalatia 6:10; Efeso 4:5; Iuta 3.

9. Aisea atonu ua sili ai ona logoleleia le faafeiloaiga a Peteru i tagata o Nuu Ese?

⁹ Atonu na sili ona logoleleia le faafeiloaiga a Peteru i le au faitau mai Nuu Ese. Sa leai ni feutagaiga e faia e tagata Iutaia ma tagata o Nuu Ese, sa latou ʻinoʻino i ai, ma sa iai pea i tagata Iutaia o ē na avea ma Kerisiano, o latou uiga faailogatagata i tagata o Nuu Ese. (Luka 10:29-37; Ioane 4:9; Galuega 10:28) Peitai, o Peteru, o ia o se tamafanau moni a Iutaia ma o se aposetolo a Iesu Keriso, na ia taʻua faapea o lana au faitau—o tagata Iutaia ma tagata o Nuu Ese—sa tutusa le faatuatua na ia i latou ma na tutusa foi le faaeaga sa latou olioli ai faatasi ma ia.

10. O ā ni lesona e mafai ona tatou aʻoaʻoina mai le faafeiloaiga a Peteru?

¹⁰ Seʻi manatu i lesona matagofie ua aʻoaʻo mai e le faafeiloaiga a Peteru ia i tatou i aso nei. E lē faailogatagata le Atua; e lē faaʻauʻau atu o ia i le isi ituaiga po o le isi atunuu nai lo isi. (Galuega 10:34, 35; 11:1, 17; 15:3-9) E pei ona aʻoaʻo mai e Iesu lava ia, o Kerisiano uma lava o ni uso, ma e leai se tasi o i tatou e tatau ona fia sili aʻe sona manatu. E lē gata i lea, ua faamamafa mai i le faafeiloaiga a Peteru faapea o i tatou uma lava o se au uso i le lalolagi aoao, o loo ia i tatou ‘le faaeaga tutusa’ o le faatuatua lea sa iai foi ia Peteru ma ona uso aposetolo.—Mataio 23:8; 1 Peteru 5:9.

Le Poto ma Folafolaga a le Atua

11. Ina ua uma lana faafeiloaiga, o ā ni mea tāua ua faamamafa atu e Peteru?

¹¹ Ina ua uma lana faafeiloaiga, ona tusi atu lea o Peteru: “Ia faateleina ia te outou le alofa tunoa ma le manuia [“filemu,” NW].” E faapefea ona faateleina ia i tatou le alofa tunoa ma le filemu? Ua tali mai Peteru: “I [le] . . . iloa lelei [o] le Atua, atoa ma lo tatou Alii o Iesu.” Ona ia faapea mai lea: “Ua foaiina mai ia te i tatou e lona mana Atua o mea uma e oo ai i le ola ma le amio Atua.” Ae faapefea ona tatou maua nei mea tāua? “I lo tatou iloa lelei o le na valaau mai ia i tatou i lona mamalu ma lona lelei silisili.” E faalua la ona faamamafa e Peteru faapea, e manaomia tele le poto saʻo e uiga i le Atua ma lona Alo.—2 Peteru 1:2, 3; Ioane 17:3.

12. (a) Aisea ua faamamafa ai e Peteru le tāua o le poto saʻo? (e) Ina ia maua folafolaga a le Atua, o le ā e tatau ona tatou muai faia?

¹² O “aʻoaʻo pepelo” ia o loo lapatai ai Peteru i le mataupu e 2 ua latou faaaogā “upu pepelo” e faaseseina ai Kerisiano. O le auala lenei ua latou taumafai e faatosina ai Kerisiano ina ia faia amioga lē tatau na sa faasaoina mai ai i latou. E matautia iuga e oo i so o se tasi na faasaoina mai e ala i “le poto saʻo e uiga i le Alii ma le Faaola o Iesu Keriso” ae mulimuli ane ua toe faananau atu i ai i na faiga faaʻoleʻole. (2 Peteru 2:1-3, 20, NW) E foliga mai a o faatalitali Peteru mo le talanoaina o lenei faafitauli i se taimi mulimuli ane, ua ia faamamafaina ai i le amataga lava o lana tusi le matafaioi a le poto saʻo i le tausisia o se tulaga mamā i luma o le Atua. Ua mātauina e Peteru faapea “ua ia [le Atua] folafolaina mai ai o mea e silisili ese lava ma le aoga, ina ia tofusia faatasi ai [i tatou] i le uiga o le Atua.” Peitai, ina ia mauaina nei folafolaga, lea ua avea o se vaega tāua o lo tatou faatuatua, ua faapea mai Peteru, e tatau ona tatou muai “sosola ese . . . i le amio leaga o i le lalolagi i le tuʻinanau.”—2 Peteru 1:4.

