‘Po ua Tonu Mai ea Lou Loto ia te Au?’

“Ia ta o ma aʻu, e te iloa ai loʻu maelega ia Ieova.”—2 TUPU 10:16.

1, 2. (a) Na faapefea ona faateteleina le leaga o le tulaga faalelotu o Isaraelu? (e) I le 905 T.L.M., o ā suiga mataina sa lei pine ona faatino lea i Isaraelu?

SA AVEA le tausaga e 905 T.L.M. o se taimi o suiga tetele i Isaraelu. I le toetoe lava 100 tausaga muamua atu, na faapogaia ai e Ieova le malo autasi o Isaraelu ina ia vaeluaina ona o faiga faaaposetasi a Solomona. (1 Tupu 11:9-13) O le taimi lea o loo pulea ai Iuta, le malo i saute e Reopoamo le atalii o Solomona, a o Isarelu, le malo i mātū sa pulea e le tupu o Ierepoamo, o ia o le sā Efaraima. Ma le faanoanoa lava, sa iai se amataga sili ona lē manuia o le malo i mātū. Sa lē manao Ierepoamo e ō atu ona tagatānuu i le malo i saute i le nofoaga o loo iai le malumalu e tapuai ai, ona o lona popole ina neʻi latou mananao e toe foi atu i le aiga o Tavita. O lea na ia amataina ai se tapuaiga i le tamai povi i totonu o Isaraelu, ma faavae se faiga faaifo i tupua lea na iai pea i le talafaasolopito atoa o le malo i mātū.—1 Tupu 12:26-33.

² Na faatetele le leaga o tulaga o mea ina ua avea Aapo, le atalii o Omeri, ma tupu. Sa uunaia malosi e lana avā mai nuu ese, o Iesepela, le tapuaiga ia Paala, ma fasiotia perofeta a Ieova. E ui lava i lapataiga tuusaʻo a le perofeta o Elia, ae sa lei faia e Aapo se gaoioiga e taofia ai lana avā. Peitai, i le 905 T.L.M., na oti ai Aapo, ona pule ai lea o lona atalii o Ioramo. Ua oo nei i le taimi mo le faamamāina o le nuu. O Elisaia, lē na sosoo ane ina ua mavae Elia, sa ia logo atu i le taʻitaʻiʻau o Ieu e faapea, ua faauuina o ia e Ieova ina ia sosoo ane e avea ma tupu o Isaraelu. O le ā lona tofiga? Ia faaumatia le aiga agasala o Aapo ma taui atu le toto o perofeta lea na faamasaaina e Iesepela!—2 Tupu 9:1-10.

3, 4. Sa faapefea ona faaalia e Ionatapa o loo ‘tonu atu lona loto i le loto o Ieu’?

³ I le usitaia o le poloaiga a le Atua, sa fasiotia ai e Ieu ia Iesepela amioleaga, ona sosoo lea ma lona oo atu e faamamāina Isaraelu e ala i le faaumatia o le aiga o Aapo. (2 Tupu 9:15–10:14, 17) Ona la fetaiai lea ma sē na lagolago ane ia te ia. “Ona iloa ai lea e ia o Ionatapa le atalii o Rakapa, ua faafetaiai mai ia te ia. Ona alofa atu ai lea ia te ia, ua fai atu i ai, Po ua tonu mai ea lou loto, faapei o loʻu loto i lou loto? Ona fai mai ai lea o Ionatapa, O lea lava. Afai ua faapea, au mai ia lou lima. Ona au mai ai lea e ia o lona lima; ona ia avae ai lea o ia ia la faatasi i le kariota. Ona fai atu ai lea o ia, Ia ta o ma aʻu, e te iloa ai loʻu maelega ia Ieova. Ua latou fai atu ia te ia e tietie i lona kariota.”—2 Tupu 10:15, 16.

