Kirisimasi Faaonaponei ma Lona Talaaga

MO LE faitau miliona o tagata i le lalolagi aoao, ua avea le vaitaimi o le Kirisimasi ma taimi o le tausaga e sili ona fiafia ai. O se taimi o le anoanoai o meaʻai lelei, o se taimi o faaaloaloga faaleaganuu ma le faatasia ai o aiga. O le aso mālōlō o le Kirisimasi, o se taimi foi lea e fesanisaniai ai uo ma aiga e feaveai ai pepa o faamanuiaga ma meaalofa.

Ae peitai, i le na o le 150 tausaga ua mavae, sa matuā lē faapea le aso mālōlō o le aso Kirisimasi. I lana tusi The Battle for Christmas, ua tusia ai e le polofesa o talafaasolopito o Stephen Nissenbaum e faapea: “O le Kirisimasi . . . sa avea o se taimi o onaga, o le taimi lena e lē amanaia ai tulafono e pulea ai amioga a tagata i luma o le lautele, ona o le manao tele i se ‘faafiafiaga lē pulea,’ o se ituaiga o faafiafiaga e pei o le Mardi Gras lea e faia ia Tesema.”

Ia i latou o ē manatu ma le matuā faaaloalo ma faamamaluina le Kirisimasi, atonu o le a faateia ai i latou i lenei faamatalaga. Aisea o le a lē faamamaluina ai e so o se tasi le aso mālōlō ua manatu i ai e faapea e faamanatuina ai le fanau mai o le Alo o le Atua? O le tali, atonu o le a faateia ai oe.

Sese Lona Faavaeina Mai

Mai i le faatoʻā faavaeina o le Kirisimasi i lona fa o senituri, sa matuā tele ni fefinauaiga na faia e uiga i ai. Mo se faaaoaoga, na lāgā ai se fesili e uiga i le aso na fanau ai Iesu. Talu ai e lē o faamaʻoti maia e le Tusi Paia le aso ma le masina na fanau ai le Keriso, ua tele ai ni aso eseese ua fautuaina mai. I le senituri lona tolu, na taʻua ai e se vaega o aʻoaʻo faalelotu o Aikupito e faapea, o le aso 20 o Me, a ua faapea mai isi, o luma atu, e pei o Mati 28, Aperila 2, po o Aperila 19. E oo ane i le senituri lona 18, ua fesootai le aso fanau o Iesu ma masina uma lava o le tausaga! Ae na faapefea la ona iu ina filifilia Tesema 25?

O le toatele o tagata atamamai faapitoa e ioe e faapea, o Tesema 25 o le aso lea na atofa e le Lotu Katoliko e faapea o le aso na fanau ai Iesu. Aisea? Fai mai le New Encyclopædia Britannica: “Atonu o le mafuaaga sili lava, ona sa mananao uluai Kerisiano ina ia faafesootai faatasi le aso lea ma le aso o faafiafiaga faapaupau a Roma e faailogaina ai le ‘aso fanau o le la e lē ma faatoilaloina.’” Ae aisea o le a faafuasei ai lava ona lolo atu Kerisiano o ē na matuā sauāina e tagata faapaupau mo le sili atu i le lua ma le ʻafa senituri i ē na sauāina i latou?

Faaofi Ane i ai Faiga Faapiopio

I le uluai senituri, na lapatai atu ai le aposetolo o Paulo ia Timoteo e faapea, “a o tagata amio leaga ma e taupelopelo” o le a ō atu faaleiloga i to-tonu o le faapotopotoga Kerisiano ma faasese i le toatele. (2 Timoteo 3:13) O lenei aposetasi sili na amata ina ua mavae ona maliliu le au aposetolo. (Galuega 20:29, 30) Ina ua mavae le faaliliuina o Konesetatino i lona fa o senituri, na matuā toatele tagata faapaupau na lolofi atu i se ituaiga o Faa-Kerisiano lea sa taatele i na ona po. O le ā le iuga? Ua taʻua e le tusi Early Christianity and Paganism e faapea: “O se vaega matuā toaitiiti lava o tagata talitonu maelega moni, ua mou atu mai le vaaiga ona o le anoanoai o i latou ua faapea mai o Kerisiano.”

