Aritako—Se Aumea Faamaoni

O ARITAKO o ia o se tasi mai le toatele o aumea galulue faamaoni a le aposetolo o Paulo. O le ā e te mafaufau i ai pe a e faalogo i lona igoa? Pe iai ea se mea e te manatua ai? Pe mafai ona e faapea mai po o le ā sana vaega na ia saosaolaumea ai i le talafaasolopito o uluai Kerisiano? E ui atonu o Aritako e lē o se tasi o tagata o loo taʻua i le Tusi Paia lea e sili ona tatou masani ai, ae peitai sa aofia o ia i nisi o tala o loo faamatalaina mai i Tusitusiga Kerisiano Eleni.

O ai la Aritako? O le ā le la faiā ma Paulo? Aisea e mafai ai ona faapea atu sa avea Aritako o se aumea faamaoni? Ma o ā ni lesona e mafai ona tatou aʻoaʻoina mai le iloiloina o lana faaaoaoga?

E mataina le aliai mai o Aritako i tala o le tusi o Galuega i le taimi tonu na tutupu ai vevesi ma le fefinauai o se vaega faatupu faalavelave i le aai o Efeso. (Galuega 19:23-41) Sa avea le fausiaina o malumalu ario o le atua sese o Tiana o se faiga pisinisi e tele se tupe e maua mai ai mo Temetiu ma isi tagata Efeso latou te faia mea ario. O lea, ina ua faapogaia e le galuega talaʻi a Paulo le lafoaia e le toatele o tagata o le aai o le tapuaiga lē mamā i lenei atua fafine, sa faatupuina loa e Temetiu le ita o isi tagata o loo faia galuega faapena. Na ia taʻu atu ia i latou e faapea, o le talaʻiga a Paulo e lē gata o le a afaina ai lo latou tulaga lelei tau tupe, ae foliga mai foi o le a oo ina faamutaina ai le tapuaiga ia Tiana.

Talu ai sa lē mafai ona latou maua Paulo, ona tatoso faamalosi atu lea e le motu o tagata o loo matuā feita, ia Aritako ma Kaio i totonu o le fale mataaga. Talu ai sa fesagai i laʻua nei e toalua ma se lamatiaga matautia, ona aioi atu ai lea o uo a Paulo ia Paulo ina ia “aua le faamalosi ona alu i le fale mataaga.”

Seʻi faaāta i lou mafaufau lou iai i lena tulaga. Pe tusa ma le lua itula, o loo alalaga atu ai pea le motu o tagata faatupu faalavelave, “Ua silisili Tiana o Efeso!” Talu ai le matuā siomia atoa o i laʻua e lena vao o tagata maelega valea, ma lē mafai ai ona la tautatala atu e puipuia i laʻua, atonu o se tulaga sa matuā faamataʻuina ai Aritako ma Kaio. Atonu sa la tau mānatu pe faamata e la te toe sao mai ai. Ae o le mea e fiafia ai, auā sa toe faasaoina mai i laʻua. O le mea moni lava, o le manino o le faamatalaga a Luka ua manatu ai nisi tagata aʻoga popoto e faapea sa maua mai ana faamatalaga mai ni molimau vaaitino, atonu po o laʻua ia o Aritako ma Kaio.

Na iu ina mafai e le tusiupu o le aai ona faafilemu le vevesi. Atonu sa avea lena o se matuā laveaiga mo Aritako ma Kaio ina ua la faalogo atu o loo ia tautino atu ma le maoti le leai o se la sala ma la vaaia ai le mou atu o le teteega lea na faasagasaga mai ia i laʻua.

E faapeī ni ou lagona e ono iai pe a faatoʻā mavae atu se mea faapena? Po o le a e faapea mai ea e lē o sou lea tofi le avea o oe o se aumea misionare a Paulo, sa matautia tele, ma e sili ai ona e sailia se olaga e sili atu ona filemu? Sa lē o le manatu lena na iai ia Aritako! Ona o ia o se tasi e sau mai Tesalonia, e foliga mai la ua leva ona ia iloa lelei lamatiaga o le folafolaina atu o le tala lelei. A o talaʻi atu Paulo i lona aai pe ā o ni tausaga se lua a o lei tupu lenei vevesi, sa tupu ai foi se vevesi iina. (Galuega 17:1-9; 20:4) Ae sa pipii atu pea ma le faamaoni Aritako ia Paulo.

Mai Eleni e Oo Atu i Ierusalema

I ni masina talu ona mavae le fouvalega a le au fai mea ario, sa iai Paulo i Eleni, ma ina ua sauni e tuuvaa ese atu mo Suria e ui atu i Ierusalema sa “taupulepule foi Iutaia ia te ia.” (Galuega 20:2, 3) O ai lea ua tatou iloa o loo iai faatasi ma Paulo i nei tulaga faigata? O Aritako!

O lenei tulaga fou e lamatia ai na pogai ai ona suia fuafuaga a Paulo, Aritako, ma a la aumea, i lo latou muai faimalaga lea e ui atu i Maketonia, sosoo ai ma le malaga atu i le talafatai o Asia Itiiti a o lei amata ona malaga atu i Foinie i Patara. (Galuega 20:4, 5, 13-15; 21:1-3) E mautinoa lava o le mafuaaga o lenei faiga malaga, ina ia momoli atu meaalofa na foai e Kerisiano i Maketonia ma Akaia mo o latou uso matitiva i Ierusalema. (Galuega 24:17; Roma 15:25, 26) E toatele se vaega na faimalaga faatasi atu, atonu pe na tuuina atu ia i latou lenei tiute tauave e ni faapotopotoga eseese. E lē taumatea foi, o le iai o se vaega toatele faapena e telē se saogalemu o le a faamautinoaina ai.

