Lagolagoina ma le Faamaoni le Afioga Faagaeeina a le Atua

“A ua matou lafoai mea lilo e masiasi ai, e le o savavali ma le amio pepelo, e le o faafilogia e i matou le afioga a le Atua.”—2 KORINITO 4:2.

1. (a) O le ā sa manaomia ina ia mafai ona faataunuuina le galuega o loo faataatia mai i le Mataio 24:14 ma le Mataio 28:19, 20? (e) O le ā le tele sa maua ai le Tusi Paia i gagana a tagata ina ua amata aso e gata ai?

I LANA valoaga tele e faatatau i le taimi o lona faatasi mamalu mai ma le taufaaiuiuga o le faiga tuai o mea, na valoia ai e Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma, ona oo mai ai lea o le gataaga.” Sa ia faatonu atu foi i ona soo e faapea: “Ia outou o atu e fai nuu uma lava ma soo, . . . aʻoaʻo atu ia te i latou ia tausi i mea uma ua ou fai atu ai ia te outou.” (Mataio 24:14; 28:19, 20) O le faataunuuga o na valoaga e aofia ai le tele o galuega i le faaliliuina ma le lomiaina o le Tusi Paia, ina ia aʻoaʻo tagata po o le ā lona uiga, ma ia fesoasoani i tagata e faatatauina i o latou olaga. Maeu se faaeaga o le auai i lea galuega! E oo mai i le 1914 ua uma ona faaliliu a lē o le Tusi Paia atoa, ia o ni ona vaega i gagana e 570. Ae talu mai foi lena taimi e faitau selau isi gagana ma le tele o gagana e na o ni nai tagata e tautatala ai ua faaopoopo mai, ma o le tele lava o gagana e sili atu i le tasi le faaliliuga ua maua ai.a

2. O ā faanaunauga eseese sa taaina ai le galuega a ē na faaliliuina ma lomia le Tusi Paia?

² E lē o se galuega faigofie mo so o se tagata faaliliu le galue i se mataupu i se tasi gagana ae taumafai ina ia malamalama ai i latou e faitau ma faalogologo i ai i se isi gagana. O nisi tagata faaliliu o le Tusi Paia sa faia la latou galuega i le naunautai ma iloa lelei e faapea o le Afioga a le Atua lea latou te faaliliuina. O isi sa na ona faaosofia lava i āuga tau aʻoaʻoga e maua mai le galuega. Atonu sa latou manatu i faamatalaga i le Tusi Paia ua na o ni aganuu ma ni faamatalaga aogā. O nisi tagata, ua pei le lotu o se pisinisi, ma o le mafai ona lolomi o se tusi o loo taʻua ai o latou igoa faapea o ē na faaliliuina po o le lomiaina, o se galuega e tau ina maua ai tupe e ola ai. O o latou faanaunauga sa taaina ai le auala na fai ai a latou galuega.

3. Sa faapefea ona manatu le Komiti Faaliliu o le Tusi Paia o le Lalolagi Fou i la latou galuega?

³ E mataina le faamatalaga sa faia e le Komiti Faaliliu o le Tusi Paia o le Lalolagi Fou e faapea: “O le faaliliuina o le Tusi Paia o lona uiga o le faaliliu lea o le silafaga ma fetalaiga a Ieova le Atua i se isi gagana . . . E tāua tele lena manatu. O le au faaliliu sa faia lenei galuega, o ē e matatau ma alolofa i Atua na tusia le Tusi Paia, latou te manatu o loo ia i latou se tiute tauave faapitoa mai ia te Ia ina ia faamautinoa i le mafai e oo i ai ua saʻo ona faamatala atu ona manatu ma fetalaiga. Latou te manatu foi o loo ia i latou le tiute tauave agaʻi i tagata o ē o loo saili ma faalagolago atu i se faaliliuga o le Afioga faagaeeina a Lē Silisili Ona Maualuga mo lo latou faaolataga e faavavau. Ona o loo ia i latou lena manatu e faapea ua faatuatuaina i latou i lenei tiute tauave ina ua mavae le tele o tausaga ua mafai ai ona faia e lenei komiti o tane tuuina atu le New World Translation of the Holy Scriptures.” O le sini o le komiti o le maua lea o se faaliliuga o le Tusi Paia e manino ma malamalama, ma ia tausisi atu i manatu e pei ona iai i le uluai gagana Eperu ma le gagana Eleni lea o le a maua mai ai se faavae mo le faaauau ona tupu aʻe i le poto saʻo.

O le ā ua Tupu i le Suafa o le Atua?