13. O le ā ua filifilia uma e Kerisiano faauuina ma “isi mamoe” e maumauai atu i ai?

¹³ E faapefea ona e manatu i folafolaga a le Atua? Po o ogatasi ea ma le auala o loo manatu ai le vaega totoe o Kerisiano faauuina? I le 1991, sa taʻu mai ai e Frederick Franz, o le peresitene o le Watch Tower Bible and Tract Society i lena taimi, o lē na galue i le faiva faataimi atoa mo le silia i le 75 tausaga, se aotelega o lagona o i latou o ē faamoemoe e nofo tupu faatasi ma Keriso, i le faapea mai: “O loo matou maumauai pea e oo mai lava i lenei itula, ma o le a matou maumauai pea seia oo ina matuā faamaonia mai e le Atua lona moni i ana ‘folafolaga tautele ma le matuā silisili.’” Sa tumau pea le mautinoa o le uso o Franz i le folafolaga a le Atua e faatatau i le toetu faalelagi, ma sa ia maumauai i le faatuatua seia oo i lona maliu i le 99 o ona tausaga. (1 Korinito 15:42-44; Filipi 3:13, 14; 2 Timoteo 2:10-12) I se tulaga tutusa, e faitau miliona o loo maumauai pea i le faatuatua, i lo latou taulai atu i le folafolaga a le Atua i le parataiso i le lalolagi lea o le a ola fiafia ai e faavavau tagata. Po o oe ea o se tasi o i latou nei?—Luka 23:43; 2 Peteru 3:13; Faaaliga 21:3, 4.

Le Tali Atu i Folafolaga a le Atua

14. Aisea ua lisiina ai e Peteru le amio lelei e avea ma uluai uiga e faaopoopo atu i le faatuatua?

¹⁴ Po o tatou loto faafetai ea i le Atua ona o mea o loo ia folafola mai? Afai o lena, ua faalaeiau mai Peteru, e tatau ona tatou faaali atu. “O le mea lava lea” (ona ua tuuina mai e le Atua ia i tatou folafolaga tāua), e tatau ai ona tatou faia se taumafaiga sili ina ia gaoioi. E lē mafai ona faamalieina i tatou i le na ona iai i le faatuatua pe tau ina ia iloa le upu moni o le Tusi Paia. E lē lava lena! Atonu i aso o Peteru sa taʻua soo ai e nisi i faapotopotoga le faatuatua peitai sa latou aafia foi i amioga lē tatau. Sa manaomia ona lelei a latou amioga, o lea ua faalaeiau atu ai Peteru: “Ia faaopoopoina le amio lelei i lo outou faatuatua.”—2 Peteru 1:5; Iakopo 2:14-17.

15. (a) Aisea ua lisiina ai le poto e sosoo atu i le amio lelei, e avea o se uiga e tatau ona faaopoopo atu i le faatuatua? (e) O ā isi uiga o le a faaauupegaina ai i tatou ina ia maumauai i le faatuatua?

¹⁵ Ina ua uma ona taʻua le amio lelei, ona lisiina lea e Peteru isi uiga e ono e tatau ona iai, pe faaopoopo atu, i lo tatou faatuatua. O nei uiga taitasi e manaomia pe afai tatou te fia “tumau i le faatuatua.” (1 Korinito 16:13) Talu ai sa ‘faauigaseseina le Tusi Paia’ e aposetate, ma faatupuina ‘aʻoaʻoga pepelo,’ ona sosoo lea ma le lisi atu e Peteru o le poto faapea e tāua, i lona fai atu: “Ia faaopoopo foi le iloa [“poto,” NW] i le amio lelei.” Ona ia faaauau ai lea: “Ia faaopoopo foi le loto mama i le iloa [“poto”], ma ia faaopoopo le onosai i le loto mama, o le amio Atua foi i le onosai, ia faaopoopo foi le fealofani o le au uso i le amio Atua, o le alofa foi i le fealofani o le au uso.”—2 Peteru 1:5-7; 2:12, 13; 3:16.

16. O le ā e tupu pe a faaopoopo atu i le faatuatua uiga uma ia o loo lisiina e Peteru, ae o le ā e tupu pe afai e lē faaopoopo atu i ai?