⁴ O Ionatapa sa lē o se tagata Isaraelu. E ui i lea, ina ia ogatusa ma lona igoa (o le uiga “E Finagalo Malie Mai Ieova,” “E Maualuga Ieova,” pe “E Agaalofa Ieova”) na avea ai o ia o sē e tapuai ia Ieova. (Ieremia 35:6) E mautinoa lava, sa iai sona naunautai uigaese i le vaai atu i le ‘maelega o Ieu ia Ieova.’ E faapefea ona tatou iloa? Sa lei faafuasei ona faia le la feiloaiga ma le tupu faauuina o Isaraelu. Sa agaʻi mai Ionatapa e “faafetaiai mai ia te ia,” ma o le taimi lena ua maeʻa ona fasiotia e Ieu Iesepela ma isi o le aiga o Aapo. Sa iloa e Ionatapa le mea o loo tupu ina ua ia talia le valaaulia a Ieu ina ia oso aʻe i luga o lana kariota. E mautinoa lava sa iai o ia i le itu a Ieu—ma le itu a Ieova—i lenei feteenaiga i le va o le tapuaiga sese ma le tapuaiga moni.

Le Ieu i Ona Po Nei ma le Ionatapa i Ona Po Nei

5. (a) O ā suiga o le a lē pine ona iai lea mo tagata uma lava? (e) O ai le Ieu Sili, ma o ai o loo fai ma ona sui i le lalolagi?

⁵ I aso nei, o le a lē pine ona iai lea o se suiga tele mo tagata uma lava e pei foi ona suia mea mo Isaraelu i tuā i le 905 T.L.M. Ua latalata mai nei le taimi o le a faamamāina ai e Ieova le lalo-lagi mai mea leaga uma ona o aafiaga a Satani, e aofia ai ma lotu sese. O ai le Ieu i ona po nei? E leai lava se isi nai lo Iesu Keriso, o lē ua faasino atu i ai upu faavaloaga: “Ina fusi ia lau pelu i lou vae, o oe na le toa, o lou viiga ma lou mamalu. O lou mamalu foi ia e tietie ai i le manu ma le manuia, ona o le upu moni, ma le agamalu, ma le amiotonu.” (Salamo 45:3, 4) O loo fai ma sui o Iesu i le lalolagi “le Isaraelu [a] le Atua,” o Kerisiano faauuina “o e ua tausi i poloaiga a le Atua, ma ua taofi le mau ia Iesu.” (Kalatia 6:16; Faaaliga 12:17) Talu mai le 1922, ua lapatai atu ai ma le lē fefe e nei uso faauuina o Iesu le oo mai o gaoioiga faafaamasinoga a Ieova.—Isaia 61:1, 2; Faaaliga 8:7–9:21; 16:2-21.

6. O ai i latou ua ō mai, mai atunuu eseese e lago-lago atu i Kerisiano faauuina, ma i se gagana faafaatusa, ua faapefea ona latou ulu atu i le kariota a le Ieu Sili?

⁶ Ua lē na o Kerisiano faauuina. E pei lava ona sa agaʻi atu Ionatapa e faafetaiai ia Ieu, ua faapena foi ona ō mai le toatele o tagata mai atunuu eseese e lagolago atu ia Iesu, le Ieu Sili, ma ona sui o loo iai i le lalolagi, i la latou tauiviga mo le tapuaiga moni. (Sakaria 8:23) I le taʻua o i latou e Iesu o “isi [ana] mamoe,” na mataulia ai i le 1932 le avea o i latou o se Ionatapa faaonaponei e talitutusa i le Ionatapa o aso anamua, ma ua valaaulia i latou e ‘oso aʻe i le kariota’ a le Ieu i ona po nei. (Ioane 10:16) Faapefea? E ala i le “tausi i poloaiga a le Atua” ma auai faatasi ma soo faauuina i ‘le galuega o le molimau atu ia Iesu.’ I aso nei, ua aofia ai i lenei galuega le talaʻiina o le tala lelei o le Malo ua faavaeina o le Atua, i lalo o le pulega a le Tupu o Iesu. (Mareko 13:10) I le 1935 na iloa ai, o nei “Ionatapa” o le “motu o tagata e toatele” lea o loo taʻua i le Faaaliga 7:9-17.