Maeu le moni o upu a Paulo! Sa pei e foliga mai ua folo atoa po ua taotaomia e faiga faapiopio faapaupau le Faa-Kerisiano moni. Ma e leai lava se isi mea ua sili ona aliaʻi mai ai lenei faaleagaina nai lo o le faamanatuina o aso mālōlō.

O le mea moni, e na o le pau lava le faamanatuga na poloaiina Kerisiano ina ia faamanatuina, o le Talisuaga Afiafi a le Alii. (1 Korinito 11:23-26) Ona o faiga ifo i tupua na fefiloi faatasi ma faafiafiaga a tagata Roma, sa lei faia ai se vaega a uluai Kerisiano i na mea. Ona o lenei mafuaaga, na ulagia ai e tagata faapaupau o lona tolu o senituri ia Kerisiano i lo latou faapea atu: “E tou te lē ō atu i faaaliga; tou te lē manatu mamafa i faaaliga mo mataaga a tagata lautele; e tou te teena faigaai a tagata lautele, ma ʻinoʻino i tauvaga paia.” I le isi itu, ua gugutu mai tagata faapaupau e faapea: “Matou te tapuai ma le loto fiafia i atua i tausamiga, ma pese ma taaloga.”

E oo ane i le taulotoaiga o lona fa o senituri, ua lē toe lagona ai se faaseā mai a tagata faapaupau. E faapefea? A o toatele pea Kerisiano pepelo na ofi mālie atu i totonu o le lafu, ua oo ina faateleina ai manatu faaaposetate. O lenei mea na iu ai ina faia ni faaleleiga ma tagata Roma. I le faia o se faamatalaga e uiga i lenei mea, ua taʻua ai e le tusi, The Paganism in Our Christianity e faapea: “Sa avea o se āiāiga maʻoti faa-Kerisiano le faia o faafiafiaga faapaupau ia sa fiafia tele i ai tagata i aganuu, ma faamaonia e avea ma faiga e faafesootai atu i le Faa-Kerisiano.” Ioe, ua matuā tele lava aafiaga leaga a le aposetasi sili. O le naunau o Kerisiano pepelo e talia faamanatuga faapaupau, ua māfua ai ona talia i latou e tagata o le atunuu i lena vaitaimi. E lei umi lava se taimi, ae oo ina tele ai foi ma aso faamanatu faaletausaga a Kerisiano e pei lava o tagata faapaupau. E lē o se mea e ofo ai le avea o le Kirisimasi o se aso e sili ona faamanatuina.

Se Aso Mālōlō Faava-o-Malo

A o salalau atu i Europa se ituaiga o Faa-Kerisiano sa malosi ana taaʻiga i lena taimi, sa faapena ona salalau atu ai ma le faamanatuina o le Kirisimasi. Na talia ai e le Lotu Katoliko le manatu e faapea, o se mea talafeagai le faamamaluina o se aso fiafia e faamanatu ai le fanau mai o Iesu. E tusa ai ma lea manatu, i le 567 T.A., na faia ai e le Komiti o le Aai, o Tours (Council of Tours) se “faalauiloaga e faapea, o le 12 aso mai le Kirisimasi e oo atu i le Epifania (Ianuari 6) e avea ma vaitaimi paia ma aso o faafiafiaga.”—The Catholic Encyclopedia for School and Home.

