Le Fiafiaga Moni—O le ā le Ki?

NA FAIA tagata ina ia fiafia. Aisea e mafai ai ona tatou mautinoa e uiga i lena mea? Ia, seʻi mafaufau i le amataga o le tagata.

Na faia e Ieova le Atua le uluai ulugalii faaletagata faatasi ma le tomai ina ia olioli ai i le fiafiaga. Na tuuina Atamu ma Eva i se parataiso, o se faatoaga o le fiafia na taʻua o Etena. Na saunia e Lē na Foafoaina Mea mo i laua mea faaletino uma e tatau mo le ola. Sa iai i le faatoaga “laau uma e matagofie i le vaai, e lelei foi pe a ʻaina.” (Kenese 2:9) Sa soifua maloloina Atamu ma Eva, malolosi, ma aulelei—sa lelei atoatoa i laua ma fiafia moni.

Ae, o le ā le ki i lo la fiafiaga? Po o lo la aiga parataiso ea po ona o lo la lelei atoatoa faaletino? O nei meaalofa mai le Atua sa saosaolaumea i lo la olioli i le ola. Ae o lo la fiafiaga, sa lē faalagolago i na mea vaaia. O le faatoaga o Etena, sa sili atu nai lo o se faatoaga matagofie. Sa avea o se malumalu, o se nofoaga mo le tapuaiga i le Atua. O le ki i lo la fiafiaga e faavavau, o lo la tomai lea e faia ma tausisia ai se faiā alofa ma Lē na Foafoaina Mea. Ina ia fiafia i laua, sa tatau ona la faamalieina muamua o la manaoga faaleagaga.—Faatusatusa i le Mataio 5:3.

Le Tulaga Faaleagaga e Iu ai i le Fiafia

I le amataga, sa iai se faiā faaleagaga a Atamu ma le Atua. Sa avea o se faiā alofa ma mafana e pei o se faiā a se tamā ma se atalii. (Luka 3:38) I le faatoaga o Etena, sa maua e Atamu ma Eva ni tulaga talafeagai lelei na mafai ai ona la faamalieina o la faanaunauga e avatu le tapuaiga. E ala i lo la usiusitai ma le loto malie ma le alofa ia Ieova, na la āva ai ma faamamaluina le Atua i se tulaga e sili mamao atu i lo o mea na mafai ona faia e manu ia na foafoaina. Sa mafai ona la vivii atu ma le atamai i le Atua ona o ona uiga matagofie ma mafai ona lagolagoina lana pule silisili ese. Sa faaauau foi ona la maua e lē aunoa le tausiga alofa ma le agalelei a Ieova.

O lenei fesootaiga ma Lē na Foafoaina Mea ma le usiusitai atu i ana tulafono, na maua ai e o tatou uluai mātua le fiafiaga moni. (Luka 11:28) Sa lei faatalitalia Atamu ma Eva e ola mo le tele o ni tausaga e faataitai muamua po o le ā le mea e leaga ma le mea e lelei a o lei maua le ki i le fiafiaga. Sa fiafia i laua mai lava i le taimi na foafoaina ai. O le tausia o le filemu ma le Atua ma gauai atu i lana pule silisili ese, na faafiafiaina ai i laua.

Ae peitai, i le taimi lava na la lē usiusitai ai i le Atua, na mou ese atu ai lena fiafia. E ala i lo la fouvale, na motusia ai e Atamu ma Eva la laua faiā faaleagaga ma Ieova. E lei toe avea ai i laua ma uo a le Atua. (Kenese 3:17-19) E foliga mai, o le aso lava na tuliesea ai i laua mai le faatoaga, na motusia ai e Ieova fesootaiga uma ma i laua. Na leiloa ai lo la tulaga lelei atoatoa, le faamoemoe o le ola e faavavau, ma lo la nofoaga o se faatoaga matagofie. (Kenese 3:23) Ae o le mea e sili atu ona tāua, talu ai ua motusia lo la faiā ma le Atua, ua leiloa ai ia i laua le ki i le fiafiaga.

Lo Tatou Tomai e Faia ai Filifiliga

A o lei feoti, na tuufaasolo mai ai e Atamu ma Eva i a la fanau o la uiga faaletagata, o la uunaiga o le loto fuatia ifo, ma le tomai mo mea faaleagaga. Na lei faamaulaloina le aiga faaletagata ia tutusa ma le tulaga o manu. E mafai ona tatou faia se leleiga ma Lē na Foafoaina Mea. (2 Korinito 5:18) I le avea o ni foafoaga faiola atamamai, ua maua ai pea e tagata le pule e filifili ai pe usiusitai i le Atua pe leai. Na faaalia lenei mea i le tele o senituri ua mavae ina ua tuuina atu e Ieova i le nuu fou faatoʻā faavaeina o Isaraelu, ia filifili po o le ola po o le oti. E ala i lana sooupu o Mose, na fetalai atu ai le Atua: “Ua ou tuuina atu i ou luma i le aso nei o le ola ma le manuia, o le oti foi ma le malaia.”—Teuteronome 30:15-18.