7. Ua faapefea ona faaalia e Kerisiano i aso nei o loo ‘tonu atu pea o latou loto’ i le loto o Iesu?

⁷ Talu mai tausaga e amata mai le 1930, ua faamaonia ai ma le loto tetele e le motu o tagata e toatele ma o latou uso faauuina lo latou lagolagoina o le tapuaiga moni. I nisi o atunuu i Europa i Sasaʻe ma Europa i Sisifo, i atunuu Asia, ma Aferika, e toatele i latou ua maliliu ona o lo latou faatuatua. (Luka 9:23, 24) I isi atunuu, ua faafalepuipuiina i latou, ua osofaia e ni potopotoga o tagata, po ua faia i ai nisi sauāga. (2 Timoteo 3:12) Maeu se talaaga o le faatuatua ua latou faia! Ma ua faaalia e le Lipoti o le Tausaga Faaleauaunaga o le 1997 e faapea, o loo latou maumauai pea e auauna atu i le Atua, e tusa lava po o ā āuga e oo i ai. O loo ‘tonu atu pea o latou loto’ i le loto o Iesu. Sa faamaonia mai lenei mea a o faagasolo le 1997, ina ua faaaluina e tagata talaʻi o le Malo e toʻa 5,599,931, e toetoe o i latou uma o “Ionatapa,” se aofaiga o itula e 1,179,735,841 i le galuega o le molimau atu ia Iesu.

O Loo Talaʻi Pea ma le Maelega

8. Ua faapefea ona faaalia e Molimau a Ieova lo latou maelega mo le tapuaiga moni?

⁸ Sa lauiloa Ieu i le saoasoa o le aveina o lana kariota—o se faamaoniga o lona naunau maelega ina ia faataunuu lona tiute. (2 Tupu 9:20) O Iesu, le Ieu Sili, o loo faamatalaina faapea ua ʻʻaina lava’ i le maelega. (Salamo 69:9) E lē o se mea la e ofo ai, ua faapena foi ona matauina Kerisiano moni i aso nei i lo latou maelega. I to-tonu o le faapotopotoga faapea foi i le lautele, o loo latou “talaʻi atu [ai] le upu, . . . [i le] faamalosi i ona aso e taugalemu ai, ma ona aso e le taugalemu ai.” (2 Timoteo 4:2) Sa sili ona faamaonia mai lo latou maelega i le amatamataga lava o le 1997 ina ua mavae ona talanoaina se mataupu i La Tatou Faiva o le Malo lea na faalaeiauina ai le toatele e mafai ai, ina ia faia se sao i le auaunaga faapaeonia lagolago. I atunuu taitasi, sa faatulaga se sini o le aofai o ni paeonia lagolago e mafaia. O le ā le tali mai? Na matuā mataina! E tele lālā e sili atu a latou aofaiga na maua nai lo le numera sa latou sini i ai. I Ekutoa sa faatū le sini mo le 4,000, peitai ia Mati na lipotia mai ai le toʻa 6,936 o paeonia lagolago. Sa lipotia mai i Iapani le aofaiga e 104,215 i totonu o lena tolu masina. I Zambia, lea sa sini mo le 6,000, e toʻa 6,414 paeonia lagolago sa lipotia mai ai ia Mati; 6,532 ia Aperila; ma le 7,695 ia Me. I le lalolagi aoao, o le tumutumuga pe a tuu faatasi le aofai o paeonia lagolago ma paeonia sauatoa, e 1,110,251, o se faatelega e 34.2 pasene e sili atu ai nai lo le 1996!

9. E lē gata i le galuega mai lea fale i lea fale, ae o ā isi auala o loo maua ai e Molimau a Ieova tagata ina ia taʻu atu le tala lelei ia i latou?

⁹ Na taʻu atu e le aposetolo o Paulo i toeaina i Efeso: “[Sa ou] lei natia se mea aoga, ina neʻi le faailoa atu ma aʻoaʻo atu ia te outou i luma o le nuu, atoa foi ma lea fale ma lea fale.” (Galuega 20:20) Ua faaaʻoaʻo atu Molimau a Ieova i aso nei i le faaaoaoga a Paulo ma latou talaʻia ma le maelega le tala lelei mai lea fale i lea fale. Peitai, atonu e lē faigofie ona maua tagata i o latou aiga. O lea, ua faalaeiauina ai e “le auauna faamaoni ma le mafaufau” tagata talaʻi o le Malo ina ia oo atu i tagata i nofoaga o a latou pisinisi, i magāala, i matafaga, i paka mo tafaoga a le lautele—i so o se mea lava e mafai ona maua i ai tagata. (Mataio 24:45-47) Ua matuā sili ona lelei iuga ua maua mai ai.