Sa lei pine ae apo e le Kirisimasi le tele o tafa eseese o tausamiga masani o le seleselega i Europa i mātū. Sa sili ona taatele le faia o faafiafiaga nai lo o le faamaoni i tiute faalotu a o sagai atu le au faafiafia e matuā aai ma soona feinu. Nai lo le tetee atu i amioga leaga, sa matuā fiafia tele i ai le lotu. (Faatusatusa i le Roma 13:13; 1 Peteru 4:3.) I le 601 T.A., na tusi atu ai Pope Kelekolio I ia Mellitus o lana auauna faamisionare i Egelani, e taʻu atu ai ia te ia ina ia “aua neʻi taofia na aso fiafia faapaupau anamua, ae ia faafetaui faatasi ma gaoioiga a le Lotu, tau lava ina sui le pogai o na aso fiafia mai uunaiga faapaupau i le Faa-Kerisiano.” O le lipoti lena a Arthur Weigall, o lē sa avea muamua ma ofisa suesue sili tau i mea mai anamua a le malo o Aikupito.

I le faagasologa o tausaga mai le 500 T.A. e oo atu i le 1500 T.A., na lagona ai e i latou sa mananao ina ia faia ni suiga le manaomia ona faaoo atu so latou leo e tetee ai faasaga i na amioga lē pulea. Na latou aauina atu le tele o poloaiga eseese faasaga i “le faaaogaseseina o taimi fiafia o le Kirisimasi.” Ua taʻua e Dr. Penne Restad i lana tusi o le Christmas in America—A History e faapea: “Ua faamamafa mai e nisi taʻitaʻi lotu e faapea, e manaomia e tagata agasala se taimi e lolo atoatoa atu ai i faalogona masani o amioga lē pulea, tau lava ina ia faia i le igoa o le Faa-Kerisiano.” O lenei mea ua atili ai ona fenuminumiai le Kirisimasi. O lea la, e leai lava se eseesega, auā ua leva ona fefiloi faatasi faiga faapaupau ma le Kirisimasi, o lea sa matuā lē mananao ai lava le toatele o tagata e tuu. Ua faapenei ona faamatalaina e le tusitala o Tristram Coffin: “Sa faia e tagata uma lava mea ia sa masani ona latou faia ma ua manatu faatauvaa ai i talanoaga ua faia faatatau i le puleaina o amioga.”

Ina ua nofoia e tagata Europa ia Amerika, ua leva ona avea le Kirisimasi o se aso mālōlō lauiloa. Ae sa lei talia ai lava le Kirisimasi i kolone o Amerika i Mātū. Sa manatu ai tagata mapolotu o le lotu Porotesano (Puritan) i lenei faamanatuga e faapea, o se mea faapaupau ma na faasaina ai i Massachusetts i le va o le 1659 ma le 1681.

Ina ua tatalaina le sa, na matuā salalau atu ai le faamanatuina o le Kirisimasi i kolone atoa, ae maise lava i le itu i saute o New England. Ae peitai, i le manatu atu i aso mālōlō ua mavae, e lē o se mea e ofo ai ona sa sili atu ona popole nisi tagata i le faafiafiaina o i latou nai lo le faamamaluina o le Alo o le Atua. O se tasi o tu faale-Kirisimasi sa sili ona fai ma faalavelave, o le inumia lea o se meainu feū ua saunia faapitoa. E ulu atu ai ni kegi o tama talavou fia malolosi i fale o tagata mauoloa i tuaoi, ma tāpā faamalosi ni meaʻai ma ni meainu e fia maua fua i ni faiga taufaavalea. A musu la lē e ona le fale, sa masani ona latou fai i ai upu masoā, ma i nisi taimi e faaleagaina ai lona fale.

Sa faateteleina le leaga o le tulaga o mea i vaitausaga mai le 1820 ma agaʻi mai ai. Fai mai le polofesa o Nissenbaum, “o amioga lē pulea i le Kirisimasi,” sa oo ina “avea o se faamataʻu matuā matautia i tagata lautele.” I aai e pei o Niu Ioka ma Filatelefaia, na faafaigaluegaina ai e tagata mauoa ni tamaloloa leoleo e leoleoina o latou fanua. Ua taʻua ai foi e faapea, na faamaopoopoina ai e le aai o Niu Ioka lana uluai vaegaau o leo-leo e tetee atu i vaega faatuputupu leaga i vaitaimi o le Kirisimasi i le tausaga e 1827 ma le 1828!