4. O le ā le tāua o le suafa o le Atua i le Tusi Paia?

⁴ O se tasi o fuafuaga autū o le Tusi Paia o le fesoasoani lea i tagata ina ia iloa le Atua moni. (Esoto 20:2-7; 34:1-7; Isaia 52:6) Na aʻoaʻo e Iesu ona soo e tatalo ina “ia faapaia” le suafa o lona Tamā, ia faamamaluina, po o le avea o se mea e paia. (Mataio 6:9) Ua faaaofia ai e le Atua lona suafa totino i le Tusi Paia e sili atu i le 7,000 taimi. E finagalo o ia ina ia iloa e tagata lena suafa atoa ma uiga o Lē e ona le suafa.—Malaki 1:11.

5. Ua faapefea ona faaaogā mai e nisi tagata faaliliu le suafa o le Atua?

⁵ E toatele le au faaliliu o le Tusi Paia sa faaalia le matuā faaaloalo mo le suafa o le Atua, ma ua lē aunoa ona latou faaaogā mai ia latou faaliliuga. O nisi tagata faaliliu e fiafia i le Yahweh. O isi ua filifilia se taʻu mo le suafa o le Atua e fetaui ma la latou lava gagana ae o loo manino pea ona mataulia e pei ona faatulaga mai ai i mau Eperu, atonu o se taʻu ua iloa e le toatele ona ua leva ona faaaogā. E faaaogā e le faaliliuga o le New World Translation of the Holy Scriptures le suafa Ieova e tusa ma le 7,210 taimi i ona mau autū.

6. (a) I tausaga e lei mamao tele atu, o le ā ua faia e nisi tagata faaliliu i faamatalaga e uiga i le suafa o le Atua? (e) O le ā le lautele o le salalau atu o lenei gaoioiga?

⁶ I tausaga e lei mamao tele atu, e ui lava o loo tuu ai pea e nisi tagata faaliliu o le Tusi Paia ia igoa o atua faapaupau o Paala ma Moloka, ua amata nei ona latou aveeseina pea le suafa totino o le Atua moni mai i lana Afioga faagaeeina. (Esoto 3:15; Ieremia 32:35) I mau e pei o le Mataio 6:9 ma le Ioane 17:6, 26, o loo faaaogā ai e se faaliliuga Alapania ua taatele lona faaaogaina ia le faaupuga Eleni mo “lou suafa po o le suafa o oe” (o lona uiga, o le suafa o le Atua) na ona faapea mai lava “lou” po o “oe,” ua foliga mai ai e lē o taʻua e mau ia se suafa. I le Salamo 83:18, ua aveesea uma ai e le New English Bible ma le Today’s English Version e lē gata o le suafa totino o le Atua ae o so o se faamatalaga e faatatau i le mea moni e faapea e iai le suafa o le Atua. E ui lava o loo iai le suafa o le Atua i faaliliuga tuai o Tusitusiga Eperu i le tele o gagana, i faaliliuga fou, e tele ina aveese ia po o le na ona taʻua lava i se faamatalaga i le ogatotonu po o autafa o ia mau. O le mea lena o loo tupu i le gagana Peretania, faapena foi le tele o gagana i Europa, Aferika, Amerika i Saute, Initia, ma atumotu o le Pasefika.

7. (a) O faapefea ona feagai le au faaliliu o nisi o Tusi Paia i Aferika ma le suafa o le Atua? (e) O le ā sou lagona e uiga i lenei mea?

⁷ Ua iai se isi laasaga e sili atu i lo lena o loo faia e le au faaliliu o nisi gagana i Aferika. Nai lo le tau ina sui o le suafa o le Atua i ni taʻu faale-Tusi Paia, e pei o le Atua po o le Alii, ua latou tuu i ai igoa e maua mai ia latou talitonuga faalotu. I le The New Testament and Psalms in Zulu (faaliliuga o le 1986), o le taʻu Atua, (uNkulunkulu) o loo faaaogā fesuisuiai ma se igoa o se tagata (uMvelinqangi) lea e malamalama tagata Zulu o loo faatatau atu i ‘se tuaa sili o lē tapuaia e ala i tuaa.’ I se mataupu i le mekasini o le Bible Translator, ia Oketopa 22, na lipotia ai e faapea a o saunia le Tusi Paia i le gagana Chichewa lea o le a taʻua o le Buku Loyera, sa faaaogā e tagata faaliliu Chauta o le suafa totino e sui i a Ieova. Sa faamatala e le mataupu, o Chauta, o “le Atua lea ua latou masani ai ma tapuai i ai.” E ui i lea, o le toatele o nei tagata e latou te tapuai foi i mea ua latou talitonu i ai o agaga o ē ua oti. Pe e moni ea pe a tatalo se tasi i le “Silisili Ese,” e tusa lava la po o le ā se igoa latou te faaaogā mo le “Silisili Ese” ua fetaui lava lea e sui ai le suafa totino o Ieova, e tusa lava po o ā isi mea e aafia ia latou tapuaiga? E matuā leai lava! (Isaia 42:8; 1 Korinito 10:20) O le suia o le suafa totino o le Atua i se mea e mafai ona manatu ai tagata e faapea e saʻo o latou lava talitonuga e masani ai, o le a lē fesoasoani ai ia i latou e faalatalata atu i le Atua.

