Oneseforo—O Sē Faamafanafana Lototele
“IA MANATUA e ua noanoatia, peiseai ua noanoatia outou faatasi ma i latou; ia manatua foi e ua agaleagaina.” (Eperu 13:3) Na tusia e le aposetolo o Paulo nei upu pe tusa o le 61 T.A., ina ua uma ona ia tofo i le faafalepuipuiina e sili atu ma le faatasi, ma na ia toe taʻua foi a o lei maliu o ia faamaturo. (Galuega 16:23, 24; 22:24; 23:35; 24:27; 2 Korinito 6:5; 2 Timoteo 2:9; Filemoni 1) O lea sa iai pea le uunaiga faanatinati i lena taimi, e pei ona iai i le taimi nei, mo faapotopotoga ina ia tausia uso talitonu o loo fesagaia tofotofoga o lo latou faatuatua.
O se tasi o soo o le uluai senituri na uaʻi faapitoa i lena manaoga, o Oneseforo. Na ia asia Paulo a o faafalepuipuiina faalua o ia i Roma. Na tusi le aposetolo o Paulo e faatatau ia te ia e faapea: “Ia alofa atu le Alii i le aiga o Oneseforo; auā na ia faamafanafana soo mai ia te au, e lei mā foi o ia i oʻu filifili uamea, a e peitai na i Roma o ia, ona matuā saili mai lea o ia ia te au, i le ua maua.” (2 Timoteo 1:16, 17) Po ua e faaalu se taimi e mafaufau ai po o le ā moni le uiga o na upu? O le faia faapea o le a faateleina ai lou talisapaia mo Oneseforo. O le a e iloa ai o ia o sē faamafanafana lototele.
Le Faafalepuipuiina Faalua o Paulo
Ina ua mavae le faasaolotoina mai i lona uluai faafalepuipuiina, na toe oo ai Paulo i se falepuipui i Roma ae na ese le tulaga na iai. Sa mafai ona asiasi atu ana uo i le taimi muamua ia te ia i lona lava fale mautotogi, ma sa ia mautinoa ai le latalata ane o le faasaolotoina. Ae i le taimi lea, ua tuulafoaia e le toatele, na latalata ane foi lona faamaturoina.—Galuega 28:30; 2 Timoteo 4:6-8, 16; Filemoni 22.
Sa iai Paulo i le falepuipui i le taimi lea e tusa o le 65 T.A. Pe tusa ma le tausaga na muamua atu—ia Iulai 64 T.A.—na sasao ai se afi i Roma atoa, ma tupu ai se faatafunaga tele e 10 vaega mai nuu e 14 o le aai. E tusa ai ma le faamatalaga a le tagata tusitala faasolopito Roma o Tacitus, na lē mafai e le emeperoa o Nero ona “aveesea le talitonuga leaga e faapea o le afi o le iuga lea o se poloaiga. O le iuga, ina ia faaleaogaina le lipoti, na tuuaia sese ai e Nero le agasala ma matuā faatigaina se vasega sa ʻinoʻino i a latou mea inosia, e taʻua e tagata lautele o Kerisiano. . . . Na faaopoopo atu i ai ma so o se ituaiga o tauemuga i lo latou oti. I le faaofuina i paʻu o manu, na saeia i latou e maile ma feoti ai, po o le tuʻituʻiina i satauro, po o le susunuina i le afi ma mu ai, ina ia fai lea ma sulu o le po, pe a mavae le malamalama o le ao.”
E faapena se siomaga ma ni vaaiga na ono faatalitalia e Paulo ina ua toe oo o ia i le falepuipui. E letioa ona ia loto faafetai mo asiasiga a lana uo o Oneseforo! Ae seʻi o tatou vaai i lea lava tulaga mai le vaaiga a Oneseforo.
Asia Paulo le Pagota
E foliga mai, na nonofo le aiga o Oneseforo i Efeso. (2 Timoteo 1:18; 4:19) E lē o taʻua pe na sau Oneseforo i le laumua o le emepaea mo sana ia lava feau pe na sau faapitoa e asia Paulo. Ae po o le ā lava le tulaga, na taʻua e le aposetolo: ‘A o iai Oneseforo i Roma, na ia faamafanafana soo mai ia te au.’ (2 Timoteo 1:16, 17) O ā ituaiga o faamafanafanaga? E ui o le fesoasoani a Oneseforo atonu na aofia ai ni meafaitino, ae o lona faatasi atu na mautinoa ai foi le avea ma vai malū e faamalosia ma faalaeiauina ai Paulo. O le mea moni, o nisi o faaliliuga e faitauina faapea: “E masani ona ia faafiafiaina oʻu faalogona,” po o “e masani ona ia faamatalaloto mai ia te au.”
O le faataunuuina o se faanaunauga e asia se pagota Kerisiano i Roma i lena taimi na aumaia ai ni luʻi. E lē pei o aso o le uluai faafalepuipuiina o Paulo, na mautinoa lo latou lē toe fesootai ma Kerisiano Roma i lona faafalepuipuiina lona lua. I se aai telē e pei o Roma, e lē o se galuega faigofie le sailia o se pagota e iloagata mai se aofaiga tele o ē na faafalepuipuiina mo ni solitulafono eseese. O lea, e manaomia ai se sailiga filigā. Na faamatalaina e se tagata suesue o Giovanni i Rostagno le mataupu e faapea: “O faafitauli atonu e eseese vala. Ae sili atu, na manaomia le matuā faautauta mo le sailiga. O le aoaoina o faamatalaga mai i ma o ma le foliga mai o loo naunau e fia iloa le falepuipui o loo taofia ai se pagota maelega valea o loo lavelavea i le tele o solitulafono, e ono oso aʻe ai ni masalosaloga.”