10, 11. Ua faapefea i tagata talaʻi o ni atunuu se lua ona latou faaalia mai se uiga lelei o le tausolo-mua i le sailia o ē naunau fiafia, o ē e lē masani ona maua atu i o latou fale?

¹⁰ I Copenhagen, i Tenemaka, sa molimau atu ai se vaega toaitiiti o tagata talaʻi i magaala i tala atu o nofoaga e faatali ai nofoaafi. Mai ia Ianuari e oo atu ia Iuni, na latou ofoina ai mekasini e 4,733, sa faia ni a latou talanoaga mananaia ma tagata, ma le tele o toe asiga na faia. E tele ni tagata talaʻi i lena atunuu ua latou amataina ni ālamekasini i nofoaga o pisinisi. E iai se taulaga e iai sa latou maketi tele lava e faia i Aso Faraile taitasi, ma e faitau afe tagata e asiasi ane i ai. Ona fuafua lea e le faapotopotoga se molimau atu e lē aunoa i le maketi. I se tasi vaipanoa, ua asiasi atu ai i aʻoga ma se afifi o loo iai ni lomiga ua talafeagai lelei mo faiaʻoga.

¹¹ I Hawaii ua faia ai foi ni taumafaiga ina ia oo atu ia i latou e lē o mafai ona maua i o latou fale. O oganuu faapitoa e aofia ai nofoaga faitele (magaala, pāka mo tafaoga, nofoaga e pāka ai taavale, ma nofoaga faatali pasi), o vaipanoa i le taulaga, o nofoaga o loo tuufaatasia ai faleoloa, o malaevaalele, le molimau atu i telefoni, o auala o femalagaaiga a le lautele (talaʻi atu i totonu o pasi), ma nofoaga nofotumau o kolisi. O loo iai se faaeteetega ina ia mautinoa o loo talafeagai le toatele o Molimau e tofia atu i oganuu taitasi, ma o i latou foi ua tofia ua uma ona toleniina lelei i latou. E iai foi ni taumafaiga ua maopoopo lelei faapena o loo lipotia mai i le tele o atunuu. O le iuga, ua faafesootaia atu ai tagata loto fiafia o ē atonu e lē tāitai lava ona mauaina i le faiva mai lea fale i lea fale.

O Loo Tumau Mausalī Pea

12, 13. (a) O le ā le togafiti na faaaogā e Satani e faasagatau atu ai i Molimau a Ieova i le faagasologa o le 1997? (e) I se tasi atunuu, o le ā le auala sa iu ai ina maua mai iuga tuufaafeagai o se faamatalaga taufaasese na faia?

¹² I nisi o atunuu i le 1997, sa avea ai Molimau a Ieova ma taulaiga o faamatalaga faasalalau taufaaleaga matautia, ma le lē saʻo sa uunaia ma le fuafuaga na manino mai, ina ia faia ni gaoioiga faaletulafono e faasagatau atu ai ia i latou. Peitai sa latou tutū mausalī pea! (Salamo 112:7, 8) Sa latou manatua le tatalo a le faisalamo: “Ua fatu fua e [ē] ua faamaualuga le tala pepelo ia te au; o aʻu, ou te anaana i au feau ma loʻu loto atoa.” (Salamo 119:69) O na pepelo faalauaitele ua na o se faamaoniga o le inosia o Kerisiano moni e pei ona sa valoia mai e Iesu. (Mataio 24:9) Ma o nisi taimi ua na ona iu atu i le tuufaafeagai o a latou faufauga. Sa faitau se tamaloa i Peleseuma i se mataupu taufaaleaga e faatatau i Molimau a Ieova i se tasi o nusipepa lauiloa e maua i aso taitasi. Ona o lona teʻi i faamatalaga taufaaleaga, na ia auai atu ai i se sauniga i se Maota o le Malo i le Aso Sa na sosoo ai. Sa ia fuafua e faia sana suesuega faale-Tusi Paia ma Molimau ma na vave lava ona ia agaigai i luma. Muamua atu, sa avea lenei tamaloa o se tasi sa auai atu i se kegi. O lana suesuega faale-Tusi Paia na fesoasoani ia te ia e faasaʻoina ai lona olaga, o se mea sa mataina e tagata latou te iloa o ia. E mautinoa lava, sa lei mafaufauina e lē na ia tusia le mataupu taufaaleaga, le iai o se iuga faapea!