Sa iai ia Aritako se faaeaga tele o le ō atu faatasi ma Paulo mai Eleni e oo atu i Ierusalema. Peitai, o le la malaga na sosoo ai, sa la ō atu ai mai Iutaia seia oo atu lava i Roma.

Le Faiga Malaga i Roma

Sa fai lava sina ese o tulaga o mea i lea taimi. E lua tausaga sa feagai ai Paulo ma faasalaga i Kaisareia, na ia toe talosaga ai ia Kaisara, ma tatau ai ona auina atu loa i Roma a o saisaia pea i filifili. (Galuega 24:27; 25:11, 12) Taumafai e faaāta i lou mafaufau ni lagona atonu na oo i aumea a Paulo. E mamao le faimalaga mai Kaisareia e oo atu i Roma, ma atonu sa matuā mafatia ai o latou lagona, ae lē iloa po o le ā le iuga e oo i ai. O ai e mafai ona ō atu faatasi ma ia e lagolago ma fesoasoani atu i ai? E toalua tamaloloa na filifilia pe na malilie lava laʻua e tauofo mai. O i laʻua ia o Aritako ma Luka, le tusitala o le tusi o Galuega.—Galuega 27:1, 2.

Na mafai faapefea e Luka ma Aritako ona la ō atu faatasi i le vaa lava lea mo le vaega muamua o le malaga i Roma? Ua faapea mai se manatu o le tusitala o talafaasolopito o Giuseppe Ricciotti: “Sa faimalaga le toalua lenei e pei o ni pasese . . . pe, e sili ona foliga mai, sa faatagaina i laʻua ona o le agalelei o le taʻitaʻiʻau o le toaselau a Roma o lē na faatagā faapea atu o i laʻua nei o ni pologa a Paulo, talu ai i lalo o le tulafono, sa faataga se tagatanuu Roma ina ia ō atu faatasi ma ni ana pologa se toalua e fesoasoani ia te ia.” Maeu se faalototele na maua e Paulo ona o lo la iai iina ma a la faalaeiauga!

E matuā telē le alofa na faaali atu e Luka ma Aritako mo Paulo, ma sa tuua ai i laʻua i se tulaga lamatia. O le mea moni, sa iai se tulaga na lamatia ai o la ola, ma le ola o le la aumea na latou faaaunuua faatasi, ina ua afatia lo latou vaa i le motu o Melita.—Galuega 27:13–28:1.

O Lē na “Noanoatia Faatasi” ma Paulo

A o tusi atu e Paulo ana tusi i uso i Kolose ma ia Filemoni i le 60-61 T.A., sa iai pea ma ia i Roma o Aritako ma Luka. O loo taʻua Aritako ma Epafara o ē na “noanoatia faatasi” ma Paulo. (Kolose 4:10, 14; Filemoni 23, 24) O lea la, e foliga mai, sa iai se vaitaimi na faafalepuipuiina ai faatasi Aritako ma Paulo.

E ui na falepuipui Paulo i Roma pe a itiiti mai e lua tausaga, ae sa faataga o ia e nofo vaavaaia i lona lava fale na totogi, o iina sa mafai ai ona ia folafola atu le tala lelei i tagata na asiasi ane. (Galuega 28:16, 30) Ona auauna atu ai lea o Aritako, Epafara, Luka, ma isi ia Paulo, e ala i le fesoasoani ma faalaeiau atu ia te ia.

O se “Faamatalaloto”

Pe a maeʻa ona talanoaina mea eseese na tutupu o loo taʻua ai Aritako i faamaumauga faagaeeina a le Tusi Paia, o le ā la le ituaiga o tagata sa iai o ia? E tusa o se faamatalaga a le tusitala o W. D. Thomas e faapea, o Aritako “e matuā mataulia o se tagata e mafai ona ia faafetaiaia teteega ma sao mai ai ma se faatuatua lē maluelue ma lana filifiliga ina ia auauna ma le lē faavaivai. E matilatila o ia o se tagata o lē sa alofa i le Atua e lē gata i taimi e taugalemu ai, pe a lelei le tulaga mai o mea, ae i ona po foi e lē taugalemu ai.”

Ua taʻua e Paulo faapea, sa avea Aritako ma isi o nisi e “faamatalaloto” (faa-Eleni, pa·re·go·riʹa) ia te ia, o lona uiga, o se puna o faamafanafanaga. (Kolose 4:10, 11) Ona o lona faamatalaloto la ma le faalototele ia Paulo, na avea ai Aritako o se aumea moni lava i taimi o faigata. O le mauaina o le aufaatasiga ma le faauooga a le aposetolo mo ni nai tausaga sa tatau ona avea o se mea e sili lea ona faamalieina ma faatamaoaiga ai i le itu faaleagaga.

Atonu tatou te lē oo i ni tulaga iloga e pei o tulaga na oo i ai Aritako. E ui i lea, e faapena le alofa faamaoni e manaomia mo i latou uma lava o loo i le faapotopotoga Kerisiano i aso nei, ona faaali atu i uso faaleagaga o Keriso ma i le faalapotopotoga a Ieova. (Faatusatusa i le Mataio 25:34-40.) E foliga mai, e iai le taimi, e iai ni uso tapuai tatou te masani ai o le a mafatia i ni puapuaga po o ni mafatiaga, atonu ona o ni faavauvauga i sē pele ua maliu, ni maʻi, po o isi puapuaga. Ae o le mafuta atu ia i latou ma tuuina atu le fesoasoani, le faamaisega, ma faalaeiauga, e mafai ai ona tatou maua le olioli ma faamaonia atu le avea o i tatou o ni aumea faamaoni.—Faatusatusa i le Faataoto 17:17; Galuega 20:35.