I le faitau afe o tausaga ua mavae talu ona leiloa le uluai Parataiso e oo mai i le taimi nei, o loo iai pea ia i tatou o tagata le tomai e faia ai le filifiliga saʻo. E iai so tatou loto fuatia ifo o loo galue pea, faapea ma le tomai faavae e usiusitai ai i tulafono a le Atua. O loo tautala le Tusi Paia e faatatau “i le tagata i totonu.” (2 Korinito 4:16; Roma 7:22) O lenei faaupuga o loo faasino i uiga na fananau mai ma i tatou uma e faaatagia atu ai uiga o le Atua, ina ia manatunatu e pei o ona manatu, ia faaleagaga.

E tusa ai ma a tatou amioga masani ma le loto fuatia ifo, na tusi ai le aposetolo o Paulo e faapea: “Auā pe a fai fua e nuu ese e le o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou; o i latou ia ua iloa mai ai le galuega o le tulafono ua tusia i o latou loto, e ō faatasi ai foi o latou loto fuatia ifo, o loo fefaaleagai foi, pe fefaatonuai o latou manatu.”—Roma 2:14, 15.

O le Atamai Faale-Atua ma le Usiusitai—O le Ki Lea

Atonu la e fesili mai se tasi, ‘Pe afai e ia te i tatou uma lava se faanaunauga masani ina ia tapuai i le Atua ma iu ai ina olioli i le fiafiaga moni, aisea ua salalau atu ai le lē fiafia?’ Ina ia fiafia, e tatau ia i tatou taitoatasi ona tutupu aʻe faaleagaga. E ui lava ina faia i le amataga i le faatusa o le Atua, ae ua oo ina faaesea le tagata mai Lē na Faia o ia. (Efeso 4:17, 18) O lea la, e tatau ia i tatou taitoatasi ona faia ni laasaga maʻoti ina ia ati ae ma tausisia se faiā faaleagaga ma le Atua. Auā e lē faafuasei ona tupu o lena faiā.

Na otooto mai e Iesu ni mataupu silisili tāua se lua i le atiaeina o le itu faaleagaga. O le tasi, ia maua le poto saʻo e uiga i le Atua, ma le isi, ia gauai ma usiusitai atu i lona finagalo. (Ioane 17:3) I le sii mai o le Afioga a le Atua, na fetalai ai Iesu e faapea: “Ua tusia, E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) I se tasi taimi, na taʻua ai e Iesu e faapea: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) E tatou te lē tau faaaluina le tele o ni tausaga e faataitai ai po o le ā le lelei ae o le ā le leaga e saili ai mo le fiafiaga. E lē o le maua o le poto masani, o le ki lea i le fiafiaga. Nai lo lea, e na o le atamai faaleatua ma le usiusitai atu i Lē na Foafoaina i tatou e mafai ona iu ai i le mauaina o le fiafiaga moni i le olaga.—Salamo 19:7, 8; Failauga 12:13.

E manino lava, o le fiafia e maua e ala i le faatinoina o le atamai faaleatua ma le faia o se tulaga taʻuleleia i le silafaga a le Atua, o se mea e mafai ona tatou ausia. (Galuega 17:26, 27) O le poto e uiga ia Ieova ma lana fuafuaga, e mafai ona maua e tagata uma. I le faitau piliona o kopi o loo iai i le tele o gagana, ua avea ai pea le Tusi Paia ma tusi ua sili ona faasalalauina atu i le lalolagi atoa. E mafai ona fesoasoani le Tusi Paia ia te oe e avea ai ma uo a le Atua ma olioli ai i le fiafiaga moni, auā ua faailoa mai e le Tusi Paia ia i tatou e faapea, “amuia [“e fiafia,” NW] le nuu e fai Ieova mo latou Atua.”—Salamo 144:15.

[Pusa i le itulau 6]

Laasaga i le Mauaina o le Fiafia

1. Ia talisapaia ma ia ati ae le itu faaleagaga. Na fetalai Iesu: “E sili ona manuia [“fiafia,” NW] o e faalogo i le afioga a le Atua, ma tausi i ai.”—Luka 11:28.

2. Ia iloa, e sili atu ona tāua le mauaina o le faamaoniga a le Atua nai lo o tamaoaiga po o mea taugata o le olaga. Na tusi mai Paulo e faapea: “A o le amio Atua ma le loto malie, o le oloa tele lava lea. . . . Afai ua maua e i tatou o mea e aai ai ma mea e oofu ai, ia gata ai o tatou manao.”—1 Timoteo 6:6-8.

3. Ia tauivi e atiina ae ma tali atu i se loto fuatia ifo ua aʻoaʻoina e le Tusi Paia.—Roma 2:14, 15.

4. Ia loto atu e usiusitai ia Ieova le Atua, ma i lea ua tauagavaaina ai e avea o se tasi o ona tagata. Na tusi mai Tavita o aso anamua e faapea: “Amuia [“e fiafia,” NW] le nuu e fai Ieova mo latou Atua.”—Salamo 144:15.

[Ata i le itulau 7]

“E fiafia i latou o ē iloa o latou manaoga faaleagaga.”—Mataio 5:3, “NW”