Toe Faafouina le Kirisimasi

I le senituri lona 19, na oo mai ai ni suiga e matuā uigaese lava i tagata. Na amata ai i lea taimi ona matuā televavave auala o femalagaiga, o felauaiga o oloa, faapea ma faasalalauga, ona ua faia le tele o auala ma auala o nofoaafi. Ona o gaoioiga a faalapotopotoga o tagata faipisinisi, ua maua ai foi e tagata le faitau miliona o galuega, ma ua mafai ai e falegaosimea ona saunia mai le anoanoai o oloa e faatauina atu. Ua aumaia foi e lena tulaga tau tamaoaiga ni faafitauli fou ma le faigata i le sosaiete o tagata, lea na sili atu ona aafia ai le auala na faamanatuina ai le Kirisimasi.

Ua leva ona faaaogā e tagata ia aso mālōlō e fai ma auala e faamalosia ai sootaga faaleaiga, ma ua faapena foi ona faia i le Kirisimasi. I le toe faia o ni fesuiaiga i nisi o tu masani tuai o le Kirisimasi, ua suia ai e i latou na faia ia fesuiaiga le Kirisimasi mai patī po o faigaai soona pisapisaō ma le lē pulea i se aso mālōlō faaleaiga.

O le mea moni, e oo atu i le faaiuiuga o lona 19 o senituri, ua oo ina manatu i le Kirisimasi o se ituaiga aso e avea ma mapusaga mai mafatiaga o le olaga o tagata Amerika i na aso. Fai mai Dr. Restad: “Mai isi aso mālōlō uma lava, sa avea ai aso mālōlō o le Kirisimasi o se auala e sili ona lelei mo le moliooina atu o le lotu ma faalogona faalelotu i le aiga, ma mo le faasaʻoina o amioga lē pulea sa masani ai le toatele, faapea ma mea ua lē taulau ai le lalolagi lautele.” Ua ia faaopoopo mai e faapea: “O le feaveaiina o meaalofa, o uiga o le limafoai, e oo lava i feofoofoaiga faaleuo o faamanuiaga o aso mālōlō, o le teuteuina ma le fiafia o se laau lanumeamata e faatu i le potu mālōlō, pe faatuina mulimuli ane i le fale e faia ai se Aʻoga Aso Sa, sa fesootai ai tagata taitoatasi uma lava o le aiga, o le tasi i le isi, i le lotu, faapea ma tagata o le sosaiete.”

I se auala foi faapena, ua faamanatu ai e le toatele o tagata i aso nei le Kirisimasi e avea o se aso e faamautinoa atu ai lo latou alofa o le tasi i le isi, ma fesoasoani foi e tausia ai le autasi o le aiga. O le mea moni, e lē tatau foi ona faagaloina ia tafa faaleagaga. E faitau miliona tagata ua faamanatuina le Kirisimasi e faamamaluina ai le aso na fanau ai Iesu. E latou te auai i ni sauniga lotu faapitoa, ma faatuina i le aiga se ata o le vaaiga i le Fanau mai o Iesu, po o le ofoina atu o tatalo faafetai ia Iesu lava ia. Ae o le ā le silafaga a le Atua i lenei mataupu? Pe na te faamaonia nei mea? Seʻi manatu i le mea o fai mai ai le Tusi Paia.

“Ia Naunau i le Upu Moni ma le Filemu”

A o iai Iesu i le lalolagi, na ia taʻu atu i ona soo e faapea: “O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni [“upu moni,” NW ].” (Ioane 4:24) Na soifua Iesu e tusa ma na upu. Sa fetalai pea o ia i le upu moni. Sa lelei atoatoa ona ia faataitai atu i lona Tamā, ‘o Ieova le Atua o le upu moni.’—Salamo 31:5; Ioane 14:9.