Na tusia e le tusitala o P. N. Harrison se ata manino o le tulaga lava lea e tasi, e faapea: “E peiseai ua tatou iloa atu le maʻalo ane o ni foliga o loo iai se mea o loo pisi ai, i le lotolotoi o le motu o tagata o loo femiomioai solo, na sosoo ai ma le oso mai o le fia iloa o lenei tagata ese mai talafatai mamao o le Aegean, a o ia feseaʻi solo i magāala e lē masani ai, tuʻituʻi i le tele o faitotoa, taumafai e sailia faamaoniga o le tele o faamatalaga, na lapataia o ia i le ono lamatia ai o lona ola ae lei solomuli ai lava i lana sailiga; seia oo lava ina faafeiloai mai o ia e se leo e masani ai mai se falepuipui mamao ese, ma na ia iloa atu ai Paulo o loo saisaia i se fitafita Roma.” Pe afai o lena nofoaga, e pei o isi falepuipui i Roma, atonu la o se nofoaga e mālūlū, e pogisa, e palapalā, e iai so o se ituaiga o noanoataga ma mafatiaga.
O se mea e lamatia ai pe a iloa o se uo a se pagota e pei o Paulo. Sa sili atu ona matautia le asiasi soo atu ia te ia. O le faailoa faalauaitele o se tasi o se Kerisiano e ono lamatia ai i le puʻeina faapagota ma faatigaina seia oo ina oti. Peitai sa lei faamalieina Onoseforo i le na o le asiasi atu faatasi pe faalua. Sa ia lei masiasi pe fefe i le faia “soo” faapea. Sa ola moni lava Oneseforo i le uiga o lona igoa, “O Sē Galue ia Aogā,” e saunia se fesoasoani i le lototele ma le alofa tusa lava po o ā lamatiaga.
Aisea na faia ai e Oneseforo nei mea uma? Na matauina e Brian Rapske: “O le falepuipui e lē na o se nofoaga e faatigaina ai faaletino, ae o se nofoaga e avatu ai i le pagota popolega i mafatiaga o le tino ma le mafaufau. I se siomaga faapena, o le faatasi ai i le tino ma upu faalaeiau a tagata fesoasoani e mafai ona avea ma se gaoioiga faalaeiau sili i le itu tau i faalogona o le pagota.” E mautinoa na iloa lelei e Onoseforo lena mea ma sa lagolago ma le faamaoni i lana uo. Maeu le matuā tatau ona talisapaia e Paulo o lea fesoasoani!
O le ā na Tupu Mulimuli Ane ai ia Oneseforo?
I lana tusi lona lua ia Timoteo, na ofo alofa atu ai Paulo i le auaiga o Oneseforo ma faapea atu e faatatau ia te ia: “Ia foaiina atu e le Alii ia te ia ia maua le alofa mai le Alii i lea lava aso.” (2 Timoteo 1:18; 4:19) E toatele e manatu faapea o le faaupuga “lea lava aso” e faasino atu i le aso faamasino o le Atua, ma o lea na faia ai se faaiuga faapea ua maliu Oneseforo. Pe afai o le tulaga lena, atonu “na faatele ona oo atu Oneseforo i lena nofoaga lamatia, . . . ona maua ai lea o ia ma fasiotia,” na faapea mai ai P. N. Harrison. O le mea moni, atonu sa na ona toesea o Oneseforo mai le aiga, auā na semanū e faaaofia atu e Paulo o ia ina ua ia ofo alofa atu i lona auaiga atoa.
E talitonu nisi faapea e iai se uiga faapitoa i le faamatalaga: “Ia foaiina atu e le Alii ia te ia ia maua le alofa mai le Alii i lea lava aso.” E latou te lagona faapea o nei upu ua talafeagai mo se olega mo agaga ua aveesea ae o loo ola pea ma atonu o loo faapuapuagatia i se nofoaga o agaga. Peitai, o lena ituaiga o manatu e feteenai ma le aʻoaʻoga a le Tusi Paia e faapea o le tagata oti e lē toe iloa se mea. (Failauga 9:5, 10) E tusa lava la po ua maliu Oneseforo, ae na faamatalaina lava e Paulo lona faanaunauga ia maua e lana uo le alofa mai le Atua. Ua faapea mai foi R. F. Horton: “O lena moomooga matou te faanaunau ia iai mo tagata uma. Ae o le tatalo mo ē ua oti, ma le ofoina atu o Misasa mo i latou, o se manatu sa mamao ma le mafaufau [o le aposetolo].”
Seʻi Avea i Tatou ma ni Ē Faamafanafana Faamaoni
E tusa lava pe na leiloa moni le ola o Oneseforo a o fesoasoani atu ia Paulo pe leai foi, ae mautinoa na lamatia lona ola i le sailia o le aposetolo ma asia o ia i le falepuipui. Ma e lē fesiligia le talisapaia e Paulo o le lagolagosua na matuā manaomia ma faalaeiauga na ia maua mai ia Oneseforo.
Pe a feagai la uso Kerisiano ma tofotofoga, sauāga, po o le faafalepuipuiina, tatou te ono iai i se tulaga e faamafanafana ma faamalosia ai i latou. Seia tatou tatalo mo i latou ma faia ma le agalelei mea uma tatou te mafai e fesoasoani ai ia i latou. (Ioane 13:35; 1 Tesalonia 5:25) I le pei o Oneseforo, seʻi avea i tatou o ni ē faamafanafana loto tetele.
[Ata i le itulau 31]
Na faamafanafanaina ma le lototele e Oneseforo le aposetolo o Paulo a o faafalepuipuiina