8. Aisea ua leai ai se faaletonu i le fuafuaga a le Atua ina ia faalauiloa lona suafa?

⁸ O nei mea uma e lē o suia ai pe faaletonu ai le fuafuaga a Ieova ina ia faalauiloa lona suafa. O loo iai pea le anoanoai o Tusi Paia o loo iai le suafa o le Atua i gagana i Europa, Aferika, i Amerika, o atunuu i Sasaʻe, atoa ma atumotu o le vasaloloa. O loo iai foi le sili atu i le 5,400,000 Molimau a Ieova i atunuu ma teletori e 233 o ē i le tuufaatasi ua latou faaaluina le sili atu i le piliona itula i le tausaga e taʻu ai i isi e faatatau i le suafa ma fuafuaga a le Atua moni. Ua latou lolomi ma tufatufa atu Tusi Paia—ia o loo faaaogā ai le suafa o le Atua—i gagana e tautatala ai le pe a ma le 3,600,000,000 o le faitau aofai o le lalolagi, e aofia ai le gagana Peretania, Saina, Rusia, Sepania, Potukale, Falani, ma Holani. Ua latou lomia foi ia lomiga e fesoasoani mo le suesueina o le Tusi Paia i gagana o loo iloa e le toatele o tagata o le lalolagi. E lē o toe umi ona gaoioi lea o le Atua i le auala o le a matuā faataunuuina ai ma le lē masese lana faasilasilaga e faatatau i nuu e faapea, “e iloa ai lava e i latou o aʻu lava o Ieova.”—Esekielu 38:23

Pe a Pulea e Talitonuga o le Tagata lava ia le Faaliliuga

9. Ua faapefea ona faaalia e le Tusi Paia le tāua o le tiute tauave o loo i luga o i latou o taulimaina le Afioga a le Atua?

⁹ O loo i luga o i latou e faaliliuina le Afioga a le Atua se tiute tauave tāua faapena foi ma ē o loo e aʻoaʻoina atu. Na fai mai Paulo e faatatau i lana faiva atoa ma le faiva a ana aumea: “A ua matou lafoai mea lilo e masiasi ai, e le o savavali ma le amio pepelo, e le o faafilogia e i matou le afioga a le Atua, a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni.” (2 Korinito 4:2) A faafilogia o lona uiga o le faaleagaina e ala i le faafefiloi ma nisi mea e ese pe e faatauvaa. Sa lei pei le aposetolo o Paulo o leoleo mamoe lē faamaoni i Isaraelu i aso o Ieremia ia na aoaia e Ieova ona o le talaʻia o o latou lava manatu nai lo o mea na fetalai mai ai le Atua. (Ieremia 23:16, 22) Peitai o le ā ua tupu i aso nei?

10. (a) Ua faapefea ona aafia nisi tagata faaliliu i o tatou aso i uunaiga e ese mai i le alofa faamaoni i le Atua? (e) O le ā le le vaega ua sese ona latou tauaveina?