E ala i le Tusi Paia, ua faamanino mai ai e Ieova e faapea, e inosia e ia faiga faaʻoleʻole uma lava. (Salamo 5:6) E tusa ai la ma lenei manatu, po o se mea lē talafeagai ea ma le lē moni le tele o faiga sese ua fesootai atu ma le faamanatuina o le Kirisimasi? Mo se faataitaiga, seʻi manatu i le tala faafagogo e uiga ia Santa Claus (Le Tamā o le Kirisimasi). Pe sa e taumafai e faamatala atu i se tamaitiiti pe aisea ua manao ai Santa e ui mai i le alaasu o le fale nai lo o le ui mai i le faitotoa, e pei ona talitonuina i le tele o atunuu? Ma e mafai faapefea ona asiasi atu Santa i le faitau miliona o aiga i le na o le po lava e tasi? Ae faapefea ia ʻaila e felelei? Pe a iloa ane e se tamaitiiti e faapea ua olegia o ia i le faatalitonuina e faapea o Santa o se tagata moni, po o le a lē ōia ai lona faatuatuaina o ona mātua?

Ua taʻu manino mai e le Catholic Encyclopedia e faapea: “O tu faapaupau . . . ua taaina ai le Kirisimasi.” O lea, aisea la ua faaauau ai pea e le Lotu Katoliko ma isi lotu o Kerisinetoma ona faamanatuina pea se aso mālōlō e lē faa-Kerisiano ana tu masani? Po ua lē faaalia ai ea i lena mea le tausisia pea o aʻoaʻoga faapaupau?

A o iai i le lalolagi, sa lei uunaia faamalosi e Iesu tagata e tapuai atu ia te ia. Na fetalai Iesu lava ia: “E te ifo atu ia Ieova lou Atua, e na o ia lava e te tuuina atu i ai le auaunaga paia.” (Mataio 4:10, NW ) E faapena foi ina ua uma le faamamaluina faalelagi o Iesu, na taʻu atu e se agelu i le aposetolo o Ioane ina ia “ifo i le Atua,” e faaalia ai e leai lava se mea o suia e faatatau i lenei mataupu. (Faaaliga 19:10) O lenei mea, ua lāgā ai se fesili, Po o le a faamaonia e Iesu nei faiga faaletapuaiga uma e tuuina atu ia te ia i le taimi o le Kirisimasi, ae lē o tuuina atu i lona Tamā?

E manino lava, ua lē avea o se tala lelei mea moni e uiga i le Kirisimasi i ona po nei. Ua matele lava ina avea o se aso mālōlō e toe faamanatuina ai faiga inosia o aso ua mavae. Ona o se loto fuatia ifo lelei la, ua filifilia ai e le faitau miliona o Kerisiano ina ia lē faamanatuina le Kirisimasi. Mo se faaaoaoga, ua faapea mai se tasi talavou e igoa ia Rani e faatatau i le Kirisimasi: “E matuā fiafia lava tagata mo ni aso se lua i le tausaga pe a faapotopoto faatasi le aiga ma ua fiafia tagata uma. Ae o le ā le tāua o lena mea? I le tausaga atoa, e aumai ai e oʻu mātua ni meaalofa mo aʻu!” Fai mai se tasi talavou e 12 ona tausaga: “E leai lava se mea o oʻu misia. Ou te maua pea meaalofa i le tausaga atoa, ae lē na o se aso faapitoa e tasi pe a lagona e tagata ua tatau ona faatauina ni meaalofa.”

Na faamalosiau atu le perofeta o Sakaria i ona uso Isaraelu ina ia “naunau i le upu moni ma le filemu.” (Sakaria 8:19, NW ) Pe afai tatou te pei o Sakaria ma isi tane faamaoni anamua, e “naunau i le upu moni,” pe lē tatau ea ona tatou aloese mai so o se aso faamanatu a lotu sese e lē faamamaluina ai “le Atua soifua ma le ua moni” o Ieova?—1 Tesalonia 1:9.

[Ata i le itulau 7]

“E leai se mea o oʻu misia. Ou te maua pea meaalofa i le tausaga atoa”