¹⁶ O le ā o le a tupu pe a faaopoopoina nei mea uma e fitu i lo tatou faatuatua? Ua tali mai Peteru: “Pe a maua e outou ia mea, ma ua faateleina, ona avea ai lea o outou ma e ua le paie, a o e fua mai le iloa lelei [“poto saʻo,” NW] o lo tatou Alii o Iesu Keriso.” (2 Peteru 1:8) I le isi itu, ua taʻua e Peteru: “O ia e le o i ai nei mea, ua tauaso ia, ua faasegosego, ua faagalogalo foi e ia o le faamamāina o ana agasala tuai.” (2 Peteru 1:9) Ia mātau, ua suia e Peteru le faaaogaina o upu “outou” ma le “tatou” i le faaaogā o le upu “ia.” E ui lava i se tulaga faanoanoa, sa iai nisi na tauaso, sa faagalogalo, ma lē mamā, ae sa agalelei Peteru ma na te lei faapea atu o lē faitau o se tasi o i latou nei.—2 Peteru 2:2.

Le Faalaeiauina o Ona Uso

17. O le ā atonu ua uunaia ai le aioiga agalelei a Peteru ina ia faia “nei mea”?

¹⁷ Atonu i le matauina faapea o ē fou o loo sili ona faigofie ona faaseseina, ua faalaeiau atu ai ma le agalelei Peteru ia i latou: “Le au uso e, ia atili ai ona faamalolosi outou ia faamauina lo outou valaauina ma lo outou filifilia, auā pe a outou faia ia mea tou te le iu vale lava.” (2 Peteru 1:10; 2:18) O Kerisiano faauuina o ē ua latou faaopoopoina nei mea e fitu i lo latou faatuatua, o le a olioli i se taui sili, e pei ona taʻua e Peteru: “Ona matuā faaofia ai lea o outou i le ala o le malo faavavau o lo tatou Alii, o lo tatou Faaola lea o Iesu Keriso.” (2 Peteru 1:11) O le a mauaina e “isi mamoe” le tofi e faavavau i le nofoaga faalelalolagi o le Malo o le Atua.—Ioane 10:16; Mataio 25:33, 34.

18. Aisea ua naunau ai Peteru ina ia ‘faamanatu atu pea’ i ona uso?

¹⁸ E manao moni lava Peteru ina ia maua e ona uso lena taui sili. Ua ia tusi: “O le mea lea ou te le faatamala ai, e ui lava ina ua iloa e outou, ma ua faatumauina i lenei lava upu moni.” (2 Peteru 1:12) O loo faaaogā e Peteru le upu Eleni ste·riʹzo, lea ua faaliliuina iinei “ua faatumauina” ae o loo faaaogā ai le upu “faamalosi” i le timaiga a Iesu lea na muai fai atu ia Peteru: “Ona e faamalosi ai lea i ou uso.” (Luka 22:32) O le faaaogaina o lena upu e ono taʻu mai ai faapea, o loo manatua e Peteru le timaiga malosi na ia maua mai lona Alii. Ua faapea atu nei Peteru: “O loʻu manatu foi, e tatau ina ia ou faamalosi atu ia te outou i loʻu faamanatu atu i aso uma ou te i ai i lenei fale apitaga [tino faaletagata]; ina ua ou iloa e vave ona tuueseina o loʻu nei fale apitaga.”—2 Peteru 1:13, 14.

19. O ā fesoasoani tatou te manaomia i aso nei?

¹⁹ E ui ina faapea atu ma le agalelei Peteru o lana au faitau ua “faatumauina i [le] upu moni,” ae ua ia iloa e mafai ona faavaatuʻia lo latou faatuatua. (1 Timoteo 1:19) Talu ai ua ia iloa ua lē o toe umi ona oti lea o ia, ua ia faalaeiau atu ai i ona uso e ala i le taʻuina atu i ai o mea e mafai ona latou toe mafaufau i ai ina ia faamalosia ai pea i latou faaleagaga. (2 Peteru 1:15; 3:12, 13) E faapena foi ona tatou manaomia i aso nei ni faamanatuga faifai pea ina ia tumau mausalī ai i le faatuatua. E tusa lava po o ai i tatou pe ua fia le umi talu ona tatou iai i le upu moni, ae lē mafai ona tatou lafoaia le faitauina e lē aunoa o le Tusi Paia, o suesuega totino, ma le auai i sauniga a le faapotopotoga. E fai faamolemolega nisi pe a lē auai, i le faapea mai ua latou lē lavavā pe e tutusa lava mea o loo fai i sauniga uma, pe e lē o lelei ona faia sauniga, peitai sa iloa e Peteru le vave e mafai ona mou atu ai le faatuatua o so o se tasi o i tatou pe afai tatou te soona mautinoa naʻuā.—Mareko 14:66-72; 1 Korinito 10:12; Eperu 10:25.

Le Faavae Mausalī mo lo Tatou Faatuatua

20, 21. Na faapefea i le liliuga ona faamalosia ai le faatuatua o Peteru ma ē na faitauina ana tusi, o loo aofia ai ma i tatou i aso nei?