¹⁰ I le vaitaimi o le Taua Lona Lua a le Lalolagi, na faia ai e se komiti a tagata suesue i aʻoaʻoga faalotu ma ni faifeau, e ʻauʻau faatasi ma le malo faa-Nasi o Siamani, se toe teuteuga o le “Feagaiga Fou” lea na aveesea ai faamatalaga aloaia uma e faatatau i tagata Iutaia ma ni mea e foliga mai ai o Iesu e sau mai le gafa o tagata Iutaia. O le mea pito lata mai, o tagata faaliliu na saunia le New Testament and Psalms: An Inclusive Version e ese le auala ua latou faia, ua latou taumafai malosi e aveese so o se mea e faafoliga mai ai o tagata Iutaia na māfua ai le maliu o Keriso. E manatu foi na tagata faaliliu e faapea o tagata faitau o ē e faatāuaina le aiā a fafine o le a fiafia pe a taʻua le Atua, e lē o se Tamā, ae ia Tamā-Tinā ma e lelei foi pe a taʻua Iesu, e lē o le Atalii o le Atua ae o le Fanau a le Atua. (Mataio 11:27) A o latou faia faapea, ua latou aveesea ai le mataupu silisili o le usitai o avā i tane ma le usitai o fanau i mātua. (Kolose 3:18, 20) O i latou o loo faia nei faaliliuga e manino mai lo latou lē maua o le faanaunauga sa i le aposetolo o Paulo ia ‘aua le faafilogia le Afioga a le Atua.’ Ua galo ia i latou le vaega a le tagata faaliliu, ua latou faoa le tulaga o le tusitala, ma saunia ni tusi o loo faaaogā ai le talaaga o le Tusi Paia e faaauiluma ai o latou lava manatu.

11. E faapefea ona feteenai aʻoaʻoga a Kerisinetoma ma le mea o fai mai ai le Tusi Paia e faatatau i le solu (soul) ma le oti?

¹¹ O loo masani ona aʻoaʻoina e lotu o Kerisinetoma e faapea o le solu (soul) o le tagata o le agaga, lea e tuua le tino pe a oti, ma e lē mafai ona oti. I le tuufaafeagai, o faaliliuga tuai o le Tusi Paia i le tele o gagana o loo taʻua manino ai o tagata o solu, o mea ola o solu, ma e oti le solu. (Kenese 12:5; 36:6; Numera 31:28; Iakopo 5:20) Ua tuu ai i se tulaga masiasi le au failotu ona o lenei mea.

12. O le ā le auala ua faanenefu ai e nisi faaliliuga ia upu moni faavae o le Tusi Paia?

¹² I nisi faaliliuga fou o le Tusi Paia ua matuā aveesea ai lava nei upu moni. E faapefea? Ua latou alofiaina le faaliliuina saʻo o le nauna Eperu o le neʹphesh (solu) i nisi o mau. I le Kenese 2:7, atonu latou te faapea mai “ona ola ai lea o le uluai tagata” (nai lo le “avea o le tagata ma solu ola”). Ia po o lo latou faasino atu foi i “mea ola” nai lo le “solu” pe a fai o le ola o se manu. (Kenese 1: 21) I mau e pei o le Esekielu 18:4, 20, ua latou faasino atu i “le tagata” po o “se tasi” (nai lo “le solu”) faapea e oti. O nei faaliliuga, atonu e fetaui i le tagata faaliliu. Peitai o le ā le tele o se fesoasoani o avatu ai i le tagata o loo saili ma le faamaoni i le upu moni, ae ua faatumuina lona manatu e aʻoaʻoga e lē faale-Tusi Paia a Kerisinetoma?b

13. O ā auala ua natia ai e nisi faaliliuga le fuafuaga a le Atua e faatatau i le laueleele?

¹³ I se taumafaiga ina ia lagolago lo latou talitonuga e faapea e ō i le lagi tagata lelei uma, ua fai ai e le au faaliliu—ia po o tagata suesue i aʻoaʻoga faalotu foi o ē o loo iloiloina a latou galuega—atonu latou te taumafai malosi e natia le mea o fai mai ai le Tusi Paia e faatatau i le fuafuaga a le Atua mo le lalolagi. I le Salamo 37:11, o le tele o faaliliuga e faitauina faapea o ē agamalu e fai mo latou “le nuu.” Atonu o le “nuu” o se faaliliuga lea o le upu (ʼeʹrets) o loo faaaogā i mau i le gagana Eperu. Peitai ane, ua sili atu suiga ua fai e le Today’s English Version (lea e fai ma faavae o faaliliuga agaʻi i le tele o isi gagana). E ui lava e faaaogā faasefulufitu e le faaliliuga lenei le upu Eleni ge, o le “lalolagi” i le Evagelia na tusia e Mataio, ae i le Mataio 5:5 ua suia le “lalolagi” i le faaupuga “le mea ua folafola mai e le Atua.” O le manatu masani o tagata lotu o le mea ua folafolaina e le Atua, o le lagi. E lē o faamaoni ona taʻu atu ia i latou e faapea, i lana Lauga i le Mauga, na fetalai Iesu o le tagata agamalu, e faamaulalo, po o ē lotomaulalo e “fai mo latou tofi le lalolagi.”