¹³ E iai nisi tagata loto faamaoni i Peleseuma ua latou tāutala tetee atu i ia manatu faasalalau taufaasese. O se tasi o i latou na o se tamaloa na avea muamua ma palemia o lē na tautino mai lona matuā mataina ma le fiafia o mea ua faataulauina e Molimau a Ieova. Ma na tusi mai se tasi o sui o le fono faitulafono: “I le tuufaafeagai i faamatalaga taufaaleaga o loo salalau atu i nisi o taimi, e lē o foliga mai lava [Molimau a Ieova] ia te au faapea o i latou o se faamataʻuga i le Faiga Malo. O i latou o ni tagatānuu e naunau i le filemu, e galulue faamaoni, ma faaaloalo i ē o loo iai le pule.” Ua matuā atamai la, upu a le aposetolo o Peteru: “Ia lelei a outou amio i luma o nuu ese, o le mea latou te fai upu leaga ai ia te outou, peiseai o tagata amio leaga outou, latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai.”—1 Peteru 2:12.

Se Faamanatuga Mataina

14. O ā nisi o lipoti fiafia o aofia sa auai i Faamanatuga i le 1997?

¹⁴ Ua talafeagai mo i latou o ē o loo molimau ia Iesu ona latou manatu i le Faamanatuga o lona maliu o se mea e avea ma faatumutumuga o lo latou tausaga. I le 1997, e toʻa 14,322,226 na auai ia Mati 23 ina ia faamanatuina lena sauniga. E silia lena ma le 1,400,000 e sili atu ai nai lo le aofai i le 1996. (Luka 22:14-20) I le tele o atunuu, sa matuā sili mamao atu le aofai o ē na auai nai lo le aofai o a latou tagata talaʻi o le Malo, e faaalia mai ai ni faamoemoega lelei mo se faatelega i le lumanai. Mo se faaaoaoga, i Haiti, sa vaaia ai i le 1997 se tumutumuga e 10,621 o le autalaʻi, ae 67,259 na auai i le Faamanatuga. E mafai ona e tilofaia le lipoti faaletausaga i le itulau e 18 e oo atu i le 21 ma iloa ai pe fia isi atunuu sa iai foi ni a latou aofia tetele faapena pe a faatusatusa atu i le aofai o a latou autalaʻi.

15. I nisi atunuu, na faapefea ona foia e o tatou uso ni faafitauli matuia ina ia mafai ona latou faamanatuina le Faamanatuga?

¹⁵ Sa lē faigofie mo nisi le auai atu i le Faamanatuga. I Alapania, sa iai se vavao na faia i le 7:00 i le afiafi talu ai fevesiaiga i le va o tagata lava o le atunuu. E 115 ni vaega laiti na vaevaeina i ai i le atunuu, ma amata a latou Faamanatuga i le 5:45 i le afiafi. Sa goto le la i le 6:08 i le afiafi, e faailoga ai le amataga o Nisani 14. Sa faasolo le tufaina o le areto ma le uaina i le tusa o le 6:15 i le afiafi. I le tele o vaega sa faia la latou tatalo faaiu i le 6:30 i le afiafi, ona faavave loa lea ona toe foi atu le aofia i o latou aiga a o lei ta le vavao. Peitai, sa iai pea le aofia e 3,154 i le Faamanatuga, e faatusatusa atu i le tumutumuga o le autalaʻi e 1,090. I se tasi o atunuu Aferika, na avea fevesiaiga i le va o tagata lava o le atunuu ma itu na lē mafai ai ona faaaogā le Maota o le Malo, o lea sa tonu ai i toeaina e toalua e feiloai atu i le fale o le toeaina lona tolu ina ia latou fuafuaina le faia o le Faamanatuga i ni vaega toalaiti. Ina ia mafai ona la oo atu i le fale, sa tatau ai i toeaina nei e toalua ona āsa se alavai. Peitai, sa iai se fetauaiga i lena vaipanoa, ma sa tafana ai e fitafita so o se tasi lava o loo taumafai e āsa le alavai. Sa matuā tamoe saosaoa atu le tasi toeaina ma āsa le alavai e aunoa ma se afaina. O le toeaina lona lua na āsa atu ina ua lagonaina le pa o se fana. Sa faapaʻū loa i lalo i le palapala ma totolo atu ma le saogalemu a o felelei solo pulufana i luga aʻe o lona ulu. Sa taulau manuia le fono a toeaina, ma sa faataunuuina foi manaoga o le faapotopotoga.