²⁰ Po o faavae aʻe ea lo tatou faatuatua i ni talafaafagogo ua poto ona fatuina? ‘E leai,’ ua matuā faamamafa mai le tali a Peteru: “E lei usiusitai i matou i tala o le vavau ua fatua ma le poto, ina ua matou faailoa atu ia te outou le mana ma le afio mai o lo tatou Alii o Iesu Keriso; peitai na matou vaavaai atu i lona lava mamalu.” O Peteru, Iakopo, ma Ioane sa iai faatasi ma Iesu ina ua latou vaaia se vaaiga o ia i le mana o le Malo. Ua faamatala e Peteru: “Na maua e ia mai le Atua le Tamā o le mamalu ma le viiga, ina ua tulei mai ia te ia le siufofoga lava nai le mamalu silisili ese, ua faapea mai, ‘O loʻu Atalii pele lena, ou te fiafia lava ia te ia.’ O le siufofoga lava lea na matou faalogologo ai, na tulei mai mai le lagi, ina o matou i ai ma ia i le mauga paia.”—2 Peteru 1:16-18.

²¹ Ina ua vaaia e Peteru, Iakopo, ma Ioane lea vaaiga, sa oo ina matuā moni ai le Malo ia i latou! Ua taʻua e Peteru: “O loo ia te i tatou foi le upu o le valoaga e sili lona mausali, e lelei ona outou naunau [“uaʻi atu,” NW] i ai.” Ioe, o ē na faitauina le tusi a Peteru, o loo aofia ai ma i tatou i aso nei, ua mauaina se mafuaaga malosi e uaʻi atu ai i valoaga e uiga i le Malo o le Atua. I le ā le auala e manaomia ona tatou uaʻi atu ai? Ua tali mai Peteru: “E pei o se molī e mumū i le mea pogisa, seia tafa mai ata, seia alu ae foi le fetu ao i o outou loto.”—2 Peteru 1:19; Tanielu 7:13, 14; Isaia 9:6, 7.

22. (a) O le ā e manaomia e o tatou loto ona mataala pea i ai? (e) E faapefea ona tatou uaʻi atu i le upu o le valoaga?

²² O le a pogisa o tatou loto pe a aunoa ma le malamalama o le upu o le valoaga. Peitai o le uaʻi atu i ai, ua mataala ai pea loto o Kerisiano i le tafa mai o ata o le aso pe a oso aʻe le “fetu ao,” o Iesu Keriso lea, i le mamalu o le Malo. (Faaaliga 22:16) E faapefea e i tatou i aso nei ona uaʻi atu i le upu o le valoaga? E ala i le suesueina o le Tusi Paia, o sauniuniga mo sauniga ma le faia o se sao, ma le ‘mafaufau i nei mea, ma faamasani i ai.’ (1 Timoteo 4:15) Pe afai e tatau ona avea le upu o le valoaga o se lamepa o loo susulu i le “mea pogisa” (o tatou loto), e tatau la ona tatou faataga ina ia matuā faaaafia ai i tatou—o tatou faanaunauga, faalogona, uunaiga o le loto, ma sini. E manaomia ona avea i tatou o ni tagata suesue o le Tusi Paia, auā ua faaiu mai e Peteru le mataupu 1: “Ua leai se valoaga o i le Tusi e faamatalafuaina. Auā e le o le loto o tagata na tuu mai ai le valoaga anamua, a o tagata o le Atua na talatalaina mai ina ua osofia mai e le Agaga Paia.”—2 Peteru 1:20, 21.

23. Mo le ā ua sauniunia ai e le uluai mataupu o le 2 Peteru 1 le au faitau?

²³ I le mataupu amata o lana tusi lona lua, ua saunia ai e Peteru se uunaiga malosi mo i tatou e maumauai ai i lo tatou faatuatua tautele. Ua tatou sauniuni atu nei mo le talanoaina o mataupu e sili ona tāua o loo mulimuli mai. I le mataupu o loo sosoo mai o le a talanoaina ai le mataupu e 2 o le 2 Peteru, lea o loo faatautaia ai e le aposetolo le luʻi o taaʻiga lē mamā sa ofi atu i totonu o faapotopotoga.

E te Manatua?

◻ Aisea ua faamamafa ai e Peteru le tāua o le poto saʻo?

◻ O le ā le mafuaaga atonu ua lisiina ai le amio lelei e avea ma uluai uiga e faaopoopo atu i le faatuatua?

◻ Aisea ua naunau ai Peteru ina ia faamanatu atu pea i ona uso?

◻ O le ā le faavae mausalī ua saunia e Peteru mo lo tatou faatuatua?

[Ata i le itulau 9]

Sa lei avea vaivaiga o Peteru e uunaia ai o ia e lafoai lona faatuatua