14. O ā faanaunauga manatu faapito o loo manino mai i nisi faaliliuga o le Tusi Paia?

¹⁴ O nisi faaliliuga o le Tusi Paia ua latou faaaogā ni upu ma le manatu ina ia fesoasoani atu ai ina ia maua e faifeau totogi tetelē. E moni o loo faapea mai le Tusi Paia: “E tatau ona avatu i le faigaluega o lona taui.” (1 Timoteo 5:18) Ae i le 1 Timoteo 5:17, o loo faapea mai o toeaina o ē pule lelei, “ia taʻuaogaina i latou ona faateleina atu i ai o le mamalu,” na pau lava le mamalu e manatu nisi o i latou e ao ona taʻua o tupe. (Faatusatusa i le 1 Peteru 5:2.) O lea la, fai mai le New English Bible o nei toeaina e “ao ona taʻuaogaina e tatau ona faaluaina le tetelē o o latou alofa,” ae fai mai le Contemporary English Version o i latou nei e “talafeagai ona faaluaina o latou totogi.”

Lagolagoina ma le Faamaoni le Afioga a le Atua

15. E faapefea ona tatou filifilia po o le fea faaliliuga o le Tusi Paia e ao ona faaaogā?

¹⁵ O le ā e uiga i ai nei mea uma mo tagata taitoatasi e faitau i le Tusi Paia ma i latou o ē e faaaogā le Tusi Paia e aʻoaʻo ai isi? I le tele lava o gagana ia e toatele tagata e tautatala ai, e sili atu i le tasi ia faaliliuga o le Tusi Paia e mafai ona filifili mai ai. Ia faaalia le faautauta i le filifiliina o le faaliliuga o le Tusi Paia e te faaaogaina. (Faataoto 19:8) Afai e lē o faamaoni se faaliliuga i le faailoaina mai o le Atua lava ia—aveesea lona suafa mai i lana Afioga faagaeeina po o le ā lava le mafuaaga—faamata e lē o faia foi faapea e le au faaliliu i isi vaega o mau o le Tusi Paia? Pe afai e te lē o mautinoa i le lelei o se faaliliuga, taumafai e faatusatusa ma isi faaliliuga tuai. Afai o oe o se faiaʻoga o le Afioga a le Atua, faaaogā le faaliliuga o loo pipii atu i manatu o loo i uluai mau i le gagana Eperu ma le Eleni.

16. E faapefea e i tatou taitoatasi ona faataitaia lo tatou faamaoni e ala i lo tatou faaaogaina o le Afioga faagaeeina a le Atua?

¹⁶ O i tatou uma lava e ao ona taitoatasi ma faamaoni i le Afioga a le Atua. Tatou te faia lena mea e ala i le manatu mamafa i mea o loo iai, ma afai e mafai, ia tatou faaaluina sina taimi i aso taitasi e faitau ai le Tusi Paia. (Salamo 1:1-3) Tatou te faia e ala i le faatatauina atoatoa i o tatou olaga o mea o fai mai ai, faamasani e faaaogā ona mataupu silisili ma faataitaiga e faavae ai ni filifiliga lelei. (Roma 12:2; Eperu 5:14) Tatou te faaalia o i tatou o ē folafola ma le faamaoni le Afioga a le Atua e ala i lo tatou talaʻi atu ma le maelega i isi. Tatou te faia foi o ni faiaʻoga e ala i le faaaogaina ma le faaeteete o le Tusi Paia, i lo tatou lē mimiloina po o le faaopoopo i ai nisi manatu i mea ua iai ina ia fetaui ma o tatou manatu. (2 Timoteo 2:15) O mea ua valoia mai e le Atua o le a faataunuuina moni lava. E faamaoni o ia i le faataunuuina o lana Afioga. Tau ina ia tatou lagolagoina ma le faamaoni le Tusi Paia.

[Faaopoopoga i lalo]

Pe E te Manatua?

◻ O ā faanaunauga ua aafia ai le galuega a le au faaliliu o le Tusi Paia i o tatou aso?

◻ Aisea ua lē faalavelaveina ai le fuafuaga a le Atua e faatatau i lona lava suafa i mea ua faia e faaliliuga faaonaponei?

◻ Ua faapefea ona faanenefu e nisi faaliliuga ia upu moni o le Tusi Paia e uiga i le solu, le oti, ma le lalolagi?

◻ O ā auala tatou te faaalia ai o loo tatou lagolagoina ma le faamaoni le Afioga a le Atua?

[Ata i le itulau 16]

O lē fea faaliliuga o le Tusi Paia o le ā e faaaogaina?