“Mai Atu Nuu Uma, ma Aiga, . . . ma Gagana Eseese”

16. O ā fuafuaga ua faia e le vasega o le auauna faamaoni ma le mafaufau ina ia mafai ona faasalalau atu le tala lelei i isi tamai vaega e ese la latou gagana?

¹⁶ Na taʻua e le aposetolo o Ioane faapea o le a ō mai le motu o tagata e toatele “mai atu nuu uma, ma aiga, ma nuu, ma gagana eseese.” (Faaaliga 7:9) O lea, ua fuafua ai e le Vaega Pule ina ia mafai ona faateleina pea ni gagana e lomia i ai lomiga—e aofia ai gagana a ituaiga o tagata o loo nonofo mamao ese ma isi vaega toalaiti o tagata. Mo se faaaoaoga, i Mozambique, na tatalaina ai le sāvali Olaga i se Lalolagi Fou Filemu i nisi gagana faaopoopo se lima. I Nicaragua, sa faaliliuina ai le polosiua Olioli i Le Ola i Le Lalolagi e Faavavau! i le gagana Miskito—o se uluai lomiga lea a le Sosaiete o le Olo Matamata i lena gagana. E toatele tagata Initia Miskito sa latou taliaina ma le olioli le polosiua ina ua vaaia ua iai se lomiga i la latou lava gagana. I le 1997, na faamaonia ai e le Sosaiete le lomiaina o lomiga i isi gagana e 25, ma na lolomiina ai le sili atu i le piliona mekasini.

17. O le ā le vaega e ese la latou gagana sa mauaina se fesoasoani i Korea, ma ua faapefea i lipine vitiō ona fesoasoani tele i lenei vaega o tagata?

¹⁷ Sa maua foi e se vaega i Korea o loo ese la latou gagana se fesoasoani. O le tausaga e 1997 na vaaia ai le uluai tauaofiaga ua faia i le gagana Korea mo tagata gūgū. E 15 faapotopotoga i Korea e faaaogā ai le gagana mo tagata gūgū faatasi ai ma se autalaʻi e 543, peitai e 1,174 na auai atu i le tauaofiaga, ma le toʻa 21 na papatisoina. Ina ia fesoasoani i ē logonoa e lē o faigofie ona latou malamalama i gagana tautala po o gagana o loo tusitusia, ua saunia ai lomiga i lipine vitiō i gagana eseese e 13 mo tagata gūgū. O lea, ua maua ai e ē logonoa se fesoasoani e “faitau” ma oo foi ina latou suesueina le tala lelei, ma maua ai ni iuga lelei. I le taimi muamua i le Iunaite Setete, e oo atu lava i le lima tausaga o tau agaigai i luma se tagata mo le papatisoga. I le taimi nei, ona o le tele o vitiō ua pueina i le Gagana Amerika mo Tagata Gūgū, ua faaitiitia ai mo nisi tagata logonoa lena umi, i le tusa pe na o le tausaga.

‘O Loo Tumau Pea i le Kariota’

18. Ina ua uma le la feiloaiga ma Ionatapa, o le ā na agaʻi atu loa Ieu e fai?

¹⁸ I tuā i le 905 T.L.M., ina ua aufaatasi atu ia te ia Ionatapa, sa agaʻi atu loa Ieu e faaumatia tapuaiga sese. Sa ia aauina atu se valaaulia i tagata tapuai uma a Paala: “Talaʻi ia o se nunu ia Paala.” Ona ia aauina atu lea o le feau i le nuu atoa ina ia faamautinoa ua maua uma tagata e tapuai ia Paala. A o lolofi atu motu o tagata i le malumalu sili o le atua sese, sa faamautinoa e Ieu e lē o iai iina se tagata tapuai a Ieova. Mulimuli ane, ona fasiotia loa lea e Ieu ma lana autau tagata uma sa tapuai ia Paala. “O lenei, ua faaumatia Paala e Ieu i Isaraelu.”—2 Tupu 10:20-28.

19. I le vaai atu i mea o loo i le lumanai mo le fanau a tagata, o le ā le agaga e ao ona tatou faaalia, ma o le ā le tiute e tatau ona tatou naunautai e auai atu i ai?

¹⁹ I aso nei, ua matuā lalata mai lava le faamasinoga faaiu o lotu sese uma. E ala i le taitaiga faaagelu, o loo folafola atu ai e Kerisiano le tala lelei i tagata uma, i le faalaeiauina o i latou ina ia matataʻu i le Atua ma ia vavae ese mai lotu sese. (Faaaliga 14:6-8; 18:2, 4) Ua faalaeiauina ē agamalu ina ia gauai atu i le Malo o le Atua i le pulega a le Tupu tofia a Ieova, o Iesu Keriso. (Faaaliga 12:10) I lenei taimi e faagaeetia ai, e lē tatau ona tatou faatagaina le faavaivaia o lo tatou maelega a o tatou mausalī mo le tapuaiga moni.

20.O le ā o le a e filifili maumauai e fai a o faagasolo le tausaga faaleauaunaga o le 1998?

²⁰ I se tasi taimi, a o feagai le tupu o Tavita ma omiga matuitui, na ia tatalo ai: “Le Atua e, ua maumauai loʻu loto, ua maumauai lava loʻu loto. Ou te pese lava, ma ou fai pesega. Ieova e, e ao ona ou vivii atu ia te oe i luma o tagata.” (Salamo 57:7, 9, NW) Tau ina ia maumauai foi o tatou loto. I le faagasologa o le tausaga faaleauaunaga o le 1997, a o fesagai ma le tele o faigata, sa siitia aʻe ai se alaga tele o viiga i le mamalu o Ieova le Atua. Tau ina ia lagonaina foi se alaga faapena, pe sili atu, a o faagasolo lenei tausaga faaleauaunaga. Ma talosia ia faaauau ona faia faapea e tusa lava po o ā mea o loo taumafai Satani e faavaivaia ai i tatou pe tetee mai ai ia i tatou. Ona tatou faaalia atu ai lea o loo tonu atu pea o tatou loto i le Ieu Sili, o Iesu Keriso, ma o le a tatou tali atu ma o tatou loto atoa i le timaiga faagaeeina: “Ina fiafia ia ia Ieova, ma olioli o outou o e amiotonu; ina alalaga ia ma le fiafia o outou uma o e ua faamaoni o outou loto.”—Salamo 32:11.

Pe Mafai Ona E Faamatala?

◻ O ā suiga na faia i Isaraelu i le 905 T.L.M.?

◻ O ai le Ieu i ona po nei, ma ua faapefea ona faaalia e le “motu o tagata e toatele” o loo ‘tonu atu o latou loto’ i lona loto?

◻ O ā numera faamaumauina mai le lipoti faaletausaga e faataitaia mai ai le maelega sa faaalia e Molimau a Ieova a o faagasolo le tausaga faaleauaunaga o le 1997?

◻ Po o ā lava mea e faia e Satani e faasagatau mai ai ia i tatou, ae o le ā le agaga tatou te faaalia a o faagasolo le tausaga faaleauaunaga o le 1998?

[Siata i le itulau 18-21]

LIPOTI O LE TAUSAGA FAALEAUAUNAGA O LE 1997 A MOLIMAU A IEOVA I LE LALOLAGI AOAO

(Tagaʻi i le lomiga mo le ata atoa)

[Ata i le itulau 15]

O le aofia mataina sa iai i le Faamanatuga ua faaalia mai ai ni faamoemoega lelei mo se faatelega i le lumanai

[Ata i le itulau 16]

E pei ona sa lagolago atu Ionatapa ia Ieu, ua faapena foi i le “motu o tagata e toatele” ona latou lagolago atu i le Ieu Sili, o Iesu Keriso, ma ona uso faauuina